Suid-Afrikaanse nuus, d.w.s. sowel nuus uit Suid-Afrika én Suider-Afrika.
In die Grahamstadse Hooggeregshof het ‘n bejaarde vrou, Thelma Lily Petzer, getuig hoe haar vriend Stephanus Jacobus Williams in hul huis vermoor is. Die twee aangeklaagdes, Roro Mntwaphi en Mbulelo Kula, pleit onskuldig op die moordklag.
Volgens Petzer het die twee mans haar aangerand en ook probeer om haar ringe van haar vingers af te byt. Een aangeklaagde het die ander vir ‘n mes gevra sodat hy Petzer se keel kon afsny. Dit het egter nie gebeur nie en hulle het haar bloeiend agtergelaat.
Petzer het agterna die polisie gevra om haar vriend se lyk te sien. By hierdie punt het sy in die getuiebank ineengestort en begin huil.
‘n Segsman vir die Suid-Afrikaanse departement van Verdediging, Temba Gadebe, het gister ontken dat die An Yue Jiang in Suid-Afrikaanse gebiedswaters is.
Hy het gereageer op ‘n verklaring van die Suid-Afrikaanse Sentrum vir Litigasie dat die Chinese skip op die oomblik in Suid-Afrika se gebiedswaters verkeer in oortreding van ‘n Durbanse Hooggeregshofbevel.
Gadebe het gesê hulle hou die skip dop en dat hulle seker is dat die skip nie in Suid-Afrika se gebiedswaters is nie. Hy kon nie sê waar die skip tans is nie.
Die An Yue Jiang het Vrydagnag onmiddellik anker gelig nadat die Durbanse Hof beveel het dat die vrag afgelaai word onder toesig van die balju.
Die Bush-administrasie het intussen ingetree om met regerings in Suidelike Afrika oorleg te pleeg sodat die skip nie die vrag ter plaatse kan aflaai nie.
Die pas verkose leier van die ANC-jeugliga, Julius Malema, het in sy eerste brief as president van dié organisasie uitgevaar teen diegene wat hulle aan onbehoorlike gedrag skuldig gemaak het by die liga se onlangse kongres in Bloemfontein.
Skurke en skorriemorrie wat glo dat hulle die organisasie kan afpers deur hulle aanstootlike gedrag sal ongenaakbaar behandel word, het hy gesê.
Onder andere het die Times-koerant ‘n voorbladfoto geplaas van ‘n afgevaardigde wat sy broek voor die kamera by die konferensie aftrek. Volgens Malema pas sulke gedrag nie by die kamerade nie.
Eerste Nasionale Bank se eiendomsbarometer toon dat die persentasie van eiendomsverkopers wat emigreer gestyg het. In die eerste kwartaal vanjaar was 12 persent van alle verkopers van plan om te emigreer, teenoor nege persent wat in die vierde kwartaal van verlede jaar besig was om te emigreer.
Die toename in emigrasie vind veral in die duurder buurte plaas waar huise meer as R2,5 mijoen werd is. Nie minder nie as 18% van alle verkopers in dié kategorie is van plan om te emigreer. Trouens, emigrasie is die enkele grootste rede waarom mense in die luuksemark hul huise verkoop.
Ook eiendomsagente bevestig dat daar ‘n onrusbarende toename in die aantal mense is wat van hul eiendomme weens emigrasieplanne ontslae wil raak. Volgens die voorsitter van Seeff, mnr. Samuel Seeff, wil 25% tot 30% van huidige verkopers van huise emigreer. Volgens hom gaan nie alle eiendomme verkoop nie en sal ‘n hele aantal mense dus verplig wees om in die land aan te bly.
Die opposisie het ‘n lys met besonderhede vrygestel van sy ondersteuners wat deur die regerende party beseer en gedood is sedert die verkiesing einde verlede maand.
Die menseregte-organisasie Human Rights Watch in New York het Saterdag gesê dat foltering en geweld in Zimbabwe toeneem. Die regerende party is besig om martelkampe op te rig, om mense te slaan en te martel wat daarvan verdink word dat hulle vir die MDC in verlede maand se verkiesing gestem het.
McBride het al die aantygings teen hom ontken. Hy het gesê dat hy wel wapens gesmokkel het tydens die gewapende stryd, maar dat hy nie meer betrokke is by sulke aktiwiteite nie.
Die Nasionale Vervolgingsgesag het bevestig dat die18 dossiere van die McBride-saak wel deel was van die hofrekords wat Sondagaand by die Johannesburgse Hooggeregshof in ‘n militêre styl rooftog gebuit is.
Bullard is verlede week afgedank deur redakteur Mondli Makhanya omdat swart lesers gedink het dat sy siening van prekoloniale Afrika rassisties is.
Hy sê nou dat hy die grense te veel getoets het en dat hy enorme respek voel vir die redakteur wat hom afgedank het.
Hy meen verder dat hy die vriendskap van soveel stille vriende verraai het, en dit was onvergeeflik, self vir ‘n ikonoklas soos hy.
Die Suid-Afrikaanse regering sal die uitvoer van ‘n groot besending Chinese wapens en ammunisie wat in Durban wag na die Zimbabwiese Weermag moet goedkeur, omdat hulle wetlik daartoe verplig is.
‘n Firma van Krygkor, AB Logistics, is gevra om die vervoer van die wapens na Zimbabwe te behartig.
AB Logistics is van die nodige veiligheidsklaring voorsien, maar dit hang van die Suid-Afrikaanse regering af of die vrag gestuur sal word aldan nie.
Pretoria het dit duidelik gestel dat daar geen VN of Afrika-Unie embargo op die lewering van wapens na Zimbabwe bestaan nie. Ook was daar geen kabinetsbeslisseing soos in die geval van Israel, oor die aangeleentheid nie.
Die Demokratiese Alliansie het gister bekendgemaak dat dringende ingryping nodig is om die agteruitgang in Suid-Afrika se paaie te stuit.
Die party het gereageer op die ANC-minister van vervoer, Jeff Radebe, se verklaring dat die agterstand in instandhouding van provinsiale paaie R72 miljard bereik het en dat slegs R5,2 miljard vir die 2008/2009-finansiële jaar toegeken is.
Volgens Radebe word die Gautengprovinsie die ergste geraak, waar die instandhoudingsagterstand reeds R18,3 miljard bereik het. Slegs R960 miljoen is aan die onderhoud van paaie in Gauteng vir die huidige belastingjaar toegeken.
Die meeste paaie se leeftyd is beperk tot 20 jaar. Twee-en-tagtig persent van paaie is reeds ouer as dit.
‘n Navorser van die Raad op Geesteswetenskaplike Navorsing, Ben Roberts, het bevind dat openbare vertroue in 2007 ‘n laagtepunt onder die bevolking van Suid-Afrika bereik het.
Vertroue in plaaslike regering en die parlement het met twintig persent afgeneem. Volgens Roberts is dit rede tot kommer.
Faktore waarop mense reageer is skandale en getuienis van selfverryking deur amptenare en politici, asook armoede en misdaad wat nie aangespreek word nie.
Omtrent negentig persent van die publiek is ook gekant teen aborsie. Terselfdertyd is die man op straat ten gunste van die doodstraf weens die hoë misdaadvlakke.
Oorlopery deur politici he took heelwat gedoen om die kiesers se vertroue in hul leiers te skend.
Volgens ‘n woordvoerder van die Suid-Afrikaanse Militêre Intelligensie, word militêre magte van Sjina, Brittanje en Australië tans in buurlande ontplooi. Ook Suid-Afrikaanse magte by Lohatla in die Noord-Kaap is op ‘n gereedheidsgrondslag geplaas en met skerppuntammunisie toegerus.
Die spil waarom die magsopbou draai, is Zimbabwe waar Robert Mugabe aan die mag bly vasklou. Sjinese soldate in uniform is digby die Mosambiekse grens opgemerk. Intussen het Suid-Afrika die vrag wapens in die Durbanse hawe wat vir Zimbabwe bestem is, goedgekeur en sal die wapens na Harare vervoer word.
Die Britse en Australiese soldate bevind hulle in Botswana. Die VSA beskik reeds jare lank oor ‘n groot basis en aanloopbaan in Botswana wat moontlik gebruik kan word om Britse magte hierheen te vervoer.
Intussen is geen verklarings nog van die Sjinese, Britse of Australiese regerings ontvang oor hul militêre bedrywigheid in Suider-Afrika nie.
Sedert 1990 het Suid-Afrika se kindersterftesyfer gestyg en die land bevind hom nou in dieselfde kategorie as Somalië, Soedan en Zimbabwe.
Die sterftesyfer vir kinders onder vyf het oor die afgelope sestien jaar vanaf 60 tot 69 per 1000 lewende geboortes opgegaan.
Die minister van gesondheid, Manto Tshabalala-Msimang het vroeër vandeesweek gesê dat armoede, onderontwikkeling, gebrek aan behuising, water en riolering die gesondheid van swartmense in Afrika ondermyn.
Ook die moedersterftesyfer tydens geboorte in Suid-Afrika word as hoog beskou, met 400 sterftes per 100 000 lewende geboortes.
Die Kongres van Suid-Afrikaanse Vakverbonde, Cosatu, het aangedui dat hulle vandag meer as 5 000 mense wat teen hoër voedselpryse gekant is, in ‘n optog in Johannesburg verwag.
Betogers sal by die Johannesburgse stadsaal byeenkom teen 1uur vanmiddag en dan stap na Eskom se kantore in Braamfontein en daarna Pick’n’Pay. Hulle wil die aandag vestig op stygende kospryse, Eskom se voorgestelde 53% tariefverhoging en duurder brandstof.
Cosatu voel sterk dat Sasol genasionaliseer behoort te word om kapasiteit om brandstof aan alle Suid-Afrikaners te voorsien, te verhoog.
Sangoco, die Suid-Afrikaanse Koalisie vir Nie-regeringsorganisasies, sal ook deelneem maar Fedusa sal nie deel wees van die optog nie.
‘n Taxibestuurder is gister ernstig beseer in ‘n padwoedevoorval in Menlyn toe twee mans hom voor ‘n aankomende voertuig ingestoot het.
Volgens getuies is die voorval ontketen deur die taxibestuurder wat voor ‘n ander voertuig ingeswaai het. Daarop het twee mans uit die voertuig geklim en die taxibestuurder begin aanrand.
Hierna is die taxibestuurder voor ‘n aankomende voertuig ingestoot. Noodhulppersoneel het hom later vir beenbreuke en ‘n kopbesering behandel alvorens hy hospitaal toe geneem is.
