Suider-Afrika Archives - Page 299 of 888

Obama sal Mandela-roubeklaers by ENB-stadion toespreek

obamajozi2 — Michelle en Barack Obama het pas in Pretoria aangekom

Nat roubeklaers stroom na die ENB-stadion om die amptelike gedenkdiens by te woon waar president Barack Obama sal praat.

Paaie om die ENB-stadion in Johannesburg is gesluit met die oog op die Mandelagedenkdiens.

Digte wolke is oor Johannesburg saamgetrek met ‘n deurdringende motreën wat sedert Maandagnag val.

Desondanks is duisende swart inwoners tans in die gure weer onderweg na die stadion om hul laaste eer te betoon.

Die minister in die presidensie, Collins Chabane het ‘n beroep op samewerking gedoen vóór die gedenkdiens.

Hy sê sommige mense sal waarskynlik weggewys moet word by die stadion, weens beperkte sitplek. Hy het gevra dat hulle dit aanvaar sonder om insidente te veroorsaak.

Daar is honderd-en-vyftig openbare plekke ingerig waar die publiek die verrigtinge kan volg.

Madiba-aanhangers het reeds oornag begin toustaan om by die ENB-stadion toegelaat te word.

Privaatvoertuie word nie by die stadion toegelaat nie en mense mag ook nie sambrele bring nie.

Sowat 100.000 mense, onder wie 90 staats- en regeringsleiers, sal na verwagting die geleentheid bywoon.

Lede van die Amerikaanse Spesiale Magte sal ook in die stadion wees om na die veiligheid van president Barack Obama en sy voorgangers om te sien.

Die Amerikaanse president, Barack Obama en sy gevolg kom vanoggend in die land aan en sal ‘n spreekbeurt by die verrigtinge kry. Obama reis saam met oudpresident George W Bush.

Die voormalige presidente, Jimmy Carter en Bill Clinton, sowel as Clinton se vrou, Hillary sal saam met Obama die geleentheid bywoon.

Ses en twintig Amerikaanse kongreslede sal ook teenwoordig wees.

Die SANW sê hulle is gereed om die groot getal hoogwaardigheidsbekleërs te hanteer. ‘n Woordvoerder van die weermag, brigadier-generaal Xolani Mabanga sê hulle enigste bekommernis is die weer.

Hoofsuperintindent Wayne Minnaar van die Johannesburgse Metropolisie sê die Randse Skou-weg, Nasrec-weg en die Soweto-hoofweg is gesluit.

Die hekke by die stadion het reeds sesuur oopgemaak met busvragte vol mense wat afgelaai word.

Die Reavya-busdiens in Johannesburg is reeds van vyfuur vanoggend oopgestel.

Minnaar het mense wat die gedenkdiens wil bywoon, aangeraai om busse en treine te gebruik aangesien parkeer plekke vir buitelandse besoekers gereserveer is.

Die Weermag is glo gereed om enige gebeurlikheid te hanteer met sowat 11.000 weermaglede wat vir die geleentheid ontplooi is.

Die minister van Verdediging, Nosiviwe Mapisa-Nqalkula het laat gister ‘n vergadering met die hoofde van die die Leër, Lugmag en Vloot gehou om veiligheidsplanne te finaliseer.

Die weermag sê dis sy plig om sy voormalige Umkhonto we Sizwe-opperbevelvoerder te groet.

Benewens die huidige en vorige Amerikaanse presidente, sal al 54 Afrika-staatshoofde ook na verwagting die gedenkdiens bywoon, sowel as leiers uit Brasilië, Kuba en Palestina. Israel sal nie die diens bywoon nie.

SA maak reg vir besoekers

Hotelle in Gauteng sal na verwagting volbespreek wees wanneer buitelandse hooggeplaastes en die media vir Nelson Mandela se begrafnis na Suid-Afrika reis.

Pascal Fouquet , algemene bestuurder van die Sheraton Hotel in Pretoria, oorkant die Uniegebou , het gesê die departement van internasionale betrekkinge en samewerking het gevra dat hulle al die beskikbare kamers reserveer vir besoekende hoogwaardigheidsbekleërs vir die begrafnis.

Teen Sondag het net 73 reisigers van die VSA egter besprekings gemaak vir akkommodasie in Pretoria, waar Mandela se liggaam van Woensdag tot Vrydag in staatsie sal lê.

Gastehuise in Pretoria sê hulle het wel besprekings ontvang vir die begrafnis.

Die Radison Blue Hotel, in Sandton, Johannesburg, is volbespreek vir die week, maar volgens ‘n bestuurder is dit nie noodwendig as gevolg van die begrafnis nie.

Michael Swart, bestuurder van Themba Day Tours and Safaris , wat daaglikse toere na Soweto reël, het gesê daar was geen oplewing in die aantal besprekings vir Sowetotoere nie.

Die toerismebedryf hoop daar sal groot belangstelling wees en dat Mandela se afsterwe ‘n “laaste geskenk” aan die bedryf sal wees.

Die koste van akkommodasie naby Qunu waar Mandela sal begrawe word, het die hoogte ingeskiet sedert die nuus van sy dood.

Die gehuggie was nogtans stil, behalwe by die Mandela-huis waar ‘n wit tent opgerig word asook sitplekke.

‘n Gewone bed- en-ontbyt vra al R3000 per nag.

Tariewe is gewoonlik tussen R700 en R1000 per nag in die Mthatha-gebied.

As gevolg van verskeie regerings- en konsulaatreëlings, sal alle hotelle in Gauteng vanaf 6 Desember tot 25 Desember as ‘n blok bespreek word.

Treine, busse gratis na massagedenkdienste

Die parlement sal Maandag ‘n gesamentlike sitting hou, die grootste nog, ter ere van Nelson Mandela.

Verteenwoordigers van slle sektore van die samelewing is genooi om dit by te woon en sal om twee-uur begin. Die parlementshekke sal vanaf agt-uur Maandagoggend oopgestel word.

Ten minste 41 treine sal roubeklaers na die amptelike gedenkdiens vir Mandela by die ENB-stadion naby Soweto vervoer. Die gedenkdiens word Dinsdag in die stadion gehou.

Metrorail sê die treine sal tussen 60.000 en 80.000 mense van regoor Gauteng gratis laat reis. Die treindienste sal vyfuur die oggend begin.

Metrorail sal ook treine na Ellispark, die Orlando-stadion en die Dobsonville-stadion beskikbaar stel.

Die busmaatskappye Autopax, ‘n filiaal van die passasierspooragentskap, het 300 busse beskikbaar gestel om hoogwaardigheidsbekleërs na die ENB-stadion te vervoer.

Die regering het ‘n beroep op plaaslike en internasionale joernaliste gedoen om so gou moontlik akkreditasie te kry om toegang tot die verrigtinge te verseker.

Mandela se staatsbegrafnis sal aanstaande Sondag plaasvind.

Die akkreditasie-sentrum by Nasrec suid van Johannesburg het Sondag tegniese probleme ondervind.

Pieter Mulder: Mandela is die een man wat ‘n verskil gemaak het

Die Vryheidsfront Plus het simpatie betuig met oud-president Nelson Mandela se vrou en familie na sy afsterwe in ‘n verklaring.

Die verklaring wat deur dr Pieter Mulder uitgereik is, lui: It is given to few men to live out their dreams in their lifetime. Nelson Mandela succeeded in doing this. Against the most colossal odds, he had realized the vision he had as a young man.

Mulder het gesê een persoon alleen se invloed op alle politieke veranderlikes is moontlik soos Mandela bewys het.

Hy het gesê: “Een persoon, op die regte plek, op die regte tyd en met die regte aanslag kan ’n reuse verskil maak. Nelson Mandela was so ’n persoon. Hy het hierdie stelling as korrek bewys. Hy het nie net ’n invloed op Suid-Afrika nie, maar op die hele wêreld gehad.

“Wie sou kon voorspel watter impak hy, nie net op swart mense nie, maar ook op wit mense sou hê. Tog het hy nie berekend net vir populariteit gegaan nie. Ek onthou hoe hy veertigduisend mense in ’n stadion aangespreek en streng berispe het omdat hulle nie die Afrikaanse gedeelte van die volkslied gesing het nie.

“Na ’n gespreksontbyt en ’n uur lange gesprek met hom alleen in die negentigerjare, was my opsomming dat vriendelikheid en nederigheid sy sterkste eienskappe is, maar dat jy nie vir ’n oomblik oor sy klipharde wil om sy doelwitte te bereik, moet twyfel nie.

“Sy gewildheid het grootliks gelê in sy menslike aanslag op persoonlike vlak. Hy het ’n aanvoeling vir klein dingetjies gehad wat groot impak op mense het.”

Mulder het in Engels voortgegaan en gesê “Few men to live out their dreams in their lifetime. Nelson Mandela succeeded in doing this. Die vraag is, wat was hierdie drome van mnr. Mandela?”

Hy het ook na Mandela se toespraak by die Rivonia-verhoor op 20 April 1964 verwys as ‘n model waarna Suid-Afrikaners moet streef..

Mulder het Mandela as volg aangehaal: “I have fought against white domination, and I have fought against black domination. I have cherished the idea of a democratic and free society in which all persons will live together in harmony and with equal opportunities. It is an idea for which I hope to live for and to see realized, but my lord, if it needs be it is an ideal for which I am prepared to die.”

Die vreemde transformasie van Mandela se tronksel

Mandela se tronksel op Robbeneiland het deur die jare ‘n vreemde transformasie ondergaan. Tydens sy aanhouding was dit vol boeke op sy boekrak en ‘n bed met ‘n matras en kussing, ‘n stoel en lessenaar soos foto- en filmmateriaal van selfs CNN, of die Johannesburgse digitale argief duidelik aantoon. Foto’s van swart Amerikaanse sterre soos Beyoncé wat by die tronksel poseer, wys die rak en bed in die agtergrond.Met President Obama se besoek het die kamer skielik die bed, matras, boekrak, tafel en stoel verloor!

Mandela in sy sel by 'n latere besoek — Mandela in sy sel by ‘n latere besoek

Beyonce met die bed en rak in die agtergrond

Britse koninklikes verneem van Mandela se dood tydens filmpremiere in Londen

Mandela se dood is tydens ‘n glansgeleentheid – die premiere van die rolprent Long walk to freedom – in Londen wat deur die Britse prins William en sy vrou Kate bygewoon is, aangekondig. Volgens berigte wat algemeen in die media verskyn, sou Mandela gisteraand om 20:50 Suid-Afrikaanse tyd gesterf het.

Die gehoor by die premiere het van Mandela se dood verneem terwyl die finale titels van die film by die skerm afrol. Mandela se dogters, wat ook die vertoning in die Britse hoofstad bygewoon het, het blykbaar vooraf van sy dood verneem, maar het ingestem dat die vertoning van die film moet voortgaan alvorens die gehoor daarvan in kennis gestel word.

Die vervaardiger van die film, Anant Singh, was insgelyks in Londen teenwoordig en het agterna vir ‘n oomblik se stilte gevra.

Prins William het gereageer deur te sê: “Dis uiters treurige en tragiese nuus.”

Net voor die vertoning het Zindzi Mandela, die groot man se dogter, nog oor die rooi tapyt geloop en op ‘n vraag oor haar vader se welstand aan ‘n verslaggewer gesê: “Dit gaan goed met my pa.”

Mandela het vanjaar 95 geword.

Die Noord-Amerikaanse regte vir die film is deur die Weinstein-broers se The Weinstein Company (TWC) gekoop. Benewens Long walk to freedom, het die Weinstein-broers en die vervaardiger Anant Singh op Sarafina, Cry, the beloved country en ander films saamgewerk.

Harvey Weinstein en sy vrou, Georgina Chapman, wat 25 jaar jonger as hy is

“Ek voel hartstogtelik oor Mandela: Long walk to freedom,” het die medevoorsitterr van TWC, Harvey Weinstein, vroeër gesê. “Anant Singh het meesterlike werk verrig deur dié epiese verhaal van ons tyd te vervaardig. Deur Anant en Bob de Niro, het ek Nelson Mandela ontmoet, wat een van die grootste ervarings van my lewe was.”

Die transaksie rondom die film is in Londen deur die prokureurrsfirrma David Glasser en Michal Steinberg namensThe Weinstein Company onderhandel terwyl Alan Grodin van Weintraub Tobin-prokureurs namens Singh onderhandel het. Pathe versprei die film in Brittanje en Frankryk en sal ook internasionale verkope hanteer.

Plett sien drastiese toename in kondoom-, aborsiepilverkope

Vanjaar se Plett Rage is ‘n inspuiting vir aptekers en supermarkte soos die vraag deur skoolverlaters vir aborsiepil en kondome sedert die fees verlede week gestyg het.

“Ons het veral besig sedert Maandag en sien tussen 15 en 20 jongmense ‘n dag hier wat vra vir die aborsiepil,” het ‘n werknemer van Plettenbergbaai se Alpha Pharm gesê.

Dit is kommerwekkend aangesien dit beteken dat tieners is onbeskermde seks het.

Market Square Clicks Apteek personeel het gesê dit is nie ‘n nuwe tendens nie en hulle bestel elke jaar bykomende voorraad van die noodvoorbehoedmiddels vir die Plett Rage. Omega Apteek se personeel het ook ‘n styging in die aanvraag opgemerk sedert verlede week.

Bestuurder van Melville se Corner Clicks sê kondome is tans “baie gewild”, veral onder tienerseuns. “Ons verkoop ongeveer 600 kondome ‘n dag.”

Checkers se Shaun Davids het gesê kondoomverkope het sedert die begin van die fees verdubbel.

‘n Market Square Pick n Pay kassier sê teen 09:00 elke dag is hul normale daaglikse voorraad van ongeveer 200 tot 300 kondome uitverkoop en teen 10:00 op Woensdag was daar net drie oor.

Engen sê die gratis regeringgeborgde kondome is amper op, terwyl Shell Ultra se woordvoerder sê die gratis kondome in die manstoilet word drie keer ‘n dag aangevul. ‘n Houer hou sowat 100 kondome.

Drankwinkels het soveel as ‘n 50 persent toename in alkoholverkope aangeteken, terwyl ander kleinhandelaars sê hulle het ook gesien produkte, soos bekende lewermiddels vlieg van die rakke af .

Tops drankwinkel gesê alkoholverkope het ten minste hierdie week verdubbel.

“Ons sien ‘n baie skoolverlaters kom in en koop kiste bier en appelbier. Die ouens koop meestal bier en die meisies appelbier.”

Pick n Pay Drankwinkelpersoneel het gesê hulle het ook ‘n toename in die verkope van sowat 50 persent gesien.

Kabinet vra dat Nkandla-verslag vrygestel word

Die Kabinet het beveel dat ‘n interministeriële taakspan se verslag oor die Nkandla omstredenheid vrygestel word aan die publiek.

“Die Kabinet onderskryf die aanbevelings en vra die verslag wat vrygestel word aan die publiek.

“Die Kabinet het beraadslaag oor die aanbieding deur die Minister van Openbare Werke oor die interministeriële taakspan se verslag oor die veiligheidsopgraderings by die president se Nkandla tuiste,” lui ‘n verklaring ná sy tweeweeklikse vergadering Woensdag.

Die besluit is Donderdag aangekondig ná ‘n aanval deur die ANC op die openbare beskermer, Thuli Madonsela oor die tydsberekening van haar verslag oor die bouwerk by President Jacob Zuma se landgoed.

Vliegtuigongeluk in Richmond eis 2

‘n Ligte vliegtuig se wrakstukke is vroeg Donderdagoggend op ‘n suikerriet-plaas buite Richmond in KwaZulu-Natal opgespoor.

Die vliegtuig het Woensdagmiddag van radarskerms af verdwyn. ER24 se woordvoerder Werner Vermaak het gesê die vliegtuig het vermis geraak kort nadat hy van die Oribi-lughawe in Pietermaritzburg opgestyg het.

Albei die insittendes van die vliegtuig is in die ongeluk dood.

Swaar reën en mis in die gebied het die polisie en reddingswerkers se soekpogings in die wiele gery en die soektog is eers afgelas.

‘n Woordvoerder vir die KwaZulu-Natalse polisie, kaptein Thulani Zwane sê een van die oorledenes se selfoon was deurentyd aangeskakel.

Die polisie het die sein gebruik om die wrak se posisie te trianguleer wat na die ongelukstoneel gelei het.

Haelskade sal ekonomie knou sê Britsboere

‘n Haelstorm by Brits, in Noordwes het vir groot skade gesorg. Boere sê ‘n geraamde R100 miljoen is deur die storm in die Brits-omgewing aangerig.

Die meeste plase in die gebied is geraak deur die swaar weer en haelskade.

Groenteboere sê hulle is baie nadelig geraak omdat hulle nie versekering op die oeste het nie.

Hulle meen die skade sal ‘n negatiewe invloed op voedselsekerheid en ekonomiese uitkomste hê.