Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

Twee van Zimbabwe geskiet

‘n Zimbabwiër en sy vrou is Maandagaand in hul huis in Alexandra, noord van Johannesburg, geskiet. Hulle is na die Charlotte Maxeke-hospitaal gehaas.

Lt.kol. Lungelo Dlamini, polisiewoordvoerder, het gesê die motief vir die aanval is nog nie bekend nie, maar die aanvallers het die paar geskiet en hulself daarna uit die voete gemaak.

Dit is nie duidelik of die aanval met die nuwe vlaag xenofobiese aanvalle in Johannesburg die afgelope week verbind kan word nie.

Drie gewapendes het aan die deur geklop en op die twee Zimbabwiërs losgebrand. Niks is glo uit die huis gesteel nie.

Die 33-jarige man en sy 22-jarige vriendin is albei in die bolyf gewond.

Xenofobiese geweld kom reeds ‘n hele aantal jare sporadies in Suid-Afrika voor en het die afgelope tyd in Durban en Johannesburg opgevlam.

Zuma voer hoëvlaksamesprekings oor oop grense

Hoëvlaksamesprekings oor Suid-Afrika se migrasiebeleid sal Woensdag in Pretoria gevoer word weens druk op die land om oop grense te bevorder.

Suid-Afrika verduur kritiek uit veral ander Afrikalande weens xenofobiese geweld nadat ‘n mesaanval op ‘n Mosambiekse burger, Emmanuel Sithole, wêreldkundig geraak het.

President Jacob Zuma sal vandag en môre met sakeleiers, arbeid en gemeenskapsorganisasies vergader.

Dit volg ‘n dag nadat die weermag in Alexandra, noord van Johannesburg ontplooi is om die polisie te ondersteun.

Voortslepende, lae-intensiteit geweld teen buitelanders het drie weke gelede in die Durban-omgewing verhewig en na Gauteng oorgespoel.

Die Suid-Afrikaanse Hoë Kommissaris in Ghana, Lulama Xingawa, sê sy het dreigemente van vier mense van Ghana ontvang dat die Kommissariaat in Accra aangeval gaan word uit vergelding.

Sy het ontken dat Ghanese in die jongste geweld omgekom het en gesê die Suid-Afrikaanse minister van polisie het bevestig dat geen burgers van Ghana in Suid-Afrika geteiken word nie.

‘n Ghanese burger is onlangs in Durban dood gevind, maar volgens die polisie was dit aan misdaad te wyte.

Xingwana sê veiligheid by die gebou is intussen opgeskerp.

Suid-Afrika moes egter sy konsulaat in Lagos in Nigerië sluit weens betogings oor die xenofobiese voorvalle.

Die Suid-Afrikaanse konsul-generaal in Nigerië, Sam Monaisa, sê Nigeriërs gebruik sosiale media om ‘n reeds-gespanne situasie in Suid-Afrika uit verband te ruk.

Hy het Suid-Afrikaners in dié land gewaarsku om besonder waaksaam te wees en nie onnodig die aandag op hulself te vestig nie.

Protesoptredes is gehou by die konsulaat en die Suid-Afrikaanse Hoë Kommissariaat in Abuja. Die konsulaat sal vir twee dae gesluit wees.

Vier van Jan Kempdorp voor

Vier leerlinge van ‘n hoërskool in Jan Kempdorp verskyn na verwagting vandag weer in die plaaslike landdroshof vir die beweerde aanranding van ‘n mede-leerling.

Volgens polisiewoordvoerder, Priscilla Naidu, bly die beskuldigdes in die sorg van hul ouers.

Die vier het na bewering tydens ‘n ontgroeningspraktyk ‘n 19-jarige leerling aangerand in sy koshuiskamer by die skool.

Die seuns het reeds voor ‘n tugkomitee van die skoolbeheerliggaam verskyn, maar die bevindinge is nog nie bekendgemaak nie.

Gerugte dat die klagte teen een van die vier teruggetrek is, is deur die Noord-Kaapse onderwysdepartement ontken.

Sydney Stander sê alvorens die tugproses afgehandel is, kan die saak nie teruggetrek word nie.

Fedsas kry nuwe hoof

Die gewese registrateur van die Universiteit van die Vrystaat (UV) beskou sy aanstelling as uitvoerende hoof van die beheerliggaam-federasie, Fedsas, se instituut vir skoolbeheer as ‘n voorreg.

Derek Swemmer sê hy gaan die geleentheid gebruik om die nuwe instituut, wat deel is van Fedsas se struktuur, uit te brei sodat lidmaatskole onder meer by opleidingsgeleenthede kan baat.

Volgens hom moet lede van beheerliggame die nodige kennis hê om op soortgelyke strukture te dien.

Swemmer glo weens sy ervaring as registrateur by verskeie tersiêre instellings en lid van universiteitsrade, asook sy leidende rol in ander instellings se beheerstrukture kan hy ‘n waardevolle bydrae lewer om skoolbeheerliggame te versterk.

Swemmer en sy vrou Driekie Hay, gewese akademiese viserektor by die UV, is verlede jaar weg na ‘n skikking met die instelling. Hay is nou verbonde aan die Universiteit van KwaZulu-Natal as dekaan van navorsing.

Sasol verkoop elektrisiteit

Die petrochemiese reus Sasol het ‘n kragkoopkontrak met Eskom aangegaan om elektrisiteit aan die kragnetwerk te verskaf, het Business Day Dinsdag berig.

Volgens die berig sal Sasol 440 MW van sy oortollige elektrisiteit tot die kragnetwerk bydra. Alex Anderson, woordvoerder van Sasol, het volgens die berig gesê die ooreenkoms geld al van die begin van die maand af.

Sasol sal die elektrisiteit van sy Secunda- en Sasolburg-aanlegte verskaf waar 1 100 MW se elektrisiteit opgewek word deur gas wat van Mosambiek af ingevoer word. Eskom sal tot 440 MW hiervan vat namate elektrisiteit benodig word.

Medupi se eerste eenheid sal intussen glo volgende maand ten volle in werking wees en 800 MW tot die kragnetwerk bydra. Volgens Business Day is MTN ook van voorneme om elektrisiteit aan Eskom te verskaf deur middel van sy metaangas- en sonkragaanlegte.

Zim sê dodetal in xenofobiese geweld ‘n grys gebied

Die polisie in Gauteng het Maandag ontken dat ‘n Zimbabwiese vrou wat onthoof is in Killarney verlede week, ‘n slagoffer van xenofobiese geweld was, maar Zimbawiese hooggeplaastes sê die dodetal is ‘n grys gebied.

Lungelo Dlamini, polisiewoordvoerder, het aan News24 gesê die vrou se liggaam is Dinsdag gevind “naby die plek waar die hawelose mense was bly” in Killarney.

“Ons dink nie dat dit verband hou met die xenofobiese geweld nie. Dit lyk soos ‘n beplande moord. Sy is elders vermoor, en haar liggaam is daarna in die plastieksak gestop en weggegooi,” het Dlamini gesê, wat bevestig het dat die polisie die motief vir die vrou se moord ondersoek.

Dlamini het nie die naam van die slagoffer bekend gemaak nie, maar die staatsbeheerde media in Zimbabwe het Maandag lede van ‘n gesin in Harare aangehaal wat gesê het hul familielid is onthoof in die Houghton-gebied.

Sy is glo Naome Garusa en hulle glo sy was inderdaad ‘n slagoffer van die xenofobiese geweld in dele van Durban en Johannesburg wat vir meer as ‘n week gewoed het.

“Plunderende xenofobiese elemente, het haar geteiken toe sy van haar werkplek gekom het”, het die Herald berig.

Buitelandse kinders wat in Suid-Afrika skoolgaan, is ook geraak deur die onlangse xenofobiese aanvalle, het die Nasionale Professionele Onderwysersorganisasie van SA (Naptosa), gister gesê.

“Leerders is ook ontwrig deur die geweld en ‘n paar buitelandse leerders is geïntimideer,” sê Naptosa se president Basil Manuel.

Onderrig is ook ontwrig in sommige skole, en sommige buitelandse onderwysers in Suid-Afrika was bang om te rapporteer vir diens.

Zimbabwe se ambassadeur in Suid-Afrika Isak Moyo, wat tans in Durban is, sê die dodetal is ‘n “grys gebied”. Suid-Afrikaanse bronne beweer net sewe mense is dood in die onlangse geweld.

Hy het aan die Chronicle-koerant Maandag gesê dat daar slegs een Zimbabwiese slagoffer amptelik bevestig is, ‘n man wat bekend staan ​​as Mhofu. Amptenare probeer om sy liggaam te repatrieer.

Maar daar is vroeër berig dat nog twee Zimbabwiërs, ‘n vrou en ‘n kind, dood is in die geweld.

Zimbabwe het begin om honderde burgers in die nasleep van die aanvalle terug te bring huistoe.

Die eerste groep van 407 Zimbabwiërs, waaronder byna 100 kinders, het Maadag by die Beitbrug-grenspos aangekom.

Vierde moordverdagte in Sithole-mesaanval vas

‘n Vierde swart moordverdagte is in hegtenis geneem in verband met die mesaanval op Emmanuel Sithole, ‘n Mosambiekse burger in Alexandra, noord van Johannesburg.

Die polisie het intussen ontken dat die moord uit vreemdelinghaat gepleeg is.

Volgens Gauteng polisiewoordvoerder, Lungelo Dlamini, is die vierde verdagte deur die nag in hegtenis geneem. Hy sal saam met die drie ander verdagtes vandag in die hof verskyn.

Sithole, ‘n buitelandse straathandelaar, is Saterdag aangeval en met ‘n mes doodgesteek. Hy is later in die hospitaal oorlede. Fotogetuienis van die moord het in ‘n naweekkoerant verskyn.

Dlamini het gesê die voorval kan nie met vreemdelingehaat verbind word nie.

Die minister van Samewerkende Regering, Pravin Gordan en die burgemeester van Johannesburg, Parks Tau het Alexandra Maandag besoek waar Sithole doodgesteek is.

Gordhan sê hy is vol vertroue dat die situasie in die land binne ‘n week na normaal sal terugkeer ná die vlaag xenofobiese aanvalle waarin sewe mense omgekom het.

Hy het sonder ironie gesê baie word op die oomblik gedoen om te verseker dat die land weer ‘n “plek van hoop en vrede vir al die mense in die land en vir die vasteland” sal word.

‘n EFF-lid is gister gewond toe skote vanuit ‘n hostel in Alexandra geskiet is terwyl die party ‘n optog gehou het.

Die leier van die EFF, Julius Malema het tydens sý besoek aan Alexandra gesê geen intimidasie sal hom verhinder om voort te gaan met sy veldtog teen xenofobiese geweld nie.

Malema het die lokasie ook besoek om hulde te bring aan Sithole.

Die ANC-regering is onder druk om aanvalle teen buitelanders te verduidelik nadat die mees onlangse xenofobiese geweld vir skerp kritiek in die buiteland en veral Afrika gesorg het.

‘n Optog teen xenofobie sal Woensdag in Windhoek se middestad gehou word uit eensgesindheid met die slagoffers van xenofobiese geweld in Suid-Afrika.

Die nasionale koördineerder van die Namibiese Musiek-bedryfvakbond, Johannes Shalipo Haludilu sê tydens oorloë het Afrika-lande ‘n veilige heenkome vir uitgewekenes gebied en dat dit nie vergeet moet word nie.

Hy het die mense van Namibië geloof omdat hulle vrede met alle buitelanders nastreef en het aan almal gevra om op te staan teen xenofobiese geweld.

Sowat 200 kunstenaars het reeds bevestig dat hulle aan die protesaksie gaan deelneem.

Polisie vang Indiër met R-1

Die polisie in Gauteng het Sondagaand ‘n Indiër in Actonville aan die Oosrand in hegtenis geneem vir die onwettige besit van ‘n R1-aanvalsgeweer.

Die Indiërman is vermoedelik ‘n buitelander. Die gebied het die afgelope ruk onder xenofobiese geweld deurgeloop.

Die polisie het vroeër bevestig dat hulle orde herstel het nadat hostelbewoners paaie versper het. Die groep is met traanrook uiteengejaag voor daar by sakeondernemings ingebreek kon word.

Geen berigte van beserings is egter ontvang nie.

Actonville is in die 1950’s ingevolge die Groepsgebiedewet ingerig vir Indiërs.

Die Indiërgemeenskap van Actonville en die swart gemeenskap van Wattville is vroeër deur ‘n treinspoor wat vandag nie meer bestaan nie, geskei, maar woon nog steeds apart van mekaar.

Die Indiërs is verskuif uit Boksburg, Germiston, Nigel en Springs na Actonville en talle het munisipale huise ontvang terwyl sommige hul eie huise gebou het.

By Liberty Cinema, Actonville se sokkerstadion en Red Square in Khan Crescent, is politieke vergaderings gehou in die 1950’s.

Wat het koning Goodwill presies gesê?

Daar is die afgelope paar dae herhaaldelik na Koning Goodwill Zwelithini se onlangse kommentaar verwys wat sou gelei het tot gewelddadige aanvalle tussen plaaslike inwoners en buitelandse burgers in KwaZulu-Natal.

Sedert die toespraak, het die koning se woordvoerders ontken dat hy inwoners teen buitelanders aangehits het en gesê hy het in werklikheid net verwys na ongedokumenteerde buitelanders.

Uit ‘n vertaling van wat die koning presies gesê het toe hy gepraat het in Pongola verlede maand, blyk dit dat die koning ook sy onderdane berispe het.

Toepaslike dele van die toespraak is vertaal met die hulp van Zoeloe-akademici. Die spreekwoorde is direk vertaal.

Die koning klim onder diegene in wat hul nalatenskap van konings Dinizoeloe en Cetshwayo verwaarloos met hul verworwe vryheid uit luiheid en kriminaliteit.

“In 2015 praat ons van Suid-Afrikaners wat nie wil luister nie. Hulle wil nie werk nie, wat diewe is, kinders verkrag en by huise inbreek, lui mense wat nie grond wil bewerk nie. Daar is mense van ander lande wat na hulle kyk en sal sê ‘kom ons gaan eet die erfenis van daardie dommes’.

“As julle nou buite gaan kyk soos ek praat, sal julle sien hoe lyk hulle winkels. En al die soort goed wat buite hang, onnet en deurmekaar. Hulle het chaos na ons strate gebring, die buitelanders, dis vieslik vuil, jy kan nie eers sien wat binne is nie.

“Ek weet die politici hou nie daarvan om oor hierdie goed te praat nie, want die slegte mense word stemgeregtiges na vyf jaar. Die leiers moet my vergewe, maar in sulke omstandighede moet ek uitpraat.

“As iemand wat nie vyf jaar hoef te wag nie, [luide gelag] as Zoeloekoning wat groot respek in oral in die wêreld afdwing vir die bevryding van Afrika, sal ek nie stilbly as mense wat geen reg het, met hierdie land speel nie. Dit is tyd vir ons om ons sê te sê. Ek vra die regering om ons te help.

“Ons moet ons luise vang. Ons moet die miere van ons koppe haal en hulle in die son laat. Die buitelanders moet hulle tasse pak en gaan. [luide toejuiging]”

Afrika wys tande oor aanvalle op buitelanders

Die Nigeriese regering het glo ’n ultimatum aan die Suid-Afrikaanse regering gestel om die geweld teen hulle burgers te keer, en gedreig dat Suid-Afrikaanse ondernemings in Nigerië gesluit sal word indien dit aanhou.

Meer as 100 Suid-Afrikaanse maatskappye, waaronder MTN, Standard Bank, Sasol, Shoprite, Multi­Choice en Mr Price, doen sake in Nigerië, volgens die Nigeries-Suid-Afrikaanse Sakekamer.

Nigerië sê ultimatum, wat blykbaar aan die Suid-Afrikaanse ambassade in Nigerië gerig was, kon nie deur MTN bevestig word nie.

MTN se totale omset verlede jaar het vir meer as die helfte op Afrika staatgemaak.

In Nigerië het die maatskappy in 2014 bykans R54 miljard se omset gehad, veel groter as die R39 miljard wat die maatskappy in Suid-Afrika genereer.

Die vier groot banke, naamlik FirstRand, Standard Bank, Barclays en Nedbank is ook op die vasteland gefokus. Standard Bank het die grootste teenwoordigheid in Afrika en byna ‘n derde van sy omset kom van buite die land.

Shoprite is die kontinent se grootste voedselkettingwinkelgroep en selfs in lande soos Angola en Nigerië wat afhanklik is van ‘n goeie olieprys, kon die kleinhandelaar ‘n styging van 15% in sy winste behaal.

Suid-Afrikaanse maatskappye bekommer dat die xenofobiese geweld hul beeld skade kan berokken.

Sasol het 340 Suid-Afrikaanse werkers inderhaas onttrek by gasaanleg in Temane, Noord-Mosambiek, nadat Mosambiekers oor hulle teenwoordigheid gekla het, het ‘n S­asol-woordvoerder gesê.

In 2014 het 30% van ons land se totale uitvoere na die res van Afrika gegaan, soveel as na Asië, terwyl net 13% van die totale invoer uit Afrika kom.

Afrika bied ‘n mark wat vervaardigde produkte insluit en nie net grondstowwe nie.