Suider-Afrika Archives - Page 122 of 888

Safarigids deur leeu doodgebyt in Hwange

`n Safari-gids is dood in die Hwange Nasionale Park nadat `n leeu hom verskeur het.

Volgens amptenare is die 40-jarige Quinn Swales in die Zimbabwiese park doodgebyt.

Die insident het in dieselfde park gebeur waar die leeu Cecil verlede maand deur `n Amerikaanse boogjagter, Walter Palmer, doodgeskiet is.

Swales het `n fotografiegroep gelei toe die leeu onverwags gestorm het.

Cecil se dood is vroeër internasionaal veroordeel en het vrae oor trofeejag in Afrika laat opvlam.

Hwange het in ‘n verklaring gesê dat die aanval Maandagoggend plaasgevind het.

Swales is glo deur ‘n leeumannetjie aangeval en het van sy beserings beswyk.

Die gids se laaste inskrywing op Facebook was ‘n foto van ‘n kraagmanntejie, klaarblyklik dié van Cecil.

Weerdiens waarsku dat klimaatsverandering kom

Die Suid-Afrikaanse Weerdiens het bekend gemaak dat meer negatiewe uitwerkings van klimaatsverandering in die land gaan voorkom, veral in Mpumalanga en Limpopo.

Dit het aan die lig gekom by ‘n klimaatsverandering-konferensie in Mbombela. Die konferensie is georganiseer deur die Departement van Omgewingsake, die provinsiale departement van Landbou, Landelike Ontwikkeling en Grondadministrasie.

Dit is deel van die komende Verenigde Nasies Klimaatsverandering-konferensie in Parys, Frankryk, later vanjaar, het RSG berig.

‘n Weervoorspeller, Rudzani Malala sê uiterste weerstoestande word voorspel in die oostelike dele van die land.

Dit sluit in onder meer hittegolwe en die groter intensiteit van tropiese siklone. Malala sê die situasie gaan nie verbeter, indien die kwessie nie dringend aandag kry nie.

Dele van Vrystaat sonder water oor wanbetaling

Virginia, Welkom, Hennenman, Ventersdorp en Alanridge moet Maandagoggend sonder water klaarkom nadat Sedibeng-water die watertoevoer na die Matjhabeng-munisipaliteit opgeskort het.

Sedibeng tot dié stap oorgegaan weens wanbetaling. Die munisipaliteit skuld glo sowat R945 miljoen.

Betalende inwoners is ontstoke en sê dis onaanvaarbaar dat verbruikers wat getrou hul munisipale rekeninge betaal, nou op dié manier behandel word.

Die munisipaliteit het glo nie by ‘n afbetalingsooreenkoms gehou nie.

Sedibeng-water se hoof, Tredwin Takalani, sê by monde van sy woordvoerder, dat hy nie kan kommentaar lewer nie, aangesien hy die hele dag in ‘n vergadering is.

Twee renosters in Vrystaat geskiet

‘n Renostereienaar en talle helpers is warm op die spoor van drie stropers wat gisteraand twee renosters op die plaas Brakfontein tussen Wesselsbron en Bultfontein geskiet het.

Japie Pienaar sê die bul en koei is nie onthoring nie, maar wel ernstig gewond.

Hy sê hy hoop dat sy koei gered kan word, veral omdat sy ‘n een-maand-oue kalf het. Hy sê die bul se prognose is glad nie goed nie – een van sy bene is deur ‘n swaarkaliber-koeël versplinter.

Pienaar sê hy en sy vrou was besig om op die plaas te kamp toe hulle skote hoor. Hulle het dadelik met hul bakkie in die rigting van die skote gejaag en op die gewonde diere afgekom.

Spoorsnyers volg die stropers van die Vetrivier in die rigting van Bultfontein. ‘n Soekgeselskap, insluitend ‘n helikopter, is ingespan.

Pienaar sê hulle is hoopvol dat die booswigte vasgetrek sal word.

Twee polisiebeamptes voor vir motorkaping

Twee Bloemfonteinse polisiebeamptes wat glo ‘n taxi gekaap het, sal Dinsdag na verwagting weer in die plaaslike landdroshof verskyn.

Mojalelfa Bonties van die Parkweg-polisiekantoor en Delikile Nomandla van die Bloemspruit-polisiekantoor, is vroeër op borgtog van R800 elk vrygelaat.

Polisiewoordvoerder, Chaka Marope, sê hulle het glo ‘n taxi gehuur en toe in ‘n woordewisselling met die taxibestuurder betrokke geraak.

Een van die beamptes het glo in die stryery ‘n vuurwapen op die bestuurder gerig, waarna hy die voertuig gestop en uitgespring het om hulp te kry. Die twee beamptes het glo toe probeer om met die taxi weg te ry.

Bonties en Nomandla staan tereg op ‘n aanklag van die rig van ‘n vuurwapen en diefstal.

Polisievoertuig aan die brand gesteek by Hartebeespoortdam

‘n Polisievoertuig is aan die brand gesteek en ‘n ander onder klippe gesteek by die Ten Rooms-lokasie naby Hartbeespoortdam, het Noordwes se polisie Sondag gesê.

Kolonel Sabata Mokgwabone het gesê die polisievoertuig is Saterdag aan die brand gesteek.

Daar word beweer dat die polisie wou keer dat die gemeenskap ‘n man aanrand.

Die polisie het na bewering probeer om in te gryp om die man van die tierende skare te red.

Die skare het daarna glo die polisievoertuig aan die brand gesteek, maar die amptenare het daarin geslaag om die erg beseerde man, wat daarvan beskuldig word dat hy verantwoordelik is vir misdaad in die gebied, te red.

Mokgwabone het gesê ‘n ander voertuig is deur die skare onder klippe gesteek.

“Daar word beweer dat die gemeenskap probeer het om die motor te brand deur ‘n brandende buiteband op dit te gooi. Tog het die motor nie gebrand nie, hoewel die band skade veroorsaak het. ”

Paramedici het die beseerde bygestaan en hy is in die hospitaal opgeneem. Die polisiebeamptes is nie in die voorval beseer nie.

Burgerlugvaartowerheid weier toegang tot ambulansvlug-opnames

Die Bestuurshoof van die Prosperity Groep en van E-Med Rescue 24 Namibië, Bertus Struwig sê hulle sal voortgaan met hulle stryd om toegang te kry tot die vlugopnames van die ambulansvlug wat verlede naweek verongeluk het.

Die Suid-Afrikaanse Burgerlugvaartowerheid het toegang tot die opnames geweier.

Van die laaste gesprekke tussen lughawebeheer en die vlieëniers van die Namibiese lugambulans is verlede Sondagoggend opgeneem voordat die vliegtuig met vyf mense aan boord naby Kaapstad neergestort het.

Al vyf is in die ongeluk dood.

Die Namibiese reddingsdiens het intussen ‘n regspan aangestel om hulle te help om te bepaal wat presies daardie oggend gebeur het.

Die vlugambulansdiens ER24 het vroeër in ‘n verklaring gesê: “Daar word verstaan van die Lughawensmaatskappy van Suid-Afrika dat alle vliegtuie wat die Kaapstadse Internasionale Lughawe in die tyd genader het, in ‘n lugtou geplaas is weens ‘n tegniese fout met hul radars.

“Die E-med Rescue24 se vliegtuig was ook in die lugtou op dié tydstip. Ons het kontak verloor met die vliegtuig ongeveer sewe myl buite die lughawe,” het die verklaring gelui.

Burgerlugvaartowerheid het verklaar dat hulle hul volle samewerking met die ondersoek sal gee.

Intussen het polisie die man uitgeken wat dood is nadat sy ligte vliegtuig in die agterplaas van ‘n huis op Brits in Noordwes neergestort het.

Hy was die 45-jarige Andre Denoon. Die Brits Vliegklub sê die ongeluk het gister plaasgevind.

‘n Woordvoerder, Loanne Louw, sê die vliegtuig het oënskynlik na opstyging neergestort. Denoon word oorleef deur sy vrou Tanya en twee dogters.

Die oorsaak van die ongeluk is nog nie vasgestel nie.

Twis tussen Rusland en SA oor visums

‘n Diplomatieke onderonsie dreig tussen Suid-Afrika en Rusland oor visums.

‘n Besluit deur Moskou om nie visum-vereistes vir Suid-Afrikaners te verslap nie, het glo gelei tot die verskil.

Suid-Afrikaanse sakelui is ontevrede dat Suid-Afrika nie ingesluit word by BRICS-lande nie, aangesien visum-vereistes vir alle lede van die BRICS-lande intussen verslap is.

Volgens Rusland moet Suid-Afrikaners persoonlik om visums aansoek doen.

Die mede-voorsitter van die Rusland/Suid-Afrika sakeforum, Ndaba Ntsele sê hulle het die kwessie telke male sonder sukses met die Russiese regering probeer oppper.

Oscar bly sit

Die minister van justisie het aangekondig dat Oscar Pistorius nie Vrydag op parool vrygelaat gaan word, soos verwag is nie.

Die Minister van Justisie en Korrektiewe Dienste, Michael Masutha, het die besluit om Oscar Pistorius onder korrektiewe toesig te plaas, opgeskort en na die Korrektiewe Toesig en Paroolhersieningsraad verwys.

Dit volg na die Minister Maandag ‘n petisie van die Progressive Women’s Movement of South Africa (PWMSA) ontvang het waarin hulle hul teenkanting teen die vrystelling van Pistorius verklaar het.

In hul voorlegging het hulle versoek dat Masutha Pistorius se vrylating hierdie Vrydag skrap, met verwysing na die feit dat dit tans Vrouemaand is.

Pistorius is gevonnis tot vyf jaar tronkstraf vir strafbare manslag verlede jaar nadat hy sy destydse vriendin Reeva Steenkamp in 2013 geskiet het toe hy haar vir ‘n inbreker aangesien het. Hy het tot dusver slegs 10 maande van sy vonnis uitgedien.

Twee leerlinge van Witbank-skool aangerand

Twee leerlinge van ’n plaaslike skool in Witbank is in hegtenis geneem na ’n aanval op wit medeleerlinge.

Die twee leerlinge is Vrydag 14 Augustus gearresteer en het Maandag 17 Augustus in Witbank Landdroshof verskyn op klagtes van aanranding en roof.

Die name van die seuns word intussen weerhou omdat hulle minderjarig is.

Dié aanranding het omstreeks 13:45 net om die draai van dié skool plaasgevind.

’n Daaglikse roetine, soos huiswaarts keer na skool, het nou in ’n nagmerrie ontaard vir die twee slagoffers.
Die twee leerlinge onderskeidelik 15 en 16 jaar oud is té bang om in die middae huis toe te loop.

“Die skool het net uitgekom en ek en my vriend was op pad huis toe. Voor die winkel net om die hoek van die skool het ons die agt seuns gesien. Twee was bekend want hulle is in ons skool. Ons het nie moeilikheid verwag nie” het die 16-jarige die gebeure geskets.

Hy het vertel dat alles in ’n oogwink in chaos ontaard het toe die groep van agt hulle weg versper het.

“My eerste instink was om my foon vas te druk. Ek het gesien hoe my vriend ook sy foon vasdruk. Die volgende oomblik toe waai die vuiste. Uit die hoek van my oog het ek gesien hoe hulle my vriend van sy fiets afslaan.”