Suider-Afrika Archives - Page 306 of 888

Elf dood toe bus vragmotor verbysteek

Elf mense is dood in ‘n busongeluk op die N1 naby die Capricorn-tolhek in Limpopo.

Die polisie sê die bus het in ‘n motor vasgery nadat dit ‘n vragmotor verbygesteek het.

‘n Polisiewoordvoerder, Hangwani Mulaudzi, sê vyf insittendes van die motor en ses buspassasiers is dood.

Beseerdes is na die Utsogwa-hospitaal geneem.

Volgens Mulaudzi is ‘n ondersoek reeds aan die gang. In September het ‘n bus en vragmotor verongeluk wat die lewens van twee mense geëis het op dieselfde pad.

Die ongeluk kom nadat 30 mense vroeër dié maand dood is toe vier voertuie gebots het by Kwaggafontein in Mpumalanga.

Twee vragmotors, ‘n bus en bakkie was op die Molotopad in ‘n kettingbotsing betrokke waarin 29 mense beseer is.

In September, is 24 mense dood toe ‘n vragmotor in ‘n minibus gepleog het in Pinetown, in KwaZulu-Natal. – Sapa

Gautengse wetgewer erken Kleinfontein as kultuurgemeenskap

Die Gautengse Portefeuljekomitee oor Gemeenskapsveiligheid sê hy kan geen bewyse vind dat swart polisielede wat nie Afrikaans kan praat nie, toegang tot Kleinfontein buite Pretoria geweier word nie.

Afrikaners elders in die land het die erkenning van Kleinfontein as kultuurgemeenskap deur die Gautengse Wetgewer verwelkom

Kleinfontein het vroeër vanjaar nuus gemaak omdat dit ‘n Afrikanerdorpie is. Mense woon daar op grond van hulle kultuur, taal en assosiasie met die Voortrekkergeskiedenis.

Die voorsitter van die komitee, Jacob Khawe, sê geen bewyse kon vir die bewering gevind word nie.

Khawe sê egter hulle is van mening dat die Polisie enige tyd die gebied moet kan binnegaan omdat dit nie ‘n geïsoleerde gebied in Gauteng is nie. – RSG/praag

SANEF sal aanhou om foto’s van Nkandla te plaas

Die Nasionale Redakteursforum, SANEF, sê die media sal voortgaan foto’s van Nkandla te publiseer.

SANEF sê foto’s van veiligheidskenmerke van die opgraderings aan President Jacob Zuma se privaatwoning op Nkandla in KwaZulu-Natal wek aansienlike openbare belangstelling, en daarom sal hulle voortgaan om dit af te neem en te plaas.

Suid-Afrika se veiligheidsgroepering het vroeër aangedui dat sulke foto’s nie wenslik is nie.

SANEF het na die groepering se versoek aan die media en lede van die publiek om nie sulke foto’s te publiseer nie, gesê hulle sal nie gehoor gee daaraan nie.

Die Ministers het vroeër in Pretoria ‘n sterk waarskuwing gerig dat diegene wat sulke foto’s publiseer, vervolg sal word aangesien die woning ‘n nasionale sleutelpunt is.

Die Grondwetkenner, Pierre de Vos, sê daar is geen wetgewing wat die publikasie van foto’s van nasionale sleutelpunte verbied nie.

De Vos sê indien dit wel ‘n oortreding van de wet sou wees om sulke foto’s te publiseer, sal dit ook onwettig wees om die opening van die Parlement uit te saai aangesien dit ook ‘n Nasionale Sleutelpunt is.

Twee OTM’s in Kaapstad opgeblaas

Die polisie soek na twee verdagtes wat Donderdagoggend twee OTM-masjiene in Brackenfell, Kaapstad opgeblaas het.

Die gewapende mans het die OTM’e by die Glengarry-winkelsentrum opgeblaas, maar het met leë hande gevlug.

Volgens die polisie het die mans twee van die winkelsentrum se veiligheidswagte in die sentrum se parkeerarea vasgebind.

Vier ploftoestelle het ontplof en ooggetuies het gesien hoe die verdagtes vlug.

Die twee kitsbanke was met ‘n nuwe toestel toegerus wat blou kleurstof vrygestel het met die eerste ontploffing en toe die geld gevlek het. – EWN

Straatsmouse vas oor Mandela-fliek

Die Amerikaanse Mandela het niks met ons eie weergawe in gemeen nie

Twee buitelanders is in Randburg noord van Johannesburg vasgetrek nadat hulle na bewering roofkopieë van ‘n nuwe fliek oor Mandela verkoop het.

Die polisie het egter vasgestel dat die roof DVD’s die titel van ‘n nuwe Amerikaanse rolprent gebruik, maar die inhoud verskil totaal van die film.

Die straatsmouse het dokumentêre programme van oudpresident Nelson Mandela verkoop met die titel van die nuwe rolprent oor die oud-terroris “Long Walk tot Freedom”.

Die subtitel van die film heet: It’s an ideal for which I’m prepared to die.

Dit is ook onder meer die titel van ‘n prenteboek deur Chris van Wyk.

Die rolprent word aanstaande Donderdag in Suid-Afrika vrygestel.

Praag het met swart Suid-Afrikaners van Diepsloot gesels oor die rolprent waarin Amerikaanse akteurs die rolle van swart Suid-Afrikaners speel.

Die meeste het nog nooit daarvan gehoor nie en het gesê hulle stel ook nie belang om daarna te gaan kyk nie, aangesien dit sonder respek vir die siek Mandela is.

Haelstorm verwoes Ceres-oes

Boere in die Witzenberg-distrik – wat Ceres, Tulbagh, die Koue Bokkeveld, Wolseley en die vallei insluit – se drome van ’n goeie oes is verlede Vrydag deur ’n haelstorm verwoes.

Die Burger berig dat tussen R150 miljoen en R200 miljoen se skade in Ceres deur hael aan boere se appel- en peer-oeste aangerig is.

Dié bedryf dra sowat R3 miljard tot die ekonomie van die groter Ceres-gebied by, maar weens die oesskade gaan dit nou aansienlik minder wees, het Hannes Hanekom, voorsitter van die Ceres/Witzenberg-boerevereniging gesê.

Die meeste plase het tussen 50% en 100% skade gely.

Mosambiek stem sonder Renamo

Stemmery in Mosambiek het grooliks vreedsaam verloop in gister se verkiesing te midde van spanning en sporadiese voorvalle van geweld wat die afgelope tyd tussen die regering en die opposisieparty Renamo voorgekom het.

Renamo het die verkiesing geboikot.

In sommige gebiede het ongerymdhede voorgekom en die Verkiesingskommissie het aangekondig dat die uitslag in die Nampula-provinsie in die noorde van die land teruggehou sal word weens ‘n fout op die stembrief.

Stemmery in die gebied sal herhaal word. In sommige gebiede het kiesers meer as een keer gestem of vertragings het voorgekom. – RSG

Regstappe teen Indiër-kontrakteurs van Tongaat-gebou

Die ondervoorsitter van Cosatu in KwaZulu-Natal, Beauty Zibula, het gevra dat regstappe teen die kontrakteurs van die winkelsentrum by Tongaat noord van Durban ingestel word.

Die Indiër-kontrakteurs se konstruksiewerk het inmekaargestort nadat werkers op die perseel aangedui het dat die beton nie “hard” was nie. Die werkers het ‘n gerammel soos donderweer gehoor, waarna die steierwerk meegegee het en daarna die drie betonvloere.

Minstens een persoon is dood en 29 beseer – waarvan ‘n aantal ernstig – toe die gebou ineengetuimel het.

Die Ethekwini Metro het gesê die stad het die Rectangle Property Investments van Jay Singh drie keer gewaarsku teen die voortsetting van die konstruksiewerk omdat geen bouplanne ingedien is nie.

Daar word beweer dat ‘n hofinterdik Vrydag op die maatskappy beteken is, maar dat hy dit geïgnoreer het.

Zibula sê dit is bewys dat die eienaars nie die werkers se veiligheid in ag geneem het nie.

Polisie steel glo R2 miljoen se drank

Twee polisiebeamptes is in Elsburg, Germiston, in hegtenis geneem nadat hulle ‘n vragmotor gekaap en drank ter waarde van R2 miljoen gesteel het, het die Valke gesê.

Kapt. Paul Ramaloko, woordvoerder, het gesê ‘n adjudant-offisier en ‘n konstabel het op 1 November ‘n vragmotor op die N3 afgetrek.

Die vragmotorbestuurder en sy passasiers is by ‘n polisiekantoor aangehou terwyl die polisiebeamptes die drank by ‘n onbekende plek afgelaai het. Die groep is later vrygelaat.

“Hulle is aangekla van vragmotorkaping. Daar is ‘n moontlikheid dat ‘n aanklag van diefstal bygevoeg kan word,” het Ramaloko gesê.

Drank ter waarde van R100 000 is teruggevind.

Die mans sal na verwagting Donderdag in die Germiston-landdroshof verskyn. – Sapa

Zuma se regspan verdien byna R9 miljoen

Pres. Jacob Zuma se regsverteenwoordigers is die afgelope vier jaar meer as R8,8 miljoen betaal, het Jeff Radebe, minister van justisie, gesê.

Radebe het Woensdag in ‘n geskrewe antwoord op ‘n vraag in die parlement gesê die firma Hulley & Vennote het in 2009/10 altesaam R7 945 971 ontvang, R570 068 in 2010/11 en R327 890 in 2012/13.

Die private regsverteenwoordiger het Zuma ondermeer in die saak oor die multimiljardrand-wapentransaksie verteenwoordig, sowel as die saak oor die sogenaamde spioenasie-opnames.

Die DA het Woensdag in ‘n verklaring gesê die party sal opvolgvrae indien oor die bedrag wat betaal is. Dít is ‘n poging om vas te stel watter bedrag aan Michael Hulley, Zuma se prokureur, betaal is. – Sapa