Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

SA koop hardeware, kos, drank, tabak

Kleinhandelverkope in Suid-Afrika het almal verras, het RSG berig.

Dit het in Februarie met vier persent teenoor die ooreenstemmende tyd verlede jaar toegeneem.

Die syfer is beter as wat verwag is. Kleinhandelverkope het die afgelope twee maande teleurgestel.

Dit het in Desember gedaal en in Januarie effens herstel.

Statistieke Suid-Afrika sê die grootste stygings was in die hardewaresektor sowel as kos, drank en tabak.

Die KwaZulu-Natalse LUR vir Ekonomiese Ontwikkeling het intussen aangekondig dat hulle smouse in die lokasies gaan bystaan nadat buitelanders se winkels geplunder is.

Die provinsiale regering het glo driemiljoen rand opsygesit om ‘n provinsiale vereniging vir alle handelaars op die been te bring.

Die vereniging sal sy eie pakhuise en bergplekke vestig omdat smouse in die lokasies glo teen ‘n verlies moet werk.

Handelstoestande vir Suid-Afrikaanse sake-ondernemings gaan egter steeds agteruit terwyl die Handelsbedrywighede Indeks verlede maand met een punt tot 47 gedaal het.

Die Suid-Afrikaanse Kamer van Handel en Nywerheid, SACCI, sê die Indeks het in die eerste kwartaal met 9 punte gedaal en is drie punte onder sy vlak van ‘n jaar gelede.

SACCI sê ekonomiese vooruitsigte is steeds onseker en die druk op die handelsektor het vergroot.

Buitelandse winkels in Johannesburg sluit na dreigemente

Winkels in buitelandse besit in Johannesburg se middestad het begin om hul deure te sluit ná gerugte dat ‘n skare dreig om op ‘n plunderveldtog te gaan.

Nuus24 berig dat die meeste winkels op Breëstraat reeds gesluit is.

Eyewitness News het getwiet dat daar dreigemente van geweld in die sentrum Johannesburg is en sommige winkels is alreeds geplunder

‘n Polisiewoordvoerder Wayne Minnaar sê die metropolisie monitor die situasie.

Geweld het die afgelope week vanaf gebiede buite Durban na die middestad versprei en polisieversterkings moes uit ander dele van die provinsie ingeroep word.

By Ledig naby Sun City in Noordwes is ook voorvalle van plundery en brandstigting teen buitelanders aangemeld.

Intussen het die VN se voormalige Hoëkommissaris vir Menseregte, Navi Pillay, in Durban oor voortgesette xenofobiese aanvalle in Suid-Afrika gepraat.

Pillay het gesê Suid-Afrika moet ‘n strenger immigrasiebeleid instel en strenger beheer neem oor landsgrense.

Sy het Suid-Afrika se oop grense gekritiseer.

Die voormalige VN-amptenaar is deel van ‘n taakspan wat deur die KwaZulu-Natalse regering aangestel is om aandag te gee aan die geweld wat reeds vyf lewens geëis het, waaronder ook die van ‘n minderjarige.

Byna 2000 buitelanders is reeds na skuilplekke uitgedryf.

Die organisasie, Regslui vir Menseregte, sê die regering maatreëls in te stel om die integrasie van buitelanders in die samelewing te vergemaklik.

Hulle het gesê die regering en wetstoepassingsagentskappe moet optree om die huidige vlaag van geweld te ontlont.

Volgens Regslui vir Menseregte voel Suid-Afrikaners dat buitelanders hulle werksgeleenthede bedreig en dit lei tot misdaad en vreemdelingehaat.

Malawi het vroeër aangekondig dat hy sy burgers uit Suid-Afrika sal repatrieer na die toename in xenofobiese geweld.

Zimbabwe het gesê die aanvalle teen sy burgers in Durban sal nie betrekkinge tussen die twee lande beïnvloed nie.

MK dreig Vavi met dood

‘n Lid van Umkhonto we Sizwe Militêre veterane in Limpopo dreig om die geskorste Cosatu-sekretaris generaal Zwelinzima Vavi te vermoor, het Nuus24 berig.

Ondervoorsitter van die veterane-organisasie, Jack Lulamile, het aan vakbondverteenwoordigers gesê hulle moet vir Vavi sê Lulamile Jack, Chris Hani se voormalige lyfwag, gaan hom vermoor omdat hy Cosatu verraai het.

Lulamile en ander leiers het gister tydens die vergadering gesê Vavi is ‘n las vir die vakverbond.

Hulle sê Vavi het begin glo dat hy groter as die federasie is. Lulamile het aanbeveel dat Cosatu president Sdumo Dlamini van Vavi ontslae raak.

Hy ontken egter dat hy die uitvoerende bestuur se besluit beinvloed het.

Eskom kondig Fase 1-beurtkrag aan

Eskom het aangekondig dat hulle Fase 1-beurtkrag en kragvermindering van 06:00 vanoggend tot 22:00 vanaand sal toepas.

Dit volg nadat Eskom gister Fase 2-beurtkrag rondom 16:00 gistermiddag tot Fase 3-beurtkrag verhoog het.

Fase 3-beurtkrag is Dinsdag omstreeks 16:00 in werking gestel.

Die energieverskaffer sê in ‘n verklaring dat die inwerkingstelling van Fase 3-beurtkrag duidelik wys hoe weerbaar die stelsel op die oomblik is.

Eskom sê die stelsel is steeds onder geweldige druk en verbruikers moet asseblief elektrisiteit sover as moontlik bespaar.

VN spreek kommer uit oor xenofobiese geweld

Die Verenigde Nasies se Vlugtelingagentskap het sy kommer uitgespreek oor voortslepende xenofobiese geweld in die land.

Nog twaalf mense is intussen in hegtenis geneem in Durban vir openbare geweld waarin vyf mense reeds omgekom het.

Die plundery het Dinsdag na die Indiërbuurt Verulam uitgebrei.

Die Vlugtelingagentskap het berigte van buitelanders landwyd ontvang wat sê dat hulle vir hulle lewens vrees.

Die woordvoerder, Tina Ghelli sê talle vlugtelinge en asielsoekers word dakloos gelaat weens die geweld teen hulle en hulle het geen heenkome nie.

Die minister van binnelandse sake, Malusi Gigaba het gesê leiers moet hulle daarvan weerhou om opruiende taal te gebruik, wat deur sommige mense as kritiek teen die koning vertolk is.

Gigaba en ander ministers van die veiligheids-groepering het vroeër met die Zoeloekoning samesprekings gevoer oor sy kommer oor migrasie-bestuur.

Die vergadering het op versoek van die regering plaasgevind.

Geweld breek weer by Medupi uit

Geweld het uitgebreek tussen die polisie en stakende konstruksiewerkers van die Medupi-kragaanleg op Ellisras (Lephalale) in Limpopo, het RSG berig.

Pantservoertuie en waterkanonne is ook ingebring. Dit volg nadat polisie en werkers slaags geraak het by hostelle in die Marapong-township waar strate opnuut versper is en busse verhoed word om werkers op te laai.

Motors in die gebied is met klippe bestook en die ingang na die township is met brandende bande versper.

Sommige werkers kon egter daarin slaag om by die werk uit te kom. Die stakers het gister Eskom se aanbod om vandag vir werk aan te meld, verwerp.

Herrie oor Libiese gesante in Namibië

Die Republikein berig dat die DTA se president, mnr. McHenry Venaani, sê die Namibiese regering moet ’n beduidende standpunt inneem oor watter faksie in Libië amptelik erken word.

Libië is sedert die omverwerping en moord van die voormalige diktator, kolonel Muammar Gaddafi, in 2011 in politieke onrus gehul.

Venaani het verlede Donderdag in die parlement gesê die Namibiese regering het in die verlede die Gaddafi-bewind ondersteun, en dat voormalige president Hifikepunye Pohamba in die openbaar geweier het om die Nasio­nale Oorgangsraad (NTC) te erken.

Die NTC was vir tien maande ná Gaddafi se dood die werklike Libiese regering voordat die land in faksie­gevegte verstrengel geraak het.

In Windhoek het die NTC-vlag vir ’n paar dae by die Libiese ambassade gehang voordat dit verwyder is. Volgens die Weense Konvensie moet die gasheerland ’n ooreenkoms met die hoof van die ambassade aangaan rakende die diplomate wat in die land kan dien.

“Ondersteun ons die Raad van Afgevaardigdes (soms na verwys as die Huis van Verteenwoordigers) in Tobruk wat deur Abdullah al-­Thani gelei word en skynbaar die grootste internasionale ondersteuning en erkenning het, of erken ons die Nuwe Algemene Nasionale Kongres (NGNC) in Tripoli onder leiding van Nouri Abusahmain?” het Venaani gevra. “Ons moet ’n ondubbel­sinnige en bondige buitelandse beleid hê.”

Venaani wil voorts weet wie, of watter faksie, tans in die Libiese ambassade in Windhoek is en of hierdie diplomate die ambassade wettiglik beset.

Verkeershoof se bende voor

Sewe lede van ‘n sindikaat – wat die verkeershoof en drie verkeersbeamptes van De Aar insluit – is vandag op borgtog vrygelaat.

Die verdagtes – Desmond Mjandana, Stoffel Khabaliso, Janie Johannes, Puleng Mokhethi, Mandisa Mqwebedu, Simon Vywers en Xolile Stonga staan tereg op klagtes van bedrog, korrupsie, sameswering om ‘n misdaad te pleeg, oortreding van die Padverskeerswet en die uitreiking van valse bestuurslisensies.

Polisiewoordvoerder, Brigadier Mochologi-Maleeme, sê die sindikaat het na bewering onwettige bestuurslisensies en padwaardigheidsertifikate vir vermoedelik gesteelde voertuie aan die publiek verkoop.

Daar is ook op die verdgates se voertuie beslag gelê.

Dit is die tweede keer dat die verkeershoof in verband met soortgelyke klagtes in die hof verskyn. Hy is ook in 2008 aangekla, maar is onskuldig bevind.

Die verkeersbeamptes is op R2500 en die res op R1000 borgtog vrygelaat. Die saak is tot 4 Augustus uitgestel.

Kouefront in aantog

Suid-Afrikaners moet hulself intussen staal vir die eerste kouefront wat die land vandeesweek kan tref.

Die Vrystaatse weerdiens sê die eerste ryp van die seisoen sal op dorpe soos Zastron, Fouriesburg en Aliwal-Noord voorkom, met ‘n daling in temperature.

Ryp is ook in die Oos-Kaap voorspel. Die weerdiens sê die ysige temperature behoort KwaZulu-Natal teen môre-aand te bereik.

Daar is ook ‘n kans vir sneeu op sommige bergreekse later vandeesweek.

Medupi-stakers terug werk toe met netwerk onder groter druk

Die Nasionale Mynwerkersunie, Numsa, sê geskorste werknemers van die Medupi-kragstasie in Ellisras (Lephalale) sal na verwagting môre terugkeer werk toe. Dié aankondiging kom te midde van groot druk op die kragleweringsnetwerk.

Eskom het Woensdagaand fase-drie beurtkrag ingestel, en sê die kragnetwerk is tans kwesbaar.

Nuus24 berig ten minste 1 500 werknemers is uit die kragstasie gesluit nadat hulle ‘n bonus vir die voltooiing van eenheid 6 geëis het.

Numsa-streekswoordvoerder, Mahlodi Modike, sê hulle sal steeds vandag met werknemers vergader om die voorstel van die werkgewer te bespreek. Sommige van die werkers het boodskappe ontvang dat hulle geskors is, terwyl ander bloot uitgesluit is.

Dié aksie het tot die staking aanleiding gegee.

Eskom en Numsa het drie dae lank onderhandel, waarna die geskorste werkers uiteindelik toegelaat is om terug te keer werk toe. Die bonuseis is egter nog nie uitgeklaar nie.

Eskom het intussen aangekondig dat Fase Twee beurtkrag van sesuur vanoggend tot tienuur vanaand hervat sal word.

Die kragvoorsiener sê die netwerk is onder druk weens opwekkingseenhede wat buite werking is. Fase Drie beurtkrag is Woensdag ingestel nadat geskeduleerde onderbrekings sedert Sondag voorkom.

Die Johannesburgse elektrisiteit-nutsmaatskappy City Power het bekend gemaak dat ‘n nuwe stelsel in werking gestel word.

Volgens die kragbeperking-stelsel sal krag na huishoudings gesny word wat elektrisiteit buitensporig gebruik. Dit sal egter slegs geld vir huishoudings met slim-meters.

Die burgemeester van Johannesburg, Parks Tau wat die loodsfase in Aspen Hills bekend gestel het, sê verbruikers sal aangemoedig word om krag tydens dié tydperke spaarsaam te gebruik.