Zanu-PF-oorwinning: Wit en swart reaksies

zanuPolisielede, toegerus met outomatiese gewere, het in Zimbabwe bykomende padblokkades in Harare opgerig en beman te midde van onsekerheid oor die opposisie MDC se aanklag dat die pasafgelope verkiesing ‘n klug is en dat Zanu-PF die verkiesing gesteel het.

Dié stap volg ook na ‘n oproep van geestelike leiers dat mense vir vrede moet bid na die oorweldigende oorwinning van president Robert Mugabe en Zanu PF in die land se nasionale verkiesing.

Verskeie kerke waaronder die Rooms Katolieke kerk het hulle lidmate gevra om selfbeheersing en geduld aan die dag te lê.

Die MDC-leier, Morgan Tsvangirai, het die uitslag van die verkiesing wat aan Zanu PF ‘n tweederde meerderheid in die parlement gegee het, verwerp en gesê hy sal dit betwis.

Mugabe het 62% van die stemme in die presidensiële verkiesing op hom verenig.

Die 61-jarige Tsvangirai, leier van die Beweging vir Demokratiese Verandering (MDC) het nou die derde keer onsuksesvol probeer om Mugabe te ontsetel.

Westerse magte, wat verbied is om volle waarnemerspanne in Zimbabwe te ontplooi, het hul ernstige bedenkinge oor die stemmery uitgespreek ná kommer oor ongerymdhede.

Sondag, het Duitsland gesê die verkiesing “gooi ‘n groot skaduwee oor die politieke en ekonomiese toekoms van Zimbabwe“, terwyl Australië om nuwe verkiesings gevra het.

“Gegewe ons twyfel oor die resultate, doen Australië ‘n beroep vir ‘n herverkiesing wat gebaseer is op ‘n geverifieerde en aanvaarbare kieserslys,” het die minister van buitelandse sake Bob Carr in ‘n verklaring gesê.

Die Amerikaanse minister van buitelandse John Kerry het Saterdag die verkiesing as “diep gebrekkig” beskryf en gesê Washington “glo nie dat die resultate … vandag ‘n geloofwaardige uitdrukking van die wil van die mense van Zimbabwe verteenwoordig nie“.

Die Britse minister van buitelandse sake William Hague het sy “ernstige kommer” oor die stemmery in die voormalige kolonie uitgespreek.

Die verkiesing is egter meestal met blydskap op die Afrika-kontinent begroet. President Jacob Zuma het sy gelukwensinge aan Mugabe Sondag oorgedra.

In Harare se oudste lokasie Mbare het honderde Mugabe-ondersteuners Sondag ‘n wit kis gedrapeer in ‘n MDC-vlag gedra, met die opskrif “RIP Morgan“.

“Mense is opgewonde,” het een van die optoggangers, Tatenda Savanhu, 26, ‘n ekonoom, gesê.

“Dit is regtig ‘n oomblik van vreugde dat die GNU [koalisie-regering] nou verby is dat ons‘n era van Zanu-PF binnegaan“.

Klag teen Mogoeng kom

Regter Mogoeng
Regter Mogoeng

Die Regterlike Dienskommissie (RDK) sal na verwagting vandeesweek ‘n amptelike klag ontvang waarin hoofregter Mogoeng Mogoeng se kop geëis word.

Dit is die jongste verwikkeling in die geskil rondom verandering aan die regbank en hoe die Regterlike Dienskommissie aanbevelings maak vir die aanstelling van regters.

Vrae is gevra oor die aanbevelings wat vroue regters betref asook ‘n ongunstige benadering teenoor wit mans.

Mogoeng het in sy toespraak getiteld “Die plig om te transformeer” by ‘n algemene jaarvergadering verlede maand van die Advocates for Transformation dit duidelik gemaak dat wit mans nie welkom is nie.

Die klag teen Mogoeng volg ná korrespondensie tussen homself en die direkteur van die Instituut vir Verantwoordbaarheid in Suider-Afrika, Paul Hoffman.

Hoffman het in ‘n brief aan Mogoeng gesê dit is ongrondwetlik om die loopbaan van enige persoon op grond van ras of geslag te benadeel.

Vroeër vanjaar het die RDK ‘n besprekingsdokument, geskryf deur advokaat Izak Smuts, verwerp waarin Smuts beweer die persepsie dat wit mans nie gunstig vir oorweeg word vir aanstellings nie, is besig om toe te neem.

Hy het bedank uit die kommissie ná hewige debatte.

Brandstigting ondersoek na 4 sterf

Cape York-gebou
Cape York-gebou

‘n Saak van brandstigting word deur die polisie ondersoek nadat ‘n brand in die Johannesburgse middestad die lewens van drie volwassenes en ‘n baba geëis het.

Die brand het in die Cape York-gebou uitgebreek, toe ‘n petrolbom in ‘n woonstel geslinger is, nadat ‘n stryery tussen ‘n man en vrou ontstaan het.

Niemand is nog in verband met die voorval in hegtenis geneem nie.

Die liggame van twee volwassenes en ‘n baba is in die puin van ‘n woonstelgebou gevind. Hulle is deur die rook oorval.

‘n Vierde persoon het by die gebou uitgespring om die vlammehel te ontsnap. Hy is op pad na die hospitaal toe dood.

Pretoriase reeksmoordenaar steeds op vrye voet

sapstape‘n Vermeende reeksmoordenaar en -verkragter is in Pretoria op vrye voet.

Die verdagte word reeds positief met vier moorde verbind. Altesaam 14 moorde in Sunnyside, Villeria en Mamelodi word ondersoek aangesien dieselfde metodes gebruik is.

Die polisiekommissaris, Riah Phiyega, het gister ‘n spesiale span speurders aangestel om die moordenaar te soek.

Die span sluit lede van verskillende eenhede in soos gesinsgeweld, kinderbeskerming, seksuele oortredings, misdaadintelligensie, DNS-ontleders en ‘n profielsamesteller. – RSG

Wapenskandaal-ondersoek open

Patricia de Lille
Patricia de Lille

Die langverwagte Kommissie van Ondersoek na strategiese verdedigingsaankope begin vandag in Pretoria met sy openbare sittings.

President Jacob Zuma het in 2011 die kommissie aangestel ná oproepe deur opposisiepartye dat bewerings van bedrog en korrupsie ondersoek word.

Die kommissie het egter verskeie terugslae beleef met die bedanking van sleutelpersoneellede. Een van die kommissarisse, regter Francis Legodi, het verlede week sy bedanking ingedien, terwyl die getuienisleier, Tayob Aboobaker Vrydag bedank het, maar gister sy bedanking teruggetrek het.

Die kommissie het bekendgemaak dat Aboobaker Vrydag sy bedanking ingedien het, maar dat hy dit teruggetrek het nadat daar met hom gesprek gevoer is.

Die woordvoerder van die kommissie, William Baloyi, kon nie redes verskaf vir Aboobaker se bedanking nie. Aboobaker is die mees senior regspersoon in die kommissie.

Volgens bronne het Aboobaker die kommissie van nepotisme, binne-gevegte en ‘n gebrek aan professionaliteit beskuldig.

Oudpresident Thabo Mbeki, die beplanningsminister, Trevor Manuel en die oudministers Mosioua Lekota, Ronnie Kasrils en Alec Erwin sal verskyn.

Die burgemeester van Kaapstad, Patricia de Lille, wat beskou word as die persoon wat die beweerde bedrog oopgevlek het, sê die kommissie moet ‘n kans gegun word om sy werk te doen.

De Lille het haar kommer uitgespreek omdat die Seriti-kommissie van ondersoek na die wapentransaksie binne ses maande aan president Jacob Zuma moet verslag doen.

Sy sê die president self word by van die bewerings betrek.

Die ondersoek na die omstrede wapentransaksie in die laat negentiger-jare, begin vandag met hul openbare sittings.

Die onafhanklike verdedigingskenner, Helmoed-Romer Heitman sê teen die tyd het diegene wat by korrupsie betrokke was waarskynlik reeds hul voetspore doodgevee. – RSG

Pak slae tuis dalk onwettig

stoutDie minister van maatskaplike ontwikkeling het glo gesê ouers moet hul kinders met behoorlike waardes grootmaak om seker te maak dat hulle nie hul eie kinders eindelik doodmaak nie.

’n Nuwe wetsontwerp kan dit onwettig gaan maak vir ouers om hul kinders by die huis ’n pak slae te gee.

Bathabile Dlamini, die minister van maatskaplike ontwikkeling het glo aan ‘n koerant gesê ouers moet hul kinders met behoorlike waardes grootmaak om seker te maak dat hulle nie hul eie kinders eindelik doodmaak nie.

“As ’n man sy vrou slaan, is dit ’n misdaad, maar as ’n ouer ’n hulpelose kind slaan, is dit nie onwettig nie,” het sy glo gesê.

Volgens berigte kan ouers ingevolge dié wetsontwerp van aanranding aangekla word as indien hulle kinders met ’n plat hand op hul boude slaan of enige ander metode van lyfstraf toedien.

Lyfstraf by skole is reeds in 2006 onwettig verklaar.

Dit is glo die tweede keer dat die nie-regerings­organisasie, Children’s Right Project, poog om pak slae onwettig te maak.

In 2007 het hul eerste poging glo misluk nadat hulle glo hewige teenkanting van kulturele en godsdienstige groepe ontvang het. – looklocal.co.za

Swazi-hoofman verbied minirompe en broeke vir vroue

Die Swazivlag
Die Swazivlag

‘n Swazi-hoofman het vroue verbied om minirompe en broeke te dra tydens ‘n tweedaagse nominasieproses wat gister begin het kandidate vir die voorgenome verkiesing aan te wys.

“Ek het onlangs aan die inwoners gesê dat hulle môre behoorlik moet aantrek, ordentlik soos ons gebruik is, om respek te betoon,” het prins Mashila van Maphalaleni, ‘n stam omtrent 20 kilometer van Mbabane, gesê. “Dis al waarvoor ek gevra het – net om respek vir die hoofman se woonplek te betoon,” het hy aan AFP verklaar.

Nog ‘n hoofman het kort rokke by sy kraal in die klein monargie verbied.

Maar die goewerneur by die woning van koning Mswati III, Afrika se laaste absolute heerser, het ‘n meer versoenende houding ingeslaan.

“Dis waar dat ons ons hoofmanne se wonings wil laat respekteer, dis ons kultuur,” het TImothy Mtetwa gesê. “Maar vanweë modernisering, kan ons nie broeke en minirompe wegwens nie en by ‘n sekere punt moet ons hulle omhels en akkommodeer

Die twee dae lange proses sal kandidate vir die parlement en ander plaaslike poste nomineer.

Ongeveer 600 000 van die bergkoninkryk se 1,1 miljoen mense sal na verwagting aan die verkiesing op 20 September deelneem, wat reeds deur opposisiegroepe gekritiseer is.

Swaziland het in politieke partye in 1973 verbied. – AFP

VSA, EU twyfel oor Zim-uitslag

Catherine Ashton
Catherine Ashton

Amerika en die Europese Unie het hul twyfel uitgespreek oor die geldigheid van Zimbabwe se presidensiële en parlementêre verkiesing.

President Robert Mugabe en sy ZANU-PF party het as duidelike wenners uit die stryd getree.

Die Amerikaanse minister van Buitelandse sake, John Kerry sê hy glo nie dat die amptelike uitslag die wil van Zimbabwiese burgers weerspieel nie.

Kerry het ‘n beroep op die Suider Afrikaanse Ontwikkelingsgemeenskap en die Afrika-Unie gedoen om in te gryp. Hy het ook die Zimbabwiese regering gevra om ‘n plan te maak sodat Zimbabwiërs hul mees fundamentele demokratiese reg in ‘n vry en regverdige omgewing kan uitoefen.

Die Europese Unie het op sy beurt gesê hy is bekommerd oor die beweerde onreëlmatighede en ‘n gebrek aan deursigtigheid in die verkiesings.

Die EU se uiteindelike besluit oor die verkiesing, sal deurslaggewend wees wanneer besluit word oor die verslapping of verstewiging van sanksies teen Zimbabwe.

Die EU se buitelandse beleidshoof – Catherine Ashton – sê die EU sal die verwikkelinge die volgende paar weke noukeurig dophou.

Volgens die amptelike uitslag het president Robert Mugabe die presidentsverkiesing met 61 persent gewen, terwyl Morgan Tsvangirai van die MDC 33 persent van die stemme op hom verenig het.

Die ZANU-PF-party het vroeër ‘n tweederde-meerderheid in die parlement gekry toe hy 150 van die 210 setels ingepalm het. – RSG

Swartbemagtigingsfonds verdedig R34m vir luuksewinkel

Khanyi Dhlomo
Khanyi Dhlomo

Die uitvoerende beampte van die Nasionale Bemagtigingsfonds, Philisiwe Mthethwa, verdedig die besluit om ‘n luukseboetiek in Johannesburg te befonds deur te sê dat die kleinhandelsektor rassetransformasie benodig. Só berig die koerant The New Age.

“Die afgelope vier dae is transformasie bevraagteken, miskien omdat sekere mense nie die behoefte aan bemagtiging vir vroue insien nie, miskien omdat sommiges nie die behoefte aan transformasie in die kleinhandelsektor insien nie,” sê Mthethwa, volgens die koerant.

Dié opmerkings deur Mthethwa is tydens ‘n konferensie van die Swart Sakeraad (Black Business Council) in Midrand gemaak.

Volgens die New Age, sou sy gesê het dat die mense wat die kleinhandelsektor in Suid-Afrika ondersteun, swart is, dog die sektor bly blank, en meer swartmense is nodig om aan die sakekant deel te neem.

“Ek sien uit na die dag as die werk van swartmense met vertroue en waardering begroet sal word en nie met instinktiewe agterdog van kwaaddoenery en oortredings wat tans reaksies op ondernemings deur swartmense kenmerk nie.”

Die regering se swartbemagtigingsfonds het R34,1 miljoen aan finansiering vir Ndalo Luxury Ventures (NLV) goedgekeur om die Luminance-boetiek, wat luukseklere en verwante goedere verkoop, in Hydepark, Johannesburg, te vestig.

Die boetiek word deur die media-sakevrou, Khanyi Dhlomo, haar ma Venetia en die sakevrou Judy Dhlamini bestuur.

Dinsdagaand het die minister van handel en nywerheid, Rob Davies, gesê dat hy ‘n uitgebreide verslag van die swartbemagtigingsfonds rondom die finansiering vir NLV aangevra het. – sapa

Wilgehof: Departement, TV-kameras slaan toe oor nóg ‘n k-woord

wilgehofDie Volksblad berig dat die Vrystaatse departement van onderwys teleurgesteld moes omdraai nadat amptenare met ’n TV-nuusspan by die Laerskool Wilgehof in Bloemfontein opgedaag het om ’n onderwyseres te skors na nóg ’n beweerde rassevoorval .

Amptenare van die departement ’n skorsingsbrief aan die leerkrag oorhandig, maar moes uitvind dat sy ’n beheerliggaampos beklee en nie deur die departement geskors kan word nie.

Die onderwyseres het die aantygings teen haar ten sterkste ontken en gesê sy beplan om dadelik stappe te neem teen dié ongegronde aantygings.

Howard Ndaba, woordvoerder van die departement, sê sy het glo die k-woord gebruik.

Omdat sy nog nie amptelik aangekla is nie, kan haar naam nie bekend gemaak word nie.

Magda Strydom, sekretaris van die Suid-Afrikaanse Onderwysersunie (SAOU), sê die departement se bewerings dat die onderwyseres ’n rassistiese opmerking teenoor leerlinge vroeër vandeesweek in ’n voorval op die skoolterrein gemaak het, is ongegrond.

Sy gaan voort met haar pligte terwyl die beheerliggaam die saak ondersoek, sê Strydom.

Ndaba sê die Vrystaatse onderwysdepartement sal met Fedsas en die skool se beheerliggaam saamwerk om toe te sien dat die onderwyseres tydelik geskors word hangende ‘n ondersoek.

‘n Ondersoek kan nie geskied as sy nog by die skool betrokke is nie, sê Ndaba.

Dié aantygings kom te midde van die laerskool se geskorste skoolhoof, Fanie Roeloffze, en Lenard MacKay, ’n onderwyser, wat albei binnekort voor ’n dissiplinêre komitee van die Vrystaatse onderwysdepartement sal verskyn oor beweerde rassisme.