‘n Arbeidsontleder, Terry Bell het mynmaatskappye gewaarsku om simpatiek te wees teenoor die lot van mynwerkers, het RSG berig.
Lede van die vakbond Amcu het in Januarie begin staak. Hulle eis ‘n intreevlak-salaris van R12 500.
Die kommissie vir versoening, bemiddeling en arbitrasie (KVBA), het samesperkings om die staking in die platinumsektor te beëindig, vir ‘n onbepaalde tyd opgeskort omdat Amcu en platinummaatskappye sê hulle mandate laat hulle nie toe om verder te onderhandel nie.
Die drie grootste platinummaatskappye het meer as sewe miljard rand in inkomste verloor sedert die staking begin het, terwyl werkers meer as drie miljard rand in lone verloor het.
Bell sê egter dat mynmaatskappye hulle verliese sal kan verhaal, terwyl mynwerkers nie so maklik sal herstel van die staking nie.
Amcu hou vandag ‘n optog na die Uniegebou om ‘n memorandum met eise aan regeringsamptenare te oorhandig.
Die DA en VF+ staan die nuwe klousule teen wat buitelandse eienaarskap in die privaatsekuruteitsbedryf beperk. Dié partye sê dit sal “werkloosheid” meebring.
Die wetgewing is daarop gemik om strenger regulering in die privaatsekuriteitsbedryf toe te pas. Daar is meer lede in dié bedryf as in die weermag en polisie saam.
Die Nasionale Raad van Provinsies het die Wysigingswetsontwerp oor die Regulering van die Privaatsekuriteitsbedryf met 20 stemme teenoor 9 goedgekeur.
Die wetsontwerp is verlede week in die Nasionale Vergadering aanvaar. President Jacob Zuma sal eersdaags die wetsontwerp bekragtig.
Privaat eienaarskap sal tot 49% beperk word.
Die DA sê die wetsontwerp gaan ook ‘n nadelige uitwerking op die ekonomie hê. Die VF+ het vroeër gesê die wetsontwerp is “ongrondwetlik”.
Eskom het ‘n beroep op die publiek gedoen om kragverbruik te verminder, nadat die kragvoorsiener ‘n nuwe noodtoestand uitgeroep het.
Eskom het Donderdagoggend opnuut ‘n noodtoestand verklaar en gewaarsku dat hulle genoodsaak sal wees om beurtkrag toe te pas.
‘n Woordvoerder van Eskom, Andrew Etzinger sê steenkool-voorrade is glo nat na sewe dae se swaar reëns.
Etzinger sê hulle het groot nywerheids-kliënte gevra om hulle kragverbruik met 10 persent te verminder, maar die vermindering blyk nie genoeg te wees om die kragtekort te verlig nie.
Volgens Etzinger sal dit beteken dat beurtkrag toegepas mag word.
President Jacob Zuma is gisteraand weereens geboe toe hy op die sokkerveld van die ENB-stadium stap na afloop van die wedstryd tussen die SA span en Brasilië.
Zuma is uitgejou en geboe toe sy naam aangekondig is tydens die seremonie ná die wedstryd.
Brasilië het die wedstryd teen Bafana Bafana maklik met 5-0 gewen.
Zuma het die gasheerskap van die Fifa-wêreldbeker aan Brasilië, wat die gasheerland vir 2014 is, oorhandig.
Saam met hom op die verhoog het die sportminister Fikile Mbalula verskyn, asook die president van die SA Sokkervereniging, Danny Jordaan, en verskeie Brasiliaanse hoëlui wat gedenkplaatjies vir die gebeurtenis ontvang het.
Zuma is voorheen in Desember 2013 by die ENB-stadion geboe tydens die gedenkdiens vir Nelson Mandela.
Petrolpryse sal vandag weer styg. Motoriste word opnuut gestraf deurdat brandstof nou byna R15 per liter petrol sal kos.
Alle grade petrol het om middernag met 36 sent ‘n liter die hoogte in geskiet. Diesel kos nou tussen 27 en 28 sent meer.
Die impak op motoriste sal onmiddellik gevoel word, maar die styging sal ook uiteindelik weer bydra tot hoër voedselpryse.
Hoër voedselpryse word wêreldwyd verbind met opstande en rewolusies wat selfs verkose regerings destabiliseer.
Die hoof van die wêreld se grootste voedselmaatskappy het gewaarsku dat stygende voedselpryse tot verdere opstande kan lei soos in 2008.
Die Switserse voorsitter van Nestlé, Peter Brabeck het vroeër aan ‘n Oostenrykse koerant gesê stygende pryse is ‘n produk van ‘n groeiende wêreldbevolking, die opkoms van ‘n middelklas in lande soos Indië wat gretig is om meer vleis te eet, en die toenemende vraag na water.
Brabeck het gesê: “Dit is die nuwe werklikheid.”
In die geval van die Franse Revolusie is die krisis, hongersnood, kunsmatig geskep deur die Jakobyne wat sleutelposisies in die vervaardiging van die opstand gehad het.
Hulle het wetteloosheid aangemoedig deur ‘n groep boewe hul gang te laat gaan. Daarna het hulle meer invloedryke lede van die gemeenskap gekry om ‘n oproep vir “wet en orde” te doen en duisende Franse mans is na die guillotine gestuur. Daarmee het die verdeling tussen ryk en arm versterk.
In die lente en somer van 1789 is ‘n kunsmatige tekort aan graan geskep deur manipulasies van die graanmark. Dit het tot ‘n hongersnood gelei.
Maar in werklikheid het die samesweerders voedselvoorrade en alle hervormings in die Nasionale Vergadering geblokkeer om die situasie te vererger en die bevolking uit te honger.
Daar is dus ruim voorbeelde uit die geskiedenis wat aantoon hoe kunsmatige manipulasie van voedselpryse aanleiding tot opstand kan gee.
Die minister van finansies, Pravin Gordhan het tydens sy begroting aangekondig dat die brandstofheffing en bydrae tot die padongelukkefonds van 2 April verhoog word.
Dit beteken ‘n bykomende verhoging van 20-sent per liter.
Georganiseerde misdaadsindikate wat Durbanse hawens gebruik, gaan beteken dat die stad die middelpunt van dwelmhandel in Suider-Afrika word, het RSG berig.
Die direkteur van die Internasionale Narkotika Beheerraad, Lochan Naidoo, het die organisasie se jaarverslag in Durban bekendgemaak.
Dagga, heroïen, crack, tik en kokaïen is die dwelmmiddels wat die meeste in Suid-Afrika gebruik word.
Dit is die eerste keer dat Durban genoem word in die raad se ontleding oor dwelmhandel regoor die wêreld.
Naidoo sê hulle kry die afgelope tyd al hoe meer berigte van beslagleggings by die Koning Shaka-lughawe van kokaïene wat uit die Golf-state afkomstig is.
Hy sê bouwerk aan die Durbanse hawe en die onvermoë om te bepaal wanneer vermeende dwelmbesendings verwag word bemoeilik sake.
Volgens Naidoo word lande waar dwelmhandel plaasvind uiteindelik dwelmverbruikers.
Suid-Afrika spog met 11 landstale wat blykbaar daagliks in geen hof tot hul reg kom nie en regspleging benadeel. Dié opspraakwekkende leemte in Maandag tydens die Oscar Pistorius-moordverhoor aan die wêreldmedia ontbloot.
Die gehalte van tolkwerk in howe is van kardinale belang, aangesien stemming en inhoud wat oorgedra word hoogsgespesialiseerde taalvaardige tolke vereis en hul rol om getuienis vas te lê mag selfs die verskil tussen lewenslange tronkstraf en kwytskelding beteken.
Die gehalte van die tolk op die eerste dag van die Oscar Pistorius-moordverhoor was “skandalig” het ‘n regsgeleerde aan Beeld gesê.
Die tolkwerk van Afrikaans na Engels in die hooggeregshof in Pretoria is as “pateties” beskryf.
Die getuienis van die staat se eerste getuie, Michelle Burger, ‘n buurvrou van die moordaangeklaagde paralimpiese atleet was in Afrikaans.
Volgens Jacques Steenkamp, ervare misdaadverslaggewer, het die eerste tolk nie kans gesien om voort te gaan met al die internasionale media-aandag wat op die verhoor gefokus is nie.
Die tolk wat Burger se getuienis van Afrikaans na Engels moes vertaal, het ‘n paar keer Burger se woorde verdraai, en veral ‘n beskrywing van die tye tussen die vier skote, verkeerd weergegee.
Dit het die getuie Burger, wat gelukkig Engels magtig is, ‘n paar keer genoop om self in Engels aan regter Thokozile Matilda Masipa te probeer verduidelik wat sy eintlik gesê het.
Dit is ook nie duidelik waarom ‘n regter gekies is wat nie Afrikaans verstaan nie, terwyl daar talle sulke regters is.
Die regsgeleerde het aan Beeld gesê die gehalte van tolke in diens van die departement van justisie wat van Afrikaans na Engels moet tolk is ‘n skande en regslui word daagliks in howe gekonfronteer met dié bedenklike kwaliteit van diens.
Met die oë van die wêreld op Suid-Afrika se regstelsel gerig, sou ‘n mens ten minste verwag dat die tolk gekwalifiseer is vir die belangrike taak om geregtigheid te laat geskied.
Veral ook in die lig van die vorige gebaretolkfiasko by Mandela se gedenkdiens, toe ‘n skisofreen allerlei bobbejaanstreke voor internasionale staatshoofde en media uitgehaal het, is die versuim onverstaanbaar.
Woorde wat verkeerd getolk word plaas onregverdige druk op die getuie, die regspan en die regter en kan ‘n regverdige verhoor kelder, het die regsgeleerde, ‘n strafregdeskundige, aan Beeld gesê.
“Wanneer jou woorde verkeerd in die hof getolk word, ontstaan daar onmiddellik ‘n onreëlmatigheid wat gronde gee vir ‘n hersieningsaansoek teen die billikheid van die verhoor. In wese veroorsaak dit dat die regter ‘n verkeerde afleiding maak van dit wat die getuie sê en dit kan tot ‘n verkeerde bevinding lui,” het hy verduidelik.
Nog ‘n regsgeleerde het aan Praag gesê die agteruitgang van die ander landstale duur al die afgelope twintig jaar deurdat openlike voorkeur aan Engels gegee word en Suid-Afrikaners wat nie Engels magtig is nie, word ontsettend daardeur benadeel.
Dit is uiters kommerwekkend dat dit daagliks in Suid-Afrikaanse howe afspeel sonder dat die kwessie hoegenaamd aandag geniet.
Tony Yengeni, oud-MK en lid van die ANC se uitvoerende komitee, sal Dinsdag in die Kaapstadse landdroshof tereg te staan op ‘n aanklag van dronkbestuur.
Yengeni is op die oomblik uit op R500 borgtog.
Hy is in Augustus verlede jaar in Groenpunt in hegtenis geneem.
Yengeni is hoof van die ANC se politieke skool
Dit is die tweede klag van dronkbestuur teen hom. In November 2007 is hy in Goodwood, Kaapstad ook in hegtenis geneem vir dronkbestuur. Die saak is uitgegooi omdat daar met bloedmonsters gepeuter was.
Yengeni is voorheen skuldig bevind aan bedrog toe hy afslag op ‘n luukse motor tydens die tenderproses vir ‘n omstrede wapentransaksie bekom het.
Michael Woerfel van EADS was ook in die bedrogsaak betrek terwyl Yengeni lid van ‘n parlementêre komitee was.
Yengeni moes verslag oor transaksie doen. Die saak teen Woerfel is teruggetrek omdat Yengeni onskuldig bevind is op die aanklagte ivm Woerfel.
Yengeni is na die Pollsmoor-gevangenis naby Kaapstad gestuur in 2006, maar byna onmiddellik na die meer moderne Malmesbury-gevangenis oorgeplaas.
Hy is op parool vrygelaat op 15 Januarie 2007 ná die voltooiing van ‘n skamele vier maande van die vier-jaar vonnis.
Inwoners van Kanyamazane en Pienaar in Mpumalanga beweer dat die water vergiftig is, nadat hulle die naweek op ‘n plundertog teen buitelanders gegaan het.
Oproeriges het die hoofpad in die gebied met brandende bande en klippe versper in die voortslepende xenofobiese geweld.
Die oproer het begin toe ‘n Somaliër verlede week ‘n 20-jarige man doodgeskiet het.
Die oorledene is Sondag begrawe, Ná die begrafnis het inwoners die buitelanders se winkels ingevaar, gevandaliseer, besteel en aan die brand gesteek.
Hulle het vyf winkels wat aan buitelanders behoort geplunder en vier afgebrand. Nege mense is tot op hede in hegtenis geneem ivm openbare geweld.
Die Mbombela munisipaliteit sê hulle ondersoek die bewerings dat die water ook vergiftig is.
