Nuus Archives - Page 626 of 1583

Rietvlei se renosters onthoring

Alle wit renosters in die Rietvlei-natuurreservaat buite Pretoria is onthoring om hulle van stropers te beskerm, het die stad Tshwane Dinsdag gesê.

‘n Opgeleide wildvanger het die operasies uitgevoer en ‘n toepaslike permit vir die proses is uitgereik, het Selby Bokaba, woordvoerder, in ‘n verklaring gesê.

“Mikroskyfies is op die diere en horings ingeplant en DNS-monsters is geneem vir ‘n databank in Onderstepoort.”

Bokaba het gesê altesaam 1 722 renosters is tussen 2010 en 30 April 2013 gestroop. Drie jaar gelede het die metro twee renosters weens stroperery verloor.

“Wanneer renosters onthoring word, sal die horings op dieselfde manier as ‘n vingernael teruggroei. Die teruggroei van ‘n renosterhoring is tussen sowat vier en sewe sentimeter per jaar.” – Sapa

Vier vas vir wrede moord in Oranjeville

Die polisie het vier verdagtes in hegtenis geneem na die grusame moord op Vivien Ponté (57) in Oranjeville. Die vrou se verbrande lyk is Maandagoggend deur die polisie en bure ontdek.

Die swart mans is Dinsdag aangekeer in die Metsimaholo-lokasie. Die aanvallers is vasgetrek nadat die polisie inligting en bewysstukke wat op die toneel gekry is, opgevolg het.

Konst. Peter Kareli het namens Sasolburg se polisie bevestig dat vier mans van tussen 23 en 27 aangekeer is.

Een van die swartes het glo naweke vir Ponté in die tuin gewerk. Hulle het van Ponté se besittings by hulle gehad.

Sy is vermoedelik verkrag, vasgebind en verwurg, waarna die boosdoeners die vertrek aan die brand gesteek het.

Die verdagtes sal Vrydag in die Sasolburg-landdroshof verskyn.

Watergraf vir bemanning na duikboot ontplof

‘n Indiese vlootduikboot met sowat 18 bemanningslede aan boord het Woensdagoggend ná ‘n ontploffing aan die brand geslaan en gesink.

Die ontploffing het net ná middernag in die kilo-klas INS Sindhurakshak gebeur.

Die ongeluk kom in dieselfde week as wat Indië met ‘n plaaslik vervaardigde vliegdekskip se konstruksie begin. Dit word vir voltooiing in 2017 beplan.

Die land het ook pas aangekondig dat die reaktor op Indië se eerste tuisgeboude kernduikboot nou in werking is.

“Die Sindhurakshak vandag is miskien die ergste ongeluk wat ‘n Indiese vlootduikboot nog ooit gehad het,” sê die verdedigingsdeskundige en voormalige kommodoor Uday Bhaskar.

Narendra Vispute, woordvoerder van die vloot, het gesê pogings word aangewend om vas te stel of die bemanningslede veilig is.

Die Indiese nuuskanaal NDTV het gesê ‘n harde ontploffing is aangemeld. Sowat 12 brandweerwaens het na die hawe in Moembai gehaas en brandbestryders het sowat twee uur lank gespook om die brand te blus.

Vispute het gesê die oorsaak van die ontploffing word ondersoek. Geen verdere inligting is bekend gemaak nie.

Onderhoudswerk aan die 16 jaar oue Russies-vervaardigde duikboot is onlangs gedoen. – AFP

Babalyk in Ceres gevind

Die lyk van ‘n baba is in Ceres in die Wes-Kaap gevind, het die polisie gesê.

Kapt. Frederick van Wyk, polisiewoordvoerder, het gesê inwoners het die kind se lyk Maandag omstreeks 17:00 ontdek.

“‘n Saak van moord word ondersoek en ‘n nadoodse ondersoek sal uitgevoer word om die oorsaak van die dood te bepaal. Niemand is nog in hegtenis geneem nie.”

Geen verdere besonderhede is bekend gemaak nie.

Van Wyk het persone met inligting gevra om die polisie te kontak. – Sapa

Regering stel plaaswerkers se werk in gevaar

TLU SA het die Minister van Landbou, Tina Joemat-Pettersen, versoek om haar uit te spreek oor haar kollega van Landelike Ontwikkeling en Grondhervorming se ideologiese proses om blanke grondeienaars van hulle regmatige eiendom te ontneem.

TLU SA se president, mnr. Louis Meintjes, noem minister Nkwinti se planne “konstruktiewe ontneming van blanke grondeienaar, indien dit nie doodgewone gewettigde grondgryp is nie”.

Mnr. Meintjes het Minister Joemat-Petterson in ‘n brief gevra of haar kollega se beleid dan regeringsbeleid is, en of sy, in wese ook as die minister wat ‘n direkte belang by voedselsekerheid het, kan saamgaan met daardie ideologiese benadering wat kommersiële landbou totaal gaan vernietig.

Terselfdertyd is Minister Nkwinti per brief ingelig dat totdat hy en sy departement die ordentlikheid aan die dag lê om op korrespondensie te reageer, TLU SA nie deel sal wees van die NAREG-proses of enige van sy ministeriële werksessies nie, en dat TLU SA sy optrede nie erken as deel van openbare deelname proses nie en dat dit ook nie voldoen aan administratiewe vereistes nie.

Mnr. Meintjes het ‘n beroep gedoen op Minister Joemat-Petterson om toe te sien dat die planne en voorstelle van grondhervorming, nie soveel reg aan werkers gee dat voedselsekerheid in gedrang kom nie, want in terme van daardie voorstelle sal boere uiteindelik geen besluite meer op hulle eie plase kan neem sonder arbeiders se goedkeuring nie.

“Hierdie voorstelle plaas die Regering effektief in beheer van alle landbou-eiendomme. Dit is ‘n kommunistiese benadering wat gevolg word, en sal TLU SA geen ander keuse hê as om boere aan te moedig om binne die korste moontlike tyd maatreëls in plek te kry om sonder arbeid hulle bedrywe voort te sit,” sê mnr. Meintjes.

Sou hierdie voorstelle in wetgewing vervat word sal dit die totale ekonomie negatief beïnvloed en voorspel ons hongersnood in Suid Afrika.

Ulundi glo broeines van politieke onverdraagsaamheid

Nog niemand is in hegtenis geneem in verband met die dood van die ANC-voorsitter op Ulundi in KwaZulu-Natal nie.

Makhosonke Msibi is Sondagaand voor sy huis doodgeskiet na sy terugkeer van ‘n ANC-vergadering op KwaNongoma.

Ulundi en KwaNongoma het die afgelope jare bekend geraak as ‘n broeines vir politieke onverdraagsaamheid wat tot talle gewelddadige sterftes gelei het.

Intussen het die minister van Polisie, Nathi Mthethwa, aangedui dat hy Msibi se familie vandag sal besoek.- RSG

Amcu nooi NUM na Marikana-herdenking

Die president van NUM, Senzeni Zokwana is na die beplande Amcu-herdenking van die Marikana-slagting uitgenooi, maar het nog nie aangedui of hy die uitnodiging sal aanvaar nie.

Die mynwerkersvakbond Amcu het sy planne bekendgemaak om die Marikana-gebeurtenis Vrydag te herdenk.

Verlede jaar op 16 Augustus is 34 mynwerkers tydens skermutselings met die polisie doodgeskiet by Lonmin se myn op Marikana in Noordwes.

Die herdenkingsgeleentheid sal by Wonderkop gehou word waar Amcu-lede deur die polisie in ‘n lokval gelei is en afgemaai voor die wêreld se TV-kameras.

Advokaat Dali Mpofu, biskop Joe Seoka en die Amcu-leier Joseph Mathunkwa sal die geleentheid lei.

Die Minister van polisie, Nathi Mthethwa, het in Marikana in Noordwes aangekom na die skietery van ‘n NUM-vakbondverteenwoordiger in die gebied Maandag.

Die minister het by die plaaslike polisiestasie aangedoen vir ‘n inligtingsessie deur beamptes voordat hy die gesin van ‘n mynwerker wat na bewering doodgeskiet is – die 27-jarige Mncedi Mabhulu – besoek het.

Volgens sekere berigte is dit steeds onduidelik op hierdie stadium hoe die mynwerker gesterf het, hoewel daar aanvanklik berig is dat sy geskiet is.

Intussen het die polisie gister toegeslaan opmynhostelle in Marikana en beslag gelê op ‘n aantal tradisionele wapens.

Intussen dreig die Farlam-kommissie om uitmekaar te val weens ‘n gebrek aan befondsing vir die slagoffers. Privaatfinansiers glo die staat moet die Marikana–slagoffers se regsverteenwoordiger, Dali Mpofu en ander vergoed, en hulle is dus huiwerig om geld te gee.

Hierdie potensiële befondsers sluit die Raith-stigting en die Black Lawyers Association in. Raith het reeds R2 miljoen bewillig.

Verdere uitstel sal nadelig wees vir die kommissie, en die beseerdes en aangeklaagdes moet teenwoordig wees by die verrigtinge as die kommissie hervat om met sy geloofwaardigheid ongeskonde ander kant uit te kom, het waarnemers gesê.

Myner geskiet by Wonderkop, dae voor Marikana-herdenking

‘n Myner is Maandag doodgeskiet by ‘n woongebied in Wonderkop, naby Lonmin se Marikanamyn buite Rustenburg, het Noordwes-polisie gesê.

Die 44-jarige vrou is in die kop geskiet terwyl sy teruggekeer het van ‘n winkel op Wonderkop om 12:30, het brig. Thulani Ngubane gesê.

“Dit is ‘n myn residensiële gebied wat nie ver van Rowland Shaft is nie en in die nabyheid van die National Union of Mineworkers (NUM) en Association of Mineworkers and Construction Union se kantore by Lonmin.”

Die vrou, wat gewerk het op vier Belt Shaft, was van diens af ten tye van haar dood. Ses 9mm patrone is gevind.

‘n Moorddossier is geopen. Die motief is nog nie bekend nie.

Ngubane kon nie NUM se vroeëre bewering bevestig dat die vermoorde vrou ‘n NUM-organiseerder was nie.

Noordwes se polisie kommissaris Lt-genl Zukiswa Mbombo het ‘n beroep op plaaslike inwoners gedoen om nie te spekuleer oor die motief vir die moord nie.

Vroeër, het NUM se woordvoerder Lesiba Seshoka gesê in ‘n verklaring dat die vrou ‘n vakbondorganiseerder was.

“Ons is teleurgesteld dat te midde van die toenemende sluipmoorde in Marikana en die breër Rustenburg-area, daar nie enige vordering met betrekking tot die inhegtenisneming en vervolging van die verdagtes is nie,” het hy gesê.

“Terwyl baie van die verdagtes bekend is aan die polisie, is nie een in hegtenis geneem of vervolg nie.”

Seshoka het gesê Lonmin-vakbondverteenwoordigers is opdrag gegee om terug te keer om te werk, selfs al het die NUM gewaarsku dat dit nie veilig is nie.

“Die vakbond is bekommerd dat die maatskappy se pre-okkupasie met winste en die polisie se onbevoegdheid kan lei tot ‘n ernstige bloedbad in Rustenburg,” het Seshoka gesê.

Kommentaar van Lonmin was nie onmiddellik beskikbaar nie.

Cosatu het gesê dit is tragies dat die moord gebeur het dae voor die 16 Augustus-herdenking van die Marikana-slagting.

In die vorige week, is 10 mense, onder wie twee polisiebeamptes en twee veiligheidswagte, dood in staking-verwante geweld.

OB besoek Nkandla onder wolk van geheimhouding

Die Openbare Beskermer (OB), het pres. Jacob Zuma se Nkandla-kompleks Maandag besoek.

Dit vorm deel van haar ondersoek na staatsbesteding wat tot R206 miljoen aan verbeterings aan Nkandla beloop.

Nosiviwe Mapisa-Nqakula, minister van verdediging, en van haar senior amptenare het OB Thuli Madonsela na die kompleks vergesel, het Mike Ramagoma, die minister se adviseur, gesê.

Die OB en die regering is volgens Ramagoma dit eens daar moet verseker word dat die veiligheid by Nkandla nie deur die besoek benadeel word nie.

Madonsela wou nie besonderhede bekend maak oor haar ondersoek na die veiligheidopgradering aan die president se Nkandla-woning nie.

Madonsela het bevestig dat sy die woning gister besoek het as deel van haar ondersoek, maar sê kragtens die wet op die openbare beskermer kan inligting nie nou bekend gemaak word nie.

Haar kantoor sê sy wag steeds vir inligting om haar ondersoek te voltooi. Haar voorlopige verslag sal aan alle betrokke partye bekend gemaak word.

Die finale verslag sal glo wel openbaar gemaak word.

Thulas Nxesi, minister van openbare werke, het sy departement se ondersoek na die Nkandla-projek vroeër ingevolge die minimum-inligting-veiligheidstandaarde geklassifiseer.

Nxesi het dié besluit blykbaar geneem omdat die verslag volgens die departement sensitiewe kwessies insluit wat Zuma se veiligheid kan bedreig as dit uitlek.

Die OB hoop om die Nkandla-verslag teen die einde van die week te voltooi.

Kabinet wens Zim geluk met suksesvolle verkiesings

Die Kabinet het ‘n verklaring uitgereik waarin hulle “die mense van Zimbabwe en politieke partye gelukwens met die suksesvolle, gladde parlementêre en plaaslike verkiesings”.

Pres. Jacob Zuma se rol as die Suider-Afrikaanse Ontwikkelingsgemeenskap (SAOG) se fasiliteerder geprys en gesê die rol wat dialoog gespeel het om alle politieke partye te oorreed tot vreedsame verkiesings, was deurslaggewend.

Daar heers eenstemmigheid in die SAOG oor die geloofwaardigheid van die Zimbabwiese verkiesingsuitslag, met die uitsondering van Botswana wat meen die verkiesing was nie vry en regverdig nie.

Botswana is die enigste land in die Gemeenskap wat nie van Suid-Afrika afhanklik is nie, weens die diamantreus De Beers se belange in die land.

Die SAOG vergader Saterdag en Sondag onder meer om die verslag van sy waarnemerspan by die Zimbabwiese verkiesing te oorweeg en ’n besluit oor die aanvaarbaarheid van die verkiesing te neem.

By die inligtingsessie na afloop van die kabinetsvergadering het Phumla Williams, waarnemende kabinetswoordvoerder, en Tina Joemat-Pettersson, minister van landbou, bosbou en visserye, gesê Suid-Afrika het nog nie ’n finale gevolgtrekking oor die verkiesingsuitslag gemaak nie.