Nuus Archives - Page 621 of 1583

Vragskip breek in twee in Richardsbaai

‘n Vragskip het Maandag by die Richardsbaai-hawe gestrand nadat dit enjinprobleme ondervind het, het die hawebestuur gesê.

Kapt. Rufus Lekala, hawemeester van die Transnet- Nasionale Hawe-owerheid (TNPA), het in ‘n verklaring gesê die Smart, wat ‘n vrag van 147 650 ton se steenkool vervoer, het om 14:10 Maandagmiddag buite die ingang van die hawe gestrand.

Hy het gesê die skip het omstreeks 10:10 klaar gelaai by die Richardsbaai-steenkoolterminaal en het die terminaal kort voor 13:30 verlaat.

Luidens die verklaring het die skip enjinprobleme ondervind toe dit die hawe verlaat het.

Lekala het gesê die skip, wat onder ’n Panamese vlag vaar, het in twee gebreek en is gedeeltelik onder water.

Altesaam 23 bemanningslede is per helikopter opgepik.

Die TNPA het gesê hy monitor die ekologiese impak wat die skip kan hê. Weens swak weerstoestande is die ingang en uitgang tot die hawe tot verdere kennisgewing opgeskort. – Sapa

Moslembroederskap-leier in aanhouding

Die geestelike leier van die Moslem Broederskap in Egipte, Mohamed Badie, is Dinsdagoggend in die Nasr City in die noordooste van Kaïro in hegtenis geneem.

Badie (70) was die hoogste bevelvoerder van die organisasie wat deur die owerhede gesoek is. Hy sal op 25 Augustus verskyn saam met twee ander ampsdraers

Badie se seun is verlede week doodgeskiet toe die weermag op twee proteskampe van die Broederskap toegeslaan het.

Badie se inhegtenisneming volg te midde van nog lede van die Broederskap wat regdeur die land aangekeer word. Foto’s van sy inhegtenisname is op die interim-regering se Facebookbladsy geplaas.

Intussen is berigte ontvang dat die interim regering nuwe aanklagte van die aanhitsing van geweld aanhangig gemaak het teen die ontsetelde president Mohammed Morsi. Morsi se plek van aanhouding is steeds onbekend.

Die aanklagte hou verband met die dood van talle mense gedurende protesoptrede by die presidensiële paleis verlede Desember.

Dieselfde regter wat nuwe aanklagte teen Morsi bekendgemaak het, het ook verklaar dat die voormalige president Hosni Moebarak nie vir korrupsie aangehou kan word nie. – RSG

Boot met 100 asielsoekers na Australië sink

‘n Boot met sowat 100 asielsoekers het langs die kus van die afgeleë Kerseiland gesink en Australiese owerhede moes inderhaas die passasiers uit die water red.

Die boot het Dinsdag sowat 220 km noord van Kerseiland, een van Australië se ses immigrasie-aanhoudingsentrums, gesink.

Die Australiese maritieme owerheid het gesê sowat 105 mense was aan boord.

Die veiligheidsowerheid het Dinsdagoggend ‘n noodoproep ontvang. ‘n Skip van die Australiese vloot is na die toneel gestuur.

Kerseiland is sowat 500 km suid van Djakarta, Indonesië, geleë. Dit is ‘n gewilde bestemming vir asielsoekers wat bote by Indonesiese hawens oorlaai en mense betaal om hulle na Australië te neem. – AP

Seriti-kommissie handhaaf slakkepas

Die eerste getuies sal Dinsdag geroep word om voor die Seriti-kommissie van ondersoek na die wapentransaksie in Pretoria te getuig.

Die proses wat gevolg sal word is Maandag aangedui en die lys name van die eerste week se getuies is bekendgemaak.

Die eerste getuies by die kommissie se openbare sitting is senior offisiere van die Suid-Afrikaanse vloot.

Hulle sal na verwagting verduidelik waarom nuwe wapens aangekoop moes word in die multi-miljard randse wapentransaksies in die laat 1990’s, en watter aanbevelings gedoen is.

Die getuienisleier, Matshego Ramagaga, sê die vloot en lugmag sal verduidelik hoe die wapens en toerusting gebruik is tydens plaaslike en multi-nasionale oefeninge, vredesendings, reddingswerk en patrollies.

Ontleders het die langdradige proses as ‘n vertragingstaktiek beskryf vir die ondersoek wat reeds gebuk gaan onder bedankings weens beskuldigings van partydigheid.

Maandagaand op die SABC se program, Justice Factor, het ‘n kommentator dié mening beaam en gesê sy glo nie die oormatige detail sal getuienis oplewer wat vermoedens dat korrupsie plaasgevind het, bevestig nie.

DA-hoofsweep loop na ANC oor

Die Demokratiese Alliansie het die nuus verwelkom dat sy voormalige hoofsweep in die Tshwane Metroraad, Derrick Flemming, na die ANC oorgeloop het.

Flemming was ‘n lid van die ANC voordat hy by die DA aangesluit het. Flemming het gister aangekondig dat hy uit die DA bedank en weer by die regerende party aangesluit het.

Die DA streekleier, Solly Msimanga, sê Flemming het sy ontevredenheid met die DA se beleid bekend gemaak voordat hy hom opnuut by die ANC aangesluit het.

Msimanga het die DA se goeie wense aan Flemming oorgedra.

Flemming sê die ANC is steeds die enigste party wat maatskaplike, ekonomiese en politieke verandering in die land kan bewerkstellig. – RSG

Afrikanerbond doen voorlegging oor 1913-wet

Die parlement se Ad Hoc komitee oor die herstel van grondregte en die gevolge van die 1913 Wet op Naturellegrond voer vandag samesprekings met verskillende belangegroepe oor die vordering wat tot dusver gemaak is.

Die herverdeling van grond, die voorgestelde heropening van grondeise en kommer oor voortslepende onsekerheid oor grondonteiening, is van die kwessies wat bespreek sal word.

Die voorsitter van die Ad Hoc komitee, Jerry Thibedi sê terugvoering oor die vorige werksessie wat in Junie gehou is, sal ook gegee word.

Die Afrikanerbond, wat nie by die vorige sessie teenwoordig was nie, sal vandag ‘n voorlegging doen oor die nalatenskap van die 1913-wet.

Die ministeries van Openbare Werke en van Landelike Ontwikkeling en Grondsake sal ook terugvoering gee oor die voorgestelde Onteieningswet en die konsep-wysigingswetsontwerp oor die herstel van grondregte. – RSG

Oscar-moordverhoor tot volgende jaar uitgestel

Die moordverhoor van die Paralimpiese atleet Oscar Pistorius sal van 3 tot 20 Maart aanstaande jaar in die hooggeregshof in Pretoria plaasvind.

Die staat het amptelik die klagstaat teen hom bekendgemaak. Daar is glo bewyse dat Pistorius op 14 Februarie vanjaar sy vriendin Reeva Steenkamp met voorbedagte rade doodgeskiet het, is vroeër berig.

Hy het vanoggend vlugtig in die landdroshof in Pretoria verskyn waar hy wel van moord met voorbedagte rade op Steenkamp, die onwettige besit van ammunisie en die oortreding van die Vuurwapenwet aangekla is.

Volgens berigte beoog die staat om ten minste 107 getuies te roep. Pistorius hou vol dat hy Steenkamp vir ‘n inbreker aangesien het.

Die hofverrigtinge in die Pretoriase landdroshof in die saak teen Oscar Pistorius het Maandagoggend begin en daar is wêreldwyd daaroor berig.

Pistorius het kort voor negeuur by die hof aangekom. Hy is vergesel deur sy broer, Carl en suster Aimee. Sy gesin moes die huilende atleet troos.

Die hofsaal was stampvol met tientalle plaaslike en buitelandse joernaliste teenwoordig.

Die polisie het die Pretoriase landdroshof, voor Oscar Pistorius se hofverskynin met snuffelhonde deursoek .

Die groot groep joernaliste was sedert vyfuur vanoggend by die hof saamgetrek.

Grondwethof verwerp Marikana-aansoek om staatsbefondsing

Die Grondwethof het die appèlaansoek van regsverteenwoordigers van mynwerkers by die Marikana Kommissie van Ondersoek verwerp.

Die regters in die hof het in ‘n eenparige uitspraak die aansoek verwerp om ‘n tussentydse bevel van die Noord Gautengse Hooggeregshof ter syde te stel. Dié hof het gelas dat die staat nie ‘n verpligting het om die mynwerkers se regsverteenwoordigers te betaal terwyl hulle op ‘n hersienig van die befondsingskwessie wag nie.

Die Grondwethof sê hy hoor nie appèlaansoeke oor tussentydse bevele aan nie.

Die president van die Hof het die uitspraak gelewer.

Die uitspraak oor die Marikana Kommissie van Ondersoek se befondsinggeskil sou aanvanklik Vrydag – die eerste herdenking van die slagting – gelewer word.

Die hof het egter later ‘n kennisgewing uitgereik dat uitspraak Maandag gegee sal word.

Die geskil oor betaling het die Kommissie se werksaamhede lamgelê. Die regsverteenwoordigers van die mynwerkers, en die families van die 34 afgestorwe mynwerkers, het hulle aan die Kommissie se werksaamhede onttrek nadat hulle aansoek dat die staat hulle regskoste betaal, in die Hooggeregshof van die hand gewys is.

Daarna het hulle ‘n dringende appèlaansoek by die Grondwethof ingedien. Uitspraak is gelewer sonder dat betoë aangehoor is.

Intussen sal die Kommissie van Ondersoek sy werksaamhede hervat. – RSG

Seksmisdadiger kry parool

Die seksmisdadiger Cezanne Visser, beter bekend as advokaat Barbie, gaan binnekort op parool vrygelaat word, het die Sunday Times Sondag berig.

Die departement van korrektiewe dienste het gesê die paroolraad het haar vrylating van Maandag af goedgekeur.

Visser dien tans tronkstraf van sewe jaar uit vir onsedelike aanranding en die vervaardiging en besit van kinderpornografie.

Sy is ook skuldig bevind dat sy bedrog gepleeg het by ‘n kinderhuis deur weeskinders onder valse voorwendsels uit te neem.

James Smalberger, adjunkkommissaris, het aan die koerant gesê Visser se parool val onder die maksimumkategorie, met streng voorwaardes wat Maandag geformaliseer sal word.

“Visser, soos enige ander oortreders in dieselfde kategorie, moes die helfte van haar vonnis uitdien, waarna sy oorweeg word vir parool,” het Smalberger gesê.

Smalberger sê die departement sal nie huiwer om haar weer in hegtenis te neem indien sy haar paroolvoorwaardes oortree nie. – Sapa

SAOG vra dat Zim-sanksies opgehef word

Suider-Afrikaanse leiers het die internasionale gemeenskap gevra om sanksies teen Zimbabwe op te hef in die lig van president Robert Mugabe se oorwinning by die stembus.

Die voorsitter van die SAOG, Joyce Banda sê Zimbabwiërs het nou genoeg gely.

Lede van die SAOG sê hulle is tevrede dat die Zimbabwiese verkiesing vry en vreedsaam was.

Die leier van die opposisie, Morgan Tsvangirai beweer egter dat daar grootskaalse ongerymdhede was.- RSG