Brandspanne het hul hande vol in die Vrystaat waar veldbrande woed. ‘n Sterk wind blaas die vlamme aan en die droë toestande vererger die situasie.
‘n Groot brand woed tussen Rosendal en Fouriesburg. Daar is ook brande op Rouxville, Zastron, Wepener, Hobhouse en Paul Roux.
Twee plaashuise het afgebrand en duisende hektaar weiveld is reeds vernietig.
Spanne van Working on Fire, boere en plaaswerkers bestry die brande. – RSG
“Roof by woonhuise as die misdaad wat die meeste gevrees word in Suid-Afrika het met 3,6% toegeneem volgens die nuutste misdaadstatistiek. Inbrake by woonhuise het met 3,3% (253 633 gevalle) toegeneem en motorkapings met 5,4%. Dit is juis by jou huis en op pad werk toe wat mense veilig wil voel. Die publiek het dus rede om onveilig te voel en ervaar dat misdaad toeneem,” sê dr. Pieter Groenewald, hoofwoordvoerder van Polisie vir die Vryheidsfront Plus.
“Wat ook kommerwekkend is, is dat van die 1 833 775 ernstige misdade wat aangemeld is, daar slegs 352 513 suksesvolle vervolgings was. Dit is slegs 19% suksesvolle vervolgings. Dit beteken dat die strafregstelsel in Suid-Afrika ernstige gebreke het en die publiek in die steek laat,” het Groenewald gesê.
“Moord het met 0,6% toegeneem, maar die feit dat 16 259 mense vermoor is beteken dat die kans vyf keer groter is om in Suid-Afrika vermoor te word as elders in die wêreld waar die gemiddeld 6 per 100 000 is. Poging tot moord het met 6,5% (16 363 gevalle) toegeneem wat beteken Suid-Afrika bly steeds ‘n gevaarlike land,” sê Groenewald.
Die Vryheidsfront Plus verwelkom wel die afname in misdade teen vroue en kinders en in misdade soos aanranding.
Die Instituut vir Sekerheidstudies het ‘n beroep op die Minister van Polisie, Nathi Mthethwa gedoen om toe te laat dat meer gereelde en gedetailleerde inligting oor sogenaamde nuwe misdade in die land bekend gemaak word.
Die ISS het die vorige syfers van ‘n afname in geweldsmisdaad verwelkom, maar verwag dat die nuwe misdaadstatistiek wat vandag bekend gemaak word, op ‘n toename in eiendomsmisdaad sal dui.
Die hoof van die ISS se misdaad en geregtigheidsprogram, Gareth Newham sê die vorige statistieke toon nie sekere nuwe ernstige veiligheidsbedreigings in die land nie.ISS
Hy sê dit is misdade soos korrupsie, openbare geweld, groepmoorde, politieke sluipmoorde en huishoudelike geweld.
Mthethwa sal die misdaadstatistiek vir 2012/2013 vanoggend by die Tshwane Opleidingsakademie in Pretoria-Wes bekendmaak.
Die ISS word ondersteun deur Kanada, Denemarke, Finland, Japan, Noorweë, Spanje, Swede, Switserland, Nederland en die VSA. – RSG
Twee mense is Woensdagmiddag beseer toe ‘n groep swartes wat besig was om van veiligheidswagte in die Johannesburgse middestad af weg te vlug, begin skiet het, het die polisie gesê.
“‘n Audi Q7 het ‘n blou BMW M1 gejaag toe die insittendes van die BMW op die Audi Q7 begin skiet het, wat deur veiligheidswagte op die hoek van Anderson- en Sauerstrate bestuur is,” het die woordvoerder, adjundantoffisier Xoli Mbhele Donderdag gesê.
“Die veiligheidswagte het daarna hul vuur beantwoord en die BMW se band stukkend geskiet,” het hy gesê.
Mbhele sê die vyf het hierna uit hul motor gespring en te voet weggevlug terwyl hulle op die veiligheidswagte losbrand. Hul skote het twee passasiers in ‘n stilstaande Quantum-taxi op die hoek van Breë- en Lovedaystrate getref.
“Daarna het die groep ‘n wit Nissan Tiida gekaap en van die toneel af weggejaag,” sê Mbhele.
Die motor is later in Turffontein teruggevind.
“Die beseerdes, ‘n man en ‘n vrou, is op die toneel behandel, maar die vou is hospitaal toe geneem met ‘n wond in die nek,” sê Mbhele.
“Die veiligheidswagte het die groep se motor agternagesit toe hulle nie wou stilhou in die aangesig van aankomende verkeer nie,” sê Mbhele.
Volgens hom is die polisie na die misdadigers op soek. – Sapa
Duitse amptenare het bevestig dat Berlyn chemikalieë na Sirië versend het wat moontlik gebruik kan word om Saringas te maak. Die regering het egter benadruk dat hulle vol vertroue is dat die “tweeledige-gebruik“ chemikalieë nie vir militêre doeleindes aangewend is nie.
Duitsland het meer as 100 ton van die bestanddele wat ook vir die vervaardiging van dodelike gas gebruik kan word, tussen 2002 en 2006 uitgevoer.
“Die permitte [vir die lewering van die chemikalieë] is toegestaan is ná ‘n deeglike ondersoek van alle moontlike risiko’s, insluitend die gevare van misbruik en herleiding met die oog op moontlike gebruik in verband met chemiese wapens,” het Duitsland se Ministerie van Ekonomie gesê in ‘n verklaring in reaksie op ‘n formele versoek van ‘n opposisieparty.
“Ek kan nie glo dat Duitsland ‘n totaal van meer as 111 ton chemikalieë na Sirië versend het wat gebruik kan word om Sarin te produseer nie. En dit in ‘n land wat bekend is daarvoor dat hulle ‘n chemiese wapenprogram het,” het Jan van Aken, ‘n opposisielid, wapendeskundige en voormalige VN-wapeninspekteur, gesê.
Die eerste stel aflewerings is in 2002-2003 gemaak, onder die sentrum-linkse regering van Gerhard Schroeder. Die tweede is gemaak in 2005-2006, onder die huidige sentrum-regse regering.
“Volgens die bevindinge wat tot my beskikking, is dit gebruik vir burgerlike aanwending,“ het kanselier Angela Merkel gesê in ‘n onderhoud met die plaaslike ARD televisie.
‘n Verslag van VN inspekteurs oor verlede maand se chemiese wapenaanval op Damaskus dui daarop dat die vuurpyle wat die senugas bevat het, afgevuur is van die basis van een van die land se elite militêre eenhede wat oor die stad uitkyk, het RSG berig.
‘n Senior VN-diplomaat in New York sê besonderhede oor die omvang van die aanval, die vuurpyle wat gebruik is en inligting oor die trajek in die verslag maak dit duidelik dat die Siriese regering vir die aanval verantwoordelik was.
‘n Verslag van Human Rights Watch het ook gesê die vermeende vlugroete van die vuurpyle wat deur die VN- inspekteurs gemeld word, lei terug na ‘n basis van die Republikeinse Wag in die dieselfde gebied.
Meer as 100 mense is vir openbare geweldpleging en die plunder van spaza-winkels tydens betogings in Port Elizabeth gearresteer, het die Oos-Kaapse polisie Woensdag gesê.
“Die situasie in sekere van die lokasies in Port Elizabeth bly gespanne maar bestendig met die polisie wat steeds ‘n streng teenwoordigheid handhaaf,” het brigadier Marinda Mills gesê.
Volgens Mills tree die polisie met verskeie partye in gesprek wat bystand verleen aan diegene wat deur die gewelddadige betogings dakloos gelaat is.
Twee geïsoleerde gevalle het Dinsdagaand in die Soweto-langs-die-see- en KwaMagxaki-lokasies voorgekom waar ‘n Chinese winkel geplunder is.
“Terwyl die polisie op ‘n onlustoneel in Soweto-langs-die-see was, is hulle met klippe gegooi en ‘n lid het ‘n besering aan sy been opgedoen,” het Mills gesê.
Betogings het Maandagnag utigebreek nadat ‘n Somaliër in hegtenis geneem is ná hy Saterdagaand ‘n man buite ‘n winkel na bewering doodgeskiet het.
“Gedurende ons interaksie met die gemeenskappe wat hierdeur geraak word, is dit helder dat die motief vir die aanvalle op spaza-winkels nie xenofobies van aard is nie, maar ‘n misdadige element wat van die geleentheid gebruik maak,” het Mills Dinsdag gesê.
Volgens Mills het inwoners van die gebiede aan polisie gesê dat hulle geen beswaar daarteen het om tussen immigrante te werk en te woon nie, en vele het hulle gedurende die aanvalle bygestaan.
Voorlopige uitslae wat deur die Onafhanklike Verkiesingskommissie vrygestel is, toon dat die ANC in wyk ses teen die DA gewen het.
In wyk 18 het die ANC teen ‘n onafhanklike kandidaat gewen, maar wyk 26 is weer deur ‘n onafhanklike kandidaat, Butiki Mahlabe, ingepalm.
Die hoof van die OVK in Noordwes, Dr Tumelontle Thiba het die uitslae vroeër bekendgemaak. Volgens Thiba het tussen 38 en 39 persent van kiesers opgedaag om hulle kruisie te trek.
Die ANC het hulle oorwinning in twee van die wyke gevier en gesê dit is duidelik dat die party weer beheer van die munisipaliteit kan terugwen.
Die DA in Noordwes het hulle teleurstelling oor die uitslae van Woensdag se tussenverkiesings in die Tlokwemunisipaliteit in Potchefstroom uitgespreek, maar gesê hulle is nogtans verlig dat die ANC net twee uit die drie wyke gewen het.
Die DA het slegs wyk ses betwis, maar het die onafhanklike kandidate in die ander twee wyke gesteun.
Die ANC het minder steun gehad het as twee jaar gelede in die wyke wat hulle gewen het.
Die minister van polisie, Nathi Mthethwa, sal na verwagting Donderdag die misdaadstatistiek vrystel.
Verlede jaar het die amptelike statistiek wat deur Mthethwa vrygestel is, aangetoon dat die reële moordsyfer effens afgeneem het, met 331 minder mense wat in 2012 as in 2011 vermoor is.
‘n Ontleding wat vooraf deur die hoof van die SAPD se taakspan, Mzandile Petros, gedoen is, het totale vir die land se ergste misdade tussen 1 April 2011 en 31 Maart 2012 verskaf:
– Moord: 15 609 (vorige jaar 15 940);
– Poging tot moord: 14,859 (vorige jaarr 15,493);
– Aanranding met die doel om ernstig te beseer: 192,651 (vorige jaar 198,602);
– Gewone aanranding: 181,670 (vorige jaar 185,891); en
– Seksuele oortredings: 64 514 (vorige jaar 66,196).
Violent crime in provinces had reduced in all but three provinces.
Geweldsmisdaad in alle provinsies, benewens drie, afgeneem.
Limpopo, die Vrystaat en die Wes-Kaap het ‘n toename in kontakmisdaad getoon, waaronder moorde, aanranding, roof en verkragting.
Die ander ses provinsies het tot die algehele afname van 3,5 persent in kontakmisdaad bygedra.
Geweldsmisdaad in Gauteng het met 11 persent gedaal – die beduidendste in die land.
Die hoof van die Instituut vir Sekerheidstudies (ISS) se misdaad en geregtigheidsprogram, Gareth Newham, het die afname in geweldsmisdaad verwelkom maar gesê die statistiek weerspieël nie sekere van die ernstige opkomende veiligheidsbedreigings waarvoor die land tans te staan kom nie.
Dit sluit korrupsie, openbare geweld, groepsmoorde, politieke sluipmoorde en huishoudelike geweld in.
Newham het Mthethwa versoek om die polisie toe te laat om meer gereeld en in groter besonderhede oor dié misdade verslag te doen.
Die uitvoerende direkteur van Corruption Watch, David Lewis, het gesê die statistiek verskaf nie die nodige inligting om die stryd teen korrupsie te ondersteun nie.
Dit het geblyk dat die misdaadstatistiek heelwat van die verslae van korrupsie as gewone bedrog kategoriseer. – Sapa
Die uitvoerende hoof van die Waterhulpbronkommissie, Dhesigen Naidoo, sê Suid-Afrika het ‘n unieke geleentheid om ‘n nuwe wêreldstandaard vir die ontrekking van gas deur hidrobreking te stel.
Hy het ‘n nasionale konferensie oor grondwater in Durban toegespreek waar die omstrede vooruitsigte van hidrobreking in die Karoo bespreek is.
Naidoo sê Suid-Afrika kan dit nie ignoreer dat die land oor gasbronne beskik wat kan help om die land se energietekorte te verlig nie.
Naidoo sê Suid-Afrika is nou by ‘n soortgelyke kruispad soos aan die begin van die goudstormloop aan die Witwatersrand in die 1880’s. – RSG
Aanklagte voorlopig teruggetrek teen ‘n Somaliese winkeleienaar van Port Elizabeth.
Hy het na bewering ‘n 19-jarige doodgeskiet, wat gelei tot uitgebreide onluste en plundertogte.
Die winkelier is as gevolg van ‘n gebrek aan getuies in die New Brightonse landdroshof vrygelaat.
Die polisie sê hulle was onbewus daarvan dat getuies geroep sou word, sodat hulle getuies ingelig het oor die verskyning in die hof nie.
Tot ‘n honderd winkels is geplunder in Port Elizabeth se lokasies, wat tot sowat 110 arrestasies gelei het.
Polisie sê hierdie is nie xenofobiese aanvalle nie, maar is krimineel van aard. – Sapa
