Kurt Darren het Maandag ‘n ope brief aan sy ondersteuners en die publiek gerig na kritiek omdat hy by die ANC se inhuldingsvieringe opgetree het.
Veral wit DA-ondersteuners het Darren op webwerwe en sosiale media geroskam.
Jong swart ANC-ondersteuners het egter onder die Twitter-naam ANC Our Party agter Darren gestaan.
Hy het ook ondersteuning op Twitter gekry met die etiketwoord #handsoffkurt.
Bandile Masuku, woordvoerder van die ANC-jeugliga, het gesê swart steun vir Darren was spontaan.
Darren sou by die Laerskool Bergsig in Pretoria opgetree het, maar ’n borg het intussen glo onttrek weens Darren se optrede by die ANC-vieringe.
Die kunstenaars was glo bereid om saam met Darren op te tree en Darren self het aangebied om klanktoerusting gratis te voorsien, maar die skool het nietemin besluit om te kanselleer.
Die polisie in Kaapstad ondersoek ‘n saak van poging tot moord ná die skietery gisteraand by die Kaapstadse Internasionale Lughawe waarin een persoon dood en drie gewond is, het RSG berig.
Volgens `n polisiewoordvoerder, Kaptein Frederick van Wyk het `n drie-en-dertig-jarige polisieman drie mense by `n restaurant op die lughawe gewond voordat hy homself geskiet het.
Kaptein van Wyk sê die konstabel het gisteraand net na ses op die lughawe aangekom om met sy vriendin te gesels. ‘n Woordewisseling het ontstaan waarna die skietery plaasgevind het.
Die meisie en twee werkers van die restaurant is gewond.
Die toneel is deur die polisie afgesper, maar die normale bedrywighede op die lughawe het voortgegaan.
Die Noord Gautengse Hooggeregshof het beslis dat die minister van Justisie en Korrektiewe Dienste, Michael Masutha moet besluit of die voormalige bevelvoerder van die polisie se Vlakplaas-eenheid, op parool vrygelaat sal word.
Regter Thokozile Masipa het beslis dat die minister die besluit moet neem of Eugene de Kok na twee dekades in die tronk op parool vrygelaat sal word.
Die nuwe minister moet binne dertig dae besluit oor die kwessie.
De Kock, wat in die Britsgesinde pers as Prime Evil bekend staan, is in 1996 skuldig bevind en tot twee-honderd-en-twaalf jaar gevangenisstraf gevonnis.
Verskeie vorige pogings om hom op parool te laat vrylaat, is reeds van die hand gewys.
Die Nasionale Raad vir Korrektiewe Dienste het glo ‘n aanbeveling oor De Kock se parool in November verlede jaar ontvang.
Die aanbeveling is gestuur na die destydse minister van Korrektiewe Dienste S’bu Ndebele, maar dié het versuim om ‘n tydige besluit te neem.
Ndebele se regsadviseurs het onderneem dat die minister ‘n besluit sal neem teen 12 Mei deser.
Geen besluit is gemaak voor die sperdatum nie en toe Ndebele sy kabinetspos na die Mei 7 algemene verkiesings verloor, het De Kock weer die hof genader vir ‘n beslissing.
Die voormalige polisiekolonel, wat in beheer was van ‘n eenheid by Vlakplaas buite Pretoria, is in 1994 in hegtenis geneem.
Baie van sy voormalige kollegas wat moord gepleeg het onder sy bevel het getuig in ruil vir vrywaring van vervolging.
De Kock het self in detail voor die Waarheids-en-versoeningskommissie getuig, maar is amnestie geweier omdat die moorde glo nie “polities gemotiveer” was nie.
Die woordvoerder van die Departement van Justisie en Korrektiewe Dienste, Manelisi Wolela, sê hulle wag nog vir die hofbevel.
Die minister van Minerale Hulpbronne, Ngoako Ramathlodi sê hy sien mislukking om arbeidsprobleme in die platinumgordel op te los nie as ‘n opsie nie.
Lede van die mynwerkersvakbond, Amcu staak sedert 23 Januarie by die mynmaatskappye, Lonmin, Impala Platinum en Anglo American Platinum.
Die staking kos die land reeds miljarde en het byna ‘n algehele insinking in Rustenburg se ekonomie veroorsaak.
Ramathlodi het dié week ‘n amptelike taakspan saamgestel om die staking in die bedryf te probeer beëindig.
Die span sal reeds Donderdag vergader en na afloop van hul eerste vergadering aan Ramathlodi verslag doen oor moontlike oplossings.
Volgens Ramathlodi sal die taakspan poog om die benadering tot die krisis in ‘n breër lig te stel en alle moontlikhede vir ‘n oplossing ondersoek.
Die minister het die mynmaatskappye in kennis gestel dat van die moontlike oplossings sou wees om uitgawes soos salarisse van die bestuur te beperk en sekere programme te beëindig.
Die Sweedse Demokrate, wat saam met die Franse Front National, die Vlaams Belang en ander partye deel van die regse groepering in die Europese Parlement gaan uitmaak, het twee setels in Straatsburg, waar die parlement geleë is, ontvang. Dié kleiner Sweedse party het in die pas afgelope Europese verkiesing sy steun vanaf 5 persent tot bykans 10 persent verdubbel.
Volgens die invloedryke politieke kommentator van die Londense Financial Times, Gideon Rachman, sou dit ‘n “fatale fout” wees om die swaai na regs in Europa te ignoreer. In gister se Financial Times skryf hy:
Dit is hoogs waarskynlik dat Europa se leiers gaan poog om die uitslae van die Europese verkiesings af te lag en hul toevlug tot alledaagse politiek gaan neem. Dit sou ‘n groot, moontlik fatale, fout wees.
Nie net verwerp ‘n toenemende aantal kiesers in al die EU-lande die immigrasiepolitiek van die Europese en Brusselse elite nie, maar ook hul ekonomiese beleid en die oorgawe van nasionale soewereiniteit aan die supranasionale instelling wat die Europese Unie verteenwoordig. Ongeveer ‘n kwart van Europese kiesers stem nou vir “nie-tradisionele” partye of partye wat buite die hoofstroom van die politiek staan en dus sonder enige werklike politieke mag is.
Terwyl die tradisioneel linkse Sosiaal-Demokratiese Party in Swede 24,5 persent van die stem op hom verenig het, het die Groenparty ook sterk vordering gemaak met 15,2 persent van stemme.
‘n Nuweling in Swede is die Feministiese Insiatief wat ‘n enkele setel in die Europese Parlement met 5,3 persent van die stemme verower het.
Hierteenoor het die Gematigde Party in Swede ‘n daling in steun ondervind en 13,5 persent aangeteken. Die voorheen gewilde “Rowersparty” het slegs 2,2 persent ontvang en moes albei sy huidige setels in die Europese Parlement afstaan. Swede is ook die tuiste van ‘n internetroofkykkultuur met die wêreldberoemde en berugte “The Pirate Bay” waar gebruikers gratis musiek en rolprente kan aflaai.
Swede het 20 verteenwoordigers in die Europese Parlement teenoor Frankryk se 74 of Duitsland se 99 LEP’s (Lede van die Europese Parlement) in Straatsburg. Dit beteken dat daardie 20 setels nou onder 9 Sweedse partye verdeel moet word, terwyl daar voorheen 8 partye in die Europarlement verteenwoordig was.
Die volledige uitslag van die Europese verkiesing in Swede lyk so:
Linkse Party 6,3 persent
Sosiaal-Demokrate 24,4 persent
Groenparty 15,3 persent
Liberale (Folkpartiet) 10,0 persent
Christen-Demokrate 6,0 persent
Gematigde Party 13,6 persent
Sweedse Demokrate 9,7 persent
Rowersparty 2,2 persent
Feministiese Inisiatief 5,3 persent
Sentrumparty: 6,5 persent
Bloemhof in Noordwes is tans in die greep van ‘n diarree-uitbraak.
Die dorp ondervind al reeds geruime tyd probleme met skoon water.
Verskeie leerders is van die skool af huistoe gestuur vir mediese hulp nadat hulle simptome van die siekte begin toon het, het RSG berig.
Daar word vermoed dat die siekte die gevolg is van die onverwerkte riool wat in die Vaalrivier inloop en besoedeling van die gemeenskap se watervoorsieningsnetwerk.
Die Departement van Gesondheid in die provinsie en privaat mediese praktisyns het bevestig dat daar baie pasiënte is, met simptome wat ondermeer braking en maagkrampe insluit.
Die Departement van Gesondheid het intussen watermonsters geneem om die oorsaak van die uitbreking te probeer vasstel.
Die Registrateur-generaal, Tobaiwa Mudede het Zimbabwiërs aangeraai om voorbehoedmiddels te staak. Hy het gesê voorbehoedmiddels is ‘n slenter deur magtige Westerse lande om bevolkingsgroei te vertraag in Afrika en sodoende die kontinent te verswak.
Mudede het gesê voorbehoedmiddels lei tot pandemiese siektes soos kanker, veral in vroue. Hy het voor kerklike gemeentelede ter herdenking van Afrika-dag in Kambuzuma, Harare dié waarskuwing gerig.
Teenwoordig was senior Zanu-PF- en ander regeringsamptenare.
Mudede het gesê hy is mede-outeur van ‘n boek oor bevolkingsbeheer wat hy saam met televisieprodusent Richard Hondo gepen het.
Hy het gesê die boek verduidelik waarom swartes moet ophou om voorbehoedmiddels te gebruik en gesê hulle moet eerder soveel kinders as moontlik kry.
Mudede het toegegee dat sy idees weerstand sal kry. Maar, het hy gesê: “Ek is beangs as ek dink dat my dogtertjie voorbehoedmiddels moet gebruik. Hoekom wil jy hierdie buitelandse produkte hê? Dit veroorsaak baie pyn vir my.
“Waar gaan jy kry soldate kry as daar ‘n aanval is? Ons wil polisiebeamptes, werkers, verpleegsters hê. As jy die jong mense vandag vra hoeveel kinders hulle het, hoor jy hoe hulle trots reageer ‘net twee’.”
Mudede het gesê Zimbabwe kan nie ‘n supermoondheid word indien hy sy bevolkingsgroei aan bande lê nie.
Hy het verwys na Nigerië, wat ‘n bevolking van meer as 130-miljoen het, en ‘n opbloei in sy ekonomie beleef, terwyl lande soos Zimbabwe wat hom steur aan voorbehoeding, traer ekonomieë het.
Die stakings by platinamyne het nie net die grootste daling in mynbou-aktiwiteit in vyftig jaar veroorsaak nie, maar ook die hele Suid-Afrikaanse ekonomie met 0,6 persent in die eerste kwartaal laat daal. Die inkrimping in mynbou- en steengroef-aktiwiteit is 24,7 persent.
Sommige ekonome voorspel reeds ‘n resessie aangesien die dispuut oor lone in die platinumgordel nog glad nie verby is nie. Ná 18 weke, sal dit ook die land se ekonomiese uitset in die tweede kwartaal raak, terwyl somminge myne in Rustenburg reeds in April en Mei feitlik heeltemal tot stilstand gedwing is. Dit beteken dat die statistiek vir die tweede kwartaal ook teleurstellend gaan wees.
Volgens gangbare ekonomiese definisies, staan twee agtereenvolgende kwartale van negatiewe groei as ‘n resessie bekend. Die kanse is dus nou goed dat Suid-Afrika aan die einde van dié kwartaal amptelik in ‘n resessie sal verkeer. Die vorige keer toe die land hom in dié situasie bevind het, was tydens die globale finansiële krisis in 2009.
In die vierdie kwartaal van verlede jaar het die ekonomie nog met 3,8% gegroei.
Met die huidige trae en negatiewe groeikoers, is daar geen moontlikheid dat die werkloosheidsyfer sal verbeter nie. Minder ekonomiese aktiwiteit beteken ook dat die invordering van belastings getref sal word, wat weer die begrotingstekort gaan verhoog.
Die Nasionale Ontwikkelingsplan (NOP) vereis ‘n groeikoers van 5% per jaar ten einde werkloosheid teen die jaar 2030 tot minder as 10% te verlaag.
Die hoofekonoom van Econometrix, Azar Jammine meen egter dat ‘n resessie slegs moontlik is indien die plantinastaking vir die res van die jaar duur. Indien dit gou beëindig word, kan die land nog ‘n resessie vermy.
Volgens Johan Theron, ‘n woordvoerder van Impala Platinum, sal dit ongeveer drie maande neem om die produksievlakke van vóór die staking te bereik indien die staking sou ophou.
Die swak groeisyfers vir die eerste kwartaal het die reeds die Reserwebank genoop om sy vooruitskatting vir ekonomiese groei van 2,6% tot 2,1% vir vanjaar aan te pas.
Hierdie syfers ondersteun ook die Reserwebank se besluit om rentekoerse voorlopig onveranderd te laat.
RSG berig dat daar vandag twee tussenverkiesings in die Wes-Kaap plaasvind, een in Kaapstad en die ander een in die Matzikamamunisipaliteit op Vredendal. Die Onafhanklike Verkiesingskommissie sê stembusse sal oop wees van sewe-uur die oggend tot nege-uur die aand. Die OVK se hoof in die Wes-Kaap. Courtney Sampson, sê bykans 60-duisend kiesers is in die 34 stemdistrikte geregistreer. Sampson sê in wyk 25 in Kaapstad waar die ANC, DA, FNLA en PA sake sal uitspook, sal daar 9 stemlokale wees. By die tussenverkiesing op Vredendal word daar in wyk ses gestem en sal die ANC, DA en PA sake uitspook.
Die laaste leier van die Nasionale Party en voormalige minister van toerisme, Marthinus van Schalkwyk het bedank uit die Parlement.
“Kortbroek” soos hy bekendstaan, het ‘n dag nadat President Jacob Zuma hom uit sy nuwe Kabinet gelaat het, bedank.
Van Schalkwyk, wat vanaf 2004 vir 10 jaar as ‘n minister gedien het, het Maandag bedank, maar wou nie sê waarom hy loop of wat hy beplan om volgende te doen nie.
In ‘n bondige verklaring het hy Zuma en voormalige presidente Thabo Mbeki en Kgalema Motlanthe bedank vir sy aanstellings.
Sy opvolger is die nuutaangestelde minister van toerisme, Derek Hanekom.
Dit is veilig om te sê dat Van Schalkwyk klaarblyklik nie bereid is om op die ANC-agterbanke in die Nasionale Vergadering te sit nie.
Kortbroek het sy party die laaste paar jaar byna nooit in die openbaar verdedig nie.
Met Pieter Mulder en Kortbroek weg, bly nog net Gert Oosthuizen aan as adjunk-minister van sport.
