Sowat 20 “struggle kids” het Vrydagaand by die Katutura-polisiekantoor in Windhoek ingebreek en een van hul lede uit die selle bevry, het Die Republikein berig.
Dít volg nadat dié jeugdiges wat agter die tralies gesit het, vroeër deur die polisie in hegtenis geneem was omdat hy glo iemand se voertuigruit uitgeslaan het.
Die voorval het om 00:00 plaasgevind toe die strydjeugdiges by die kantoor aangekom het, die diefwering wat die beamptes van die publiek skei, afgebreek het en ingegaan en die gevangene vrygelaat het.
Nampol se spesiale veldmag het Saterdag om 08:00 die ‘struggle kids’ se kamp binnegegaan en vyf van hulle, insluitend die gevangene, in hegtenis geneem.
Die woordvoerder van die polisie, adj.komm. Edwin Kanguatjivi, het die voorvalle Maandag tydens die weeklikse misdaadkonferensie bevestig.
Kanguatjivi sê in die uur wat die strydjeugdiges by die polisiekantoor ingebreek het, is daar gewoonlik sowat twee tot drie polisiebeamptes wat elke kantoor beman.
“Die beamptes was moontlik deur die groot groep oorweldig. Dit kan wees dat die beamptes hul samewerking moes gee om die gevangene te bevry, weens die gevaar waarin hulle en die publiek in daardie stadium kon verkeer het,” het hy gesê.
Die man wat Maandag van die 21e vloer van die Geesteswetenskappe-gebou op die Universiteit van Pretoria (UP) se hoofkampus gespring het, was ‘n student.
Nicolize Mulder, UP-woordvoerder, het gesê die naam van die student word teruggehou totdat die universiteit toestemming van die ouers verkry het om sy naam bekend te maak.
“Traumaberading is beskikbaar vir alle personeel en studente wat deur die voorval geraak is,” het Mulder gesê.
Kaptein Colette Weilbach, Brooklyn-polisiewoordvoerder, het gesê hulle ondersoek die saak.
“‘n Geregtelike doodsondersoek is geopen. Geen vuilspel word vermoed nie,” het Weilbach gesê.
Rekord het berig dat die student uit dieselfde venster gespring het as Danny Anthony Nortjé-Rossouw, die dosent wat sowat ‘n maand gelede dood is.
Albei mans se lyke is met ‘n brandweerwa se hyskraan van die gebou se dak verwyder.
Verbruikers gaan binnekort meer moet opdok vir die gebruik van bankkaarte.
Jan Alleman sal aanstons die bankkoste betaal wanneer bankkaarte by verkoopspunte gebruik word.
Dié verwikkeling volg na ‘n vermindering in tussenhandelstariewe wat vroeër vanjaar deur die Reserwebank aangekondig is.
Kleinhandelaars subsidieer in werklikheid die gebruik van bankkaarte want die handelaar betaal op die oomblik ‘n hoër tussenhandelstarief vir dié gerief.
As tariewe verlaag word, sal banke die verskil van verbruikers verhaal.
Die bestuurshoof van die Betaalpunt-vereniging, Walter Volker sê die verlaging van die tariewe is egter goeie nuus vir kleinhandelaars omdat dit hulle koste sal verlaag.
Hy sê vir verbruikers kan transaksiekostes styg, maar dat banke self sal besluit hoeveel die kliënt sal moet opdok.
Soldate van die Oekraïense junta het teruggeval van die Lugansk-lughawe en ‘n nabygeleë dorp in die ooste van die land nadat hulle onder swaar vuur gekom het, het die sekuriteitswoordvoerder in Kiëf Maandag gesê.
“Oekraïnse soldate het ‘n bevel ontvang en georganiseerd teruggeval van die Lugansk-lughawe en die dorp Georgijiefka,” het Andrij Lysenko gesê.
Berigte dui daarop dat Kiëf se magte in chaos verkeer nadat hulle lugaanvalle op Russiesprekende burgers in die ooste nie vrugte afgewerp het nie.
Kiëf probeer hul nederlae herhaaldelik toeskryf aan ‘n “Russiese inval”, maar die verklarings is grootliks fantasievlugte van die owerhede want daar is geen teken van die Russiese Federasie se teenwoordigheid in die land nie.
“Te oordeel aan die presiesheid van die aanvalle is dit waarskynlik die Russiese gewapende magte wat op die soldate gevuur het,” het Kiëf in die jongste van dié soort verklarings gesê.
Die lughawe en Georgijiefka is ‘n paar kilometer suid van die selfverdedigings magte se vesting in Lugansk geleë.
Intussen het Moskou hul skok te kenne gegee dat die Oekraïne se minister van verdediging, Valery Geletej beweer dat Rusland ‘n “kernaanval” op sy buurman beplan.
Rusland het gewaarsku dat sulke onverantwoordelike retoriek die burgerlike konflik in die Oekraïne net verdiep.
“Dit is moeilik om te glo dat sulke uitlatings kan kom van ‘n minister van verdediging van ‘n beskaafde staat. Andersins, is dit net nie duidelik hoe tien duisende Oekraïense gesinne só ‘n amptenaar met die lewens van hul kinders, broers en mans, gemobiliseer in die Oekraïense weermag om ‘n oorlog te voer teen hul eie mense, kan vertrou nie.”
Betogers in Kiëf het Maandag geëis dat die Oekraïense president en minister van verdediging moet bedank.
Vroeër Maandag, het die Russiese minister van buitelandse sake Sergei Lawrof beklemtoon dat daar “geen militêre ingryping deur Rusland in die konflik in die Oekraïne” sal wees nie.
‘n Groep woedende inwoners van Letlhabile van Brits in Noordwes het ‘n munisipale voertuig aan die brand gesteek, het RSG berig.
‘n Polisielid op die toneel sê die groep het probeer om munisipale grond te beset om hutte op te rig toe hulle die voertuig aan die brand gesteek het.
Niemand is beseer nie.
Die groep se leier, Lefa Mohkele sê die inwoners eis grond om hutte op te bou omdat die munisipaliteit nie by sy belofte gehou het om laekostehuise vir hulle te bou nie.
Twee winkelsentrums in Johannesburg het Maandagoggend onder gewapende rowers deurgeloop.
Lt.kol. Lungelo Dlamini, polisiewoordvoerder, sê gewapende rowers het Maandagoggend ‘n selfoonwinkel by die Northgate-winkelsentrum besteel.
Gewapende rowers het ook met ’n groot bedrag geld van die selfoonwinkel in die Northgate-winkelsentrum gevlug, sê Dlamini.
“Twee gewapende rowers het by die die selfoonwinkel ingestap en vuurwapens uitgehaal. Die winkelbestuurder en die werknemers is met vuurwapens gedreig. Die twee rowers het selfone gevat en geld geëis. Hulle het by die winkelsentrum uitgehardloop en met die buit verdwyn. Niemand is in die voorval beseer nie.”
Dlamini sê niemand is in verband met die voorvalle in hegtenis geneem nie en die polisie is steeds op soek na die verdagtes.
Ses gewapende rowers het Maandagoggend ook twee sekuriteitswagte van ‘n groot bedrag geld by die Maponya-winkelsentrum in Soweto beroof.
“Twee veiligheidswagte van die Maponya-winkelsentrum was op pad om twee sakke geld bank toe te neem. ‘n Gewapende rower het hulle gekonfronteer en die geld van hulle geëis.
“Nóg ’n gewapende rower het by een van die ingange gestaan en skote gevuur. Vier ander rowers het buite in ’n silwer motor vir hulle gewag. Die ses rowers is met die buit weg.”
Dlamini sê niemand kon die motor aan die polisie beskryf nie.
Vyf mense is Maandagoggend aangerand tydens ’n winkelrooftog in Rosettenville, suid van Johannesburg.
“Paramedici het by die winkel aangekom en die werknemers binne die winkel aangetref. Hulle was sigbaar geskok,” het Russel Meiring, woordvoerder van ER24, gesê.
“Die vyf pasiënte is vir hul beserings behandel en daarna na ’n nabygeleë hospitaal geneem vir verdere behandeling.”
Volgens Meiring het hulle ligte beserings opgedoen. Geen verdere inligting is beskikbaar gestel nie.
Die polisie kon ook nog nie verdere kommentaar oor die rooftog lewer nie.
‘n Bejaarde man en ’n vrou wat in besit van Mandrax met ’n geskatte straatwaarde van R1,2 miljoen betrap is, het Maandag in die Kimberley-landdroshof verskyn, het die Nasionale Vervolgingsgesag (NVG) in ‘n verklaring gesê.
Die saak sal tot 8 September uitgestel word om ‘n formele borgtogaansoek te doen, het Mashudu Malabi, woordvoerder, gesê.
Die twee is Saterdag in Kimberley, op ’n trein wat na Kaapstad onderweg was, in hegtenis geneem.
“Die polisie het vinnig op ‘n wenk gereageer. ’n Man (72) en ’n vrou (49) is in besit van ongeveer 12 500 Mandrax-pille, wat in twee sakke gebêre was, betrap,” het lt. Donald Mdhluli gesê.
Lesotho se afgesette premier, Thomas Thabane, wat Saterdag na Suid-Afrika gevlug het, het Maandag gevra dat ‘n SAOG-vredesmag na sy land ontplooi word. Hy het gewaarsku dat die “situasie buite beheer is”.
Die SAOG het ook ooreengekom om ‘n streeksfasiliteerder na die land te stuur om met die koalisieregering saam te werk.
Probleme soos oorgrenswapensmokkelary en ‘n politieke vakuum in die Lesotho Hooglandwaterprojek, wat water aan Gauteng besorg, kan ‘n kopseer vir Suid-Afrika word, sê ontleders.
President Zuma en ander verteenwoordigers van die SAOG het in Pretoria samesprekings gevoer.
Lesotho se regerende partye het intussen, na samesprekings met Suid-Afrika, ooreengekom om die skorsing van die parlement op te hef.
Die troika van die SAOG, wat deur Zuma gelei word, het in ‘n verklaring gesê premier Tom Thabane, sy adjunk, Mothejoa Metsing en die leier van die derde koalisieparty en minister van sport, Thesele Maseribane, het ooreengekom om saam te werk.
Thabane het in Julie vanjaar beveel dat die parlement gestaak word na verskille tussen die polisie en weermag na vore gekom het.
Dit is ‘n poging om bestendigheid in die land te herstel na ‘n vermeende staatsgreeppoging.
Thabane het Saterdag na Suid-Afrika gevlug toe soldate by verskeie polisiestasies op wapens beslag gelê en sy ampswoning omring het.
Een Polisielid is dood en verskeie ander gewond in die gevegte.
‘n Geheimsinnige “organisasie” het so pas ‘n hooggeregshofaansoek in Johannesburg geloods om alle Afrikaanse skole te verbied om enige vorm van christelike verwysing, gebed of die lees van die Bybel in Afrikaanse skole te verbied.
Mnr. Johannes de Klerk Pietersen voer in hofstukke voor die Gautengse Hooggeregshof, Johannesburgse plaaslike afdeling, aan dat dit “ongrondwetlik” is om hoegenaamd na die christelike geloof in ‘n openbare skool te verwys. Daar mag ook nie van “christelike norme en waardes” gepraat word nie, aangesien dit teen ander gelowe en opvattings “diskrimineer”.
Namens die “organisasie vir godsdienste-onderrig en demokrasie”, waarvan hy voorsitter is, vra Pietersen die hof om ‘n bevel wat die Laerskool Randhart in Alberton, die Laerskool Baanbreker in Boksburg, die Laerskool Garsfontein in Pretoria, die Hoërskool Linden in Johannesburg, die Hoërskool Oudtshoorn en die Langenhoven-Gimnasium in Oudtshoorn sal verbied om christelike verwysings en gebruike toe te laat en sodanige verwysings en gebruike as “ongrondwetlik” te verklaar.
Lede van Pietersen se organisasie is, volgens berigte, “Afrikaanssprekende mense wie se kinders in die onderskeie skole aan christelike praktyke onderwerp is”.
Dit is bekend dat dr. Piet Croucamp van die Universiteit van Johannesburg, wat voorheen by ‘n heksejag betrokke was teen Afrikaanse akademici wat kritiek op kultuurmarxisme lewer, insgelyks hewig teen christelike inhoud of gebruike in skole gekant is. Hy lewer gereeld op sy Facebookblad neerhalende kommentaar oor gelowiges en christene in die besonder. Dit is tans onbekend of hy by die aksie teen christenskap in skole gekant is.
Pietersen se organisasie is nou die derde wat teen Afrikaanse skole optree, naas die nasionale onderwysdepartement en die George Soros-ondersteunde Section 27 wat reeds ‘n hofsaak teen die Hoërskool Fochville gevoer het in ‘n poging om die skool te verengels en rasse-onmin tussen kinders te saai. Die vorige LUR vir onderwys in Gauteng, die Engelse mev. Barbara Creecy, het private dreigemente teenoor Afrikaanse skole in die provinsie gemaak dat sy hul geboue sou konfiskeer en met Engelse kinders sou vul.
Mnr. Paul Colditz van Fedsas adviseer die skole oor die hofsaak wat hulle in die gesig staar. Daar is nog nie ‘n besluit geneem of die skole die aansoek gaan teenstaan nie. Volgens hom, “raak die aansoek… elke openbare skool, ook die skole met ’n ander godsdienstige etos as dié van christenskap. Sou die saak verder gevoer word, sal dit waarskynlik in die grondwethof draai weens dít wat gevra word.”
Die Madonna del Granduca deur Raphaël. Binnekort is die studie daarvan op ‘n Afrikaanse skool verbode?
Optrede teen die christelike geloof op skool word internasionaal veral met die kommunisme in die voormalige Oos-Europa vereenselwig. Gewoonlik is dit ‘n teken van ‘n owerheid wat ‘n wig tussen kinders en hul ouers wil indryf, sodat kinders makliker op skool gebreinspoel kan word. In Marx en Engels se oorspronklike Kommunistiese Manifes word voorgestel dat die staat kinders van hul ouers moet wegneem en moet grootmaak sodat kommunisme as enigste ideologie kan seëvier.
Kunsonderwyseresse by die skole is veral bekommerd dat hulle nie meer toegelaat sal word om Westerse kuns, waarin vele christelike tonele en verwysings voorkom, aan kinders te doseer nie. “Dikwels is daar ‘n klassieke skildery wat weer na ‘n Renaissance-skildery met ‘n christelike inhoud verwys,” het ‘n onderwyseres van Johannesburg, wat uit vrees vir viktimisering nie haar naam genoem wil hê nie, gesê. “Hoe gaan ‘n mens die inhoud en betekenis aan leerlinge kan verduidelik sonder om na die christelike godsdiens of die Bybel te verwys?”
‘n Vliegtuig van die Oekraïne met sewe mense aan boord het in die Sahara-woestyn in Algerië neergestort, het die Algerynse staatsmedia (APS) berig.
Die Antonov 12-vragvliegtuig, wat onderweg was na Ekwatoriaal-Guinee vanaf Glasgow in Skotland, het omstreeks 02:00 Saterdagoggend naby die grens van Mali en die Niger neergestort.
Dit het vroeër by ‘n lughawe in die Algerynse stad Tamanrasset, geland vir ongespesifiseerde tegniese redes. Dié Algerynse stad lê diep in die Sahara, ongeveer 2000 kilometer suid van Algiers.
Reddingswerkers het wrakstukke van die vliegtuig in ‘n bergagtige gebied in die suide gevind, maar die lot van die mense aan boord is nog onseker, het amptenare gesê.
Die vliegtuig het onderdele van ‘n petroleumnywerheid vervoer.
