Kategorie: Nuus

NAVO saboteer vredesproses in Oekraïne

NAVO misbruik die Oekraïense krisis as ‘n verskoning om sy militêre teenwoordigheid nader aan Rusland se grense uit te brei en planne vir ‘n nuwe vinnige reaksiemag sal die vredesproses in die ooste van die Oekraïne saboteer, het die Russiese Federasie gesê.

Rusland se voormalige NAVO-gesant, Alexander Grushko, het NAVO intussen ook daarvan beskuldig dat die VSA “probeer om die finansiële las van die handhawing van NAVO op sy bondgenote af te laai”. Sonder ‘n groot inspuiting van fondse en ‘n nuwe doelwit is NAVO gedoem aangesien die alliansie se bemoeienis met die Midde-Ooste ‘n fiasko gebaar het in lande soos Libië.

​​Ten minste 4000 troepe sal in die reaksiemag dien wat deur NAVO goedkeur is.

“Die [uitbreiding]planne deur NAVO word al vir ‘n lang tyd voorberei, en die onlangse gebeure het as ‘n verskoning gedien om dit te laat realiseer,” het die Russiese ministerie van buitelandse sake in ‘n verklaring op hul webwerf gesê, na aanleiding van ‘n besluit by die NAVO-beraad in Wallis.

“Saam met die retoriek by die beraad, en die beplande militêre oefeninge voor die einde van die jaar, sal hierdie spanning verhoog, die ontluikende vredesproses destabiliseer, en ‘n verdere uitbreiding van die konflik in die Oekraïne tot gevolg hê,” het die ministerie se verklaring gelui.

“Die bogenoemde is ook bewys van NAVO se onvoorwaardelike steun vir die ekstremiste en neo-fasciste in Kiëf, insluitend die Regse Sektor se politieke beweging,” het hy beklemtoon.

Tydens die twee-dag-beraad, het die 28 NAVO-lidlande op die skepping van ‘n vinnige reaksie-eenheid van ten minste 4000 besluit. Dié mag sal in minder as 48 uur in Oos-Europa ontplooi kan word.

Die primêre rede vir die inisiatief is glo “Rusland se aggressie teen die Oekraïne”. Die Oekraïene was voorheen deel van Rusland en word beskou as die oorsprong van die Slawiese kultuur.

Grushko het die uitgediende “Koue Oorlog-denke” veroordeel en gesê die geskiedkundige 1997-ooreenkoms waarin Moskou en Brussel amptelik verklaar het dat hulle nie meer “teenstanders” is nie, word hierdeur ondermyn.

In ‘n TV-onderhoud, het Grushko gesê dat NAVO ‘n verhoogde teenwoordigheid van NAVO-skepe in die Oossee en Swart See gelas het wat die vlak van vertroue om potensiële brandpunte op te los, vernietig het.

Grushko het ook die beplande NAVO-Oekraïne-oefening ‘n “provokasie” genoem want “buitelandse troepe sal in ‘n land opdaag wat teen sy eie mense veg”.

Die oorlog wat Kiëf teen Russiessprekende minderhede in die land verklaar het, het Rusland vroeër genoop om humanitêre hulpkonvooie na die oorlogsgeteisterde ooste te stuur.

“NAVO moet geen rol in die Oekraïense konflik speel nie,” het die amptenaar gesê aan die Rossiya-24-netwerk.

Verenigde State van Amerika se president het Vrydag gesê dat die VSA en die Europese Unie voortgaan met sanksies teen Rusland ten spyte van die ondertekening van ‘n skietstilstand-ooreenkoms.

Barack Obama het in Newport, Wallis aan die einde van ‘n NAVO-beraad gesê hy is skepties oor ‘n vredesverdrag wat deur verteenwoordigers van Kiëf, Lugansk en Donetsk slegs ure vroeër in Minsk onderteken is, en het gesê die VSA van voorneme is om voort te gaan met nuwe sanksies.

Die aankondiging van bykomende sanksies teen Rusland deur die Europese Unie is ‘n direkte ondersteuning van Kiëf se “Oorlogsparty” het Rusland se ministerie van buitelandse sake Saterdag gesê.

“Die Europese Unie het getoon dat die owerhede steeds in ‘n politieke fantasie leef, en hulle verskaf byna direkte ondersteuning aan die Oorlogsparty in Kiëf, wat nie tevrede is met die uitkoms van die Minsk-vergadering nie,” het die ministerie gesê.

Regering se grondgrypplan gaan voort

Die minister van grondhervorming, Gugile Nkwinti het vroeër gesê dat die regering sal voortgaan met die plan om die omstrede grondhervormingsbeleid in te stel.

Hy het in Boksburg aan die Oos-Rand by ‘n beraad oor grond en eiendomsreg gepraat.

Die ANC stel in sy beleidsdokument voor dat plaaswerkers die helfte van die grond van boere wat hulle as werknemers aanhou, moet oorneem.

Die regering sal luidens dié voorstelle die koste van die oordrag van grond dra.

Die landbou-unie, AgriSA sê die kwessie van grondhervorming skep onsekerheid in die landbousektor.

Die adjunk-president van die unie, Theo de Jager sê dat die uitvoering van die beleid maak boere senuweeagtig en nie die beleid as sodanig nie.

Hy sê die unie ondersteun grondhervorming, maar dat die proses kan skeefloop indien dit nie behoorlik bestuur word nie.

De Jager het gesê vennootskappe tussen privaatondernemings en die staat moet as alternatief ondersoek word

Hy het gesê die gevaar bestaan dat voedselsekerheid in die gedrang kan kom.

Sapa herhaal naakte Amerikaanse propaganda

Sapa het Vrydag naakte Amerikaanse en NAVO-propaganda herhaal waarin “berig” word dat “strawwe maatreëls” teen “Russiese aggressie” teen die Oekraïne ná die NAVO-beraad in Wallis sal volg.

Amerika en die Europese Unie gaan na verwagting nuwe gekoördineerde sanksies teen Rusland aankondig. Dit gaan beperkings insluit op van die land se belangrikste energiemaatskappye, sowel as reisbeperkings.

Die sanksies word teen die Russiese president en sy raadgewers en vertrouelinge gemik. Die VSA is tans druk besig met ‘n koverte destabiliseringspoging teen Rusland en Oos-Europa.

Paul Craig Roberts, een van Praag se bydraers en ‘n voormalige ekonomiese raadgewer van Ronald Reagan, sê hy het van hoë amptenare in die Amerikaanse administrasie verneem dat Europese politici deur Washington met geld omgekoop word om ‘n Amerikaanse agenda te dryf wat teen die belange van hul lande en kiesers indruis.

Ben Rhodes, adjunk-nasionale raadgewer vir die Withuis, het Rusland gewaarsku dat die Amerikaanse aanslag vorentoe net feller sal word.

Die sekretaris-generaal van NAVO, Anders Fogh Rasmussen, het op sy beurt gewaarsku dat Rusland “die grootste bedreiging vir Europa inhou sedert die Koue Oorlog”, ten spyte daarvan dat die VSA vir die militêre opbou in Europa verantwoordelik is.

NAVO, ‘n verlengstuk van die VSA, hoop om ‘n oorlog op die vasteland teen Rusland te ontketen.

Ondersoekverslag van MH17 eersdaags bekend

Ondersoekers in Nederland het aangekondig dat ’n voorlopige verslag eerskomende Dinsdag bekendgestel sal word oor vlug MH17 van die Maleisiese lugdiens wat in die ooste van die Oekraïne neergestort het.

Daar het 298 passasiers het in die lugramp omgekom.

“Die voorlopige verslag sal feitelike inligting bevat wat ontvang is van bronne wat aan die Nederlandse Veiligheidsraad beskikbaar gestel is,” het ondersoekers in ’n verklaring gesê,

Die langverwagte eerste verslag sal nie tydens ‘n mediakonferensie vrygestel word nie. Nederland en Brittanje het die inhoud van die vlugopnemers ondersoek.

Nederland is glo in beheer van die ondersoek wat in die VK plaasgevind het. Die ondersoek is onderneem om te bepaal hoe Boeing 777 op 17 Julie 2014 bo die konflikgeteisterde Oekraïne afgeskiet is en almal aan boord – insluitende 193 Nederlandse burgers – dood is.

Dit is nie duidelik wat Brittanje se rol in die ondersoek is nie, aangesien hulle soseer geraak is deur die ramp nie.

Beeld het die lugramp as ‘n “voorval” beskryf.

Westerse lande het die lugramp intussen as verskoning gebruik om Rusland aan te val en ‘n militêre operasie teen Russiessprekende inwoners in die ooste van die Oekraïne te loods om hulle te verdryf uit die land.

Meer as 150.000 vlugtelinge het oor die grens na Rusland gevlug nadat die VSA en NAVO die operasie gesteun het waarvan die dodetal aansienlik hoër is as die onlangse Israelse aanval op Gasa.

Rusland het intussen data vrygestel wat die vinger wys na die Oekraïnse magte se betrokkenheid by die lugramp.

Obama sê Russiese troepe in die Oekraïne ‘n feit

Die teenwoordigheid van Russiese troepe in die Oekraïne is sonder twyfel waar, het president Barack Obama gesê in die Tallinn Konsertgebou Nordea, in Estland.

“Russiese troepe in die gebied van die Oekraïne is nie ‘n humanitêre of vredesending nie,” het hy gesê. Volgens hom, “dit is die feite wat bewys kan word,” en “hulle kan nie bevraagteken word nie.”

‘n Verteenwoordiger van die Amerikaanse ministerie van buitelandse sake Jen Psaki het gesê dat die Verenigde State van Amerika se State Department geen onafhanklike bewyse het dat die Russiese troepe oor die grens van die Oekraïne beweeg het nie.

Boer en sy vrou in die kop geskiet

‘n Beesboer en sy vrou in KwaZulu-Natal is Woensdagmiddag op hul plaas doodgeskiet in die jongste plaasmoordaanval.

Nico en Marsha Lens, van Elandsberg,in die Paulpietersburg-distrik, is glo in die laatmiddag oorval. Albei is in die kop geskiet.

Marsha Lens het blykbaar die paniekknoppie gedruk om haar bure te laat weet van die aanval voor sy dood is.

Die Lens-egpaar, in hul vyftigs, is per alarmstelsel gekoppel aan buurplase, maar toe die bure by die plaas opdaag, was dit reeds te laat.

Hoewel die polisiekantoor net 30 km van die plaas geleë is, het die polisie eers ’n uur en half later opgedaag en die polisie se honde-eenheid het eers drie ure later toe dit te donker was om te begin soek.

Australiese hoëkommissaris in SA oorlede

Pres. Jacob Zuma het sy meegevoel met die Australiese regering betuig ná die afsterwe van sy hoëkommissaris na Suid-Afrika, Graeme Wilson, het die departement van internasionale betrekkinge Woensdag in ‘n verklaring gesê.

“Hoë kommissaris Wilson was ‘n merkwaardige persoon en ‘n ware ambassadeur vir sy land,” het Zuma in die verklaring gesê.

“Hy het geen steen onaangeroer gelaat om betrekkinge tussen Suid-Afrika en Australië te verstewig nie en sal altyd onthou word vir sy passie vir Afrika, veral Suid-Afrika.”

Wilson is Dinsdag in Pretoria ná ‘n kort siekbed oorlede.

Hy het sy pos sedert Januarie 2013 beklee.

Franse kanselleer lewering van Mistral aan Rusland

Die Russiese Federasie het nie-amptelike kennisgewing van Frankryk ontvang dat die lewering aan Rusland van die eerste helikopterdraer, die Mistral-ooreenkoms opgeskort is, het Oleg Bochkarjof, ‘n adjunk-voorsitter van die regering se kommissie vir verdedigingvervaardiging aan ITAR-Tass gesê.

Die kantoor van die Franse president Francois Hollande het Moskou se onlangse optrede in die Oekraïne as rede vir die stap aangevoer.

Frankryk was onder kwaai druk van van die VSA en ander NAVO-lande om die verkoop van twee Mistralskepe aan Rusland te staak. Frankryk neem tans deel aan NAVO-samesprekinge in Wallis om ‘n snelreaksiemag teen Rusland te ontplooi.

Vroeër in die dag het die Elysees-paleis gesê ‘n besluit teen die lewering van die eerste Mistral is geneem. Dit sou in Oktober afgelewer word.

‘n Kontrak met ‘n spesifieke bekende Franse maatskappy bestaan ​​en dit is onderteken deur ‘n Russiese staatsagentskap,” het Bochkaryjof gesê.

“Dit sal regsgevolge inhou slegs as die Franse vennote ‘n amptelike dokument vir ons stuur waarin hulle sê dat hulle weier om die tegnologie aan ons te lewer.”

Hy het beklemtoon dat Rusland tot dusver die bepalings van die kontrak streng tot op die letter nagekom het.

“Ons standpunt is goed bekend – ons wil nie deure toeklap nie, ons maak hulle toe, maar bly oop vir samewerking,” het Bochkarjof gesê.

Hy het aangedui dat Russiese kenners reeds by die helikopterdraers aanvaardingsinspeksie van verskeie stadiums van die werk onderneem het.

“Hulle het net twee dae gelede teruggekeer huistoe,” het Bochkarjof gesê. “Dit is nog te vroeg om te praat oor hofsake omdat ons voortgaan om te werk in die formaat van hierdie ooreenkoms.

Frankryk het die aflewering van die eerste van twee oorlogskepe aan Rusland opgeskort ondanks die vooruitsig van ‘n skietstaking in die Oekraïene.

Rusland se adjunkminister van verdediging het Frankryk se besluit as onaangenaam bestempel en sê dit plaas druk op samewerking tussen Rusland en sy Franse vennote. Hy sê dit is egter nie rampspoedig vir sy opgraderingsplan nie.

Kanadese van IS hou Amerikaanse joernaliste aan

Ten minste drie Kanadese burgers, wat by ‘n militante groep in Sirië aangesluit het, was verantwoordelik vir die aanhouding en wrede ondervraging van Amerikaanse joernaliste Theo Curtis en Matt Schrier, het CBC berig.

Intussen het die VSA gesê hulle sal Sotloff se dood te wreek nadat hulle die egtheid van die onthoofdingsvideo bevestig het. Steven Sotloff en James Foley, twee ander Amerikaanse joernaliste, is die afgelope weke kort na mekaar deur jihadiste in Irak onthoof.

Die identiteit van die drie Kanadese is nie bekend nie volgens die Kanadese media.

Met verwysing na bronne, het CBC gesê die drie Kanadese het die Amerikaanse joernaliste ondervra om rekenaarwagwoorde en PIN-nommers te kry.

Die ontvoerders het geld uit die joernaliste se bankrekenings gesteel en ​​en wrede boodskappe aan familielede gestuur waarin hulle voorgee om die gyselaars te wees.

Hulle het ook die kredietkaarte gebruik om elektroniese toerusting te koop op eBay.

Die meeste van dié individue uit Westerse lande het by die Islamitiese staat (IS), voorheen bekend as die Islamitiese staat van Irak en Sirië (ISIS of Isil) aangesluit.

Daar word geraam dat die meeste van die 3000 uit Brittanje afkomstig is.

Curtis en Schrier is aangehou tussen 2011 en 2013. Schrier het glo verlede jaar ontsnap, terwyl Curtis verlede maand vrygelaat is deur die jihadistiese Al-Nusra-groep wat nou IS/ISIS is.

Die Kanadese regering het vroeër beraam dat sowat 130 Kanadese by ekstremiste groepe oorsee aangesluit het. Maar CBC glo dat getalle iewers tussen 200 en 300 mense is.

Hulle is vroeër gewerf om teen Sirië – die laaste oorblywende land waar godsdiensvryheid beoefen word – se “diktatuur” te gaan veg met wapen- en opleidingshulp van die VSA en Brittanje.

Intussen het ‘n voormalige Britse bokskampioen die onthoofding van Amerikaanse joernaliste, Steven Sotloff en James Foley, as ‘n vorm van “vergelding” beskryf wat deur Britse optrede “uitgelok” is.

Anthony Small het Westerse magte vir die geweld belameer wat deur IS (voorheen ISIS) militante gepleeg word. Hy het gesê die Weste het “oorlog verklaar” teen Moslems.

“Ek wil nie sê ‘uitgelok’ nie, want hulle sal sê ek loof terrorisme … Geen staat kan stilsit en toelaat om op hierdie wyse aangeval te word nie.”

Die 33-jarige noem die VSA ook die “United Snakes of America”.

Hy het ook gewaarsku dat Britte terreuraanvalle kan verwag as die Verenigde Koninkryk militêr optree teen IS.

Small se opmerkings kom enkele dae nadat ‘n wit middeljarige Britse ma getwiet het sy wil Christene onthoof. Sally Jones was eers deel van ‘n rockgroep voordat sy na Sirië gereis het om by die Islamitiese Staat aan te sluit.

Ebola-koors styg

Die Wêrelgesondheidsorganisasie (WGO), het in Washington bekend gemaak dat byna 2000 mense reeds weens die ebola-virus dood is.

Die hoof van die WGO, Margaret Chan het gewaarsku dat die siekte besig is om verder uit te kring. Daar is reeds 3500 gevalle in Guinee, Sierra Leone en Liberië bevestig.

Die jongste syfer is aansienlik hoër as die 1552 sterftes wat vroeër aangemeld is.

Chan sê die WGO hoop dat die oordrag van ebola binne ses tot nege maande gestuit kan word danksy die internasionale reaksie op die gesondheidsramp.

Die Amerikaanse ambassadeur in Liberië, Deborah Malac het druk op president Ellen Johnson Sirleaf van Liberië geplaas om te bedank omdat sy glo nie die ebola-krisis reg bestuur nie.

Die George Soros-stigting en ander nie-regeringsorganisasies wat die Amerikaanse regering steun, het die eis herhaal. Soros het ook gevra dat Wes-Afrika-troepe, ECOWAS, in die land ontplooi word.

Malac beweer dat die Amerikaanse regering gesien het dat die Liberiese weermag op mense in kwarantyn skiet. Liberië het 1,3 miljoen mense onder kwarantyn geplaas nadat die WGO ‘n ebola-epidemie verklaar het. Dié mense het glo nie genoeg voedsel nie.

Daar is vandeesweek 13 ebola-sterftes in die Kongo bevestig, maar die virus behoort nie tot dieselfde stam as dié in Wes-Afrika nie.

Talle lande, waaronder ook Rusland, het aangedui dat hulle waarnemers sal stuur om ‘n oplossing vir die siekte te probeer vind.

Die Minister van Gesondheid, Aaron Motsoaledi het aan die Nasionale Vergadering gesê die O.R. Thambo lughawe in Johannesburg is die toegangspunt wat die grootste risiko inhou waar mense die land met die ebola-virus kan binnekom.

Hy het gesê weens die potensiële risiko is staatshospitale in Gauteng toegerus met beskermde toerusting sodat gesondheidswerkers doeltreffend teen die siekte kan optree.

Die Lanseria lughawe word ook as ‘n risiko bestempel. Motsoaledi sê hulle stel op die oomblik ondersoek in na die risiko’s by die Kaapse Internasionale lughawe en die Koning Shaka lughawe in Durban.