Kategorie: Nuus

Zim sê dodetal in xenofobiese geweld ‘n grys gebied

Die polisie in Gauteng het Maandag ontken dat ‘n Zimbabwiese vrou wat onthoof is in Killarney verlede week, ‘n slagoffer van xenofobiese geweld was, maar Zimbawiese hooggeplaastes sê die dodetal is ‘n grys gebied.

Lungelo Dlamini, polisiewoordvoerder, het aan News24 gesê die vrou se liggaam is Dinsdag gevind “naby die plek waar die hawelose mense was bly” in Killarney.

“Ons dink nie dat dit verband hou met die xenofobiese geweld nie. Dit lyk soos ‘n beplande moord. Sy is elders vermoor, en haar liggaam is daarna in die plastieksak gestop en weggegooi,” het Dlamini gesê, wat bevestig het dat die polisie die motief vir die vrou se moord ondersoek.

Dlamini het nie die naam van die slagoffer bekend gemaak nie, maar die staatsbeheerde media in Zimbabwe het Maandag lede van ‘n gesin in Harare aangehaal wat gesê het hul familielid is onthoof in die Houghton-gebied.

Sy is glo Naome Garusa en hulle glo sy was inderdaad ‘n slagoffer van die xenofobiese geweld in dele van Durban en Johannesburg wat vir meer as ‘n week gewoed het.

“Plunderende xenofobiese elemente, het haar geteiken toe sy van haar werkplek gekom het”, het die Herald berig.

Buitelandse kinders wat in Suid-Afrika skoolgaan, is ook geraak deur die onlangse xenofobiese aanvalle, het die Nasionale Professionele Onderwysersorganisasie van SA (Naptosa), gister gesê.

“Leerders is ook ontwrig deur die geweld en ‘n paar buitelandse leerders is geïntimideer,” sê Naptosa se president Basil Manuel.

Onderrig is ook ontwrig in sommige skole, en sommige buitelandse onderwysers in Suid-Afrika was bang om te rapporteer vir diens.

Zimbabwe se ambassadeur in Suid-Afrika Isak Moyo, wat tans in Durban is, sê die dodetal is ‘n “grys gebied”. Suid-Afrikaanse bronne beweer net sewe mense is dood in die onlangse geweld.

Hy het aan die Chronicle-koerant Maandag gesê dat daar slegs een Zimbabwiese slagoffer amptelik bevestig is, ‘n man wat bekend staan ​​as Mhofu. Amptenare probeer om sy liggaam te repatrieer.

Maar daar is vroeër berig dat nog twee Zimbabwiërs, ‘n vrou en ‘n kind, dood is in die geweld.

Zimbabwe het begin om honderde burgers in die nasleep van die aanvalle terug te bring huistoe.

Die eerste groep van 407 Zimbabwiërs, waaronder byna 100 kinders, het Maadag by die Beitbrug-grenspos aangekom.

Graadeentjie dood na hy val by skool

‘n Graadeentjie is Maandag by Laerskool Standerton oorlede.

“Die leerling, sowat agt jaar oud, het by die skool geval, opgestaan en weer geval en gesukkel om asem te kry,” het ’n bron gesê.

“Hy is na die dokter se huis toe gejaag waar die dokter hom dood verklaar het.”

“Ons het alles in ons vermoëe gedoen om hom te help,” het me. Ronel Boer van Laerskool Standerton gesê.

Die skool het dadelik ‘n verklaring uitgereik om ouers en gemeenskap in te lig dat Divan Joubert Maandag oorlede is.

Divan het vroeg vanoggend op die skoolterrein gestruikel.

Een van ons gr. 7-leerlinge het Divan opgehelp, maar hy het onmiddellik daarna inmekaargesak.

Daar is dadelik noodhulp toegepas in die vorm van mond-tot-mond asemhaling sowel as hartmassering, maar ongelukkig was dit nie suksesvol nie.

Die polisie sowel as die Departement van Onderwys onmiddellik in kennis gestel.

’n Nadoodse ondersoek sal gedoen word om die oorsaak van sy dood te bepaal.

Laerskool Standerton se hoof en personeel het hul medelye teenoor Divan se ouers, Leon en Marlene Joubert, sowel as Divan se sussie Zoë uitspreek.

Vierde moordverdagte in Sithole-mesaanval vas

‘n Vierde swart moordverdagte is in hegtenis geneem in verband met die mesaanval op Emmanuel Sithole, ‘n Mosambiekse burger in Alexandra, noord van Johannesburg.

Die polisie het intussen ontken dat die moord uit vreemdelinghaat gepleeg is.

Volgens Gauteng polisiewoordvoerder, Lungelo Dlamini, is die vierde verdagte deur die nag in hegtenis geneem. Hy sal saam met die drie ander verdagtes vandag in die hof verskyn.

Sithole, ‘n buitelandse straathandelaar, is Saterdag aangeval en met ‘n mes doodgesteek. Hy is later in die hospitaal oorlede. Fotogetuienis van die moord het in ‘n naweekkoerant verskyn.

Dlamini het gesê die voorval kan nie met vreemdelingehaat verbind word nie.

Die minister van Samewerkende Regering, Pravin Gordan en die burgemeester van Johannesburg, Parks Tau het Alexandra Maandag besoek waar Sithole doodgesteek is.

Gordhan sê hy is vol vertroue dat die situasie in die land binne ‘n week na normaal sal terugkeer ná die vlaag xenofobiese aanvalle waarin sewe mense omgekom het.

Hy het sonder ironie gesê baie word op die oomblik gedoen om te verseker dat die land weer ‘n “plek van hoop en vrede vir al die mense in die land en vir die vasteland” sal word.

‘n EFF-lid is gister gewond toe skote vanuit ‘n hostel in Alexandra geskiet is terwyl die party ‘n optog gehou het.

Die leier van die EFF, Julius Malema het tydens sý besoek aan Alexandra gesê geen intimidasie sal hom verhinder om voort te gaan met sy veldtog teen xenofobiese geweld nie.

Malema het die lokasie ook besoek om hulde te bring aan Sithole.

Die ANC-regering is onder druk om aanvalle teen buitelanders te verduidelik nadat die mees onlangse xenofobiese geweld vir skerp kritiek in die buiteland en veral Afrika gesorg het.

‘n Optog teen xenofobie sal Woensdag in Windhoek se middestad gehou word uit eensgesindheid met die slagoffers van xenofobiese geweld in Suid-Afrika.

Die nasionale koördineerder van die Namibiese Musiek-bedryfvakbond, Johannes Shalipo Haludilu sê tydens oorloë het Afrika-lande ‘n veilige heenkome vir uitgewekenes gebied en dat dit nie vergeet moet word nie.

Hy het die mense van Namibië geloof omdat hulle vrede met alle buitelanders nastreef en het aan almal gevra om op te staan teen xenofobiese geweld.

Sowat 200 kunstenaars het reeds bevestig dat hulle aan die protesaksie gaan deelneem.

Dertig Christene deur ISIS onthoof

Die Islamitiese Staat-groep het ‘n video vrygestel wat toon hoe 30 Christene tereggestel word.

Die beeldmateriaal van 29 minute wys hoe “volgelinge van die kruis” op ‘n strand onthoof word en ander doodgeskiet word.

Die Ethiopiese Christene is in Libië ontvoer.

Dit is soortgelyk aan ‘n ISIS-video wat toon hoe 21 Egiptiese Christene in Februarie tereggestel is.

Die groep beheer tans groot dele van Sirië en Irak en het die steun van Saoedi-Arabië, ‘n Amerikaanse bondgenoot.

ISIS het reeds in dele van die Midde-Ooste en Afrika-lande soos Libië uitgebrei.

Noord-Afrika is deur Amerikaans-geleide NAVO-lugaanvalle gedestabiliseer wat die opkoms van ISIS vergemaklik het.

‘n Woordvoerder van die Ethiopiese regering het die grusame daad veroordeel.

ISIS is bedrywig op die internet en het ‘n span kuberkrakers wat namens hulle kuberaanvalle doen.

Tien dood in aanval op VN-bussie

Minstens tien personeellede van die Verenigde Nasies is in ‘n ontploffing in Garowe in die Puntland-provinsie van Somalië dood.

Die ontploffing het ‘n bus geteiken wat VN-personeel werk toe vervoer.

Volgens berigte het die aanval by die kantore van die VN-voedselagentskap plaasgevind. Die ploftoestel was aan die wit Toyotabussie geheg wat naby die hoofkantoor afgegaan het.

Die slagoffers sluit vyf internasionale asook plaaslike personeellede in. MogadishuNews het bevestig dat daar buitelanders in die groep was.

Al Sjabaab het aanspreeklikheid vir die ontploffing in dié semi-outonome provinsie aanvaar wat tot dusver Islamitiese geweld vrygespring het.

Polisie vang Indiër met R-1

Die polisie in Gauteng het Sondagaand ‘n Indiër in Actonville aan die Oosrand in hegtenis geneem vir die onwettige besit van ‘n R1-aanvalsgeweer.

Die Indiërman is vermoedelik ‘n buitelander. Die gebied het die afgelope ruk onder xenofobiese geweld deurgeloop.

Die polisie het vroeër bevestig dat hulle orde herstel het nadat hostelbewoners paaie versper het. Die groep is met traanrook uiteengejaag voor daar by sakeondernemings ingebreek kon word.

Geen berigte van beserings is egter ontvang nie.

Actonville is in die 1950’s ingevolge die Groepsgebiedewet ingerig vir Indiërs.

Die Indiërgemeenskap van Actonville en die swart gemeenskap van Wattville is vroeër deur ‘n treinspoor wat vandag nie meer bestaan nie, geskei, maar woon nog steeds apart van mekaar.

Die Indiërs is verskuif uit Boksburg, Germiston, Nigel en Springs na Actonville en talle het munisipale huise ontvang terwyl sommige hul eie huise gebou het.

By Liberty Cinema, Actonville se sokkerstadion en Red Square in Khan Crescent, is politieke vergaderings gehou in die 1950’s.

Wat het koning Goodwill presies gesê?

Daar is die afgelope paar dae herhaaldelik na Koning Goodwill Zwelithini se onlangse kommentaar verwys wat sou gelei het tot gewelddadige aanvalle tussen plaaslike inwoners en buitelandse burgers in KwaZulu-Natal.

Sedert die toespraak, het die koning se woordvoerders ontken dat hy inwoners teen buitelanders aangehits het en gesê hy het in werklikheid net verwys na ongedokumenteerde buitelanders.

Uit ‘n vertaling van wat die koning presies gesê het toe hy gepraat het in Pongola verlede maand, blyk dit dat die koning ook sy onderdane berispe het.

Toepaslike dele van die toespraak is vertaal met die hulp van Zoeloe-akademici. Die spreekwoorde is direk vertaal.

Die koning klim onder diegene in wat hul nalatenskap van konings Dinizoeloe en Cetshwayo verwaarloos met hul verworwe vryheid uit luiheid en kriminaliteit.

“In 2015 praat ons van Suid-Afrikaners wat nie wil luister nie. Hulle wil nie werk nie, wat diewe is, kinders verkrag en by huise inbreek, lui mense wat nie grond wil bewerk nie. Daar is mense van ander lande wat na hulle kyk en sal sê ‘kom ons gaan eet die erfenis van daardie dommes’.

“As julle nou buite gaan kyk soos ek praat, sal julle sien hoe lyk hulle winkels. En al die soort goed wat buite hang, onnet en deurmekaar. Hulle het chaos na ons strate gebring, die buitelanders, dis vieslik vuil, jy kan nie eers sien wat binne is nie.

“Ek weet die politici hou nie daarvan om oor hierdie goed te praat nie, want die slegte mense word stemgeregtiges na vyf jaar. Die leiers moet my vergewe, maar in sulke omstandighede moet ek uitpraat.

“As iemand wat nie vyf jaar hoef te wag nie, [luide gelag] as Zoeloekoning wat groot respek in oral in die wêreld afdwing vir die bevryding van Afrika, sal ek nie stilbly as mense wat geen reg het, met hierdie land speel nie. Dit is tyd vir ons om ons sê te sê. Ek vra die regering om ons te help.

“Ons moet ons luise vang. Ons moet die miere van ons koppe haal en hulle in die son laat. Die buitelanders moet hulle tasse pak en gaan. [luide toejuiging]”

Honderde asielsoekers verdrink na boot omslaan

Daar word gevrees dat 700 mense verdrink het toe ’n visserboot wat immigrante na Europa gesmokkel het, Saterdagnag naby die Libiese kus in die Middellandse See omgeslaan het, het AFP berig.

Die Verenigde Nasies se agentskap vir vlugtelinge (UNHCR), het gister gesê dit kan die dodelikste Mediterreense immigranteramp ooit wees.

Net 28 mense het oorleef toe die visserboot omgeslaan het, het die UNHCR se woordvoerder, Carlotta Sami, gister in ’n onderhoud met die Sky TG24-nuusdiens in Italië gesê.

Volgens haar was daar meer as 700 mense aan boord toe dit omgeslaan het.

Die vloot van Malta skat die getal mense wat op die visserboot was op 650 en sê ’n noodsein is omstreeks middernag Saterdag ontvang.

“Ons het saam met Italië vaartuie in die gebied ontplooi om met die reddingsoperasie te help,” het ’n woordvoerder van die Maltese vloot gister aan AFP gesê.

Sou die getal sterftes bevestig word, kan hierdie by verre die grootste massaverdrinking wees in ’n groeiende reeks soortgelyke voorvalle waarin immigrante uit Afrika op oorlaaide, onseevaardige skepe na lande in die Europese Unie probeer vlug.

Die visserboot het sowat 96 km van die kus van Libië en 193 km suid van die Italiaanse eiland Lampedusa omgeslaan.
Hierdie ramp volg ná ’n week waarin nagenoeg 450 ander mense in soortgelyke vlugtelingsrampe in die ­Mediterreense gebied verdrink het. Meer as 11 000 skipbreukelinge is deur lede van die Italiaanse kuswag en ander bote gered.

Sowat 1 500 immigrante het reeds sedert die begin van die jaar verdrink toe hulle die see tussen Libië en Italië probeer oorsteek het.

Hulporganisasies het ’n beroep gedoen op die internasionale gemeenskap om beter soek-en-reddingstelsels te vestig en ook vir ’n veldtog om ’n oplossing te vind vir die ongeëwenaarde getal asielsoekers uit Asië, die Midde-Ooste en Afrika.

Afrika wys tande oor aanvalle op buitelanders

Die Nigeriese regering het glo ’n ultimatum aan die Suid-Afrikaanse regering gestel om die geweld teen hulle burgers te keer, en gedreig dat Suid-Afrikaanse ondernemings in Nigerië gesluit sal word indien dit aanhou.

Meer as 100 Suid-Afrikaanse maatskappye, waaronder MTN, Standard Bank, Sasol, Shoprite, Multi­Choice en Mr Price, doen sake in Nigerië, volgens die Nigeries-Suid-Afrikaanse Sakekamer.

Nigerië sê ultimatum, wat blykbaar aan die Suid-Afrikaanse ambassade in Nigerië gerig was, kon nie deur MTN bevestig word nie.

MTN se totale omset verlede jaar het vir meer as die helfte op Afrika staatgemaak.

In Nigerië het die maatskappy in 2014 bykans R54 miljard se omset gehad, veel groter as die R39 miljard wat die maatskappy in Suid-Afrika genereer.

Die vier groot banke, naamlik FirstRand, Standard Bank, Barclays en Nedbank is ook op die vasteland gefokus. Standard Bank het die grootste teenwoordigheid in Afrika en byna ‘n derde van sy omset kom van buite die land.

Shoprite is die kontinent se grootste voedselkettingwinkelgroep en selfs in lande soos Angola en Nigerië wat afhanklik is van ‘n goeie olieprys, kon die kleinhandelaar ‘n styging van 15% in sy winste behaal.

Suid-Afrikaanse maatskappye bekommer dat die xenofobiese geweld hul beeld skade kan berokken.

Sasol het 340 Suid-Afrikaanse werkers inderhaas onttrek by gasaanleg in Temane, Noord-Mosambiek, nadat Mosambiekers oor hulle teenwoordigheid gekla het, het ‘n S­asol-woordvoerder gesê.

In 2014 het 30% van ons land se totale uitvoere na die res van Afrika gegaan, soveel as na Asië, terwyl net 13% van die totale invoer uit Afrika kom.

Afrika bied ‘n mark wat vervaardigde produkte insluit en nie net grondstowwe nie.

ANC, DA steun ‘Ons is een Mensdom’

Die ANC-premier van Gauteng, David Makhura en DA-leier Helen Zille het hulself ten sterkste uitgespreek teen die jongste vlaag vreemdelingehaataanvalle.

Beide het die geweld veroordeel. Makhura het aan ‘n optog van die Metodiste kerk in Yeoville, Johannesburg teen die xenofobiese geweld deelgeneem.

Die geweld het vroeër verlede week na Gauteng versprei met verskeie winkels van buitelanders wat geplunder is. Meer as 60 mense is reeds in verband met die aanvalle in die provinsie in hegtenis geneem.

Die minister van polisie Nathi Nhleko sê sy departement se “Ons is Een Mensdom” veldtog teen xenofobie sal tussen Mei en Oktober vanjaar na alle provinsies uitgebrei word.

Die veldtog sluit uitreikingsprogramme, opvoedingsprogramme en gesprekvoering oor xenofobie in.

Nhleko, wat die veldtog in Durban bekendgestel het, sê nasionale gesprekvoering moet plaasvind oor die voorkoms en patroon van geweld in die gemeenskap.

Zille het Sondag die hoofrede gelewer tydens haar party se Vrystaatse provinsiale kongres.

Dit sal waarskynlik haar laaste toespraak as leier van die party in die Vrystaat wees, ná sy haarself nie weer verkiesbaar gestel het vir volgende maand se federale kongres in Port Elizabeth nie.

‘n Emosionele Zille het ‘n beroep gedoen op alle Suid-Afrikaners om geweld te laat vaar en ‘n beroep op die regering gedoen om goeie beleide daar te stel om ekonomiese groei te verseker.

Zille se party slaag nie daarin om swart stemme te trek nie, en sy moes noodgedwonge van die leierskap afsien sodat Mmusi Maimane as leier kan oorneem.

Die nuut-verkose leiers van die DA in die Wes-Kaap het hul steun aan Maimane toegesê as kandidaat vir die partyleierskap.

Die party se Wes-Kaapse kongres het die Kaapstad burgemeester, Patricia de Lille tot nuwe provinsiale leier verkies.

Al die lede van die nuwe Wes-Kaapse leierskorps het aangedui dat Maimane op hul steun kan staatmaak.

Maimane het vroeër bewerings dat die party nie gereed is vir ‘n swart leier nie, as onsin afgemaak en gesê die party het “nie-rassigheid” heeltemal aanvaar.

Dié verklarings strook nie met die party se gesukkel om swart stemme te trek nie.

Die Nigeriese konsul-generaal in Suid-Afrika, Uche Ajulu-Okele, het intussen ‘n beroep op Nigeriërs in Suid-Afrika gedoen om kalm te bly.

Sy het ‘n groep Nigeriese burgers by die Mahatma Gandhi-weg gebied in KwaZulu-Natal toegespreek.

Buitelanders wat in die gebied bly het vroeër gedreig om hulself te verdedig as plaaslike inwoners hulle winkels plunder of hulle intimideer.

Ajulu-Okele sê die Suid-Afrikaanse en Nigeriese regerings werk saam om wet en orde te herstel, die lewens van buitelanders te beskerm en xenofobiese aanvalle te beëindig.

Duisende swartes stroom vanoggend na die Moses Mabhida-stadion in Durban vir ‘n imbizo oor xenofobie.

Dié byeenkoms sal deur koning Goodwill Zweltithini toegespreek word. Sowat 10 000 mense, wat hoofmanne en tradisionele leiers insluit, sal van nege-uur af byeenkom.

Die Zoeloekoning word daarvan beskuldig dat hy tot die onlangse geweld bygedra het. Die koning voer aan dat ‘n toespraak van hom verdraai is en dat hy nooit aanvalle teen enigiemand aangemoedig het nie.

Die aanvalle teen buitelandse burgers het sowat twee weke gelede in KwaZulu-Natal begin en sedertdien na Gauteng versprei.

Die minister van Binnelandse Sake, Malusi Gigaba, het Sondag aangekondig dat die geweld teen buitelanders onder beheer gebring is.

President Jacob Zuma het intussen sy reis na Indonesië gekanselleer weens die geweld. Die adjunk-president Cyril Ramaphosa is in sy plek afgevaardig om die besoek te onderneem.