Kategorie: Nuus

Hillary, Bernie, Trump en Cruz stoei vir benoeming

Hillary Clinton en Bernie Sanders het mekaar Sondag gepak in die Demokratiese presidensiële benoemingstryd, die laaste keer voordat Iowa op 1 Februarie na die stembus gaan.

Clinton het sluikhoue na die gewilde Sanders in Charleston, Suid-Carolina probeer inkry.

Die twee kandidate het oor banke, lobbies, wapenbeheer en gesondheidsorg gestoei om swart kiesers te beïndruk.

Die ander kandidaat, Martin O’Malley, oudgoeweneur van Maryland, kon volgens ontleders, geen hond haaraf maak in die debat nie.

Na verwagting kan Sanders, ’n senator van Vermont, Hillary in New Hampshire op 9 Februarie verslaan.

Die Republikein, Donald Trump, het Maandag in sy toespraak aan 11 000 mense gesê hy sal “beleërde Christene” ondersteun.

Trump (69), die voorloper presidentskandidaat se verskyning by Liberty College in Virginië, is met dreigemente van studente-opstande begroet, maar hy het uiteindelik ontvanklike gehoor gehad.

Liberty is ’n evangeliese bas­tion. Trump en Cruz is tans in ’n taai stryd gewikkel in Iowa, die eerste staat wat op 1 Februarie sal stem vir die benoeming vir ’n Republikeinse presidentskandidaat.

Cruz se pa is ’n evangeliese predikant en Cruz reken daarom op steun vanuit die evangeliese gemeenskap.

Oudste Christen-monnikeklooster in Irak verwoes

Satellietfoto’s wat deur The Associated Press bekom is, het bevestig wat Midde-Oosterse geskiedkundiges en kerkleiers gevrees het: Van die oudste Christen monnikeklooster in Irak, het ‘n hoop rommel oorgebly.

Dis nog ‘n slagoffer van die Islamitiese Staat-groep (ISIS) se volgehoue vernietiging van erfenisplekke wat deur die groep as kettery beskou word.

Die St. Elijah monnikeklooster was die afgelope 1 400 jaar ‘n plek van aanbidding. In die vroeë millennia het geslagte monnike kerse in die nisse aangesteek en in die kapel en by die altaar aanbid.

Die Griekse letters, chi en rho, wat die eerste twee letters van Christus se naam is, is naby die ingang gegraveer.

Voor dit vernietig is, het die gedeeltelik gerestoureerde 27 000 vierkante voet klipgebou soos ‘n fort op ‘n koppie naby Mosul gestaan.

Deskundiges sê stootskrapers, swaar toerusting en waarskynlik plofstof is gebruik om van die klipmure in ‘n veld van grys stof te omskep.

St. Elijah is nou deel van die groeiende lys van meer as 100 godsdienstige en geskiedkundige plekke wat gestroop en verwoes is. Antieke monumente in die stede Nineve, Palmyra en Hatra het ook in die slag gebly.

Museums en biblioteke is geplunder, boeke is verbrand en kunswerke vernietig of verhandel.

Die monnikeklooster is in 590 gebou. Tragedie het in 1743 toegeslaan toe 150 monnike, wat geweier het om die Islamitiese geloof te aanvaar, daar deur ‘n Moslemgeneraal vermoor is.

MTN staar nog yslike boetes in die gesig

Die selfoonreus, MTN sê hy is nog nie amptelik in kennis gestel van boetes teen sy sakebelange in Kameroen nie, maar dat die kwessie ondersoek word.

Kameroen se teenkorrupsie-raad sê MTN het glo versuim om belasting op speletjies en dobbeldienste te betaal, het RSG berig.

Die maatskappye MTN en Orange is volgens berigte as deel van ‘n omvattende operasie met sowat 160 miljoen dollar beboet.

‘n MTN-woordvoerder, Chris Maroleng sê die maatskappy sal kommentaar lewer sodra sy ondersoek afgehandel is.

Die maatskappy is verlede jaar met sowat 80 miljard rand in Nigerië beboet.

Berigte is ook verlede jaar ontvang van ‘n boete in Uganda.

EU Immigrasiekrisis: Rooi voordeure en toedeure

Asielsoekers in ‘n noordelike Engelse dorp glo hulle is maklike teikens vir rassiste omdat hulle almal gehuisves word agter rooi voordeure.

Die huise in Middlesbrough word besit deur ‘n subkontrakteur van G4S.

Nadat ‘n verslag oor die rooi deure verskyn het op die voorblad van Woensdag se Times, het ‘n woordvoerder vir G4S gesê sy subkontrakteur, Jomast, sal die deure verf.

Asielsoekers sê hulle deure en vensters is met eiers en klippe gegooi, hondontlasting besmeer en hulle moes rassistiese skimpe verduur, het die Times berig.

Oostenryk het intussen aangekondig dat hulle die invloei van asielsoekers drasties sal inperk vir 2016.

Volgens die kanselier, Werner Faymann kan die land nie soveel asielsoekers aanvaar nie.

Die owerhede sal die syfer oor die volgende vier jaar tot 30 000 per jaar beperk word, in vergelyking met die 90 000 aansoeke verlede jaar.

Serwië het in antwoord hierop gesê die getal migrante wat toegelaat word om deur die land te reis om asielaansoeke in Oostenryk en Duitsland in te dien, sal ook beperk sal word.

Die Europese Unie het intussen gevra vir ‘n beraad oor migrasie. Faymann sê hulle het nog nie besluit wat sal gebeur wanneer die beperkings bereik word nie.

Serwië sal vanaf Woensdag begin om migrante weg te wys het Reuters berig.

Die nuusagentskap het ‘n Serwiese minister aangehaal. Die minister van Arbeid Aleksandar Vulin het gesê Belgrado sal dienooreenkomstig met Oostenryk en Duitsland optree.

Die Duitse kanselier, Angela Merkel het gesê Oostenryk se besluit is nie “behulpsaam” nie.

Sy verkeer onder groot druk van haar koalisievennoot, die CSU om asielsoekers te beperk. Merkel is egter deur George Soros geloof vir haar beleid om asielsoekers te instroom.

Die miljardêrfilantroop Soros, het in ‘n onderhoud aan die New York Review of Books gesê Merkel is die sleutel om die EU te dwing om die instroming te aanvaar.

Lid van Zuma-beskermingseenheid skuldig bevind

Vonnisoplegging van ‘n lid van die presidensiële beskermingseenheid sal na verwagting Donderdag in die Potchefstroom-landdroshof begin.

Malose Makonyane is Woensdag skuldig bevind op aanklagte van opsetlike saakbeskadiging, die rig en afvuur van ’n vuurwapen, roekelose bestuur, asook die roekelose ingevaarstelling van persone.

Sy medebeskuldigde, Sankoela Lepota is vrygespreek nadat Landdros Louisa Mabille bevind het dat daar nie genoegsame bewyse was om Lepota skuldig te bevind op die aanklagte teen hom nie.

Die saak hou verband met ‘n padwoedevoorval in Augustus 2013 op die N12 waartydens ‘n skoot afgevuur is op ‘n wit egpaar en hul motor se linkervoorwiel getref is.

Tuks weer oop na miljoene se skade by kampusse landwyd

Die Universiteit van Pretoria sal Donderdag weer vir personeellede open nadat die begin van die studiejaar en registrasie die afgelope twee weke deur oproer ontwrig is.

Die universiteitsbestuur het intussen toegegee aan die betogers se eise en ‘n ooreenkoms met skoonmakers bereik om uitkontraktering op kampusse te beëindig.

Die ooreenkoms raak veiligheidswagte, skoonmakers, tuinwerkers en ander swart werkers.

Die skoonmakers eis ook ‘n salaris van R10 000 per maand.

Swart studente wat die stakende skoonmakers gesteun het, het die ooreenkoms verwelkom.

UP het in ‘n verklaring gesê die akademiese jaar by die universiteit sal Maandag hervat word.

Die departement van Hoër Onderwys moes ‘n bykomende R6,9 miljard rand beskikbaar stel om tekorte aan te vul nadat hulle toegegee het aan swart eise dat klasgelde nie verhoog moet word vir 2016 nie.

Die Nasionale Studente Finansiële Hulpskema sal Donderdag ‘n inligtingsessie aanbied oor hoe vanjaar se regeringshulp aangewend sal word.

Die visekanseliers van verskeie universiteite, die NSFAS-leierskap en die Minister van Hoër Onderwys, Blade Nzimande het Woensdag byeengekom om die befondsing en oproer by universiteite bespreek.

Nzimande, het Woensdag gesê dat die oproer het R150 miljoen se skade veroorsaak. Regering sal instaan vir die skade en die nodige herstelwerk aan kampusse onderneem.

Hy het Woensdag verklaar dat die geweld en skade wat gelei het tot die toegewings, ‘n “belangrike oorwinning” vir studente is.

Die verlinkse Suid-Afrikaanse hoofstroommedia het die “griewe”, wat neerkoms op gewone vandalisme en kriminaliteit by die kampusse geloof as “regmatig”, selfs die aanvalle op universiteitstigters en weldoeners.

Die NSFAS-voorsitter, Sizwe Nxasana sê hulle beplan om volgende jaar ‘n meer gesofistikeerde model bekend te stel wat groter klem op omstandighede plaas en wat meer as net inkomste behels.

Dodetal styg na jihadistiese aanval op universiteit in Pakistan

Die dodetal in die aanval op die Bacha Khan-universiteit in Charsadda, ongeveer 50 kilometer van die stad Peshawar, Pakistan, het vinnig gestyg toe gewapende mans die kompleks in die militante-streek bestorm het.

Polisie, soldate en spesiale magte het vinnig gevolg en van die grond en uit die lug aangeval om ‘n einde aan die aanslag te maak, het AFP berig.

“Die dodetal in die terroriste-aanval het tot 21 gestyg”, het die streek se polisiebevelvoerder, Saeed Wazir, gesê.
Hy sê die operasie is beëindig en veiligheidsmagte het die gebied opgeruim. Die meeste slagoffers was manstudente in ‘n hostel op die kampus.

Meer as 30 ander, insluitende studente, personeel en veiligheidswagte is gewond, het hy gesê.

‘n Militêre woordvoerder, genl.maj. Asim Bajwa, het op Twitter gesê vier aanvallers is ook in die voorval dood.

Studente het een dosent as ‘n held uitgesonder. Syed Hamid Hussain het volgens berigte teruggeveg en op die aanvallers geskiet in ‘n poging om sy studente te beskerm. Hy is deur die aanvallers raakgeskiet. Pakistan se pres. Mamnoon Hoessein het later bevestig dat die dosent gesterf het.

Van die studente het vertel dat die aanvallers “Allah is groot” tydens die aanval geskree het.

Niemand het onmiddellik verantwoordelikheid vir die aanval aanvaar nie. Die aanval het die eienskappe getoon van ‘n Taliban-aanval op ‘n militêre skool in Peshawar in Desember 2014 waarin 150 mense, van wie die meeste kinders was, omgekom het.

Die 2014 Taliban-aanval het die regering genoop om ‘n volskaalse aanslag op ekstremiste van stapel te stuur.

Pakistan se Jinnah Instituut sê in ‘n verslag wat Dinsdag bekend gestel is, dat die nasionale aksieplan gehelp het om ekstremistiese geweld verlede jaar hok te slaan, al het geteikende aanvalle teen godsdienstige minderhede in die Moslem-land van ongeveer 200 miljoen mense toegeneem.

Volgens die verslag was die verbetering veral op die gebied van vervolging weens haatspraak en die inhegtenisneming van terroriste van sektariese organisasies wat godsdienstige geweld aanhits.

Dinsdag het ‘n selfmoordbomaanval in ‘n mark aan die buitewyke van Peshawar die lewens van tien mense benewens dié van die bomaanvaller geëis.

Polisie in Windhoek rand witte aan

Polisielede verbonde aan die Sentrale polisiekantoor in Windhoek staar klagte van aanranding en brutaliteit in die gesig, nadat hulle glo ’n wit inwoner van Windhoek tydens ondervraging ernstig aangerand het. Die klagte, CR432/01/2016, is by dieselfde polisiekantoor aanhangig gemaak.

Na bewering is die 35-jarige mnr. Marco Bock Saterdagoggend deur polisiebeamptes by die sentrale polisiekantoor in die hoofstad vir meer as ’n uur aangerand.

Volgens Bock is hy vroeër die oggend by die Vredehof-woonstelle in Windhoek vir ondervraging na die polisiekantoor geneem. Die ondervraging spruit glo uit die diefstal van ’n iPad uit een van die woonstelle.

Drie jeugdiges was toe reeds vir ondervraging in een van die polisiebakkies na die polisiekantoor onderweg. Vingers is glo deur hulle na Bock gewys dat hy die skuldige was wat die iPad glo gesteel en onder die Tweelingbrug sou gaan wegsteek het. Die jeugdiges het na bewering die wegsteekplek aan die polisie gaan uitwys.

Die drie jeugdiges en Bock is glo beveel om by die polisiekantoor uit te klim en na die agterkant van die gebou te stap. Na bewering is hulle toe beveel om liggaamlike oefeninge waaronder opstote te doen. Polisiebeamptes het toe glo vir Bock met ’n staalpyp oor sy boude en blaaie begin slaan in ’n poging om hom tot erkenning te dwing dat hy wél die iPad gesteel het.

Na bewering is hy volgens die polisiebeamptes geslaan omdat hulle “die waarheid soek” en hy die jeugdiges sou gestuur het om die inbraak te pleeg. Die beweerde aanranding het sowat ’n uur geduur en het glo gestop toe die polisielede besluit het hy het wel die waarheid gepraat.

’n Mediese dokter het in ’n verklaring ingevolge die strafproseswet bevestig dat Bock kneusings aan sy boude en rug en bloed in sy urine gehad het.

Die woordvoerder van die polisie, insp. Slogan Matheus, kon teen druktyd geen antwoorde verskaf nie.

Bron: Die Republikein

Boervrou sterf ook na wrede aanval

Bernie (84) en Charlotte van Zyl (55) is Saterdag met ernstige beserings op hul plaas Geelhoutboom in Mpumalanga aantref.

Nie een van die twee het die wrede aanval oorleef nie.

Die bejaarde boer van Panbult is glo deur een van sy swart werkers aangeval en met krukke doodgeslaan.

Bernie is op die toneel dood en sy vrou het in die hospitaal in Ermelo aan kopbeserings beswyk.

Sers. Gerald Sedibe het intussen bevestig dat Van Zyl se eggenoot Dinsdagoggend oorlede is.

Die aanval het Saterdagmiddag plaasgevind het Sedibe gesê.

‘n Verdagte van Swaziland, ‘n voormalige werker, is in hegtenis geneem en sal Maandag in die landdroshof in Piet Retief verskyn.

Nog ‘n onwettige banier ontsier Kaapstad

‘n Yslike banier van die nuwe Suid-Afrikaanse onderbroekvlag is aan die kant van dieselfde gebou in Kaapstad aangebring wat verlede week “Zuma must fall” vertoon het.

Maar die Stad Kaapstad, sê hulle het geen idee wie verantwoordelik is vir die jongste oortreding op die hoek van Kloof- en Buitensingelstrate nie.

“Geen aansoek is aan die Stad gerig [vir die jongste vlagbanier nie],” het woordvoerder Priya Reddy gesê.

“Ons sal ondersoek instel of dit strydig met enige van ons verordeninge en as dit is, sal die saak oorhandig word aan ons aanklaer,” het Reddy gesê.

Intussen is die stad nog in die proses om Independent Outdoor Media, wat die onwettige “Zuma moet val” banier verlede week opgesit het, te dagvaar.

Swart en bruin ANC-ondersteuners het Saterdag na die woonstelgebou opgeruk en dit af die muur afgeruk met messe en ander skerp voorwerpe.

Die voorval het gelei tot verhoogde rassepolarisasie, aangesien meestal wittes gekant is teen Zuma.