Nuus – Bladsy 1104 – praag.co.za

Toetankamen was nie swart nie

Toetankamen

Zahi Hawass, deskundige van Egiptiese oudhede en die Egiptiese beskawing, het Dinsdag in ’n verklaring benadruk dat Toetankamen nie swart was nie. Dit volg op beroepe deur swart aktiviste in die VSA dat die jong farao se swart kleur uiteindelik erken moet word.

“Toetankamen was nie swart nie, en die voorstelling van die antieke Egiptiese beskawing as swart is van alle waarheid ontbloot,” aldus Hawass. “Egiptenare is nie Arabiere nie en ook nie Afrikane nie, ten spyte van die feit dat Egipte in Afrika geleë is.” Hawass het verder gesê dat hy gevoel het hy moes reageer op onlangse betogings in Philadelphia, ná afloop van ’n lesing wat hy op 6 September aangebied het om sy teorie te verdedig.

Swart aktiviste het onder andere beweer dat afbeeldings van die farao Toetankamen verander is om hom met ’n ligter velkleur voor te stel tydens die reisende uitstalling getiteld “Toetankamen en die Goue Era van die Farao’s.” Hierdie uitstalling, wat in Junie 2005 in Los Angeles afgeskop het, het destyds al ’n beroering veroorsaak toe swart aktiviste daarop aangedring het dat die borsbeeld van Toetankamen verwyder word omdat hy met “blanke” gelaatstrekke voorgestel word.

Die gesig van die legendariese farao, wat sowat 3 300 jaar gelede op die ouderdom van 19 oorlede is, is in 2005 opgebou met behulp van skanderings van sy mummie.

Die verhaal van Toetankamen fassineer mense al sedert sy onbeskadigde praalgraaf in 1922 naby Luxor in die suide van Egipte ontdek is.

шорты для девочки

Die kuns van toustaan bemeester

Die Britse kuns van toustaan

Buitelandse studente wat na die suide van Brittanje kom om Engels te leer, sal binnekort ‘n nuwe kursus moet byneem, naamlik hoe om tou te staan by bushaltes sodat die plaaslike inwoners nie verontrief word nie.

Die Southern Vectis-maatskappy wat die busdiens op die Isle of Wight bedryf, het Maandag aangekondig dat hulle die taalskole sal kontak in dié verband. Dit kom nadat die busdiens talle klagtes ontvang het ivm die gedrag van buitelanders.

March Morgan Huws, ‘n werknemer van Southern Vectis, het gesê dat die suide van Brittanje gewild is vanweë die taallesse wat aangebied word maar dat buitelanders nie gewoond is aan toustaan nie. Hulle storm op die bus af "in ‘n bondel" het hy voortgegaan. Die Britte staan tou terwyl die buitelanders skynbaar graag voor hulle indruk.

Die maatskappy wil graag saamwerk met die taalskole in die omgewing om lesse aan te bied om goeie maniere en toustaan aan die buitelandse studente te leer. Toustaan is glo deel van die Britse kultuur. Dit is onlangs weer geïllustreer deur die ordelike toue voor Northern Rock Bank se takke waar mense geduldig gewag het om hul geld te onttrek nadat kliënte gevrees het dat hulle hul deposito’s mag verloor.

As ‘n indringer die gewag wil vryspring en indruk is daar gewoonlik ‘n gebrom onder die toustaners, maar die meeste Britte is glo te welopgevoed om die oortreder direk te konfronteer. Blykbaar verkies Britse toustaners eerder om nader aanmekaar te beweeg om voornemende indrukkers te ontmoedig.

decorations

Regter se skandes

Regter in sy Jaguar

Nkola Motata, ’n regter verbonde aan die Pretoriase hoër hof, sal vandag in die Johannesburgse landdroshof verskyn op ’n aanklag van dronkbestuur. Hy word verder ook aangekla van pogings om die gereg te fnuik.

Die regter is op 6 Januarie vanjaar gearresteer toe hy met sy Jaguar deur ’n muur in Hurlingham gejaag het. Hy het hom teëgesit toe polisie hom wou arresteer en moes uiteindelik deur vyf metropolisiebeamptes in ’n polisiemotor gelaai word. Die staat beweer Motata se bloedtoets het op meer as vier keer die toegelate alkoholinhoud gedui. Hy het verder die naam van sy werkgewer as “Transval Provincial Division” geskryf en gesukkel om sy eie telefoonnommer te onthou en neer te skryf.

Motata het hom ook skuldig gemaak aan beledigings van die vroulike polisiebeamptes wat hom aanvanklik op die ongelukstoneel wou arresteer. Volgens die staat het hy geskreeu “F.. julle, onnosel vroumensbeamptes, julle kan my nie arresteer nie,” “vroumense kan my nie arresteer nie,” “julle onnosel vroue kan my nie arresteer nie,” en “n vroumens kan nie arresteer nie, dit moet ’n man wees.”

Alhoewel niemand die ongeluk, wat in die vroeë oggendure van 6 Januarie plaasgevind het, gesien het nie, is die regter “deurmekaar” agter die stuur van sy motor aangetref, te midde van die chaos van die muur wat hy stukkend gery het. Hy het aan polisie op die toneel erken dat hy die aand ’n partytjie bygewoon het en wyn gedrink het. Die regter kon nie self regop staan nie. Hy en die motor het sterk na drank geruik. Verder het hy met ’n sleeptong gepraat. Hy het aggressief geword toe hy gevra is om in ’n pypie te blaas. Hy het ook polisiebeamptes gedreig dat hy hulle sou vervolg indien hulle hom arresteer.

Na afloop van die voorval het die regter hemel en aarde probeer beweeg om sy saak van die Johannesburgse magistraatshof na die Pretoriase hoër hof te skuif, omdat hy geglo het sy status is te belangrik vir ’n doodgewone magistraatshof, maar sy pogings het misluk. Hy sal dus vandag in die eenvoudige magistraatshof moet verskyn.

designer bridal headbands

Barney se bul

Daar is gister gewoel en gewerskaf in Barney Pityana, UNISA-rektor, se Nieu-Muckleneuk-tuin. ’n Bul is opgemerk, vasgemaak aan ’n boom. Die dier sal vanmiddag om 17:00 geslag word, as deel van Pityana se dogter se huwelikseremonie.

Pityana, wat van Xhosa-afkoms is, het skynbaar die regte prosedure gevolg om die bul in sy tuin te slag, maar van sy bure is geskok en woedend. Daar word verder gewonder wie vir die seremonie gaan betaal. Die huis (’n amptelike UNISA-woning) is onlangs geverf en opgeknap. Daar word sowat 500 gaste by die troue verwag. Wit markiestente is reeds opgerig.

Volgens ’n woordvoerder van die Dierebeskermingsvereniging (DBV) in Pretoria is die organisasie bewus van die slagting. ’n Verteenwoordiger van die DBV sal teenwoordig wees om seker te maak dat die dier nie onnodig ly nie. Hy het bevestig dat daar ’n toename in sulke seremonies in Pretoria-woongebiede is.

Pityana is al sedert 2001 rektor van UNISA. Hy het ’n regsagtergrond en spesialiseer verder in swart teologie. Hy was vroeër verbonde aan die Suid-Afrikaanse menseregtekommissie. Hy het verlede jaar die Silwer Orde van die Groot Raadgewer van die Kremetart van president Thabo Mbeki ontvang. Die vermaarde joernalis Stephen Mulholland het hom al as “aggressief en bombasties” beskryf.

Лобановский Харьков

Suid-Afrika loop sy eie kernpaadjie

Buyelwa Sonjica

Suid-Afrika het besluit om voorlopig nie deel uit te maak van die VSA se projek om kernkrag te versprei en te monitor nie, aangesien die land nie sy reg wil opgee om uraan te kan verryk nie.

Buyelwa Sonjica, minister van mineraal-en energiesake, het gister tydens ’n perskonferensie na afloop van die Verenigde Nasies se Atoomkragagentskapvergadering in Wene gesê dat Suid-Afrika ’n uitnodiging ontvang het om deel uit te maak van die Globale Kernenergievennootskap, maar dit nie aanvaar het nie, aangesien so ’n stap nasionale kernkragbeleid in die wiele kan ry. Ingevolge hierdie VSA-inisiatief sal state gehelp word om kernbrandstof te bekom en hoef hulle dus nie hulle eie uraan te produseer nie. Kernkrag word sodoende versprei, maar nie die tegnologie waarmee wapens vervaardig kan word nie.

Elf lande het Sondag lede van die projek geword tydens die byeenkoms in Wene. Hulle is Australië, Bulgarye, Ghana, Hongarye, Jordanië, Kazakstan, Litaue, Pole, Roemenië, Slovenië, en Oekraïne. China, Frankryk, Japan en Rusland is reeds lede.

Sonjica glo dat om uraan uit te voer vir verrykingsdoeleindes en dit dan her in te voer nie sin maak nie. “Dit sal in konflik staan met ons nasionale beleid,” meen sy.

Will Tobey van die VSA het aanvanklik beklemtoon dat geen land gevra word om sy reg om uraan te verryk op te gee nie. Hy is verantwoordelik vir nie-proliferasie aangeleenthede in die VSA se nasionale kernveiligheidsadministrasie. Hy het egter later erken ”dat dit nie sin sal maak om beide te doen nie” – met ander woorde dat ’n land aansluit by die Globale Kernenergievennootskap en steeds voortgaan om sy eie uraan te verryk. Hy meen dit is wel voordelig vir lande om deel uit te maak van hierdie vennootskap, aangesien uraanverryking ’n baie duur proses is.

Volgens Sonjica is Suid-Afrika nou op soek na internasionale vennote wat die land in sy uraanverrykingsprogram kan bystaan.

двухпоршневой цена

Die ergste humanit?re krisis ter w?reld

David Coltart

Volgens David Coltart, MDC-parlementslid, is die humanitêre krisis wat Zimbabwe tans beleef, die ergste ter wêreld. Dit word egter nog in ’n groot mate deur die internasionale gemeenskap geïgnoreer. Coltart het die Verenigde Nasies (VN) daarvan beskuldig dat hulle hul plig versaak deur oor die saak te swyg. “Dit is ’n absolute katastrofe,” het Coltart aan die Reuters-nuusagentskap gesê. “Nie net sterf mense elke dag nie, maar die ineenstorting van die ekonomie is besig om die streek te destabiliseer.“

Inflasie is tans sowat 6000%, werkloosheid word op 80% gereken en prysbeheermaatreëls het meegebring dat supermarkrakke leeg is. Selfs stapelvoedsel soos brood en mieliemeel is feitlik onverkrygbaar. “Wat ons nou nodig het, is ’n enorme hulpverleningspoging. Mugabe gebruik met opset voedsel as ’n wapen,” meen Coltart. ”Die probleem is dat dinge op die oppervlak kalm lyk – dit is in die hospitale en lykshuise waar jy egter die waarheid sien.”

Volgens hom word daar wel tans vordering gemaak in die gesprekke tussen die ZANU-PF-regering en die MDC, maar lê daar nog ’n lang pad voor. Daar moet eenstemmigheid oor ’n nuwe grondwet bereik word voor die presidensiële en parlementêre verkiesings in Maart aanstaande jaar plaasvind.

Hy het voorts ’n beroep op die strydende faksies binne sy party gedoen om hulle geskille by te lê en om die verkiesing verenigd aan te pak. “As ons die verkiesing as ’n verdeelde party aanpak, sal dit ’n geskenk wees vir ZANU-PF en ’n ramp vir Zimbabwe."

Intussen het sakeleiers Maandag gewaarsku dat beplande wetgewing wat die meerderheidsaandele van buitelandse firmas binnekort in die hande van swart Zimbabwiërs sal plaas, die land se ekonomiese probleme gaan vererger. Daar word verwag dat buitelandse beleggings met ten minste 30% sal daal en dat ’n daling in die bruto binnelandse produk ook sal plaasvind

100 play games Александр Фильчаков

‘Grahamstad moet waai’

Daar is tydens ’n Makana-raadsvergadering op 13 September besluit dat die naam Grahamstad “moet waai.” Burgemeester Phumelelo Kate het gister gesê die besluit is op geskiedkundige redes gebaseer. “Die gemeenskap moet weet dat die naam, ter ere van Graham, afgedwing is deur koloniste.“

President Thabo Mbeki het reeds by twee geleenthede kritiek op die naam Grahamstad uitgespreek. Hy het in die parlement daarop gewys dat die Britse offisier kolonel John Graham “’n slagter“ was. Volgens Kate sal raadslede binnekort elke wyk besoek om te hoor wat inwoners dink van die voorgestelde nuwe naam, iRhini. “Die inheemse mense moet nou hulle eie lotgevalle bepaal deur deel te neem aan ’n proses om op ’n nuwe naam vir hulle dorp te besluit,“ meen Kate.

Volgens Smilo Grootboom, ’n lid van die Oos-Kaapse Geografiese Naamkomitee, is die komitee nie bewus van die besluit wat deur die Makana-munisipaliteit geneem is nie. Nadat ’n munisipale raad besluit het om ’n naam te verander, vereis die wet dat die betrokke munisipaliteit dan die plaaslike geografiese naamkomitee moet nader, wat die aansoek sal ondersoek om seker te maak dat wetlike aspekte nagekom is.

Indien die komitee tevrede is, word ’n aanbeveling oor die nuwe naam gemaak aan die provinsiale minister, wat dit dan voorlê aan die Suid-Afrikaanse Geografiese Naamkomitee, wat op hulle beurt die minister van kuns en kultuur oor sulke sake adviseer. Die minister het dan die reg om die nuwe naam in die staatskoerant bekend te maak.

Daar is tans 59 naamsveranderinge wat deur die Oos-Kaapse Geografiese Naamkomitee oorweeg word.

free bet casino

Taalsnobisme lei tot die dood

Jean Monnet-hospitaal

Taalsnobisme kan tot die dood lei. Dit is die afleiding wat die linkse dagblad, Libération, verlede week gemaak het nadat dit aan die lig gekom het dat honderde kankerpasiënte oor ‘n lang tydperk aan dodelike hoeveelhede bestraling blootgestel is in die Jean-Monnet-hospitaal in Epinal, Frankryk.

Gesondheidsminister Roselyne Bachelot het 4 500 pasiënte gevra om aan te meld by haar departement nadat 700 mense die verkeerde dosis bestraling ontvang het. Vyf mense is reeds oorlede as gevolg daarvan en honderde het ernstige inwendige skade opgedoen. Die fout het gekom omdat die personeel blykbaar nie die Engelse aanwysings behoorlik verstaan het nie en nie die moed gehad het om dit te erken nie.

Taalsnobs is toenemend ‘n probleem in die werkplek en die twee vernaamste vakbonde in Frankryk het hulself uitgespreek teen die gebruik van Engels omdat dit nie alleen diskriminerend is nie, maar ook onnodig. Taalkundiges soos Claude Hagège voel dat Engels heeltemal kontraproduktief is.

Die wet wat daarvoor sorg dat die Franse taal nie in amptelike kommunikasie en advertensies verdring word deur die "killer language", Engels, nie, heet die Toubon-wet. Dit is vernoem na die Franse minister Jacques Toubon, wat tussen 1993 en 1995 as kultuurminister gedien het. Die veelbesproke wet dateer van 1994. Daar word soms spottenderwys deur anglofiele na die eertydse minister verwys as "mnr. Allesgoed" omdat "tout bon" uit Frans vertaal "alles goed" beteken.

Twee onlangse hofsake wat in die guns van Frans beslis is danksy die wet, het tot gevolg gehad dat die taal in sekere omgewings ten minste weer in ere herstel is. ‘n Versekeringsmaatskappy, Europe Assistance, is deur die hof van Nanterre genoop om hul rekenaarprogrammatuur binne ‘n baie kort tydperk in Frans aan hul personeel beskikbaar te stel. ‘n Boete van 5 000 euro per dag is aan EA opgelê vir elke dag wat hulle laat is met die vertaling uit Engels na Frans.

Muriel Tardito van die CFTC-vakbond sê glimlaggend dat "almal skielik Frans geword het" ná die uitspraak. "Almal het opgelet na woordgebruik en interne dokumente het skielik vir werknemers verstaanbaar geraak." Voorheen het almal probeer om Engels te gebruik en die atmosfeer is bederf deur die "waansinnige aandrang." Uitdrukkings wat elkeen op die lippe gehad het om slimmer as ‘n kollega te probeer klink soos back up, asap en for your information word deesdae gelukkig nie meer gehoor nie.

EA het nie teen die uitspraak geappelleer nie. En met rede want in 2006 het die hof van Versailles die maatskappy General Electric Medical Systems ‘n boete van 580 000 euro opgelê omdat hul handleidings net in Engels beskikbaar was.

VF+ verstom oor Xingwana se onverantwoordelikheid

Lulu Xingwana

Al meer twyfel begin in landbougeledere ontstaan oor die toerekeningsvatbaarheid van die minister van Landbou, me. Lulu Xingwana.

Die VF Plus se woordvoerder oor Landbou en Grondsake, mnr. Werner Weber, het in reaksie gesê haar stelling, volgens mediaberigte, dat daar sedert 1985 agt miljoen mense van plase afgesit is, is so verregaande dat gepaste kommentaar daarop uiters problematies geword het. “Indien me. Xingwana se syfers korrek was, sou elke enkele boer in Suid-Afrika meer as 130 werkers van hulle plase moes afgesit het. Gemiddeld was daar nooit meer as 20 werkers op tipiese Suid-Afrikaanse plase nie. Daar was selfs in die hoogtepunt-jare van Suid-Afrikaanse landbou nooit meer as 2 miljoen werkers op Suid-Afrikaanse plase nie. Xingwana se syfers is dus net so buitensporig soos die res van haar aansprake”, het Weber gesê.

Haar en haar adjunkminister se verdere dreigement dat boereplase onteien gaan word as mense van plase afgesit word, bring ‘n heel nuwe dimensie in ons regstelsel na vore.

“Die Minister, gesteun deur haar adjunkminister, adv. Dirk du Toit, wil arbitrêr regter speel en buitensporige straf toemeet in gevalle van beweerde plaas-afsettings. Ons moet onthou, hierdie mense sit in die kabinet van ‘n hoogs ontwikkelde staat. Ek staan verstom oor die onverantwoordelikheid van hulle optrede”, het mnr. Weber gesê.

мультики трансформер

Franse vra DNS vir visum

Franse afgevaardigdes het Woensdag, 12 September 2007, ‘n groot tree geneem in die bestuur van immigrante. Die wetskommissie in die Nasionale Vergadering het ‘n amendement goedgekeur wat DNS-toetse vereis voordat ‘n visum vir langer as drie maande uitgereik word. "In gevalle waar ernstige twyfel heers oor identiteit" sal diplomatieke of konsulêre personeel "aanbeveel" dat ‘n visumaansoeker "op sy eie koste" ‘n toets laat doen om sy verklaarde biologiese verwantskap geneties te laat verifieer.

Indien die amendement aanvaar word, sal die uitbreiding van genetiese toetse aansienlik wees omdat die aanvraag om familieherenigingsvisums reeds 23 000 gevalle per jaar behels. Dit mag wees dat elke herenigingsaansoek voortaan ‘n DNS-toets sal vereis. Die voorstel is deur Thierry Mariani van die regerende UMP ingedien.

Om etiese redes is die wet soos dit tans op die boeke staan streng omlyn. Artikel 16 van die Code Civil stel dit duidelik dat enige genetiese studie omtrent die eienskappe van ‘n persoon alleen om mediese of navorsingsredes onderneem mag word. Familieherenigingsvisums voldoen nie aan die kriteria wat "respek vir die menslike liggaam" afdwing nie.

Mariani het egter laat blyk dat hy bewus is van die botsing met Artikel 16 en erken dat sy voorstel "afwyk" van die wet, maar vir die afgevaardigdes is die "veilige en vinnige" manier waarop DNS-inligting identiteitsbedrog sal uitskakel, die sterker oorweging. Mariani het ter ondersteuning verwys na ‘n verslag wat die UMP onder leiding van senator Adrien Gouteyron onlangs uitgebring het waarin die duidelike toename in bedrog uitgespel word.

Volgens Gouteyron is die egtheid van identiteitsbewyse onder verdenking. "In sommige lande soos Senegal, die Ivoorkus, die twee Kongo’s, Togo, Madagaskar en die Comore is tussen 30% en 80% van alle bewyse vervals." Nietemin was daar lede van die UMP wat, soos die Sosialiste, nie te vinde is vir die voorstel nie.

François Goulard (UMP) het benadruk dat daar in die Franse reg absoluut geen aanspraak in biologiese terme bestaan nie. "’n Mens kan ‘n kind sonder meer erken selfs al is ‘n mens nie die biologiese vader nie," het hy gesê. "Om dit van buitelanders te verwag is omstrede en verkeerd." Die Sosialiste wou weet watter laboratoria in dié betrokke lande die toetse gaan onderneem. "Hoe weet ons die toetse gaan nie ook vervals wees nie?" het Serge Blisko gevra.

In Europa is biologiese verwantskap as basis vir familieverwantskap tans ook problematies. Die Britse mediese publikasie, The Lancet, beweer dat soveel as 2,7% van Europese geboortes onder "vals" verwantskap aangemeld word en dat biologiese vaderskap dus nie die kind se wetlike status tans beïnvloed nie.

Die oortreding om genetiese toetse buite die wet te onderneem is vir Franse sedert 2004 strafbaar met ‘n boete van 15 000 euro of die gevangenis. Om daardie rede gebruik bekommerde vaders klandestien die dienste van Switserse, Belgiese of Spaanse laboratoriums wat hulle via die internet nader om vas te stel of hul telge hul eie is. Die koste daarvan beloop tussen 200 en 600 euro.

Russe hou ‘Gesinskommunikasiedag’

‘n Skattige patriotjie?

Owerhede in die Russiese streek van Olianofsk aan die Wolga, het burgers aangemoedig om Woensdag kinders te maak. Dit sal daartoe lei dat klein "patriotjies" op 12 Junie 2008 hul eerste lewenslig aanskou, net betyds vir die Russiese nasionale feesdag.

Die dag van "bevrugting" sal amptelik die dag van "Gesinskommunikasie" heet, het die goewerneur van Olianofsk (900 km van Moskou geleë), Sergei Morozov, aangekondig. Die geboortesyfer in Rusland het dramaties afgeneem ná die val van kommunisme.

Die stad, wat dieselfde naam as die streek dra, is die geboorteplek van Lenin. Dit is die sewentiende grootste stad in Rusland. Dit is ‘n belangrike hawestad wat riviertoegang bied en sentrum vir lugvaart. Olianofsk huisves vliegtuigfabrieke.

Staatsamptenare en studente het Woensdag verlof gekry, nege maande voor die nasionale Grondwetfees, om te gaan arbei aan die volk. Dié aankondiging is deur die plaaslike owerheid gedoen. ‘n Aantal inwoners het by die hoofposkantoor byeengekom om gratis koeverte met die slagspreuk "Gee geboorte aan ‘n patriot" uit te stuur aan die hele Rusland.

‘n Kompetisie is ook gehou om die wenner van "liefdesverklarings" aan te wys. ‘n Selfoonmaatskappy het teksboodskappe teen ‘n verminderde tarief aan die tieners beskikbaar gestel en hulle kon lesings by die biblioteek bywoon om uit te vind wat toekomstige ouers alles behoort te lees.

Vir die kleuters was daar onderwerpe aangebied soos "Ek gaan ‘n boetie kry". Plaaslike museums het ook deelgeneem aan die inisiatief en tentoonstellings oor die onderwerp van liefde en samesyn gehou. Pryse vir moeders van "patriotjies" wat op 12 Junie gebore word wissel van televisiestelle tot viertrekvoertuie.

In die eerste helfte van 2007 het Rusland met 189 000 mense gekrimp. Die land het tans 142 miljoen inwoners volgens die Russiese statistiekdiens Rosstat.

86 у купить Александр Фильчаков

Polisiegeweld teen Vlaamse nasionaliste

Filip Dewinter word weggelei

‘n Ordelike en vreedsame byeenkoms op die Brusselse Schumanplein teen die islamisering van België waaraan ook ‘n aantal Vlaamse en Europese parlementslede deelgeneem het, is Dinsdag met buitengewone hardhandigheid uiteengejaag deur die polisie. Volgens wat berig word was nie een van die polisielede Nederlands magtig nie, maar dit het hulle egter nie verhoed om deelnemers in boeie te slaan en weg te neem nie.

Onder die arrestasies was dié van partyvoorsitter van Vlaams Belang, Frank Vanhecke, asook bekende gesig, Filip Dewinter. Kennelik voel die Belgiese owerhede dat immigrante nie blootgestel behoort te word aan sulke kritiek van inwoners nie.

Anti-islamdeelnemer teen die grond

Klaarblyklik word Vlaamse nasionaliste ook beskou as vrye wild en beledigings van "vuil Vlaming" is in Frans gehoor toe die ordedienste op die byeenkoms toegesak het. Behalwe die Vlaamse verteenwoordigers was daar ook parlementslede uit Frankryk en Italië teenwoordig.

Die enkele grootste Vlaamse party, Vlaams Belang, het hul skok en verontwaardiging uitgespreek oor die gebeure en gesê dat hulle fel protes in die nasionale en Europese parlemente sal aanteken oor die inperking van demokratiese regte en vryhede in die land.

Die party het voorts gesê dat vrye meningsuiting wat deur intimididasie en geweld onderdruk word, nie in in 2007 in die Europese hoofstad geduld behoort te word nie. Regsgeleerdes versamel ondertussen getuienis oor die beserings wat deur deelnemers opgedoen is as gevolg van polisiegeweld. Vlaams Belang beoog om nie net ‘n klag in te dien by die vervolgingsgesag nie, maar ook by die Centrum voor Gelijkheid van Kansen en Racismebestrijding (CGKR).

справка купить

ANC-minister dreig met grondonteiening

Lulu Xingwana, min. van grondsake

Die ANC-minister van grondsake, Lulu Xingwana, het gister gedreig dat haar regering plase gaan onteien van boere wat “die regte van werkers skend”. Die konteks van haar uitlating was ‘n vergadering van die Voedsel en Verwante Werkersunie se nasionale konferensie in Randburg waar sy deur ‘n skare van 200 met rooi T-hemde toegejuig is.

Xingwana het gesê dat “die regering die reg het om diegene wat nie die wet (oor verblyfreg op plase) eerbiedig nie te onteien. Ek voel persoonlik dat te veel plaaswerkers hulself onder die sweep van mishandeling deur gewetenlose boere bevind.”

Haar aanval op boere volg kort op die hakke van ‘n soortgelyke uitspraak deur die adjunk-minister van grondsake, Dirk du Toit, in die parlement op Woensdag. By die pas afgelope kongres van TLU-SA, die landbou-unie, is gevoel dat Du Toit se stellings bereken is om saam te val met die landboukongres waar “Volhoubare landbou binne die Afrikarealiteit” die tema was.

Xingwana het beweer dat agt miljoen werkers van plase afgesit is van 1985 tot 2005 en dat slegs een persent van sulke uitsettings wettig was. Hierteenoor het mnr. Lourie Bosman van Agri-SA gesê dat daar sedert die begin van die jaar nog geen geval van onwettige uitsetting in die land aangemeld is nie. In terme van ‘n ooreenkoms tussen boere en die departement van grondsake, bestaan daar ‘n gesamentlike komitee om sulke gevalle te ondersoek. Sedert 1 Januarie 2007 is daar egter nog geen geval van onwettige uitsetting op ‘n plaas aangemeld nie.

Volgens Xingwana het die ANC nie met onteiening begin nie, maar het die vorige regering himself reeds sedert 1936 skuldig gemaak aan wat sy noem “skop-skiet-en-donder-onteienings”.

“Ek glo dat ons almal bewus is van die probleme op plase en dat hulle vra om dringende en besliste ingryping deur alle strategiese vennote,” het sy voortgegaan. “Ons moet beklemtoon dat plaaswerkers ook mense is en menswaardige behandeling verdien.”

Xingwana het gesê dat die debat en die behoefte om verblyfregkwessies aggressief ter hersien gedurende die Grondberaad in 2005 beklemtoon is. By die beraad is ‘n oproep gedoen om ‘n moratorium op alle uitsettings te plaas en om die huidige wetlike bestel te wysig.

Dit het die departement van grondsake genoop om drie studies aan te vra waarin bepaal sou word hoeveel mense op plase woon, hoe die wetgewing hersien behoort te word, asook die moratorium op alle uitsettings.

Die eerste studie het getoon dat daar 3 miljoen mense op plase woon. Die studies is intussen voltooi en sal deur die departement vrygestel word op Maandag 17 September. ‘n Aksieplan sal onmiddellik daarna opgetrek word.

“Sommige van die mislukkings is nie as gevolg van die wetgewing nie, maar as gevolg van die vermoë van die staat om dit te implementeer.”

“Nuwe strategieë word ontwikkel, insluitende die daarstelling van die Grondregtebestuursfasiliteit.’

Regsverteenwoordiging het nog altyd die uitslag van uitsettingsake bepaal en sodoende het plaaswerkers en plaasbewoners sulke sake verloor.

“Dit is belangrik dat die staat behoorlike meganismes in werking stel om diegene wat nie regsverteenwoordiging kan bekostig nie van hulp te wees.”

Ander elemente van die Grondregtebestuursfasiliteit sal ‘n oproepsentrum by die departement insluit om plaaswerkers en –bewoners te help, asook ‘n kommunikasiestrategie om bewustheid van grondregte te verhoog.

“Ek beoog om ‘n grondregtebewustheidsveldtog van staple te stuur en om ook gebiede met ‘n hoë voorkoms van uitsettings te besoek,” het sy gesê.

“Dade van mishandeling op plase was nie in belang van die groei en ontwikkeling van landbou, ‘n belangrike pilaar van die landsekonomie, nie,” het sy voorts verklaar.

“As regering gaan ons alles in ons vermoë doen om toestande op plase te normaliseer.”

Xingwana het ‘n beroep op boere wat steeds die menseregte van hul werkers skend gedoen om “sulke gedrag te laat vaar”.

“Ek wil boere ook vra om die werksomstandighede van diegene wat hulle dien te verbeter. Aan die ander kant doen ek ‘n beroep op plaaswerkers om met hul werknemers saam te werk,” het Xingwana gesê.

Ebola breek weer in DRK uit

Die Ebola-virus is terug

Die Wêreldgesondheidsorganisasie het Dinsdag die aanwesigheid van die dodelike Ebola-virus in die DRK bevestig. ‘n Dosyn mense is klaarblyklik die afgelope maand oorlede aan ‘n siekte waarvan die oorsaak nie bekend is nie.

‘n Woordvoerder van die Organisasie in Genève het gesê dat vyf gevalle van Ebola in Kasaï aangeteken is. Sedert 1976 is daar 450 sterftes van die siekte aangemeld. Die Organisasie kon egter nie sê of die vyf vermelde gevalle steeds leef of reeds oorlede is nie.

Die woordvoerder kon ook nie bevestig of ander siektes dalk die oorsaak kan wees van die groot aantal sterftes in die gebied nie. Daar word gespekuleer dat Shigella, ‘n aansteeklike siekte wat minder gevaarlik as Ebola is, moontlik die oorsaak van dood kon gewees het.

Die WGO in Kinshasa het verklaar dat 166 mense binne vier maande in Kasaï die lewe gelaat het. ‘n Derde van die sterftes is as gevolg van Ebola wat die afgelope vier maande in dié provinsie woed. Die prioriteit is nou om siekes te identifiseer en te isoleer sodat die siekte nie verder versprei nie.

Die Ebola-virus dra die naam van ‘n rivier in die Equateurprovinsie in die noorde van die DRK waar dit die eerste keer aangeteken is. Die virus word deur direkte kontak met die sieke se liggaamsvloeistof oorgedra en die virus bly na die dood van die besmette liggaam steeds lewensgevaarlik. Een van die hoofoorsake van siekte bly egter die kontak tussen mens en primaat.