Kategorie: Nuus

ANC-moordbeskuldigde kry borg

‘n Voormalige ANC-raadslid, wat teregstaan op die moord op sy vrou, is borgtog van R20 000 in die Bloemfonteinse landdroshof toegestaan.

Maphabole Godfrey Maphobole, ‘n voormalige ANC-raadslid van die Tokologo plaaslike munispaliteit,
verskyn na verwagting vandag weer in die hof.

‘n Verhoordatum sal na verwagting tydens die verrigtinge vasgestel word.

Die 33-jarige staar ondermeer aanklagte van moord en dwarsboming van die gereg in die gesig.

Maphobole word daarvan aangekla dat hy sy vrou, Thulani, op 27 November verlede jaar in hul huis in Langenhovenpark, Bloemfontein, vermoor het.

ANC verklaar oorlog teen wittes

Die ANC het oorlog verklaar teen sogenaamde wit “rassiste” in ‘n poging om swart eenheid te bevorder.

Die party het ook ander politieke partye gevra om hulle daarvan te weerhou om die swart regime te ondermyn.

‘n Woordvoerder van die ANC, Zizi Kodwa sê oproepe dat President Jacob Zuma uit sy pos verwyder moet word, is ‘n poging om ‘n “regte gesprek” oor wit rassisme te vermy.

Die ANC-regime probeer kennelik die wit minderheid se “rassisme” verantwoordelik hou vir hul mislukkings. Die party het al meermale verklaar dat swartes nie rassisties kan wees nie omdat hulle “verontreg” is.

Kodwa sê dit is duidelik dat die ZumaMustFall-veldtog slegs die samelewing verdeel en tot gespanne betrekkinge lei.

‘n Reuse Zuma Must Fall banier wat by ‘n woonstelgebou in Kaapstad opgerig is, is Saterdag deur ANC-ondersteuners uitmekaar geskeur.

Die DA het ‘n klag teen ‘n ANC-parlementslid ingedien nadat hy op sosiale media gesê het dat die gebou en al sy inwoners afgebrand moet word.

Die DA het ontken dat hy betrokke was by die oprig van die banier. Primedia het glo vir die banier betaal.

Intussen beoog die radiopersoonlikheid, Gareth Cliff wat afgedank is weens sy beweerde rassisme, om M-Net hof toe te sleep vir onregverdige ontslag.

Cliff is in die pad gesteek na wat talle kykers as ‘n “rassevoorval” op Twitter bestempel het. Hy het nalv die Penny Sparrow-rasseherrie gesê Suid-Afrikaners begryp nie wat vryheid van spraak beteken nie.

Die wit omroeper Cliff het nie direk na swartes verwys nie, maar die woord “people” gebruik.

Cliff het tien jaar lank op die Idols-paneel gedien. ‘n Swart Idols-beoordeelaar, Somizi was ook onlangs in ‘n rassevoorval betrokke, maar dien steeds op die paneel.

Somizi Mhlongo het om sy Instagram sy mening gelug oor “rassistiese wit Suid-Afrikaners wat hoop dat Zuma se val hulle ‘n wit president sal gee of apartheid sal terugbring”.

Hy sê hulle hoop is “‘n ware ontkenning van die werklikheid”. Hy het egter slegs Afrikaners uitgesonder as “wit Suid-Afrikaners”.

Somizi sê dié ontkenning is soortgelyk aan Donald Trump wat dink hy gaan die volgende Amerikaanse president word of Oscar Pistorius wat glo hy gaan weer aan die Olimpiese Spele deelneem.

Sanksies teen Iran opgehef

Iran het Saterdag ’n reusetree vorentoe gegee om sy internasionale afsondering te beëindig, toe sanksies teen die land opgehef is.

Die geskiedkundige kernooreenkoms met verskeie wêreldmagte wat in Julie gesluit is, het uiteindelik in werking getree, het AFP berig.

Iran se pres. Hassan Rouhani, wie se verkiesing in 2013 gehelp het om die reuse diplomatieke poging vir die 14 Julie Wenen-ooreenkoms van stapel te stuur, het dit as ’n “glorieryke oorwinning” vir die “geduldige nasie van Iran” verwelkom en as ’n “nuwe hoofstuk” in Teheran se betrekkinge met die res van die wêreld beskryf.

Die dag van implementering van die ooreenkoms het aangebreek nadat die Internasionale Atoomenergie-agentskap (IAEA) se inspekteurs bevestig het dat Iran ál die maatreëls nagekom het waarop ooreengekom is.

Die hoof van buitelandse sake van die Europese Unie (EU), Federica Mogherini, wat die ses groot wêreldmoonthede verteenwoordig het, het gesê dat “multilaterale en nasionale ekonomiese en finansiële sanksies wat verband hou met Iran se kernprogram opgehef word”.

Dit sluit in sanksies teen Iran se noodsaaklike olie-uitvoere. Rouhani het ’n “jaar van voorspoed” vir sy land voorspel.

Die aankondiging is gevolg deur die nuus van uitruiling van gevangenes tussen Amerika en Iran, nóg ’n teken dat betrekkinge tussen die twee ou vyande aan die verbeter is.

Verdere stappe deur Iran sal gekombineer word met uiters noukeurige inspeksies deur die IAEA en dit sal vir ’n jaar duur.

Iran het nog altyd ontken dat die land kernwapens wil hê en hou vol sy kernaktiwiteite is uitsluitlik vir vreedsame redes soos die opwekking van elektrisiteit.

Die ooreenkoms het meegebring dat Amerika en Iran nou op die pad na beter betrekkinge is, 35 jaar nadat die Islamitiese rewolusie die Amerikaans-gesteunde sjah uit die kussings gelig het.

Die VSA het egter nuwe sanksies teen Iranse maatskappye en individue ingestel oor ‘n onlangse ballistiese missieltoets.

Die nuwe sanksies raak 11 entiteite en individue gekoppel aan die missielprogram en sal hul gebruik van die Amerikaanse bankstelsel verhoed.

Taiwan kry eerste vrouepresident

Taiwan se eerste vrouepresident, Tsai Ing-wen, geniet ’n breë mandaat ná haar oortuigende oorwinning in die pas afgelope verkiesings, het AP berig.

Haar pro-onafhanklikheidsparty het ‘n nuwe wetgewende meerderheid behaal, maar om die eiland se delikate betrekkinge met China te bestuur, sal ’n groot uitdaging wees.

Tsai, 59, het met haar inhuldingsboodskap gesê betrekkinge met China sal voortgaan, maar die wil van die kiesers moet ook in ag geneem word.

Beijing het reeds ge­reageer nadat haar oorwinning Saterdagnag aangekondig is, met verklarings waarin gewaarsku word dat China nie sal afwyk van sy beleid dat die kommunistiese vasteland en self­regerende eiland deel van die Chinese vasteland is nie.

Tsai het 56 persent van die stemme op haar verenig. Haar naaste teenstander, Eric Chu van die Nasio­nalistiese party wat ’n vriendskaplike verhouding met China het, het 31 persent van die stemme gekry.

Tsai se Demokraties Progressiewe­ party het 68 van die 113 setels in die wet­gewende Yuan, Taiwan se parlement, verower.

Dit is die eerste meerderheid vir haar party in die wetgewende vergadering wat lank deur die Nasionaliste oorheers is.

Verkeershoof vas vir bedrog

Die hoof-verkeersbeampte van die Maquassi Hills-munisipaliteit op Wolmaransstad in Noordwes verskyn na verwagting vandag weer in die hof op verskeie aanklagte van bedrog.

Judas Mahlangu se aansoek om borgtog is vroeër in die landdroshof op Wolmaransstad geweier nadat hy in September verlede jaar versuim het om in die hof te verskyn. Hy het na bewering die munisipaliteit uit meer as R540 000 bedrieg.

Die Padverkeerbestuurskorporasie (RTMC) se woordvoerder, Simon Zwane, sê ‘n lasbrief vir Mahlangu se inhegtenisneming is in September uitgereik nadat hy in Julie verlede jaar in hegtenis geneem is in verband met regsverydeling.

Zwane sê Mahlangu is weer in September in hegtenis geneem nadat dit aan die lig gekom het dat hy by nog misdrywe betrokke is. Mahlangu is toe op R5 000 borgtog vrygelaat, maar het nie opgedaag vir sy verskyning in September nie.

Zwane sê Mahlangu is sedert sy inhegtenisneming in Mpumalanga in aanhouding.

Menslike dele in vrieskas gevind

‘n Swart man (27) van Kuruman verskyn na verwagting vandag in die landdroshof op Mothibistad nadat menslike organe na bewering in sy vrieskas gevind is.

Ernest Mabilo doen vandag aansoek om borgtog.

Volgens Noord-Kaapse polisiewoordvoerder, Mohale Ramatseba, is ‘n hart en longe verlede Vrydag in Mabilo se vrieskas gevind.

Mabilo, wat by ‘n begrafnisonderneming in Kuruman werk, staar ‘n aanklag van die onwettige besit van menslike liggaamsdele in die gesig. Hy bly in aanhouding.

Tuks gesluit weens werkersopstand

Die Universiteit van Pretoria (UP) sal gesluit bly vir registrasie tot verdere kennisgewing ná gewelddadige betogings deur uitgekontrakteerde skoonmakers verlede week op die kampus.

In ‘n verklaring, het UP woordvoerder Anna-Retha Bouwer gesê ‘n vergadering met die kontrakwerkers oor hul griewe het Saterdag op ‘n dooiepunt geëindig.

Dié werkers stel klaarblyklik nie belang in gelyke geleenthede nie, maar in voordele vir hulself.

“Sedertdien word toegang tot die ingange na die universiteit belemmer deur protesaksie en dreigemente om intimidasie en geweld voort te sit,” het sy gesê.

Die universiteit moedig aanlynregistrasie aan en studente gevra om hul aanlynportale te raadpleeg vir meer inligting.

Bouwer het gesê die kontrakwerkers eis onmiddellike UP-aanstellings vir alle kontrakwerkers en ‘n minimumsalaris van R10 000 per maand.

Die universiteit het ‘n soortgelyke benadering gevolg wat ooreenstem met ooreenkomste wat aangegaan is by verskeie ander universiteite soos Wits en die Universiteit van Johannesburg.

“Ongelukkig is dit deur die verteenwoordigers van die skoonmakers en studenteverteenwoordigers verwerp,” sê Bouwer.

Sy het gesê ‘n paar komplekse kwessies moet oorweeg word, insluitend hul langtermyn wettige kontrakte met diensverskaffers.

Die werkers teiken die Universiteit van Pretoria (UP), die Tshwane Universiteit van Tegnologie, die Tshwane North College, die Tshwane-Suid-kollege en Medunsa hierdie week.

Tennis, krieket geskud deur knoeiery

Internasionale tennis is geskud oor bewerings dat die tennisowerhede nie opgetree het teen grootskaalse wedstrydknoeiery nie.

Die tennisbase het berigte deur die BBC ontken dat 16 spelers wat deel van die topgekeurde 50 spelers is betrokke is.

Volgens dokumente wat in besit van die BBC is, is die spelers na bewering die afgelope dekades gereeld aan die Tennis Integriteitseenheid uitgewys omdat hulle vermoedelik wedstryde geknoei het.

Die eenheid het egter na bewering nie teen die spelers opgetree nie. Al die spelers, wat grand slam-wenners insluit, is toegelaat om aan te hou speel.

Volgens die bewerings is onder meer drie wedstryde op Wimbledon geknoei. Die Integriteitseenheid en die tennisowerhede het ten sterkste ontken dat bewerings oor wedstrydknoeiery onderdruk is of nie behoorlik ondersoek is nie.

Die tennisbase sê enige nuwe inligting sal egter ondersoek word. Die Australiese Ope begin vandag in Melbourne.

Dié onthullings volg nadat die bekend geraak het dat wedstrydknoeiery Suid-Afrikaanse krieket raak.

Klaarblyklik is word agt spelers daarvan verdink dat hulle geld aanvaar het om wedstryde te beïnvloed. Vier van die spelers het Suid-Afrika internasionaal verteenwoordig.

Droogte nog nie gebreek nie

Onlangse goeie reënval in droogtegeteisterde dele van die land het nog steeds nie die vlakke van damme en riviere na wense aangevul nie.

In die Vrystaat, Noordwes, Noord-Kaap en dele van Limpopo is die droogte nog nie gebreek nie.

Die land se sentrale weerkantoor sê die vooruitsigte op buie en donderbuie lyk tot 30 Januarie nietemin goed.

Weens die El Niño-verskynsel kry sekere gebiede nie wydverspreide reënval nie, maar sak buie net plek-plek uit.

Alhoewel die mielieplanttyd verstryk het, plant boere sonneblom en voer aan. Kommer oor die voeraanvraag heers egter steeds.

In besproeiingsgebiede het boere voordeel getrek uit die reën.

Brief: Kabeldiefstal laat helfte van Koster sonder krag; munisipaliteit skuld te veel

Ongeveer die 20 Desember 2015 steel hulle ‘n ondergrondse hooflynkabel in Koster wat omtrent die helfte van Koster kragloos laat.

Die munisipaliteit het nie geld om die kabel te koop van hulle gereelde verskaffers nie omdat hulle derduisende rande skuld aan die verskaffer.

Een van on belastingbetalersvereniginglede wil toe die kabel uit sy eie sak betaal maar die verskaffer dring toe daarop aan dat hy die raad se hele rekening betaal dan sal hulle ‘n kabel aan hom voorsien. Ek dink u weet wat hy toe vir hulle gesê het.

Hy koop toe ‘n kabel vir R 25 000,00 by ‘n ander verskaffer aan en gee dit vir die raad om te installeer.

Die persoon self het nou onlangs by sy huis en fabriek sonpanele opgesit wat saam met die son beweeg en dit het hom R3 500 000,00 gekos, maar hy is nou totaal onafhanklik van Koster se krag.

As dit nie was vir sy welwillendheid nie sou ons steeds sonder krag gesit het.

– Carel van Heerden, Koster