Vyftig Numsa-stakers vir openbare geweld vas in Gauteng

Die polisie in Gauteng het meer as vyftig stakende werkers van die metaalwerkersvakbond Numsa in hegtenis geneem vir openbare geweld en kwaadwillige saakbeskadiging.

Volgens die polisie is 40 mense in Germiston in hegtenis geneem nadat die perseel van ‘n staalmaatskappy onder klippe gesteek is.

Een staker is ook in hegtenis geneem vir die besit van ‘n wapen.

Dertien mense is in Brakpan in hegtenis geneem nadat hulle ‘n vragmotor met klippe bestook het.

Duitsland, VSA byeen oor jongste VSA spioenasie-aanslag

Duitsland en die VSA se verteenwoordigers vergader om spioenasie deur ‘n Duitse dubbelagent te bespreek.

Die kwessie maak oplsae in Duitsland. Die BND-agent het dokumente rakende die ondersoek na NSA-meeluistering aan Amerikaanse spioene verkoop.

Die Duitse agent het toegang tot die Bundestag gehad waar hy die dokumente gesteel het deur hulle op ‘n geheuestokkie oor te kopieer.

‘n Woordvoerder van die Wit Huis, Josh Earnest, het Woensdag bekend gemaak dat die doel van die gesprek is om geskil tussen die twee lande op te los.

Die dubbelagent is in Duitsland in hegtenis geneem. Dis die jongste spioenasie-voorval tussen die twee lande.

Verlede jaar het Edward Snowden inligting bekend gemaak dat Amerika onder meer internet-data van vriende soos Duitsland insamel.

Duitsers is boos oor die inbreuk op hulle privaatheid wat hulle glo gebruik word om Duitse nywerhede se voorsprong te vernietig.

Dit het ook geblyk dat die Duitse kansellier Angela Merkel se foongesprekke afgeluister word.

Duitsland het intussen aangekondig dat hulle wetgewing sal aanpas wat hulle in staat sal stel om Amerikaanse spioenasie die hoof te bied.

Thandi Modise kla dat sy aan vark verbind word

‘n Klagte is by die Persombudsman teen The Sowetan aanhangig gemaak oor ‘n berig wat die voorsitter van die Nasionale Raad van Provinsies, Thandi Modise, aan haar mishandelde varke verbind.

Haar woordvoerder, Neo Moepi, sê die koerant het haar verklaring oor die verwaarloosde diere wat op haar plaas aangetref is, verdraai.

Moepi sê die berig onder die opskrif ” Ek het meer as my vark gely”, op die koerant se voorblad, is nie net lasterlik nie maar kom ook neer op karakterskending.

Hy sê dit skep die indruk dat die voormalige premier nie waarde heg aan die lewens of sorg van die diere wat op haar plaas aangehou is nie.

Die polisie en amptenare van die Dierebeskermingsvereniging het Saterdag op die plaas opgedaag waar hulle deur skokkende tonele van diereverwaarlosing begroet is.

Die diere is sowat twee weke lank sonder kos en water aan hul eie lot oorgelaat. Die varke het mekaar verskeur om te probeer oorleef. Dooie skape, bokke, en eende is ook op die plaas aangetref.

Daar was geen plaaswerkers op die eiendom nie, geen krag nie en die waterpompe was ook buite werking.

Die voormalige premier hou vol dat sy nie daaroor ingelig was nie.

Mampie-Rampie roep politiek vaarwel onder bedrog-skadu

AgangSA-leier Mamphela Ramphele het besluit om die politiek vaarwel te roep, het sy Dinsdag aangekondig.

“Ek het besluit om partypolitiek te verlaat en terug te keer na die werk saam met my mede-burgers in die burgerlike samelewing om die droom van ons ‘n meer regverdige en voorspoedige samelewing na te streef,” het Ramphele gesê in ‘n verklaring.

“Ek sal dus partypolitiek verlaat, nadat ek my doel vervul het om ‘n politieke voertuig te skep vir diegene wat buite die politieke hoofstroom ‘n stem kan hê.”

Sy het gesê diegene wat AgangSA vorentoe sal neem moet voortgaan om die party te versterk en uit te bou.

Mampie-Rampie is verlede week uit AgangSA geskors volgens die party se adjunk-president, Andries Tlouamma. Hy het gesê Ramphele kan nie die party lei nie, want sy word by bedrog betrek.

Vroeg in Junie het die partyvoorsitter Mike Tshishonga ‘n saak van bedrog teen Ramphele geopen.

Ramphele het glo ‘n bankrekening vir direkte toegang tot deposito’s van die Onafhanklike Verkiesingskommissie (OVK), sonder ‘n mandaat van die party geopen.

Ramphele ontken dat sy die rekening in haar eie naam geopen het.

“Ek gaan terug na die burgerlike samelewing om voort te gaan om die idealisme wat my my hele lewe gedryf het as ‘n aktiewe burger na te streef,” het sy gesê.

“Ek bly oortuig dat die meer intense werk met jong mense en vroue, wat die meerderheid bevolking is, die beste resultate vir ons geliefde land sal lewer.”

Die ANC is verheug oor die bedanking en het dit as ‘n dapper en bewonderenswaardige besluit beskryf.

‘n ANC-woordvoerder, Zizi Kodwa, sê Ramphele was nie ‘n werklike aktivis nie en die politieke terrein was moeilik vir haar.

Kodwa sê soos die meeste partye wat op grond van sy weerstand teen die ANC gevorm is, was die party tot mislukking gedoem.

Waarom u tot praag moet bydra

Geagte leser,

Die afgelope paar dae se aanvalle op Steve Hofmeyr vanuit veral Beeld het my weer onder die indruk gebring van hoe min eg-Afrikaanse media daar oorbly.

Nie net het Beeld begin vanjaar die PUK verguis nie, maar nou vaar die koerant ook uit teen “Die Stem” van CJ Langenhoven. Dis glo “apartheid se amptelike lied” soos redakteur Adriaan Basson dit stel. In weerwil van Basson se Afrikaanse naam, huldig hy Engelse sienings oor Afrikaners en het hy die vertekende, chauvinistiese beeld van Afrikaners wat jare lank in Engelse koerante en op Engelse kampusse van ons gekonstrueer is, sy eie gemaak.

praag-embleemnuutNet vandag gesels my dogter met my oor die verskille tussen Afrikaanse en Engelse tieners. “Ons is heeltemal anders,” sê sy. “Afrikaanse tieners sal nog met dagga eksperimenteer, maar die Engelse tieners gebruik sommer enigiets: pille, sampioene, harde goed, heroïen. Hulle laat hulself tatoeëer en hul lywe vol gate maak. Ons het skoon gesigte, sonder gate of tatoeëermerke. Jy kan die verskil op ‘n myl raaksien.”

Nou wonder ek: Gaan ‘n toekomstige geslag Afrikaners net soos Engelse lyk en optree, dieselfde dinge sê en glo, van kindsbeen af?

Die greep van die ANC en Engelse liberale op Beeld en sy susterkoerante is so sterk dat Engelse rubrieke en kommentaar deesdae in vertaling in dié publikasies geplaas word. Op ‘n manier mag Afrikaners nie meer in Afrikaanse koerante skryf nie!

Gaan daar nog eg-Afrikaanse media oorbly? Of gaan dit maar net vertaalde Engelse of Britse menings en sienings wees wat aan ons opgedis gaan word, tesame met sensasie oor Oscar Pistorius?

‘n Week of wat gelede moes ons praag se stelsel bywerk en tydens ‘n paar nagmerrie-oomblikke wou dit nie werk nie. Ons het die angs beleef dat al 15 000 van ons artikels dalk korrup kon geraak het. Hoewel ons oor rugsteune beskik, is geen rugsteun ooit volmaak nie en daarom bestaan die moontlikheid van totale dataverlies altyd.

Totale dataverlies. Soms voel dit vir my asof dit is waarop ons almal afstuur, die dag as Afrikaans, Afrikaanse liedere, geskiedenis en plekname nie meer gaan bestaan nie.

Feit is dat omtrent 90% van Afrikaanse lesers vandag nie oor ‘n medium beskik waarmee hulle gemaklik voel en waar ‘n pro-Afrikaanse standpunt intelligent en konsekwent gestel word nie. En waar hulle oor die jongste wêreldgebeure en politieke strominge in Europa, die VSA en elders ingelig word.

As Afrikaans en Afrikaanse joernalistiek sou verdwyn, sou dit regtig totale dataverlies vir ons almal wees. Met slegs ‘n paar rand per maand kan u egter verseker dat dit nie gebeur nie en dat nuus en menings in Afrikaans – deur Afrikaners – altyd beskikbaar sal bly.

‘n Student uit die VSA wat dit self nie breed het nie, hou vol om vir ons $30 per maand by te dra. Hy lees nie eens Afrikaans nie, maar wíl ons eenvoudig ondersteun.

Wat van u, ons eie lesers en ondersteuners?

Help ons om praag tot ‘n magtige nuus- en kultuurmedium uit te bou.

Vul ‘n debietordervormpie in. As u nie daarvoor kans sien nie of ons op ‘n ander manier wil steun, laat gerus van u hoor met ‘n e-pos aan inlig[by]praag.org. Of kontak my op Facebook of Twitter.

Dan Roodt

Uitgewer en eindredakteur

Bibberweer, sneeu is hier

Bibberweer is hier en Suid-Afrikaners in die binneland word aangeraai om die warm komberse en watersakke uit te haal.

‘n Koue front het vanuit die suide oor die grootste deel van die binneland inbeweeg.

Berigte van sneeu is reeds uit verskeie dele van die land ontvang.

Sneeu het op die hoogste pieke van die Drakensberge uitgesak en Kokstad wat in die skadu van die hoogste bergreeks lê, het sneeuval gehad.

In die res van die land byt winterweer met temperature van minus tien in Sutherland en minus nege in Bethlehem, in die Oos-Vrystaat.

Die Weerdiens waarsku dat baie koue weer dele van die Noord- en Oos-Kaap soos De Aar, Sutherland en Calvinia sal raak.

Die temperatuur sal na verwagting eers teen Donderdag opwaarts neig, met dagtemperature wat effens sal verbeter. Dit sal egter koud bly.

Reën sal in die oostelike dele van die land voorkom en los buie word in KwaZulu-Natal teen sonsondergang verwag.

Kapenaars gaan egter weer teen Vrydag ‘n nuwe koue front moet trotseer.

Vrese dat kragonderbrekings in Soweto tot hernude geweld kan lei

Verskeie gebiede in Soweto ondervind kragonderbrekings, het RSG berig.

‘n Woordvoerder van Eskom in Gauteng, Reneiloe Semenya, sê hulle ondervind verskeie probleme wat `n kragtekort meebring.

Die gebiede wat geraak word is Dobsonville, Zola, Molapo, Mapetla en Protea Noord.

Weens die omvang van die probleem, kan Eskom nie sê wanneer kragvoorsiening in die gebiede herstel sal wees nie.

Verlede week het ontevrede inwoners in Soweto tydens ‘n kragonderbreking geweldadig geraak en talle motors is beskadig.

Die polisie moes ingryp sodat Eskom se tegnici die probleem kon oplos.

VN erken gay huwelike

​Die jongste verwikkeling by die Verenigde Nasies toon dat dié wêreldliggaam byna geheel en al deur Amerikaanse befondsing oorgeneem is.

Die VN het besluit om al sy gay werknemers se huwelike te erken. Dit sluit burgers van lande in waar gay huwelike onwettig is.

“Dit is ‘n stap vorentoe,” het Farhan Haq, die VN se adjunkwoordvoerder aan die Guardian gesê. “Baie van ons werknemers wag al lank hiervoor.”

Die nuwe beleid sluit alleen die VN se 43 000 werknemers wêreldwyd in.

Unicef, die VN-kinderfonds, en Unesco is nie deel van die beleidsaankondiging nie aangesien hul kantore nie net in New York gesetel is nie.

Unesco se hoofkantoor is in Parys, Frankryk waar gay huwelike uiters omstrede is.

Volgens die Pew-navorsingsentrum word gay huwelike slegs in 18 lande en dele van die VSA en Mexiko as wettig beskou.

In verreweg die meeste lande wat Afrika sowel as Asië en Rusland insluit, sien inwoners dit as besonder afkeurenswaardig.

Dit is nie seker waarom gay huwelike in Suid-Afrika wettig is nie, maar ontleders meen dat die swart bevolking nie ingelig genoeg is oor sekere agendas wat op hulle afgedwing word nie.

In Rusland word aannemings deur gay ouerpare verbied aangesien die Russe dit as ‘n onverkwiklike voorbeeld vir jong kinders beskou.

Steve oorval deur boodskappe van ondersteuning na Stem

Steve Hofmeyr het Maandag op Facebook gesê hy het gebars van trots toe hy Saterdag spontaan “Die Stem” by Innibos saam met 45 000 Afrikaners gesing het.

Praag het met feesgangers gepraat wat gesê het dit was heerlik om weer deel van ‘n eie groep te voel. Talle het erken hulle moes ‘n traan wegvee daarna.

“Steve se konsert was die hoogtepunt van Innibos. Almal het net gekom om na hom kom te luister,” het Berdine Viljoen aan Praag gesê. Sy sê daar was ‘n ongelooflike atmosfeer.

Feesgangers het Steve sonder uitsondering geloof vir sy moed en getrouheid en hy is behoorlik oorval deur boodskappe van gelukwensing en ondersteuning van oral oor die land.

Hofmeyr is intussen skerp aangeval deur Adriaan Basson – Beeld se redakteur – omdat hy glo ‘n lied gesing het wat nie die “meeste landsburgers” se goedkeuring wegdra nie. Die ou volkslied herinner glo aan “wit onderdrukking”.

Die Stem is lank voor Apartheid, die Nasionale Party en Angelsaksiese wit oorheersing na die Tweede Wêreldoorlog gekomponeer en gesing, maar dié lastige feit het nie in Basson se pad gestaan nie.

Basson beywer hom met ‘n buitengewone fanatisme om ‘n Afrikaner-hergoepering en patriotisme verdag te maak en met alle mag te bestry. Hy wy daagliks sy hele koerant daaraan, op openlike en minder openlike maniere.

Basson sit ook persoonlik agter die veldtog om Potchefstroom te verengels deur die laaste Afrikaanse kampus te verswart.

Hofmeyr het die stilte oor misdrywe onder die huidige volkslied veroordeel asook die voortdurende gedreunsing van aanhitsende haatliedere deur die president voor opruibare swart skares.

Hofmeyr het Afrikaners ook daaraan herinner dat nóg hy nóg hulle iets onwettigs gedoen het.

“Ek sal dit meer sing en ek vra dat die banvloek op ons heiligste tradisionele lied gelig word en dat almal vry mag wees om te sing wat hulle wil, solank dit nie haatspraak is of geweld verkondig nie,” sê Hofmeyr.

Die feesbestuur het in ’n dweperige verklaring vol liederlike spelfoute en anglisismes gesê dit was nie deel van die beplande program nie.

Praag het verneem dat die feesbestuur erg bekommerd is dat Naspers nie meer gratis publisiteit aan die Innibos-fees sal gee nie en benoude e-posse tussen Media24 en die Innibos-bestuur is glo uitgeruil.

Die geradbraakte verklaring lui: “Ons is nie ’n Afrikaner-fees of politieke platform (sic) nie. Ons is trots deel van die Nuwe Suid Afrika (sic).

“Ons sou nie noodwendig die sing van die stem (sic) as deel van die program goedgekeur het as ons vooraf daarvan geweet het nie, want ons besef dat daar sensitiwiteit is rondom die sing daarvan.”

Hofmeyr het aan RSG gesê nasiebou is ’n projek wat misluk het en dat sy ja-stem ‘n dolk in sy kultuur se rug verteenwoordig.

Hier is ‘n aanhaling uit Steve se Facebook-kommentaar:

By Innibos 2014 het ek gedurende my akoestiese kitaarmedley weggetrek met ‘n paar FAK liedjies. Suikerbos, Oukraallied, Al lê die berge nog so blou, Jan Pierrewiet. Toe ook die eerste vers van DIE STEM.
Sonder aansporing het 45000 op aandag gaan staan en saam gesing, so hard dat die hoendervleis nou nog op my uitslaan. Ek kry altyd ‘n knop in my keel by “ons sal lewe, ons sal sterwe…”. Jy sal in die opname hoor hoe ek in daardie reëls my asem vang.
Ek het gebars van trots. Ek sal dit meer sing en ek vra dat die banvloek op ons heiligste tradisionele lied gelig word en dat almal vry mag wees om te sing wat hulle wil, waar hulle wil, solank dit nie haatspraak is of geweld verkondig nie. Dankie vir RSG en Radio Pretoria wat my kans gegee het om ons saak te stel.
Ek is nie verbaas oor die enkele negatiewe reaksies nie omdat die dwepers nie die volgende ironie daarin wil lees nie:
a. Mense wat aanstoot neem vergeet dat Die Stem, soos ons praat, nog deel is van die offisiële volkslied.
b. Hierdie mense neem klaarblyklik nie aanstoot in die dinge wat gebeur onder die nuwe vlag en volkslied nie, alles vanaf wanprestasie tot moord, verkragting, Gupta, Nkandla, gronddiefstal, aggressiewe Marxisme, ekonomiese rassebeleid en lae lewensverwagting. Daar is eintlik meer as genoeg rede om aanstoot te neem in die nuwe volkslied en vlag, tog doen ons nie.
c. Die wat DIE STEM kritiseer is tjoepstil oor die president se haatspraak liedere soos KILL THE BOER en UMSHINI WAMI, terwyl DIE STEM nie een haatsprekende lettergreep bevat nie.
d. “Nkosi Sikelel’ iAfrika” is ‘n Afrikagebed, wat gewild is oor die hele kontinent, ‘n mooi gebed, maar nie ons s’n nie. DIE STEM is ook ʼn gebed, geskryf deur ʼn Suid Afrikaner vir Suid Afrikaners, twee dekades voor Apartheid.
e. Bygesê, ter versagting, ek kan Nkosi sing en die nuwe vlag salueer, veral as ons as Suid Afrikaners presteer, en ek doen steeds, maar moenie my voorskryf oor presies waaroor en wanneer ek trots moet voel nie.

Steve sing Die Stem by Innibos http://www.youtube.com/watch?v=F2wDNYVe7uo
Die Stem gesing deur 3 jarige Suid Afrikaner in New Zealand
https://www.youtube.com/watch?v=w5uXozZRtY8
Die Stem van Suid-Afrika (indien jy vergeet het): http://youtu.be/e9dq7VqV-Os
SA PRESIDENT Zuma sings his personal the hate speech anthem: Kill The Boer https://www.youtube.com/watch?v=Cb3MLHblnbQ

 

Numsa voer veldtog van openbare geweld, intimidasie, saakbeskadiging

Seifsa se hoof uitvoerende beampte, Kaizer Nyatsumba, het gesê die federasie word oorval met verslae van geweld teen sy lede.

Die afgelope naweek in Gauteng is 26 stakers van die metaalwerkersvakbond Numsa op aanklagte van openbare geweld, intimidasie en saakbeskading in hegtenis geneem.

Kwaadwillige beskadiging van privaateiendom, die intimidasie van sake-eienaars, medewerkers en die publiek is oral aangemeld.

Doelbewuste dade van wetteloosheid, insluitend geweld en algemene chaos, word glo in Gauteng sowel as KwaZulu-Natal deur werkers wat deelneem aan die Numsa-staking, gepleeg.

“Ons is baie teleurgesteld met die gewelddadige optrede van sommige unie-lede wat ‘n moedswillige veldtog van vandalisme – voertuie ingesluit – teen talle van ons ledemaatskappye voer… Dit is wat ons wou vermy toe ons ‘n beroep op die vakbonde gedoen het om ‘n vredesooreenkoms aan die begin van die onderhandelinge aan te gaan,” sê Nyatsumba.

‘n Herwinningsmaatskappy het aan die Daily News gesê hy het ‘n lys van klagtes skriftelik aan Numsa se Durban-kantore gestuur, nadat ‘n werknemer Donderdag aangerand is, na bewering deur Numsa-lede.

Hy het gesê ‘n bestuurder is deur die stakende werkers by Isipingo Donderdagoggend so erg aangerand dat hy gehospitaliseer moes word.

Die bestuurder werk vir ‘n chemiese vervaardigingsmaatskappy op Isipingo, wat nie behoort tot die stakende metaal-industrie nie.