Kategorie: Nuus

Turke wil Wes-Afrika teen ‘terreur’ help

Turkye se president, Recep Tayyip Erdogan, het die week ‘n militêre erewag saam met Ivoorkus se pres. Alassane Ouattara by die presidentspaleis in Abidjan geïnspekteer.

Erdogan het Sondag met ‘n weeklange besoek aan Wes-Afrika begin.

Hy het ook Ghana, Nigerië en Guinee besoek.

Die diplomatieke reis is daarop gemik om “strategiese vennootskappe” tussen Turkye en lede van die Ekonomiese Gemeenskap van Wes-Afrikastate (Ecowas) te versterk.

Erdogan se reis kom kort na sy besoek aan Israel. Volgens ‘n ontleder in Al-Monitor besoek die Turkse president lande waar Iran te veel invloed het en waar Israel nie meer welkom is nie, op laasgenoemde se aandrang.

Turkye is in ‘n netelige posisie nadat Rusland in Februarie onthul het dat Erdogan steun aan die internasionale terroristebeweging ISIS verskaf in Sirië.

Erdogan het in Ghana gesê sy land sal Afrika bystaan “teen terreur” en ‘n oproer gedoen dat Afrika teen die “elite” in die Veiligheidsraad opstaan en meer verteenwordiging eis.

Moskou vrees terreuraanval na makabere kop-episode

Gjultsjhekhra Bobokulowa, ’n kinderoppasser wat verdink word van moord op die kind in haar sorg, het in ‘n hof in Moskou, Rusland verskyn.

Russiese polisie het die vrou in ’n hijab, wat die onthoofde kop van ’n kind Maandag buite ’n metro-stasie in Moskou rondgeswaai het, grond toe gedwing en haar van moord aangekla.

Die voorval het vrese vir ’n Islamitiese terroriste-aanval in Rusland verhoog.

Die makabere episode is op kamera vasgevang deur verbygangers, en toon beeldmateriaal van die moslemvrou in ‘n swart sluier wat ronddwaal in die straat met die afgekapte kop ‘n kleuter wat sy hoog in die lug hou.

“Ek is ‘n terroris, ek wil jou dood hê,” skree sy in ‘n swaar aksent. Die vermoorde meisie was 3 of 4 jaar oud, het hulle gesê. Sy het glo gesê Allah het haar aangesê om dit te doen.

Nuusagentskappe het ‘n polisie-bron aangehaal wat gesê het die 38-jarige vrou was glo onder die invloed van een of ander middel, maar dit kon nie bevestig word nie.

Immigrasie-owerhede het aan die media gesê die vrou is ‘n onwettige immigrant uit die voormalige Sowjet-republiek van Oesbekistan.

Voortgesette moslemgeweld het in Februarie die lewens van minstens 670 mense in Irak geëis van wie tweederdes burgerlikes was, het die Verenigde Nasies intussen bekend gemaak.

’n Verdere 1 290 mense is gewond van wie 1 050 burgerlikes was. In Januarie is minstens 849 mense en 1 450 gewond.

In Februarie het die veiligheidstoestand in die land aansienlik verswak met twee massiewe bomaanvalle binne enkele dae deur die Islamitiese Staat (ISIS) groep onderskeidelik op die dorp, Muqdadiyah en in Bagdad waarin minstens 110 mense dood is.

Alhoewel Irakse troepe sedert verlede jaar sleuteloorwinnings teen ISIS behaal het, het die lank verwagte veldtog om Mosul te herower, die belangrikste stad wat die militante beheer, nog nie begin nie.

Opposisie se verkiesingsfoefies lei tot niks

Die mosie van wantroue in pres. Jacob Zuma wat deur Mmusi Maimane, DA-leier, ingedien is, het min kans op sukses gehad.

Die ANC in die Nasionale Vergadering het Dinsdag bankvas agter hul leier gestaan, al was hy nie teenwoordig nie.

Die mosie is met 225 teen 99 stemme verwerp, met 22 parlementslede wat buite stemming gebly het.

Dit is die tweede keer dat die DA dié verkiesingsfoefie uithaal. ‘n Jaar gelede het Maimane ’n soortgelyke mosie van wantroue teen Zuma ingedien.

Die mosie is toe met 221 stemme teen 113 verwerp nadat die EFF saam met die DA gestem het.

Die EFF het nie die mosie gesteun nie. Hulle wag glo vir die Grondwethofuitspraak oor Nkandla, ‘n saak wat die EFF teen Zuma aanhangig gemaak het.

Zuma se senioradvokaat het intussen gesê die Demokratiese Alliansie se poging om die besluit ongedaan te maak sodat hy vervolg kan word op aanklagte van korrupsie,”gaan nêrens heen nie, en is doodgebore en desperaat”.

Kemp J. Kemp het aangevoer dat die Nasionale Vervolgingsgesag (NV) se weergawe van hoe die voormalige waarnemende nasionale direkteur van openbare vervolging (NDOV), Mokotedi Mpshe, by sy besluit in 2009 uitgekom het was nie irrasioneel nie en is nog nooit verkeerd bewys deur die DA nie.

Hy het gesê die DA het dit aanvanklik as ‘n administratiewe uitdaging gesien, maar die party het besef hul argument is fundamenteel gebrekkig en is nou besig om ‘n laaste desperate posisie dat die besluit was “irrasioneel” was.

Die DA het reeds R10 miljoen aan regskoste aan die saak bestee.

Die DA se hersieningsaansoek word vandag in die Pretoriase Hooggeregshof afgesluit met betoë deur die DA.

ANC-hoofsweep bedank skielik

Die ANC se hoofsweep in die Nasionale Vergadering, Stone Sizani het bevestig dat hy skielik bedank het uit die Parlement om sy nuwe pos as ambassadeur na Duitsland op te neem.

Sizani beweer daar is niks onwelriekend aan sy skielike bedanking nie. Hy sê hy is verlede Donderdag skielik in kennis gestel van sy herontplooiing.

Hy sê sy herontplooiing is nie die gevolg van swak prestasie nie.

Die party se Moloto Mothapo sê: “Die feit is dat hy herontplooi is en hy moes bedank met onmiddellike effek, sodat hy sy nuwe posisie met onmiddellike effek kon betrek.”

Die voormalige hoofsweep is aan die voorpunt van president Jacob Zuma se ondersteuners in die parlement te midde van klagtes oor staatsbesteding aan sy huis op Nkandla.

In Januarie het Sizani gesê Suid-Afrika moet dieselfde wet implementeer as in Duitsland waar holocaust-ontkenners tronk toe gestuur word.

“Rassiste moet tronk toe gestuur word,” het hy aan die politieke redakteur van die Sowetan, Moipone Malefane, gesê.

Sizani, wat nege jaar lank op Robbeneiland deurgebring het, het gesê “die wittes wat ons land gesteel het, het die ekonomie vir hulself gevat en gebruik swartmense om te werk vir hulle en nog voel hulle nie dat hulle ons iets skuld nie”.

“Dit laat my bloed kook. Hulle kan nie die haat in ons verstaan nie. Hierdie idee van hulle dat ons die ander wang moet draai, is verkeerd en moet tot ‘n einde kom.”

Sizani se vrou, Portia “Pankie” Sizani, is verlede maand vrygespreek op vyf aanklagte van geldwassery in die Port Elizabeth se handelshof.

Maar sy sal haar grootste wetsuitdaging in die gesig staar wanneer sy terugkeer na die hof op 26 Junie om die res van die bedrogaanklagte teen haar, te betwis.

Sy word daarvan beskuldig dat sy die Oos-Kaapse Departement van Onderwys bedrieg het deur die skepping van spookonderwysers.

Daar word beweer dat sy salarisse deur die bankrekeninge van sommige van die onderwysers gewas het voordat sy die kontant in haar eie sak gesteek het.

Stropers se gif lei tot bewaringstragedie

Stropers gebruik deesdae gif teen wild in Suid-Afrika se Nasionale Parke.

Die Kruger Nasionale Park (KNP) het Saterdag op ‘n olifantkarkas, 110 dooie witrugaasvoëls, twee leeumannetjies en twee jakkalse afgekom wat weens wildvergiftiging gevrek het.

Daar is nog net 1 000 aasvoël-broeipare in die Nasionale Kruger Wildtuin oor. Die meer as 100 aasvoëls wat nou vergiftig is, is ‘n bewaringstragedie.

Die olifantkarkas is gevind met geweerskote in sy kop, sy tande is verwyder en gif is daarop gekry. Aasdiere in die omgewing van die olifantkarkas is vergiftig nadat hulle van die blootgestelde dele van die karkas gevreet het.

“Dit wil voorkom asof stropers hulself tot wildvergiftiging in die Nasionale Parke en ander beskermde gebiede in Suider-Afrika gewend het en ons natuurlewe daarmee wil verwoes. Wildvergiftiging is nie net ‘n bedreiging vir ons biodiversiteitbates nie, maar ‘n enkele voorval kan honderde spesies beïnvloed,” het ‘n bestuurder van die park gesê.

Hy het gesê deur in te meng met die duur van die diere se lewensiklus, is hul ekologiese rol beïnvloed.

Verlede jaar het die Park ‘n soortgelyke voorval aangemeld waarin een olifant en vier Afrikaleeus dieselfde oorgekom het, met 46 aasvoëls en 1 Bateleur wat ook aan vergiftiging gevrek het.

In nog ‘n voorval van doelbewuste vergiftiging van rooijakkalse en ander klein roofdiere in die Addo Olifant Nasionale Park in 2014, is dieselfde werkswyse om wild dood te maak deur middel van vergiftiging, opgemerk.

Die anti-stropereenheid se vinnige reaksie het verhoed dat die uitkoms nog erger kon gewees het.

Alhoewel vergiftiging op ‘n lae vlak teenwoordig is, is dit ‘n werklike probleem in buurlande soos Mosambiek en Zimbabwe.

Super Trump Dinsdag

Die grootste dag van die voorverkiesingsveldtog, Super-Dinsdag, is wanneer die meeste Amerikaanse kiesers stem om hul partykandidaat aan te wys. Republikeine kon die helfte van hul afgevaardigdes kies, en Demokrate ‘n derde.

Donald J. Trump se wenveldtog het sy gewildheid oor ‘n breë spektrum beklemtoon.

Trump en Hillary Clinton het as die onderskeie voorlopers in hul partye se presidentsbenoemings uitgestaan.

Trump het tot dusver in sewe deelstate gewen in die Republikeine se benoemingstryd in vergelyking met die twee wat sy naaste teenstaander, Ted Cruz, ingepalm het.

Cruz het tydens ‘n toespraak ‘n beroep op die ander kandidaat, Marco Rubio, gedoen om aan die wedloop te onttrek en by hom aan te sluit om Trump te verslaan. Ted Cruz is van die Republikeine.

Hillary Clinton is in die Demokrate se voorverkiesings ook die duidelike voorloper en het reeds in sewe deelstate gewen.

Die miljardêr-sakeman het ondermeer Alabama, Georgia, Massachusetts en Tennessee, asook Arkansas, Vermont en Virginia ingepalm en daardeur gewys dat hy plaaslike en ideologiese verskille in die Republikeinse Party te bowe gekom het.

Die teorieë oor hoe om Trump te keer, hoop intussen op.

Sy teenstanders hoop op ‘n ineenstorting van sy ondersteuningsbasis deur na hulle as “wit gemors” te verwys of ‘n konsolidasie van anti-Trumpkiesers agter net een kandidaat.

Hierdie twee dinge wil klaarblyklik nie gebeur nie. En as dit nie binne die volgende twee weke gebeur nie, is Trump op koers om die Republikeinse benoemingstryd te wen.

Stropers teiken Etosja

Stropers het die Etosja Nasionale Park in Namibië geteiken met 29 karkasse wat reeds in 2016 gevind is.

Verlede jaar het Namibië 80 renosters aan wilddiewe afgestaan. Oor die afgelope 20 jaar is die Afrika-leeus, olifante, kameelperde en renosters se getalle gehalveer.

Altesaam is 34 renosterkarkasse in die eerste twee maande van 2016 gevind waarvan verreweg die meeste in Etosja. Dié skoksyfers is pas bekendgemaak.

Vyf van die 34 karkasse is volgens die Namibiese polisie se adjunk-inspekteur-generaal van operasies, genl.maj. James Tjivikua, tydens lug- en voetpatrollies in die omgewing van Klip­rivier naby Grootberg Lodge in die Kunenestreek ontdek.

Meer as 30 verdagtes is reeds in hegtenis geneem en hul vuurwapens is gekonfiskeer, maar die stropery gaan onverpoosd voort.

Volgens Tjivikua is die karkasse wat gevind is meer as een jaar oud.

Vier Namibiërs is in verband met die stroop van een renoster naby Kliprivier in Desember in hegtenis geneem en hulle word ook verbind met nog renosterstropery.

Voorts is die Chinese burger met perlemoen en renosterhorings vasgetrek.

Zhi en sy vermeende medepligtige, James Barron Wallace, is Vrydag borgtog in die Windhoekse landdroshof toegestaan.

Geen olifantkarkasse is vanjaar nog gevind nie, maar ’n Zambiese burger is in Januarie op Kongola in verband met die besit van drie olifanttande in hegtenis geneem.

Die oorsprong van die olifanttande is egter nog nie vasgestel nie.

Einde van Aardklop ‘n kopseer vir swartmag-aanhangers

Die beëindiging van die Aardklop Nasionale Kunstefees is ‘n kopseer vir kunstenaars wat dié anti-Afrikaanse platform benut het.

Die sangeres Amanda Strydom sê dat die nuus van Aardklop se beëindiging in sy huidige formaat as ’n groot skok vir die kunstenaarsgemeenskap kom.

Die akteur Paul du Toit van Binnelanders-faam, wat ook verlede jaar in die verhoogproduksie Hemelruim tydens Aardklop te sien was, het Strydom se kommer gedeel.

Die opmerkings volg na die Aardklop Stigting se raad van direkteure onlangs besluit het dat die huidige besigheidsmodel nie meer gepas is om die doelwitte van die fees te bevorder nie.

Aardklop-voorsitter, Louise Barretto, het in ’n verklaring gesê die Aardklop Stigting sal nou op nuwe, innoverende modelle fokus om die uitvoerende kunste te bevorder en ondersteun.

Luidens die verklaring sal veranderinge eersdaags bekend gemaak word.

Veteraan akteur André Stoltz verwelkom egter die Aardklop Stigting se besluit.

Stoltz sê feesgangers soek ‘n kultuur-inspuiting. “Daarna bly hulle die res van die jaar tuis en kyk televisie of DVD’s. ’n Mens moet eerder die kultuur-aktiwiteite deur die jaar versprei sodat dit ’n meer volhoubare situasie is vir teaterpraktisyns. Die hele kunstefeesmodel moet onder die loep geneem word.”

Pukke ontken skorsings op grond van ras

Die tydelike skorsing van ses swart studente, hangende ’n dissiplinêre ondersoek ná Vrydag se betoging deur stakende werkers op die NWU se Potch-kampus, hou nie verband met hul velkleur nie.

Waarnemende rektor, Fika Jansen van Rensburg het aan OFM gesê dit is gedoen op grond van ’n berekende oortreding van prosedure-maatreëls en beleid.

Dit volg na ’n verklaring wat vroeër uitgereik is deur die SR-lid, Grantham Jonkers.

In die verklaring beweer Jonkers dat die betrokke studente die slagoffers van ’n rassistiese veldtog is, aangesien wit studente van die Laureus-manskoshuis, wat glo ’n swart student aangerand het, nie geskors is nie.

Jansen van Rensburg voer egter aan dat die studente nog nie geskors is nie omdat die ondersoek na hul beweerde wandaad pas eers begin is.

Verder sê hy Jonkers staar nou moontlik self dissiplinêre stappe in die gesig.

Rassepolarisasie op UV-kampus

Die groot ontplooiing van polisielede asook private sekuriteitswagte op die Bloemfontein-kampus van die Universiteit van die Vrystaat, volg nadat chaos verlede week daar uitgebreek het.

‘n Polisiehelikopter het Dinsdag die situasie gemonitor.

Swart studente het ‘n rasseoorlog teen wittes verklaar deur wittes uit koshuise te verwilder en Afrikaanse kultuursimbole aan te val en te beskadig.

Die meeste klasse is ontwrig weens griewe van swart skoonmakers wat voorgehou is as ‘n verskoning om wittes te teiken. Studentebotsings het hoofsaaklik op ‘n rassegrondslag plaasgevind.

Alhoewel klasse hervat is by die UV-kampus, loop die onderliggende spanning nog diep.

Wit studente het die chaos as sinneloos beskryf en gesê dit het hul studies benadeel omdat roosteraanpassings en toetsvoorbereiding met die verlore week baie druk hulle plaas.

Hulle het geen simpatie met die oproeriges se lukraak griewe gehad nie.

Swart studente het die polisieteenwoordigheid skerp gekritiseer en gesê “oplossings” kan nie gevind word as daar so “baie” SAPD-lede op die kampus is nie.

Die studenteraad het Dinsdag die vredesoptog op die kampus geboikot omdat transformasie nie genoeg aandag kry nie.

Twintig studente met hulle monde toegebind betoog buite die plek waar die opgtog gehou word. Hulle sê swart studente word by die universiteit stilgemaak.

Daar was min belangstelling in die optog, alhoewel die rektor, Jonathan Jansen deelgeneem het.