Kategorie: Nuus

VN erken gay huwelike

​Die jongste verwikkeling by die Verenigde Nasies toon dat dié wêreldliggaam byna geheel en al deur Amerikaanse befondsing oorgeneem is.

Die VN het besluit om al sy gay werknemers se huwelike te erken. Dit sluit burgers van lande in waar gay huwelike onwettig is.

“Dit is ‘n stap vorentoe,” het Farhan Haq, die VN se adjunkwoordvoerder aan die Guardian gesê. “Baie van ons werknemers wag al lank hiervoor.”

Die nuwe beleid sluit alleen die VN se 43 000 werknemers wêreldwyd in.

Unicef, die VN-kinderfonds, en Unesco is nie deel van die beleidsaankondiging nie aangesien hul kantore nie net in New York gesetel is nie.

Unesco se hoofkantoor is in Parys, Frankryk waar gay huwelike uiters omstrede is.

Volgens die Pew-navorsingsentrum word gay huwelike slegs in 18 lande en dele van die VSA en Mexiko as wettig beskou.

In verreweg die meeste lande wat Afrika sowel as Asië en Rusland insluit, sien inwoners dit as besonder afkeurenswaardig.

Dit is nie seker waarom gay huwelike in Suid-Afrika wettig is nie, maar ontleders meen dat die swart bevolking nie ingelig genoeg is oor sekere agendas wat op hulle afgedwing word nie.

In Rusland word aannemings deur gay ouerpare verbied aangesien die Russe dit as ‘n onverkwiklike voorbeeld vir jong kinders beskou.

Steve oorval deur boodskappe van ondersteuning na Stem

Steve Hofmeyr het Maandag op Facebook gesê hy het gebars van trots toe hy Saterdag spontaan “Die Stem” by Innibos saam met 45 000 Afrikaners gesing het.

Praag het met feesgangers gepraat wat gesê het dit was heerlik om weer deel van ‘n eie groep te voel. Talle het erken hulle moes ‘n traan wegvee daarna.

“Steve se konsert was die hoogtepunt van Innibos. Almal het net gekom om na hom kom te luister,” het Berdine Viljoen aan Praag gesê. Sy sê daar was ‘n ongelooflike atmosfeer.

Feesgangers het Steve sonder uitsondering geloof vir sy moed en getrouheid en hy is behoorlik oorval deur boodskappe van gelukwensing en ondersteuning van oral oor die land.

Hofmeyr is intussen skerp aangeval deur Adriaan Basson – Beeld se redakteur – omdat hy glo ‘n lied gesing het wat nie die “meeste landsburgers” se goedkeuring wegdra nie. Die ou volkslied herinner glo aan “wit onderdrukking”.

Die Stem is lank voor Apartheid, die Nasionale Party en Angelsaksiese wit oorheersing na die Tweede Wêreldoorlog gekomponeer en gesing, maar dié lastige feit het nie in Basson se pad gestaan nie.

Basson beywer hom met ‘n buitengewone fanatisme om ‘n Afrikaner-hergoepering en patriotisme verdag te maak en met alle mag te bestry. Hy wy daagliks sy hele koerant daaraan, op openlike en minder openlike maniere.

Basson sit ook persoonlik agter die veldtog om Potchefstroom te verengels deur die laaste Afrikaanse kampus te verswart.

Hofmeyr het die stilte oor misdrywe onder die huidige volkslied veroordeel asook die voortdurende gedreunsing van aanhitsende haatliedere deur die president voor opruibare swart skares.

Hofmeyr het Afrikaners ook daaraan herinner dat nóg hy nóg hulle iets onwettigs gedoen het.

“Ek sal dit meer sing en ek vra dat die banvloek op ons heiligste tradisionele lied gelig word en dat almal vry mag wees om te sing wat hulle wil, solank dit nie haatspraak is of geweld verkondig nie,” sê Hofmeyr.

Die feesbestuur het in ’n dweperige verklaring vol liederlike spelfoute en anglisismes gesê dit was nie deel van die beplande program nie.

Praag het verneem dat die feesbestuur erg bekommerd is dat Naspers nie meer gratis publisiteit aan die Innibos-fees sal gee nie en benoude e-posse tussen Media24 en die Innibos-bestuur is glo uitgeruil.

Die geradbraakte verklaring lui: “Ons is nie ’n Afrikaner-fees of politieke platform (sic) nie. Ons is trots deel van die Nuwe Suid Afrika (sic).

“Ons sou nie noodwendig die sing van die stem (sic) as deel van die program goedgekeur het as ons vooraf daarvan geweet het nie, want ons besef dat daar sensitiwiteit is rondom die sing daarvan.”

Hofmeyr het aan RSG gesê nasiebou is ’n projek wat misluk het en dat sy ja-stem ‘n dolk in sy kultuur se rug verteenwoordig.

Hier is ‘n aanhaling uit Steve se Facebook-kommentaar:

By Innibos 2014 het ek gedurende my akoestiese kitaarmedley weggetrek met ‘n paar FAK liedjies. Suikerbos, Oukraallied, Al lê die berge nog so blou, Jan Pierrewiet. Toe ook die eerste vers van DIE STEM.
Sonder aansporing het 45000 op aandag gaan staan en saam gesing, so hard dat die hoendervleis nou nog op my uitslaan. Ek kry altyd ‘n knop in my keel by “ons sal lewe, ons sal sterwe…”. Jy sal in die opname hoor hoe ek in daardie reëls my asem vang.
Ek het gebars van trots. Ek sal dit meer sing en ek vra dat die banvloek op ons heiligste tradisionele lied gelig word en dat almal vry mag wees om te sing wat hulle wil, waar hulle wil, solank dit nie haatspraak is of geweld verkondig nie. Dankie vir RSG en Radio Pretoria wat my kans gegee het om ons saak te stel.
Ek is nie verbaas oor die enkele negatiewe reaksies nie omdat die dwepers nie die volgende ironie daarin wil lees nie:
a. Mense wat aanstoot neem vergeet dat Die Stem, soos ons praat, nog deel is van die offisiële volkslied.
b. Hierdie mense neem klaarblyklik nie aanstoot in die dinge wat gebeur onder die nuwe vlag en volkslied nie, alles vanaf wanprestasie tot moord, verkragting, Gupta, Nkandla, gronddiefstal, aggressiewe Marxisme, ekonomiese rassebeleid en lae lewensverwagting. Daar is eintlik meer as genoeg rede om aanstoot te neem in die nuwe volkslied en vlag, tog doen ons nie.
c. Die wat DIE STEM kritiseer is tjoepstil oor die president se haatspraak liedere soos KILL THE BOER en UMSHINI WAMI, terwyl DIE STEM nie een haatsprekende lettergreep bevat nie.
d. “Nkosi Sikelel’ iAfrika” is ‘n Afrikagebed, wat gewild is oor die hele kontinent, ‘n mooi gebed, maar nie ons s’n nie. DIE STEM is ook ʼn gebed, geskryf deur ʼn Suid Afrikaner vir Suid Afrikaners, twee dekades voor Apartheid.
e. Bygesê, ter versagting, ek kan Nkosi sing en die nuwe vlag salueer, veral as ons as Suid Afrikaners presteer, en ek doen steeds, maar moenie my voorskryf oor presies waaroor en wanneer ek trots moet voel nie.

Steve sing Die Stem by Innibos http://www.youtube.com/watch?v=F2wDNYVe7uo
Die Stem gesing deur 3 jarige Suid Afrikaner in New Zealand
https://www.youtube.com/watch?v=w5uXozZRtY8
Die Stem van Suid-Afrika (indien jy vergeet het): http://youtu.be/e9dq7VqV-Os
SA PRESIDENT Zuma sings his personal the hate speech anthem: Kill The Boer https://www.youtube.com/watch?v=Cb3MLHblnbQ

 

Numsa voer veldtog van openbare geweld, intimidasie, saakbeskadiging

Seifsa se hoof uitvoerende beampte, Kaizer Nyatsumba, het gesê die federasie word oorval met verslae van geweld teen sy lede.

Die afgelope naweek in Gauteng is 26 stakers van die metaalwerkersvakbond Numsa op aanklagte van openbare geweld, intimidasie en saakbeskading in hegtenis geneem.

Kwaadwillige beskadiging van privaateiendom, die intimidasie van sake-eienaars, medewerkers en die publiek is oral aangemeld.

Doelbewuste dade van wetteloosheid, insluitend geweld en algemene chaos, word glo in Gauteng sowel as KwaZulu-Natal deur werkers wat deelneem aan die Numsa-staking, gepleeg.

“Ons is baie teleurgesteld met die gewelddadige optrede van sommige unie-lede wat ‘n moedswillige veldtog van vandalisme – voertuie ingesluit – teen talle van ons ledemaatskappye voer… Dit is wat ons wou vermy toe ons ‘n beroep op die vakbonde gedoen het om ‘n vredesooreenkoms aan die begin van die onderhandelinge aan te gaan,” sê Nyatsumba.

‘n Herwinningsmaatskappy het aan die Daily News gesê hy het ‘n lys van klagtes skriftelik aan Numsa se Durban-kantore gestuur, nadat ‘n werknemer Donderdag aangerand is, na bewering deur Numsa-lede.

Hy het gesê ‘n bestuurder is deur die stakende werkers by Isipingo Donderdagoggend so erg aangerand dat hy gehospitaliseer moes word.

Die bestuurder werk vir ‘n chemiese vervaardigingsmaatskappy op Isipingo, wat nie behoort tot die stakende metaal-industrie nie.

 

Oz aanvaar vlugtelinge om druk op China te plaas

Die Australiese hooggeregshof het ‘n tussentydse bevel gemaak dat die regering nie 153 asielsoekers na Sri Lanka mag terugstuur nie.

Baie van die vlugtelinge kom egter glo uit Indië.

Die saak sal môre weer in die hoogeregshof aangehoor word. Dié stap word allerweë as ‘n maatreël teen Chinese invloed in die streek beskou.

Die hofbevel kom enkele ure nadat die regering ‘n ander vaartuig laat omdraai het.

Maandag het die hof gehoor dat die groep, wat 32 vroue en 37 kinders insluit, onder die regering se beheer op see te beskerm moet word.

“Ons het aangevoer dat die asielsoekers geregtig is om hulle bewerings te maak – eise teen die regering van Sri Lanka – [dat hulle] gehoor en verwerk word in ooreenstemming met die wet,” het hul regsverteenwoordiger George Newhouse gesê.

“Die Minister kan hulle eenvoudig nie onderskep in die nag en laat verdwyn nie.”

Newhouse het gesê hy is geskok deur die onthullings dat ‘n aparte groep van 41 asielsoekers krimineel aangekla sal word in Sri Lanka as hulle terugkeer.

“Dit versterk die dringendheid van hierdie hofaansoek, want die Regering is besig om die mense aan die risiko bloot te stel van ‘n kriminele klag, tronkstraf en marteling – want dit is wat gebeur in Sri Lanka se tronke,” het hy gesê.

Regter Susan Crennan het gesê die asielsoekers word waarskynlik tans aangehou deur die vloot en sal aan Sri Lanka se owerhede oorhandig word.

Sy het ‘n tussentydse bevel toegestaan teen enige oordrag tot die saak in die Australiese hooggeregshof aangehoor word.

Sommige van die asielsoekers het glo uit Sri Lanka na vlugtelingkampe in Indië gevlug voordat hulle ‘n boot na Australië geneem het.

Die Britse Statebond het vroeër Tamil-nasionalisme ondersteun vir outonomie in die noorde van die eiland.

Brittanje het vir byna drie dekades lank die Tamil Tiere se geweld finansier om ‘n oorlog teen Sri Lanka se Sinhala-regering te voer. Die land het lank gebuk gegaan onder ‘n vernietigende burgeroorlog.

Sri Lanka het egter hul militêre en ekonomiese samewerking met China verhoog om uiteindelik die Britse aggressie van die Tiere heeltemal te verslaan in 2009.

Die jongste verwikkelinge kom te midde van Tamil-eise om ‘n onderhandelingsproses vir ‘n outonome Tamil-noorde van stapel te stuur.

Die Tamilvlugtelinge beweer minstens 11 mense op die boot is gemartel deur Sri Lanka se intelligensie dienste, en sê daar moet meer mense in ‘n soortgelyke situasie op die vaartuig wees.

Die boot is onderskep by Kerseiland meer as ‘n week gelede. Die Australiese regering het vroeër erken dat hy 41 asielsoekers Maandag aan die owerheid in Sri Lanka oorhandig het.

Dit volg op kommer dat Australië meer as twee honderd Sri Lankane oorhandig het.

ANC-premier van Noordwes pleeg ‘ergste mishandeling teenoor diere’

Die ergste wreedheid teenoor diere wat hy nog ooit gesien het, sê ‘n lid van die Dierbeskermingsvereniging oor die lot van plaasdiere op die oorgewig ANC-premier van Noordwes se plaas.

Lees verder.

Gewonde boer verjaag plaasaanvallers

’n Boer van die Vrystaat het een van drie swart plaasaanvallers doodgeskiet. ‘n Moorddossier is teen die boer geopen.

André van Greunen is in die hospitaal opgeneem nadat hy op sy plaas naby Reitz aangeval en geskiet is, het die polisie in dié provinsie Maandag gesê.

“Drie gewapende mans het hom Saterdagmiddag op sy plaas aangeval. Hy is in sy maag en in die arm geskiet,” het sers. Mmako Mophiring gesê.

Die boer kon een van sy aanvallers doodskiet. Die ander twee het daarna te voet gevlug, het Mophiring gesê.

“’n Saak van moord en poging tot moord word ondersoek,” het hy gesê.

Niks is uit die huis gesteel nie en niemand is nog in hegtenis geneem nie.”

‘Kabelfoute’ veroorsaak ontploffing by kragstasie aan Oos-Rand

Kragtoevoer is weer in Kempton Park, aan die Oos-Rand, herstel ná ’n ontploffing verlede week by ’n substasie, het die Ekurhuleni-munisipaliteit Maandag in ‘n verklaring gesê.

“Ons wil graag ons ingenieurs bedank wat sonder ophou gewerk het om te verseker die kragtoevoer word voor die aand herstel,” het Themba Gadebe, woordvoerder, gesê.

Die munisipaliteit beweer dat voorlopige ondersoeke toon dat die ontploffing waarskynlik weens “kabelfoute” gebeur het.

Die ontploffing het Vrydag omstreeks 02:00 by die Aston Manor-substasie plaasgevind. Die meeste woonbuurte in die gebied moes sonder elektrisiteit klaarkom.

Skare steek huis aan die brand

Paaslike inwoners van Ncotshane in die noorde van KwaZulu-Natal het die huis van ‘n moordverdagte aan die brand gesteek.

Die swart man word daarvan verdink word dat hy ‘n vierjarige seun vermoor het vir moetie.

‘n Polisiewoordvoerder, Thulani Zwane, sê die seun is Woensdag as vermis aangemeld.

Die liggaamsdele van die seun is vroeër in ‘n sak gevind by ‘n kerk naby Pongola.

Na bewering het iemand op die liggaamsdele in die sak afgekom en die polisie ontbied.

Die huis wat afgebrand is behoort aan ‘n plaaslike pastoor.

China kritiseer Japan se militarisering

President Xi Jinping van China het diegene wat die “geskiedenis van aggressie teen China romatiseer” Maandag tydens die 77ste herdenking van die begin van ‘n oorlog met Japan, gekritiseer.

Japan is tans besig om hul geskiedenis te herskryf en weer na militarisasie te beweeg.

Te midde van stygende spanning tussen Beijing en Tokio, het hierdie jaar se herdenking van die 1937 Marco Polo-brug-insident, ‘n buitengewoon hoë-profiel verkry.

‘n Groep Chinese skoolkinders het by die plegtigheid ‘n lied vir vrede gesing. China het gereageer op ‘n Japannese propagandaveldtog teen Beijing.

Betrekkinge het versuur ná die Japannese premier se besoek aan ‘n tempel in Tokio laat verlede jaar wat Japan se oorlogsmisdadigers vereer.

Kort daarna het amptenare by die Japannese uitsaaier NHK ontken dat die 1937-slagting in Nanjing duisende Chinese burgers se lewens gekos het, asook Japan se destydse gebruik van seksslawe.

Die twee regerings is tans betrokke in ‘n dispuut oor die eienaarskap van die onbewoonde eilande in die Oos-Sjinese See.

China het ook ongemak uitgespreek oor Japan se herinterpretasie van sy pasifistiese grondwet wat beperkings op militêre aktiwiteit ophef.

Terwyl dié verandering in Japan self met groot teenkanting begroet is deur die opposisie, is dit deur die Verenigde State van Amerika en Australië verwelkom.

Die Japannese Eerste Minister Shinzo Abe sal Maandag besoek aflê by sy Australiese ampsgenoot.

China het nie regstreeks verwys na Japan nie, maar diegene veroordeel wat “die harde werklikheid van die geskiedenis ignoreer”.

Die oorlog het op 7 Julie 1937 uitgebreek en Japan het Beijing kort daarna beset. Sowat 20 miljoen mense is volgens China in die oorlog dood.

Dit het in 1945 tot ‘n einde gekom toe Japan in die Tweede Wêreldoorlog verslaan is.

Sommige swart skole teken 2% in wiskunde aan

City Press het gister berig dat daar ‘n “groot wiskundekrisis in die land heers met leerlinge regoor die land wat nie in staat is om 30% op ‘n gestandaardiseerde wiskundetoets te behaal nie”.

Daar is in 2013 ‘n nasionale assesseringstoetse geskryf om te bepaal hoe goed leerlinge kan lees en reken. In graad 9 kry 96% van leerlinge minder as 50% in wiskunde.

Daar is ook ‘n lys van skole gepubliseer wat die swakste gevaar het. Al die skole is Engelstalig en in swart woonbuurte geleë, met die uitsondering van die “Nuwe Hoop Sentrum” op Worcester in die Wes-Kaap waar leerlinge in graad 6 ‘n gemiddeld van 17% in wiskunde aanteken en drie jaar later in graad 9 slegs 3%. Sover praag kon vasstel, is die Nuwe Hoop Sentrum ‘n skool vir hoofsaaklik bruin doofstom kinders

In Gauteng is die “Kwa-Thema Skills School” een van die skole wat die swakste in wiskunde gevaar het. Die graad sesse is gemeet op 10%, terwyl hul ouer eweknieë in dieselfde skool, die graad 9’s, slegs 2% in die toets behaal het. Kwa-Thema is die swart woonbuurt tussen Springs en Brakpan.

Nkandla haal ook die nuus vir wiskunde en optel-en-aftrek, want in Kwazulu-Natal figureer die graad 3’s van die Enhlababo Comprehensive op dié dorpie heel onder in die provinsie met 7%.

Oor die algemeen het “slegte skole” in die wiskunde-assessering “tussen 1% en 5%” behaal. Volgens City Press toon die data wat hulle onder oë gehad het dat 2 411 skole landwyd se graad 9’s tussen 0% en 30% vir wiskunde behaal het. Dieselfde druipsyfer is deur graad 6’e in 429 skole aangeteken terwyl alle graad 3’s in 59 van die laerskole ook minder as 30% gekry het.

Limpopo is blykbaar die provinsie wat die swakste van almal vaar, want in die graad 9-toetse het 96% van alle leerlinge 30% of minder in wiskunde behaal. Ook die Noord-Kaap is nie ‘n provinsie wat wiskunde-PhD’s op groot skaal gaan oplewer nie, want 92% van leerlinge het insgelyks minder as 30% ontvang. Mpumalanga is net ‘n kortkop agter die Noord-Kaap met 91% wat onder 30% “presteer”.

Die onderwysdepartement blameer die swak wiskundepunte op “leerlinge wat toetse in Engels aflê terwyl die terme wat hul onderwysers in die klas gebruik anders is”.

Volgens Servaas van den Berg, ‘n ekonoom van die Universiteit van Stellenbosch, “vaar skole in Limpopo besonder swak volgens sekere standaarde.”

“Ons sien dit nie altyd in die matriekuitslae nie, want baie kinders verlaat die stelsel lank voordat hulle by matriek uitkom. Dis ‘n baie arm provinsie wat histories nie goeie opvoedingsvlakke gehad het nie.”