Kategorie: Nuus

Polisie glo betrokke by Bothaville-plaasaanval

Vrystaat Landbou (VL) het hom sterk uitgespreek oor die beweerde betrokkenheid van polisiebeamptes by ‘n aanval op drie vroue en twee jong kinders op ‘n plaas by Bothaville.

Voorsitter van dié organisasie se komitee vir wet en orde, Tommie Esterhuyse, sê dit is onmoontlik vir boere om hulself te beskerm teen aanvalle van dié aard.

Dit kom nadat vier mans, wat hulself voorgedoen het as polisiebeamptes, verlede Vrydag kort na 19:00 op die plaas, Oorwin, aangekom het. Hulle het glo aan die plaaseienaar,‘n ouerige vrou, en haar familielede, gesê hulle wil die huis vir dwelms deursoek.

Volgens die polisie se Stephen Thakeng het die plaaseienaar haar honde elders gaan toemaak sodat die mans toegang tot die huis kon verkry. Daarna het die aanvallers aangedring op geld en die vroue met ‘n vuurwapen gedreig. Hulle het ook gedreig om een van die jong kinders op ‘n warm stoofplaat te brand as daar nie aan hul eise voldoen word nie. Esterhuyse sê die voorval is ‘n groot bron van kommer.

Die feit dat drie weerlose vroue en kinders onder valse voorwendsels met onaanvaarbare driegemente aangehou is, laat opnuut die vraag ontstaan, hoe weerlose gemeenskappe hulself kan beskerm.

Een van die vier rowers is dieselfde aand by Orkney, ná plaaslike boere onraad vermoed het, deur die polisie in hegtenis geneem. Thakeng het bevestig dat ‘n vyfde man sedert gister vir ondervraging aangehou word. Volgens VL is dié man glo werksaam op die plaas. Thakeng sê die polisieondersoek is in ‘n sensitiewe stadium. Hy wou nie bevestig of polisiebeamptes betrokke was by die rooftog nie.

‘n Vuurwapen, ‘n onbekende bedrag geld en drie selfone is in die rooftog gebuit. Die 26-jarige Paballo Molaudi van Klerksdorp het gister in die plaaslike landdroshof op ‘n aanklag van gewapende roof en dat hy hom as ‘n polisiebeampte voorgedoen het, verskyn. ‘n Polisie-glimbaadjie, R2 800 en twee selfone, wat vermoedelik gesteel is, is in Molaudi se besit gevind. Hy sal na verwagting eerskomende Maandag aansoek om borgtog doen.

OFM-nuus verkies om weens veiligheidsredes nie die slagoffers se name bekend te maak nie. Die slagoffers het nie ernstige beserings opgedoen nie, maar is steeds erg getraumatiseerd.

Godsdiensleiers, Cosatu skaar hulle by Zuma

Van die godsdiensleiers van verskillende gelowe het hulle by president Jacob Zuma geskaar.

Lede van die Nasionale Intergeloofsraad van Suid-Afrika wat onder meer Christene, Moslems, Hindoes, Rastafariërs en die Afrika Onafhanklike Kerke insluit, het die President se verskoning ná die uitspraak van die Konstitusionele Hof aanvaar.

Verlede week het van die godsdiensleiers onder die Nasionale Godsdiensleiersraad gesê die President het die morele gesag verloor om die land te lei en behoort te bedank.

Daniel Matebisi van die Intergeloofsraad sê die priesters het nie met alle priesters in die land oorleg gepleeg nie.

Die vakbond COSATU het intussen die ouditeure, KPMG en drie van die land se vier grootste banke van goedkoop politiekery beskuldig.

Dié kritiek kom nadat hulle onverwags bande met sake-ondernemings wat bande het met die Guptafamilie, verbreek en hulle bankrekenings gesluit het.

COSATU sê die besluit deur ABSA, FNB, NEDBANK, SASFIN en KPMG om op te hou om sake met die Guptas te doen, sal nie net die familie benadeel nie maar ook die seweduisend mense wat vir hulle werk.

Brexit wink na Cameron moet bieg oor Panama-dossier

Die Britse premier, David Cameron, moes sy inkomstebelastingopgawes van die afgelope sewe jaar bekend maak in die hoop om sy kritici se monde te snoer oor sy buitelandsde beleggings.

Cameron het die eerste Britse leier geword om sy finansiële sake bloot te lê, maar sy mededingers in sy eie party asook die Arbeiders, het bloed geruik.

Die premier se eie party steun nie Brittanje se deelname aan die EU nie en Boris Johnson, Londen se burgemeester se planne vir Brexit is besonder gewild onder die Tories, terwyl Cameron homself verbind het aan die EU.

Die blootlegging kom slegs ure nadat hy ’n byeenkoms van Konserwatiewe Party aktiviste meegedeel het dat hy verkeerd was deur te huiwer met die erkentenis van sy belegging in Blairmore Holdings.

Sy pa, Ian, ’n miljoenêr aandelemakelaar, het die belegging deur die Panamese regsmaatskappy Mossack Fonseca gereël.

Uit die drie bladsye opsomming van die eerste minister se verdienstes en belasting, wat hy sedert 2009 daarop betaal het, blyk dit dat hy 9 501 Britse pond wins gemaak het toe hy die aandele in 2010 verkoop het, kort voordat hy eerste minister geword het.

Sy vrou het dieselfde bedrag verdien, wat meegebring het dat hulle net-net die betaling van kapitale belasting vrygespring het.

Volgens die dokumente het Cameron die afgelope jaar 75 898 pond belasting betaal.

Cameron het planne aangekondig om ’n sogenaamde taakmag in die lewe te roep om Britse konsortiums en individue se betrokkenheid te ondersoek in fondse en maatskappye wat deur Mossack Fonseca geregistreer is.

In ’n verklaring sê hy ondersoekbeamptes onder leiding van belastingowerhede en die nasionale agentskap vir misdaadondersoeke sou optree teen enige verkeerde optrede wat verband hou met die Panama-dossier.

Vroeër het Cameron ’n openbare “mea culpa” uitgereik vir sy aanvanklike mislukking om sy belegging in Blairmore te erken. Hy het vir vier dae vrae oor die kwessie gesystap voordat hy Donderdag in ’n televisie-onderhoud met die sak patats vorendag gekom het.

“Ek kon dit beter hanteer het. Ek weet daar is lesse hieruit te leer, en ek sal dit leer. Moenie No. 10 Downing Street of naamlose raadgewers die skuld gee nie. Gee my die skuld,” het hy Saterdag gesê.

Comores stem

Kiesers in die Indiese Oseaan Comore-eilandgroep het Sondag gaan stem vir ’n president, met die huidige visepresident en ’n voormalige staatsgreep­leier wat die land vir sewe jaar regeer het as die gunstelinge.

Die tweede ronde presidentsverkiesings kom nadat visepresident Mohamed Ali Soilihi, ook bekend as Mamadou, die eerste ronde in Februarie met 17,88 persent van die stemme gewen het, het AFP berig.

Die twee ander kandidate is die goewerneur van Grande Comore-eiland, Mouigni Baraka, wie 15,62 persent in die eerste ronde gekry het en die 1999-staatsgreepleier, kolonel Azali Assoumani, wie 15,10 persent steun gehad het.

Assoumani word as Mamadou se sterkste teenstander beskou en het die steun van die Juwa-opposisieparty, wat nie ’n kandidaat in die tweede ronde gestel het nie.

Die Juwa-party is verdeel oor die besluit en 15 hooggeplaastes in die party het bedank en Mamadou gesteun.

Assoumani het in 1999 aan bewind gekom nadat hy die waarnemende president, Tadjidine Ben Said Massounde, in ’n staatsgreep omver gewerp het.

Drie jaar later het hy die presidentsverkiesing gewen en uit­getree nadat sy termyn in 2006 ten einde geloop het.

Indien die verkiesing vlot verloop, sal die opvolger van pres. Ikililou Dhoinine na verwagting binne drie dae aangewys word.

Die drie eilande, Anjouan, Grand Comore en Moheli, wat die Comore vorm, het ’n bevolking van net minder as 800 000 mense, van wie byna almal Soenni Moslems is.

Die voltooiing van Dhoinine se vyf jaar ampstermyn word allerweë as ’n teken van toenemende stabiliteit in die verarmde eilandgroep gesien.

Al gaan dié eilande, tussen Madagaskar en Mosambiek, gebuk onder armoede voer die land vanilla, naeltjies en ilang-ilang-parfuumessens uit.

Die Comore is die wêreld se top produsent van ilang-ilang, wat van ’n blom afkomstig is. Die olie is ’n sleutelbestandeel van die Chanel No 5-parfuum en word ook in verskeie ander parfuums gebruik.

Bernie gewild, maar Hillary loop voor

Bernie Sanders het met sy jongste reeks oorwinnings oor Hillary Clinton gewys dat hy besonder gewild is by kiesers.

Die voorloper in die wedloop om afgevaardigdes is egter steeds Hillary.

Sanders en Clinton wedywer in die Amerikaanse presidensiële verkiesingswedloop om as die Demokrate se kandidaat aangewys te word.

Met sy oorwinning Saterdag in Wyoming het Sanders sewe van die laaste agt voorverkiesings gewen.

Die jongste oorwinning het hom egter nie veel in die sak gebring wat afgevaardigdes betref nie, omdat voorverkiesings in Wyoming op proporsionele verteenwoordiging ­geskied.

Aangesien Wyoming net 14 afgevaardigdes vir die Demokrate het, is dit die minste van enige van die state.

Sanders en Clinton het gevolglik elk sewe afgevaardigdes ingepalm.

Clinton is nog ver voor en het byna die helfte van die 2383 afgevaardigdes wat sy benodig om benoem te word.

Albei van hulle het die week stemme in New York gewerf waar daar 291 afgevaardigdes is. Die New Yorkse verkiesing word op 19 April gehou.

Wêreldbank sê armoede in SA kan toeneem

Vir die eerste keer sedert 1994 is armoede in Suid-Afrika aan die toeneem, het die Wêreldbank gesê.

Volgens die Wêreldbank het ekonomiese aktiwiteit in Sub-Sahara-Afrika in 2015 afgeneem, met BBP-groei van gemiddeld 3 persent, af van 4.5 persent in 2014.

“Die 2016 groeivooruitsigte bly gedemp by 3,3 persent, ver onder die sterk groei van 6.8 persent in die BBP wat die streek in die tydperk 2003-2008 getoon het,” luidens die Pulse-verslag.

Kommoditeitsprysrisiko in 2016 het Afrika se sak met ‘n geraamde 16 persent geraak, met kommoditeitsuitvoerders wat groot verliese ly, het die verslag uitgewys.

“Om groei en maatskaplike ontwikkeling te verseker, moet stede goedkoper vir maatskappye en meer aantreklik vir beleggers word,” sê Punam Chuhan-Pole, waarnemende hoofekonoom van die Wêreldbank-Afrika en die skrywer van die verslag.

Suid-Afrika se ekonomiese vooruitsigte lyk minder rooskleurig. Die Wêreldbank voorspel dat armoede tot 2017 verder sal toeneem van 36% tot 37,5%.

Die land se ekonomie sal vanjaar met net sowat 0.8% groei, teenoor 2015 se sukkelende 1,3%.

Die swak ekonomiese vooruitsigte word grootliks aan beleidsonsekerheid toegeskryf wat die wisselkoers, die aandeelbeurs en die koste van lenings negatief raak.

Die moontlikheid dat staatskuld na rommelstatus afgegradeer kan word, kan voorts bykomende fiskale druk skep.

Dodetal na Hindoetempel afbrand styg

Die dodetal in die reusebrand in ’n tempel in die suide van Indië het tot meer as 100 mense gestyg.

Die polisie soek tans na 10 mense wat verbind word met die brand.

Teen Sondag het die dodetal in ’n massiewe brand in ’n Hindu-tempel in die suide van Indië op 102 gestaan, met 280 mense wat beseer is, het die hoofminister van die Kerala-staat, Oommen Chandy, aan verslaggewers gesê.

Die brand het na ’n reuse-ontploffing tydens ’n vuurwerkvertoning ontstaan. Klaarblyklik het die tempel nie toestemmining gehad om die vuurwerke te gebruik nie.

’n Span spesialisdokters is uit Nieu Delhi na die ramptoneel gestuur om diegene by te staan wat ernstige brandwonde in die voorval by die Puttingal Devi-tempel opgedoen het.

Die vloot en lugmag het helikopers gestuur om die mees kritieke pasiënte na die hoofstad te vlieg.

Brandweermanne en die polisie het deur die nag gesukkel om die brand in die kusdord Paravur onder beheer te bring.

Teen dagbreek kon stukke beton en verbrande oorblyfsels op die toneel gesien word.

Die Indiese eerste minister, Narendra Modi, het aangedui dat hy na die dorp sou vlieg en het gesê families van die oorledenes sou elk 200 000 rupees ($3 500) ontvang. Diegene wat beseer is, sou elk 50 000 rupees ontvang.

Die brand het uitgebreek toe duisende mense by die tempelkomplek vergader het om na die vuurwerke te kyk wat die jaarlikse feestelikheid by die tempel afsluit.

‘EFF gereed om groot metrogebiede oor te neem’

Die EFF-parlementslid, Mbuyiseni Ndlozi sê die party is gereed om metrogebiede soos Tshwane, Nelson Mandela-baai en Ethekwini oor te neem.

Ndlozi het Sondag Sunnyside in Pretoria besoek en inwoners aangemoedig om te registreer om te stem, het RSG berig.

Hy sê Suid-Afrikaners moet hulleself gereed maak vir verrassings in die plaaslike regeringsverkiesing op 3 Augustus.

Ndlozi het verwys na die 23ste herdenking van Chris Hani se dood en gesê die reg om te stem is ‘n belangrike nalatenskap wat nie vergeet mag word nie.

Die Onafhanklike Verkiesingskommissie sê daar is ‘n toename in die aantal jongmense wat geregistreer het om te stem in die plaaslike regeringsverkiesing op 3 Augustus.

Die OVK beraam dat meer as driemiljoen kiesers die naweek registrasiepunte landwyd besoek het.

Dit was die laaste naweek van kieserregistrasie. Die OVK sê egter 16 miljoen fisiese adresse is nog nie geverifieer nie.

Die OVK se adjunk-voorsitter, Terry Tselane het hul tevredenheid uitgespreek met die toename in die registrasie van kiesers.

Polisie in Masedonië keer massastormloop van migrante

Meer as 300 immigrante is vir beserings behandel nadat die polisie traangas, skokgranate en rubberkoeëls ingespan het om oproerige indringers terug te dryf van ‘n grensdraad.

Die mediese hulporganisasie Dokters Sonder Grense (MSF) het bevestig dat meer as driehonderd migrante beseer is.

Jeugdige migrante het die polisie met klippe bestook en wetstoepassers het op ‘n skare migrante losgebrand wat probeer het om van Griekeland af deur die grens te breek.

Dosyne immigrante en vlugtelinge is Sondag deur die Masedoniese polisie teruggedryf het hulpwerkers gesê, in ‘n daad wat deur Griekeland as “gevaarlik en betreurenswaardig” veroordeel is.

Meer as 10,000 migrante en vlugtelinge is gestrand by die Griekse grens in die dorpie Idomeni sedert Februarie want regoor die Balkan het lande hul roetes na Wes-Europa intussen afgesper.

‘n Vroeëre poging deur ‘n groot groep migrante om deur die grensdraad te breek het tot die konfrontasie gelei, het ‘n amptenaar gesê.

Volgens Griekeland het die polisie aan die Masedoniese kant van die grens besluit om tot aksie oor te gaan. Die owerhede wou net bevestig dat hulle traangas moes gebruik.

‘n Woordvoerder van die MSF-organisasie, Jonas Hagenson sê mediese personeel het sowat tweehonderd mense vir traanrook-inaseming behandel.

Hy sê die meeste mense wat behandeling ontvang het was mans, maar daar is ook vroue en kinders van onder vyf jaar oud, wat behandeling moes kry.

Mense met kneusplekke beweer dat hulle deur die polisie aangerand is.

Volgens Hagenson is sewe pasiënte na ‘n plaaslike hospitaal geneem met oop wonde, moontlike beenbreuke en meer ernstige beserings.

Brussel-aanvallers wou Parys weer bom

Die terroriste wat verlede maand Brussel geteiken het, het aanvanklik beplan om ‘n tweede aanval op Frankryk te doen, het België se Federale Vervolgingsgesag gesê.

Maar die groep was “verras deur die spoed van die vordering in die voortgesette ondersoek” en het besluit om ‘n aanval op die Belgiese hoofstad te loods, het die kantoor in ‘n verklaring gesê.

Twee selfmoordbommers het 16 mense op die lughawe Brussel op 22 Maart vermoor en in ‘n daaropvolgende ontploffing by Maalbeek-moltreinstasie dieselfde oggend, nog 16 mense opgeblaas.

Ondersoekbeamptes het bande ontdek tussen die sel agter die Brussel-aanvalle en die groep wat 130 mense in Parys vermoor het op 13 November verlede jaar.

Die verklaring Sondag het bevestig wat baie vermoed het: Die reeks klopjagte en arrestasies in die week in die aanloop tot die Brussel-aanvalle, het die moordenaars tot aksie oorgehaal.

Saterdag, het Belgiese owerhede vier mans aangekla weens hul deelname aan “terreurmoorde” en die “aktiwiteite van ‘n terroriste-groep” nalv die Brussel-aanvalle.

Een van hulle, Mohamed Abrini, is ook aangekla in verband met die aanvalle in Parys, het aanklaers gesê.

Abrini is geïdentifiseer as die sogenaamde “man in die hoed” wat langs die twee selfmoordbommer opgemerk is wat hulself opgeblaas het by die Zaventem-lughawe in Brussel.

Toesig-beeldmateriaal het hom ook in die konvooi saam met die aanvallers wat na Parys is, geplaas.

Abrini was ‘n jeugvriend van Brussel-broers Salah en Brahim Abdeslam, beide verdagtes in die Parysaanval.

Sy vingerafdrukke en DNA is nie net in ‘n Renault Clio gekry nie, maar ook in ‘n woonstel in die buurt Schaerbeek van Brussel wat gebruik is deur die lughawebommers.

Abrini het vroeër na Sirië gereis, waar sy jonger broer oorlede in 2014 as ‘n lid van die Islamitiese staat se Franssprekende brigade.

Die Belgiese anti-terreureenhede verkeer steeds op ‘n hoë gereedheidsgondslag aangesien hulle nog aanvalle verwag.

Die Franse minister van Binnelandse Sake, Bernard Cazeneuve het Sondag aan I-Tele TV gesê sy land het die afgelope tyd 13 sulke beplande aanvalle afgeweer en reeds 80 mense is aangekla sedert die begin van die jaar. Hy wou nie verder uitbrei nie.