Nog ‘n mynstaking dreig

Irvin Jim
Irvin Jim

Nog ‘n staking dreig in die mynsektor.

Die vakbond Numsa gaan ‘n 48-uur kennisgewing indien om by Anglo American Platinum te begin staak.

Dit volg terwyl die lede van die vakbond Amcu die werkgewers se jongste aanbod van ‘n nege persent verhoging verwerp het.

Numsa se hoofsekretaris, Irvin Jim, sê al die mynsektore eis dubbelsyfer verhogings. Numsa se eise sluit in behuising, skof-en vervoertoelae.

Die vakbond wil ook ‘n 40 uur werksweek hê, en dat werkers nie op openbare vakansiedae moet werk nie.

Jim het die mynbestuur gevra om vinnig op te tree om te keer dat die staking plaasvind.

Aanklagte teen vermeende plaasmoordenaar teruggetrek

plaasmoordeAanklagte teen ‘n vermeende plaasmoordenaar is Donderdag teruggetrek.

Dit is een van drie swart verdagtes wat daarvan beskuldig word dat hulle Sarel Pretorius op die plaas Roodepoort naby Barkly-Oos vermoor het.

‘n Klerk van die hof sê onvoldoende bewyse teen Thandeka Mthiyane (33) het veroorsaak dat die aanklagte teruggetrek is in die landdroshof op Barkly-Oos.

Die saak teen die ander twee beskuldigdes, Bongani Nojokwe (31) en Vumile Dingalibala (28) is tot 13 Februarie uitgestel en die twee sal in polisie-aanhouding bly.

Nojokwe en Dingalibala is in Gauteng vasgetrek na ’n intensiewe ondersoek. Pretorius is twee weke gelede vermoor en sy vrou is in die badkamer toegesluit tydens die aanval.

Mthiyane het saam met die twee verdagtes in die hof verskyn as ’n medepligtige van Gauteng.

Tydens die inhegtenisneming is daar op R74 000 kontant en twee 9 mm-pistole beslag gelê.

DA-lid rand wit raadslid aan oor ‘rassisme’

Jindela
Jindela

’n Stadsraadsvergadering van die Stellenbosch-munisipaliteit het Woensdag in geweld ontaard toe ’n swart DA-raadslid ’n wit opposisielid met die vuis geslaan het.

Die voorval is deur die stadsraad in ’n verklaring bevestig, het Beeld berig.

Nyaniso Jindela (DA) het André van der Walt (Stellenbosch Civic Association) geslaan oor ‘n “rassistiese” aanmerking.

Van der Walt het tydens die raadsvergadering vir Jindela glo “you stupid” genoem. Die speaker, Cyril Jooste, het Van der Walt gevra om sy woorde terug te trek, waaraan hy toe gehoor gegee het.

Tydens ‘n koffiepouse, ‘n rukkie daarna beweer Jindela is hy ‘n “dom kaffer” genoem waarop hy toe vir Van der Walt “geklap” het.

Van der Walt het ’n klag van aanranding by die polisie inge­dien.

‘n Raadslid sê Van der Walt het nie ’n rassistiese aanmerking gemaak nie. Hy het wel gesê dat Jindela “dom vrae vra en sy tyd mors”.

Hy het aan Die Burger gesê Van der Walt is so hard met die vuis geslaan deur Jindela dat hy twee van sy tande verloor het en op die grond neergeval het.

Van der Walt was besig om ’n wysiging ’n raadsitem te motiveer toe Jindela die spoor byster geraak het en deurentyd wou weet waaroor daar gepraat word.

Die raadslid van die Stellenbosch Civic Association het sy ontsteltenis oor die munisipaliteit se eensydige verklaring uitgespreek.

 

Trichardt-monument geskend

wawielDie bekende Trichardt-gedenkmonument, ‘n wawiel, in die middestad van Nelspruit met sy historiese brons sonwyser, is oopgebreek en van alles gestroop.

Die loodkapsule wat sedert 1938 in die monument bewaar word en eers in 2038 oppgemaak moes word, is ook weg.

Die sogenaamde tydkapsule sou ondermeer historiese dokumente bevat om die Groot Trek se eeufees in 1938 te herdenk.

Gerugte dat twee Transvaalse veldponde vir bewaring deur die nageslag in die kapsule in Nelspruit geplaas is, doen al lankal die rondte.

Dit is egter onwaarskynlik dat die metaalstropers daarvan sou weet.

‘n Goue veldpond kan deedae tot ‘n miljoen rand stuk op die wêreld muntmark haal. Dis die mees gesogte munt ooit uit Suid Afrika.

Minder as 900 daarvan is ten tye van die Vryheidsoorlog op Pelgrimsrus gemunt van die staatsgoud uit Pretoria wat later as die mistieke Kruger Miljoene bekend sou staan.

Die Historiese Belangegroep van Mpumalanga het sy telleurstelling oor die skending van ‘n erfenis baken uitgespreek.

‘n Dingende beroep word op skroothandelaars gedoen om op die uitkyk te wees vir die sonwyser en dit liewer terug te besorg as om dit te vernietig.

Planne om die stadsraad te nader en die sonwyser en tydkapsule in veilige bewaring te plaas en die brons met ‘n harsnamaaksel te vervang, is nooit ten uitvoere gebring nie.

Bron: Nelspruit Post

Rentekoersverhoging dalk net die begin

Gill Marcus
Gill Marcus

Woensdag se rentekoersverhoging – die eerste in vyf jaar – kan dalk net die begin wees.

Die goewerneur van die Reserwebank, Gill Marcus het aangekondig dat die repokoers met ‘n halwe persentasiepunt sal verhoog word tot 5,5%. Die primakoers sal gevolglik klim tot 9%.

As jy R1 miljoen op jou verband skuld, sal dit jou sowat R319 meer elke maand kos, volgens Eerste Nasionale Bank se eiendomsontleder.

Hy het huiseienaars gewaarsku om voorsiening te maak vir die styging.

Die rand se onlangse daling het inflasionêre verwagtinge geskep en die sentrale bank genoop om op te tree.

Pierre Korkie: Onderhandelaar vlug uit Jemen

pierrekorkie
Pierre Korkie

’n Onderhandelaar van Gift of the Givers en sy gesin moes uit Jemen vlug nadat onderhandelinge met al Kaida, wat ’n Suid-Afrikaner van Bloemfontein gyselaar hou, skipbreuk gely het.

Hulle dreig om Pierre Korkie te onthoof as die losprys nie betaal word nie. Intussen het Brittanje ‘n resolusie by die VN ingedien om nie lospryse vir gyselaars te betaal nie. Die resolusie is aanvaar.

“Ons het Anas al-Hamati en sy gesin Dinsdagoggend uit Jemen onttrek,” het die hoof van Gift of the Givers, dr. Imtiaz Sooliman, aan Sapa gesê.

Die gesin is tans in Doebaai.

Pierre Korkie se ontvoerders het Sondag herhaal dat die Suid-Afrikaanse regering die losprys van R33 miljoen moet betaal vir sy vrylating.

Hulle glo al-Hamati, die Gift se kantoorbestuurder in Jemen, het die losprysgeld gesteel wat die Suid-Afrikaanse regering reeds oorhandig het.

Intussen is nog geen inligting van die departement van Internasionale Betrekkinge oor die lot van ‘n Suid-Afrikaanse man wat aangehou word in Ekwatoriaal-Guinee ontvang nie.

Die 47-jarige lugvaart-konsultant van Wildernis in die suid-Kaap, Daniel Janse van Rensburg word in ‘n gevangenis aangehou nadat hy sake gedoen het met ‘n voormalige regeringsamptenaar.

Sy familie, wat hom in September verlede jaar laas gesien het, is desperaat in afwagting op nuus.

Sy vrou, Melanie sê die regering hou hulle nie op hoogte nie.

Sanral-werknemer vas oor bomdreigemente

sanralDie bomdreigemente by Sanral is glo deur ’n werknemer self van die Suid-Afrikaanse Nasionale Padagentskap gemaak.

Die man van Soweto is op aanklag van terrorisme in hegtenis geneem weens sy beweerde rol in die onlangse voorvalle by die maatskappy se bedryfsentrum in Samrand naby Midrand.

Die woordvoerder vir die Valke, kapt. Paul Ramaloko, sê die 28-jarige is Woensdagmiddag by die kantoor waar hy werk, in hegtenis geneem. Hy het bygevoeg dat die man se beweegredes nie bekend is nie.

Die dreigemente het daartoe gelei dat die gebou drie keer in ’n week ontruim moes word.

Die Valke het ook beslag gelê op ’n selfoon wat vermoedelik deur die werknemer gebruik is om ’n bomdreigement te maak.

Waterkloof-vier binnekort vrygelaat

waterkloof4Die Waterkloof-vier sal op 11 Februarie vrygelaat word, het Beeld berig.

Christoff Becker, Reinach Tiedt, Gert van Schalkwyk en Frikkie du Preez, almal van Waterkloofhoërskool wat in Januarie 2007 in die Pretoriase landdroshof elk tot 12 jaar tronkstraf gevonnis is weens onder meer moord, kan op paroolontslag staatmaak.

Die departement van korrektiewe dienste (DKD) het hul parool Woensdagaand bevestig.

“Hulle kon voordeel trek uit ’n spesiale vonnisvermindering van ses maande. Ingevolge wetgewing het die vier nou die helfte van hul vonnisse uitgedien en het hulle in aanmerking gekom vir parool totdat hul vonnisse in 2019 verval.

Die departement het gesê daar word van hulle verwag om aan streng paroolvoorwaardes te voldoen en enige oortreding kan hul terugstuur na die gevangenis.

Portefeuljekomitee keur Robert McBride se Opod-hoofskap goed

Robert McBride
Robert McBride

Die Parlement se portefeuljekomitee oor polisie het die aanstelling van Robert McBride as hoof van die Onafhanklike Polisie-ondersoekdirektoraat (Opod), goedgekeur.

Die voorsitter van die komitee, Annelize van Wyk, sê die nominasie sal nou na die Nasionale Vergadering verwys word wat na verwagting McBride se aanstelling as die hoof van Opod sal goedkeur.

Die direktoraat is al sonder ‘n permanente hoof vir meer as ‘n jaar. Opposisiepartye,waaronder die Demokratiese Alliansie, Congress of the People en die African Christian Democratic Party, is ontstoke oor die nominasie en het gesê McBride is nie geskik vir die pos nie as gevolg van sy persoonlike regsprobleme in die verlede.

Maar, die minister van polisie, Nathi Mthethwa het lede vermaan en gesê dat McBride vrygespreek is van dronkbestuur aanklagte tydens sy termyn as Ekurhuleni Metro-polisiehoof.

Arbeidshof sê vandag of goudstaking voortgaan

labourcourtDie Arbeidshof sal vandag beslis of ‘n staking in die goudmynbedryf kan voortgaan, terwyl samesprekings in die platinumsektor weer môre hervat word.

Die hof in Johannesburg moet uitspraak lewer of die vakbond, Amcu se beplande staking by goudmyne in die land beskermd sal wees. Goudprodusente wat deur die Kamer van Mynwese verteenwoordig word, betwis die wettigheid van die staking.

Samesprekings om die loonstaking by platinummyne te beëindig, het gister in Pretoria geëindig sonder dat enige ooreenkoms bereik kon word, het RSG berig.

Vakbond-onderhandelaars sê hulle kon nie tot die aanbod instem wat die mynmaatskappye voorgelê het nie.

Werkers by Amplats-, Implats- en die Lonminmyne staak sedert verlede Donderdag. Hulle eis ‘n maandelikse salaris van 12-duisend-500 rand. AMCU se hoof-onderhandelaar – Jimmy Gama – sê daar sal vandag weer met lede onderhandel word voor samesprekings môre hervat word.

Sowat 300 lede van Amcu betoog elke dag by Anglo American se Twickenham platinummyn buite Burgersfort in Limpopo, sedert die staking in Noordwes verlede week begin het.

Die provinsiale woordvoerder van Amcu, Zeb Mabilu sê daar was sover geen voorvalle van geweld of intimidasie nie.

Hy sê die stakende Amcu-lede kry heelwat simpatie van werkers wat nie aan Amcu behoort nie, maar wat ook glo dat R12.500 ‘n regverdige salaris sal wees.