Kategorie: Nuus

Paniek toe bus se remme onklaar raak

Negentien mense is Donderdag beseer nadat hulle paniekbevange uit ‘n bewegende bus gespring het aan die Wes-Rand.

Die bus se remstelsel het glo onklaar geraak.

Die beseerdes se beserings wissel van gering tot matig en elf van hulle is in die hospitaal opgeneem.

Die mense is beseer toe ‘n bus se remme na bewering in Christiaan de Wet-weg onklaar geraak het en paniek onder die passasiers veroorsaak het.

Passasiers van die bus het na bewering uitgespring deur die vensters toe hulle besef iets is verkeerd.

Toe ER24 se paramedici op die toneel kom, het hulle 11 pasiënte na die Garden City-hospitaal geneem vir verdere behandeling, terwyl die oorblywende pasiënte deur ander dienste vervoer is.

Meiringspoort gesluit

Dit word uit die Klein Karoo berig dat die Meiringspoort-pad naby Oudtshoorn gesluit is weens oorstromings.

Die provinsiale verkeersdepartement het pas Meiringspoort gesluit by Klaarstroom en De Rust as gevolg van swaar reën.

Motoriste wat na Beaufort-Wes moet gaan word aangeraai om die Willowmore-pad te gebruik.

Die Swartbergpas is steeds oop vir verkeer, maar motoriste word gemaan om nie dié pad te gebruik nie.

Daar kom sedert die begin van die week swaar reën en wind in die streek voor.

Dis nie duidelik hoe lank die betrokke pad gesluit gaan word nie.

Ena Murray oorlede

Die koningin van Afrikaanse liefdesverhale, Ena Murray, is Donderdag in Mosselbaai aan natuurlike oorsake oorlede.

Die 78–jarige Murray is dikwels bestempel as die mees geleesde skrywer in Afrikaans.

OFM-nuus het met een van Murray se kindermaats, Veronica Marais, gesels oor hul grootword dae op Loxton, ook haar geboortedorp.

Marais sê sy onthou Ena as iemand met ‘n yslike verbeelding wat altyd goeie opstelle op skool geskryf het.

Murray se 55 jaar skryfloopbaan het 130 titels ingesluit. Sy is in 2013 deur die ATKV met ’n oorkonde vereer.

Internet in Afrika tot 40 keer duurder!

In Suid-Afrika is 49% van die bevolking aanlyn, maar Afrika moet tussen 30 en 40 keer méér vir internettoegang betaal as mense in ontwikkelde lande.

Volgens die Internet Society se verslag oor internet en internetbeheer in Afrika het sowat 20% van die vasteland se bevolking teen Desember 2014 toegang gehad tot die internet.

Die verslag sê dat die uitbreiding van infrastruktuur, soos internet-“sentrales” (“internet exchange points” of IXP’s), dié koste mettertyd sal verlaag.’

Die meerderheid Afrikalande het internet-penetrasie van minder as 10%, terwyl 20% as die drempelvlak gesien word voordat ’n land ekonomiese voordele uit breëband begin trek.

Nog net drie lande – Tanzanië, Rwanda en Mauritius – het teen Desember 2014 van analoog- na digitale TV- en radio-uitsendings oorgeskakel. Nog 19 lande het met die proses begin (onder meer Suid-Afrika, waar die proses nou al jare lank sloer, tot frustrasie van internetdiensverskaffers). Die verslag betreur dié trae oorskakeling omdat digitale uitsending meer ongebruikte spektrum vir internet beskikbaar sal stel.

Nóg ’n oorgang wat Afrika “nie vinnig genoeg instel nie”, is die oorskakeling na die nuutste internet-adresprotokol, IPv6. Die verslag sê dis noodsaaklik vir langtermyn-internetuitbreiding, “veral soos wat die Internet van Dinge ’n werklikheid word”.

Suid-Afrika en Egipte het 97% van die IPv6-adresse op die vasteland geregistreer.

Die meeste mense wat vir die eerste keer “aanlyn” kom, slaan vastelyn-breëband sommer heeltemal oor ten gunste van mobiele breëband. Mobiele breëband verteenwoordig 90% van alle internet-subskripsies.

Daar is lande op die kontinent waar so min as 2% van die bevolking “aanlyn” is.

Die internet dra US$18 miljard – sowat 1,1% – tot die vasteland se totale bruto binnelandse produk (BBP). Dit is laag vergeleke met die wêreldgemiddelde van 4%.

Die McKinsey-instituut verwys na iBBP, wat bestaan uit die internet se bydrae tot private verbruik, openbare besteding, private investering en ’n land se handelsbalans. Senegal se iBBP is die beste (3,3%), maar in die twee grootste ekonomieë, Nigerië en Suid-Afrika, is dit onderskeidelik 0,8% en 1,4%.

“Dit wys op die onbenutte geleenthede wat nog in die meeste Afrika-lande gerealiseer moet word om die internet vir ekonomiese voordeel in te span,” sê die Internet Society.

Gay vlugteling laat vaar hofgeding in Namibië

Die Ugandese man wat vlugtelingstatus­ in Namibië gesoek het omdat hy homoseksueel­ is en mense van dié ‘minderheidsgroep’ in Uganda vervolg word, het nou in Kanada aansoek om asiel gedoen.

Kris Kelly (21) het verlede jaar daarin geslaag om ’n hofbeve­l te kry wat Namibië se immigrasie-­owerhede verbied om hom uit Namibië te deporteer. Hy het in Desember 2013 homself by die polisiekantoor­ in Walvisbaai as ’n vlugteling van Uganda aangemeld.­

Volgens Namibies­e immigrasie­beamptes­­ het Kelly egter eers beweer hy is van Barbado­s in die Karibiese Eilande afkomstig. Kelly, wat geen identiteitsdokumente­ het nie, het glo vir die beamptes­ vertel hy is in Oktober 2013 in Bridgetown­, Barbado­s, deur vyf onbekende­ mans ontvoer. Dié mans het na bewering vir Kelly op ’n boot gevange gehou totdat hy naby die Namibiese kuslyn van die boot afgespring­ en ontsnap het.

Kelly beweer egter hy het sy geboorteland­, Uganda, in November­ 2013 verlaat, omdat hy weens sy seksuele voorkeur in Uganda vervolg word.

In sy beëdigde verklaring­ beweer Kelly Namibiese­ immigrasiebeamptes­ het, ten spyte van die hofbevel, hom op 29 November­ 2014 oor die Namibiese­ grens na Lusaka in Zambië geneem. In Lusaka is hy glo per vliegtuig­ ­na Naïrobi en toe Entebbe in Uganda toe gestuur. Hy beweer die Ugandese­ owerhede­ het geweier om hom in die land toe te laat en dat hy teruggestuur is Lusaka toe.

’n Verteenwoordiger van die Verenigde­ Nasies se Hoë Kommissariaat­ vir Vlugtelinge­ (UNHCR) het na bewering vir Kelly in Lusaka besoek en vir hom gesê hy is wederregtelik deur Namibies­e owerhede uit die land gedeporteer.

Hy het verlede maand wéér die hoërhof genader vir ’n bevel dat hy uit aanhouding by die polisieselle­ op Seeis vrygelaat moet word. Kelly het ook die hof gevra om te las dat hy by die Osire-­vlugtelingskamp­ geplaas word, terwyl hy probeer om die besluit om nie vir hom vlugtelingstatus­ in Namibië te gee nie, uit te daag. Kelly se appèl in April teen dié besluit het misluk.

Kelly se regsverteenwoordiger, Norman Tjombe, het egter gister tydens ’n vlugtige verskyning­ in die hoërhof vir Republikein gesê dié hofaansoek sal moontlik­ teruggetrek­ word. Volgens hom sal die saak eers teruggetrek word sodra Kelly se aansoek om asiel in Kanada aanvaar word en ’n paspoort­ aan hom uitgereik word.

“Die Namibiese regering wil nie ’n presedent skep dat vlugtelingstatus­ op die grondslag­ van ’n persoon se seksuele­ voorkeer­ gegee sal word nie. Hoewel ons hierdie stryd nie voltooi het nie, het ons die gesprek begin,” het Tjombe gesê.

Bron: Die Republikein

IMF voorspel groei vir Afrika

Na ramings van die Internasionale Monetêre Fonds (IMF) word groeikoerse van 5,5% oor vyf jaar vir Afrika voorspel. Indien infrastruktuur verbeter, kan dit selfs hoër wees.

Energie en finansiering vir infrastruktuur was Donderdag die oorheersende temas met die Afrika-­beraad van die Wêreld- Ekonomiese Forum (WEF) wat in Kaapstad afgeskop het.

Minstens ‘n duisend afgevaardigdes, die meeste vir die WEF-Afrika-byeenkoms nog, het ministers van finansies en die hoofde van sentrale banke ingesluit.

Tans is minder as 13% van die handel in Afrikalande tussen Afrikalande weens gebrekkige vervoerinfrastruktuur en burokrasie.

Leiers by die beraad het het ‘n beroep gedoen op die Verenigde Nasies om geslagskwessies, kinderregte en die uitwissing van armoede in Afrika teen 2030 as sy hoofdoelwitte vir die Volhoubare Ontwikkelingsdoelwitte vir die vasteland stel.

Die Volhoubare Ontwikkelingsdoelwitte sal die VN se Millennium-ontwikkelingsdoelwitte vervang wanneer daar later vanjaar in New York daaroor besin word. Twee miljard dollar sal glo oor die volgende 15 jaar aan dié doelwitte bestee word.

Mynmaatskappye wat die WEF-beraad bygewoon het is gevra om dreigende grootskaalse afleggings in te perk. Die mynbedryf sal na verwagting duisende poste inboet, weens lae kommoditeitspryse en hoë insetkoste.

Die minister van minerale hulpbronne, Ngoako Ramatlhodi het by die Wêreld Ekonomiese Forum in Kaapstad gesê hy het slapelose nagte oor die bedryf. Hy sê maatskappye moet die regering en vakbonde insluit in enige besluite om hul werkmagte te besnoei.

Die voormalige presidentsvrou van Suid-Afrika en Mosambiek Graca Machel, het tydens ‘n paneelbespreking by die WEF gesê sy dink nie veel vordering is gemaak deur vroue in Afrika se ekonomieë nie.

Sy sê Afrika het twee ekonomieë, een formeel en die ander informeel. Die informele sektor word deur vroue oorheers, maar dit is meestal ‘n stryd om oorlewing en nie vooruitgang nie.

Vroue is grootliks afwesig in die formele ekonomie, het sy gesê.

Die minister van toerisme, Derek Hanekom het gister by die Wêreld Ekonomiese Forum gesê die regering is besig om die nuwe visum-vereistes vir minderjariges te hersien, te midde van tekens dat dit reeds die toerismebedryf negatief raak.

Die nuwe visum-regulasies het Maandag van krag geword. Toerisme dra sowat tien persent van Suid-Afrika se bruto binnelandse produk by.

Net twee Afrika-staatshoofde, pres. Jacob Zuma en pres. Abdel Fattah el-Sisi van Egipte, sal egter die beraad bywoon.

Na verwagting sal ‘n groter aantal van die vasteland se leiers byeenkom vir die spitsberaad van die Afrika-Unie aanstaande week in Johannesburg.

Afrikanererfenis beskadig in Burgersdorp

‘n Vryheidsoorlog-monument in Burgersdorp in die Oos-Kaap is in die vroeë oggendure met donkergroen verf bemors.

‘n Facebook-foto toon identifiseerbare EFF-lede voor die beskadigde monument.

Polisiewoordvoerder Ursula Roelofse het bevestig dat die monument van twee boerekrygers, wat in 1908 opgerig is, met verf gevandaliseer is.

Dit kom byna twee maande ná ‘n vlaag aanvalle op standbeelde en monumente regoor die land.

Dit is die jongste voorval in ‘n reeks voorvalle van vandalisme in die provinsie. Vroeër is die beeld van Koningin Victoria in Port Elizabeth en die Anglo-Boereoorlog-gedenksteen in Uitenhage ook beskadig.

Die Burgermonument is opgerig ter nagedagtenis aan die slag van Stormberg op 10 Desember 1899 tydens die Tweede Vryheidsoorlog, waarin dorpenaars omgekom het.

Twee van die boere-generaals, Koos Delarey en C.F. Beyers, het die onthulling van die monument in 1908 bygewoon.

Thembinkosi Mawonga, die munisipale bestuurder van dié dorp, het vroeër geweier om ‘n heining om die monument te plaas ten spyte daarvan dat die burgemeester, Ncedo Ngoqu, ingestem het.

In die week van 28 Julie verlede jaar is begin om die monument te omhein, maar toe kom die opdrag dat die werk dadelik gestaak moet word weens onenigheid tussen die burge­meester en die munisipale bestuurdeer.

Die Erfeniswet bepaal in afdelings 27, 29 en 34 dat alle provinsiale erfenisterreine beskerm moet word as dit ouer as 60 jaar is.

Die Burger- en Taalmonumente is 121 jaar oud.

Wêreld Ekonomiese Forum vir Afrika in Kaapstad begin

Meer as 1200 wêreldleiers, politici en sakelui sal van Donderdag af die 25ste Wêreld Ekonomiese Forum oor Afrika in Kaapstad bywoon.

Die konferensie sal deur verteenwoordigers uit 75 lande bygewoon word.

Vanjaar se konferensie, in die Kaapstadse internasionale konferensiesentrum, sal onder meer immigrasie, die ekonomiese impak van terreur en die ontwikkeling van Afrika se informele ekonomie fokus.

Afgevaardigdes het hul kommer uitgespreek oor die onlangse xenofobiese aanvalle in die land, sowel as nuwe visumregulasies.

Sommige sê hulle oorweeg sakegeleenthede elders in Afrika ondanks die feit dat Suid-Afrika die top sakebestemming op die vasteland is.

Nuwe regulasies is glo ‘n bron van frustrasie.

Mandela-kleinseun mag appeleer

Mandla Mandela, oudpresident Nelson Mandela se kleinseun, is gevonnis tot twee jaar tronkstraf of ‘n boete van R10 000.

‘n Vyfde van die boete is vir twee jaar opgeskort.

Die Mthatha-landdroshof het die vonnis dié week opgelê vir ‘n aanklag van aanranding, waaraan hy vroeër skuldig bevind is.

NVG-woordvoerder, Luxolo Tyali, sê Mandela mag teen sy vonnis appelleer.

Sy borgtog is verleng.

Ses wat hulself as polisie voordoen vas

Ses mans, wat hulself as polisielede voorgedoen het, sal na verwagting Vrydag in die landdroshof op Viljoenskroon verskyn nadat hulle gister deur lede van die Viljoenskroon-, Bothaville- en Vredefort-polisie in hegtenis geneem is.

Die mans is na ’n hoëspoed jaagtog in besit van polisie-uniforms, ’n vuurwapen en ’n gesteelde voertuig gearresteer.

Daar is ook op ’n groot hoeveelheid kontant beslag gelê.

Volgens Noordwes-polisiewoordvoerder Peter Kareli het ’n voormalige polisiebeampte ’n wenk aan ondersoekers verskaf dat die verdagtes in die gebied is.