Kategorie: Nuus

NAVO skrik vir Spaanse verkiesingsuitslag

Spanje se eerste minister, Mariano Rajoy, gaan sukkel om aan bewind te bly nadat sy ­konserwatiewe party hul meerderheid in ’n verkiesing verloor het politieke versplintering die kieserlandskap herrangskik het.

Nuwe partye het ‘n einde aan dekades van ’n twee-­party bewind aangekondig.

Die Spaanse regering het voorheen ondersteuning vir die omstrede anti-Europese Atlantiese Handels- en Beleggingsooreenkoms (TTIP) uitgespreek, maar die pro-Amerikaanse premier Rajoy is tans onder beleg.

Spanje was ‘n getroue Amerikaanse bondgenoot in Venezuela en Kuba en het die Amerikaanse buitelandse beleid heelhartig uitgevoer.

Vir meer as 30 jaar het Rajoy se Populiste Party (PP) en die ­Sosialiste om die beurt regeer, maar miljoene ­Spanjaarde is keelvol vir ­besuinigingsmaatreëls en korrupsieskandale

Die nuwe partye, die verlinkse Podemos en die sentraal-­regse Ciudadanos het nou in die derde en vierde plek ingeskuif.

In Sondag se verkiesing het die PP die meeste stemme behaal, maar sy absolute meerderheid in die parlement verloor.

Rajoy moet noodgewonge met ander partye in dialoog tree ten einde ’n nuwe ­regering saam te stel.

Hy het egter ­gewaarsku dat hy net in gesprek sal tree met partye wat Spanje se eenheid sal ­verdedig.

Die VSA vrees ‘n onafhanklike Katalonië aangesien Spanje ‘n aktiewe ondersteuner van NAVO is.

Dit bring mee dat Podemos, wat teen die ­besuinigingsmaatreëls gekant is, en twee Katalaanse separatiste-groepe, wat 17 parlementêre setels verower het, uit die prentjie is.

Die Sosialistiese Party (PSOE) wat die tweede meeste stemme gekry het, en die Ciudadanos Party het reeds aangedui dat hulle nie ’n kabinet onder leiding van Rajoy sal steun nie.

Die uitslag van die mees betwiste ­verkiesing in Spanje se moderne ­geskiedenis het die land, wat net begin herstel het van die finansiële krisis, in wanorde gedompel.

Bob glo deur paleisrewolusie vervang

Die leier van die opposisie in Zimbabwe, Morgan ­Tsvangirai, het Maandag gesê die president is deur ‘n paleisrewolusie vervang.

Met pres. Robert Mugabe (92) se instemming het sy vrou, Grace, glo intussen ongemerk as staats­hoof oorgeneem. Grace Mugabe (50), lei Zanu-PF se vroueliga.

“Grace Mugabe het met ‘n paleisrewolusie oorgeneem en die regering het nie ‘n vinger verroer om die krisis af te weer nie.

“Zimbabwe word deur ’n leierskaps­krisis bedreig. Niemand in die regering dink aan oplossings vir die land se uitdagings nie omdat almal se aandag gevestig is op die vraag wie die moeë man as stuurman van die skip gaan opvolg,” het die MDC-leier verklaar in sy jaarafsluitingsrede.

Mugabe, wat aanstaande jaar 92 word, is al vir 35 jaar aan bewind, klaarblyklik sonder dat sy vele termyne die Angelsaksiese pers kwel.

Sy aanstelling as staatshoof in 1980 is as ‘n triomf deur Brittanje voorgehou. Hy het sy land intussen in die grond bestuur.

Zimbabwe beplan ook om die Chinese yuan as wettige betaalmiddel te aanvaar in ruil vir skuldafskrywing ter waarde van sowat $40 miljoen.

China is die grootste belegger in Zimbabwe. Zimbabwe se minister van finansies, Patrick Chinamasa het die stap aangekondig.

Suid-Afrikaanse rand en die Amerikaanse dollar is tans die dominante geldeenhede.

Wegholveldbrand rig groot skade aan by Zastron

‘n Wegholveldbrand het Maandag duisende hektaar weidinggrond in die Zastron-distrik verwoes asook die bekende Aasvoëlberg-buitelugsentrum vernietig, het OFM berig.

Voorsitter van die Zastron Brandbeskermingsvereniging, Steyn van Ronge, sê ‘n brand wat vermoedelik deur lede van ‘n inisiasieskool in die gebied begin is, het weens matige tot sterk winde vinnig na die suide van dié Vrystaatse dorp versprei. Die droë en warm weersomstandighede het sake vererger.

Van Ronge sê weens ‘n tekort aan water op die dorp moes boere, inwoners en plaaswerkers water vanuit vee se krippe gebruik om die brande te blus. Daar word geraam dat tussen 3 000 en 5 000 hektaar grond vernietig is en minstens drie plase hul totale weidinggrond verloor het.

Rondawels, bome en geboue by die buitelugsentrum, beter bekend as die Buitelugskool, het tot op die grond afgebrand.

Dit kom ná nog ‘n brand wat tien dae gelede tussen 10 000 en 15 000 hektaar in dieselfde omgewing vernietig het.

Van Ronge sê dit smeul steeds plek-plek vandag, maar weens stiller wind is daar geen onmiddellike brandgevaar nie.

Twee tieners vermis by Heroldsbaai

Twee tieners word vermis nadat hulle vanoggend by Heroldsbaai naby George deur branders van rotse af geslaan is.

‘n Polisiewoordvoerder, Malcolm Pojie, sê die voorval het by ‘n plek wat plaaslik as Voëlklip bekend staan, gebeur.

Pojie sê ‘n 29-jarige man en twee 14-jarige seuns het gaan visvang toe hulle deur branders van die rotse afgeslaan is.

Die man kon daarin slaag om na veiligheid te swem. Die twee seuns, onderskeidelik van Kimberley en George het egter onder die water verdwyn.

Pojie sê die see is baie rof in die Voëlklip omgewing en hy het vakansiegangers gemaan om die gebied veiligheidshalwe te vermy.

Geweld teister Djiboeti

’n Opposisiegroep in Djiboeti sê minstens 19 mense is in botsings met die polisie dood, het Reuters berig.

Die onluste het uitgebreek toe mense godsdienstige vieringe gehou het. Die regering hou vol net nege mense is in die onluste beseer.

Teenstrydige berigte maak dit moeilik om vas te stel presies wat Maandag in die klein Horing van Afrika-land gebeur het.

Djibouti, die tuiste van ’n streekhawe en Amerikaanse en Franse vlootbasisse, het in die verlede sporadiese geweld ondervind wat deur betogings teen die regering van pres. Ismail Omar Guelleh ontketen is.

Guelleh, wie se party ’n ysstergreep op die mag in die land het, is sedert 1999 aan bewind en presidentsverkiesings is vir April 2016 geskeduleer.

Drie verskyn wat kind glo verkoop

Drie swart vroue wat glo ‘n eenjarige kind vir R5 000 wou verkwansel het Maandag vlugtig in die landdroshof in Nelspruit (Mbombela) verskyn.

Die drie is verlede week deur lede van die Valke in Springs in hegtenis geneem.

Reginah Ndlovu (25), die kind se ma en ‘n 18-jarige medepligtige, Nomthandazo Nkuna, is nie gevra om te pleit op die klag van mensehandel nie.

Die ander swart vrou wat aangekla word, is die een wat glo die kind gekoop het.

Die saak is tot volgende week Dinsdag uitgestel vir ‘n borgtogaansoek.

SAL-aanvaar Nene-plan op die nippertjie

Die Suid-Afrikaanse Lugdiens het ter elfder ure besluit om die Airbus-transaksieplan te aanvaar.

Die plan is soos dié een wat deur die voormalige minister van Finansies Nhlanhla Nene, goedgekeur is.

Die lugdiens het die Tesourie ingelig dat sy raad gestem het soos in Julie toe Nhlanhla Nene die plan goedgekeur het.

Die lugdiens het sodoende die spertyd gehaal om nie ‘n duur boete te betaal nie. SAL sou sowat R600 miljoen rand moes opdok vir vliegtuie wat hy nie kan bekostig nie.

Dit wil voorkom asof die heraangestelde minister van finansies, Pravin Gordhan die voorsitter van die SAL-raad, Dudu Myeni vasgevat het.

Myeni wou die ooreenkoms heronderhandel, wat die oorspronklike ooreenkoms sou laat verval het en die betaling van miljoene rand sou noodsaak.

Nene se weiering om Myeni se plan te aanvaar, het waarskynlik sy kop laat rol.

Hittegolf oor groot dele duur voort

Die heersende hittegolf gaan na alle waarskynlikheid tot môre oor groot dele van Suid-Afrika voortduur.

Die Bloemfonteinse weerkantoor se Phemelo Zonke het aan OFM gesê in die westelike dele van die land word geen reën voorspel nie.

Sy sê sekere dele van sentraal-Suid-Afrika kan wel verspreide donderbuie te wagte wees.

In Bloemfontein gaan die kwik waarskynlik môre tot 34 grade styg, terwyl Vryburg gaan braai met ‘n temperatuur van 38 grade. Upingtonners kan 42 grade verwag.

Mense word weereens gemaan om uiters versigtig met vuur om te gaan, aangesien die toestand vir wegholveldbrande baie gunstig is.

Padslagting wek groot kommer

Die Outomobiel Assosiasie het sy kommer uitgespreek oor die hoë padsterftes en sê daar is geen verbetering teenoor verlede jaar nie.

Die woordvoerder van die AA, Layton Beard het aan RSG gesê die feit dat daar reeds meer as 500 mense op die land se paaie dood is, wek groot kommer.

Beard sê te veel motoriste gehoorsaam nie die padreëls nie. Hy sê spoed, die gebruik van selfone, dronkbestuur en die versuim om veiligheidsgordels te dra is van die grootste oorsake van padongelukke.

Hy het nie die verbysteek op sperstrepe genoem wat kommerwekkend hoog is nie en die oorsaak van die meeste noodlottige ongelukke is nie.

Hy sê dringende aandag moet geskenk word aan wyses om groter verantwoordelikheid by motoriste te kweek, en wetstoepassing moet drasties verskerp word.

Volgens die Padverkeerbestuurskorporasie is vanjaar se dodetal op die land se paaie is die hoogste in vier jaar.

Bykans 700 sterftes is in 600 ongelukke in die eerste drie weke van Desember aangemeld.

Die dodetal sal na verwagting verder styg soos inligting van al nege provinsies bygewerk word.

Die meeste ongelukke vind glo tussen tienuur saans en sesuur soggens plaas.

Swaar weer ontwrig lugverkeer by OR Tambo

Alhoewel die OR Tambo Internasionale Lughawe Maandag op sy amptelike Twitter-blad ontken het dat die lughawe gesluit is, het hewige donderstorms wel lugverkeer byna tot stilstand gedwing.

Die Lughawensmaatskappy van Suid-Afrika kon nie aanvanklik vir kommentaar bereik word nie.

‘n Hewige donderstorm en hael in dele van Johannesburg het daartoe gelei dat talle vlugte by die OR Tambo Internasionale Lughawe vertraag is.

Die meeste vertragings is glo deur uiterste weerstoestande veroorsaak.

Die 18 vlugte wat geskeduleer was om op te styg moes wag, terwyl ‘n verdere 52 vlugte wat sou land ook vertraag is.

Passasiers het op die sosiale netwerk Twitter getwiet dat die lughawe gesluit is.

Intussen is groot dele van Johannesburg sonder elektrisiteit. City Power sê dele wat geraak word sluit in Sydenham en Cyrildene in die ooste in. In die noorde word Greenside, Linden, Craighall Park en Honeydew geraak en La Rochelle in die suide van die stad.

Dit is nog nie duidelik wat die kragonderbreking veroorsaak het nie. City Power sê egter die donderstorm wat oor dele van die stad gewoed het kon tot van die kragonderbrekings gelei het.

Bykomende personeel is ontplooi in ‘n poging om die onderbrekings te herstel.