{jathumbnail off} 
Skrywer: Dan Roodt
Proe die Franse platteland
{jathumbnail off} 
‘n Resep met net één vars bestandeel, smaaklik, kleurvol, eenvoudig, baie deftig en elegant. Kortom ‘n mondvol en eg Frans. Moenie volgende keer verby daardie bossie radyse in die groentewinkel of die boeremark loop nie. In daardie kraakvars pepersmakie van die nederige radys, lê die geheim van ‘n hele maaltyd opgesluit.
Soek ‘n vars bossie, verlep sal nie deug nie.
Was sorgvuldig, droog af en as die stingels en blare mooi lyk, hou dit sommer aan en pak op ‘n mooi bord uit.
Bedien saam met vars snye Franse brood of bruinbrood, ‘n bakkie soet (ongesoute) botter en growwe sout.
Om te eet, sny ‘n radysskyfie, smeer ‘n knypie brood met botter en plaas daarop. Maal ‘n bietjie growwe sout daaroor na gelang van smaak en smul!
‘n Glas koue Sauvignon Blanc daarby, ‘n hopie biltong en dis so goed soos ‘n vakansie op die Franse platteland hier tuis.
Waterwese trap water
Suid-Afrika benodig meer as R70 miljard om sy infrastruktuur vir die verskaffing van water te verbeter, het Buyelwa Sonjica, minister van omgewingsake en waterwese, Dinsdag gesê.
Sonjica het by die bekendstelling van die Maquassi Hills-watervoorsieningsprojek in die Noord-Wes gepraat.
Sy sê vyf sulke projekte is in die afgelope drie jaar in dié provinsie van stapel gestuur, maar dit kom teen ‘n prys.
“Die begroting wat aan my toegeken word kan lyk na baie geld, maar dit is net ‘n klein gedeelte van die koste wat sulke infrastruktuur beloop. Ons doelwit oorskry R70 miljard,” het Sonjica gesê.
Volgens haar is infrastruktuur, en die bestuur daarvan, ‘n belangrike element van die verskaffing van waterdienste.
Sy sê ‘n verdere 23 projekte is tans in die konstruksiefase, terwyl 11 ander wag op tenders. ‘n Verdere 47 projekte sal waarskynlik goedgekeur word.
“Die infrastruktuurontwikkeling vir die verskaffing van water in grootmaat is in sy derde jaar, maar sal moet aangaan tot die meeste van die grootmaat infrastruktuurbehoeftes bevredig is,” het Sonjica gesê.
Zuma wil misdaad met geweld bekamp
President Jacob Zuma het polisielede regoor die land aangemoedig om alles in hulle vermoë te doen om misdaad te bekamp, al beteken dit dat hulle misdadigers moet doodskiet.
Dit blyk dat Zuma ‘n vasberade benadering tenoor misdaad inneem, met die Wêreldbeker om die draai. Vrese bestaan dat 2010 geteister sal word deur kapings, moorde en rooftogte.
Tydens ‘n vergadering Dinsdag met verskeie lede van die polisie en sekuriteitsbeamptes het Zuma veral klem geplaas op die uitdagings wat SAPD-lede in die gesig staar. Dit kom slegs ‘n week nadat die nuutste misdaadstatistieke bekendgemaak is.
“Wanneer die lewens van onskuldige burgers bedreig word, het die polisie soms geen ander keuse as om geweld te gebruik om hulself en onskuldiges te beskerm nie,” het Zuma aan sowat 1000 polisie stasiebevelvoerders gesê.
“Ons soek egter nie polisielede wat net links en regs gaan skiet nie.”
Volgens statistiek word daar daagliks sowat 50 mense in die land vermoor. Zuma het bygevoeg dat Suid-Afrika die omvang van die probleem moet erken en dat daar tot uiterstes beweeg sal moet word om dit stop te sit.
Tsoenami dreig in Nieu-Seeland
‘n Tsoenami wat veroorsaak is deur ’n aardbewing naby Samoa het talle dorpe op eilande in die Stille Oseaan verwoes.
Verskeie dorpe is deur die tsoenami “weggevee” en talle mense word vermis, het ‘n verslaggewer vir Radio Polynesië aan Radio Nieu-Seeland berig.
Die aardbewing het ongeveer 85 km onder die Stille Oseaan plaasgevind, het die Amerikaanse Geologiese Instituut Woensdag gesê.
Die Stille-Oseaantsoenami-waarskuwingsentrum het voorts ’n tsoenami-waarskuwing uitgereik vir ’n groot gedeelte van die suidelike Stille Oseaan gebied.
Die waarskuwing is aan verskeie eilande in die Stille Oseaan, insluitende Nieu-Seeland, Samoa, Fidji en Tonga, uitgereik.
Zimbabwe se ‘nuwe boere’ stig veldbrande
Toenemende veldbrande ondermyn voedselproduksie in Zimbabwe. Die veldbrande word begin deur Mugabe se “nuwe boere”, op die onteiende plase van blankes.
Mugabe se “nuwe boere” het reeds die afgelope maand sowat 46 000 hektaar landbougrond verwoes, omdat hulle veldbrande aansteek, wat dan handuit ruk.
Zimbabwe het ook geen vermoë om veldbrande te blus nie. Verder word die onteiende plase tussen ‘n klomp mense opgedeel wat geen moeite doen om voorbrande te maak nie. Dit maak die verspreiding van veldbrande vanaf een lappie grond na ‘n ander veel makliker.
Franse minister in rassesaak
Die Franse minister van binnelandse sake, Brice Hortefeux, is gedagvaar om klagtes van rassisme te beantwoord. Dit spruit uit ‘n film waarin dit voorkom dat hy anti-Arabiese opmerkings gemaak het.
Die MRAP anti-rassismegroep beskuldig Hortefeux van “rassistiese beledigings” oor ‘n video wat opgeneem is tydens die somerkongres van President Nicolas Sarkozy se regerende UMP-party, vroeër vandeesmaand.
Die groep het regsaksie geneem onder ‘n vereenvoudigde snelbaanprosedure wat die eiser toelaat om ‘n verweerder regstreeks voor ‘n regter te dagvaar.
‘n Prokureur vir die MRAP, Pierre Mairat, sê die Paryse strafhof het ingestem om die saak die eerste maal op die 17de Desember aan te hoor. Die ministerie het nog nie bevestig of ontken dat die minister gedagvaar is nie.
Die film wat op die internet gelaai is, wys Hortefeux wat by ‘n man van Arabiese oorsprong poseer terwyl hy sê: “Daar moet altyd een wees. As daar een is, is dit in die haak. Dit is wanneer daar ‘n spul van hulle is, wat daar probleme is.”
Die man, na wie as Amine verwys word, is te siene in ‘n klein groepie partyaktiviste, insluitende ‘n vrou wat gehoor kan word om te sê: “Hy eet varkvleis, hy drink bier.”
Hortefeux antwoord: “Hy stem glad nie ooreen met die prototipe nie.”
Die MRAP se saak teen Hortefeux berus op die gebruik van die uitdrukking “prototipe” en die minister se klaarblyklike aanduiding dat ‘n groot hoeveelheid Arabiese immigrante ‘n probleem vir die gemeenskap veroorsaak.
“Dit sluit Arabiese mense van ons sosiale kontrak uit,” sê die groep se prokureur.
Hortefeux het later sy berou uitgespreek by ‘n geleentheid wat deur die Franse Raad vir die Moslemgeloof aangebied is, maar het daarop aangedring dat sy opmerkings buite konteks aangehaal is, maar hy het in gebreke gebly om ‘n verskoning aan te bied.
Rassebeledigings in Frankryk is strafbaar deur tot ses maande in die tronk of ‘n maksimumboete van omtrent R220,000.
Ontario vervolg tabakmaatskappye
Kanada se Ontario-provinsie het gister ‘n regsgeding teen ‘n groep tabakmaatskappye aanhangig gemaak om naastenby R400-miljard in tabakverwante gesondheidsorgonkonstes te herwin.
Die eis verteenwoordig die gesondheidsorgkostes wat deur Ontario se belastingbetalers sedert 1995 gedra is, sê die Ontario-regering in ‘n verklaring.
Die tabakmaatskappye, wat nie deur die provinsie geïdentifiseer is nie, het tot 60 dae om ‘n verweer in te dien.
Die geding volg op die passering van ‘n wet vroeër vanjaar wat die regte van betrokke partye verklaar en stel ‘n wettige raamwerk vir sulke aksies daar.
Kanada se hooggeregshof het in 2005 beveel dat provinsies tabakmaatskappye kan vervolg om gesondheidskostes wat met tabakgebruik verbind is, te herwin.
Sedertdien het twee ander provinsies, Britse Columbië en Nieu Brunswick, tabakmaatskappye vervolg maar in weerwil van jare se hofverrigtinge en onderhandelinge, is nie een van die sake al opgeklaar nie.
” Ontario neem hiermee die volgende stap om belastingbetalers se dollars wat gebruik is om tabakverbonde siektes te beveg, terug te kry,” het Ontario se prokureurgeneraal, Chris Bentley, in ‘n verklaring gesê.
Volgens die regering is rook die nommer een oorsaak van voortydige dood en siekte in Ontario, en is verantwoordelik vir 13,000 sterftes per jaar.
Proteas eindig laaste in groep
Laaste. Heel, heel laaste. Dis waar die Proteas in hulle groep in die IKR se Kampioenetrofee-toernooi geëindig het. Hulle het na die agterosposisie gedaal toe die geminagte Nieu-Seelanders gister die ewe verguisde Engelse span op die Wanderers met vier paaltjies verslaan het. Dié twee sukkelspanne is nou deur na die halfeindrondte van die toernooi terwyl die hoogaangeprese Sri Lankane saam met Suid-Afrika saggies by die agterdeur moet uitsluip huis toe.
Die Swartpette het die Rose op ‘n Wanderers-blad vol speserye deurmekaar geboul en vir 146 lopies uitgehaal. Daarna het hulle swaar getrek om die karige telling te haal, hoewel dit aanvanklik soos so maklik soos val uit ‘n boom gelyk het. Brendan McCullum en Martin Guptill het die bal, nou nie met uitgelatenheid nie, maar met uiterste gemak rondgedruk en getrek en het meer as helfte van die lopies aangeteken voordat McCullum op 48 en later Guptill op 53 uit is.
Daarna het die senuwees, die nukkerige kolfblad en Stuart Broad vol skoongesig aggressie die middelorde laat bewe het. Uiteindelik het Daniel Vettori met al sy onverstoorbaarheid die wa oor die kruin gestoot. Met dié oorwinning eindig die ondergewaardeerde Nieu-Seelanders bo in hulle groep met Engeland tweede.
Die twee superspanne, Sri Lanka en alewige stikkers, Suid-Afrika, het sterte netjies tussen die bene opgetrek en bedeesd die toernooi verlaat.
Gary Botha kom terug
Blou Bul-staatmaker, Gary Botha, is op pad terug om sy rugbyloopbaan in Suid-Afrika voort te sit. Gerugte dat dit sal gebeur is gister bevestig. Daar word selfs gereken dat Botha by die Blou Bulle vir die res van die Curriebeker-seisoen sal inval, veral noudat een van die Noord-Transvalers se hakers, die kwotaspeler, Chilliboy Ralepelle, beseer is.
Botha het die afgelope paar jaar graafskapsrugby vir Londen Harlekyne gespeel. Hy sal Saterdag sy laaste wedstryd vir dié klub speel. Die span het nog nie ‘n oorwinning hierdie seisoen behaal nie. Botha en Harlekyne het wedersyds ooreengekom dat hy vroegtydig van sy kontrak vrygestel sal word.
Die hoofafrigter, John Kingston, het gesê dat hy hartseer is dat Botha die klub gaan verlaat. “Hy was ‘n integrale deel van die onlangse sukses van Harlekyne.”
Die knoetserige haker was deel van die Blou Bulle se Renaissance gedurende die begin van die dekade.
Die 27-jarige Botha sê hy het sy tyd by Harlekyne geniet. “Dit is met ‘n swaar hart wat ek sal gaan,” het hy bygevoeg. “Ek het baie vriende in my tyd by die klub gemaak en sal die span se vordering met groot belangstelling volg.”