Dan Roodt, Author at praag.co.za

Hou ons taal só lewendig

As ek mag sou ek graag die n voorstel wou maak dat daar erens, weekliks of tweeweekliks ‘n ruimtetjie afgestaan word vir ‘n gedig of prosa met ‘n kort resensie uit ons baie ryk amper vergete bron van digters en skrywers.

Hierdeur kan ons ons Afrikanertaal en -kultuur lewendig hou.

My kleinkinders word so dikwels as wat ek kan blootgestel aan bv liedjies uit die F.A.K-bundel. Dan druk ek dit uit en as ons op die strand gaan loop, sing almal saam (ook kroonprinsie wat nog nie veel begrip het van lees nie en net sing – baie hard – die woorde wat hy kan onthou) – tot almal se vermaak.

Vir my is dit baie belangrik dat juis hierdie geslag van mense en kinders bedag gemaak word op ons geskiedenis en kultuur – want sou ons nalaat om dit te doen, gaan ons geskiedenis verlore wees vir daaropvolgende geslagte.
My liefde vir A.G Visser se gedigte en Langenhoven se ontuitputlike bron van mensweesplesier – is deur my pa se lees en vertelling in my hart neergelê – amper meer as dít wat ek op skool geleer het.

Eugene Terre’Blanche: ‘n ‘cowboy’ wat kan terugkeer

Dan Roodt sit hierdie keer die pot mis en maak ‘n strategiese fout met sy kommentaar oor Eugene Terre’blanche in sy rubriek: Antjie Krog – Beroepsafrikaner en nar.

Roodt skaar homself nou by Harald Pakendorf wat jaarliks by die Aardklop-kunstefees met die “Diskoers”-bespreking vir die gehoor aankondig Eugene Tere’blanche het van ‘n perd afgeval. (Ek plaas “Diskoers” in aanhalingstekens want al die deelnemers vertel altyd vir mekaar hoe goed dit in die nuwe SA gaan.)

Die storie van Eugene Tere’blanche se perd afval, die groen onderbroek, ens., het die uitlaatklep geword vir mense wat diep gefrustreerd is met hul eie mislukkings enof die mislukkings van die politieke bedeling waarvoor hulle gestem het. Dit is dus onnodig dat Roodt homself in hierdie groep plaas.

Ek is of was nooit ‘n AWB-ondersteuner of aanhanger van Eugene Terre’blanche nie, maar wil ‘n paar punte vir oorweging stel voor daar weer met ‘n moddergooiery teen Terre’blanche begin word:

Terre’blanche het waarskynlik in twee onderhoude op RSG meer Afrikaners bereik en op een of ander manier geraak as wat Praag in sy bestaan gedoen het. Daarmee bedoel ek nie Praag het nie ‘n rol om te vervul nie.
Meer mense luister na Steve Hofmeyer as na Helen Zille en Pieter Mulder saam. Laasgenoemde het die afgelope 15 jaar,met of sonder Constand Viljoen, niks uitgerig nie. Helen Zille het nog nie agtergekom, soos Van Zyl Slabbert reeds 20 jaar terug, dat sy besig is met ‘n oefening in futiliteit nie.
Meer mense lees een uitgawe van Die Huisgenoot as die boek van R.W. Johnstone “South Africa’s Brave New World” waar hy die ineenstorting van die nuwe Suid-Afrika beskryf.
Eugene Tere’blanche het in een onderhoud op RSG ‘n kristalhelder beeld opgeroep van sy visie vir die Boerevolk. Ná 15 jaar weet ek nog nie eintlik wat die Vryheidsfront Plus, Solidariteit, Afriforum, die FAK, ens. wil bereik nie. (Ek vermoed hulle weet self ook nie.)

Hoekom kan Eugene Terre’blanche weer ‘n suksesvolle terugkeer maak?

Die Western “Destry rides again” van Max Brand is die verhaal van ‘n cowboy wat onskuldig in die tronk geplaas is vir ‘n daad wat hy nie gepleeg het nie. Hy kom dan terug uit die tronk om met sy vyande af te reken, nadat hulle hom reeds afgeskryf het. Hierdie boek was die inspirasie van ‘n hele genre Hollywood-films die afgelope 70 jaar. Die sogenaamde “comeback kid” het ‘n rolmodel vir Amerikaanse politici geword, waaronder Bill Clinton. Die “comeback kid” kry gewoonlik geweldige simpatie by die publiek.
Die liberale Afrikaanse establishment het ‘n onsettende probleem indien Terre’blanche suksesvol sou terugkom, want ons het hier ‘n groot kommunikeerder. Wat die situasie so interessant, selfs gevaarlik, kan maak is dat Terre’blanche ou geraamtes uit die klerekas kan begin haal oor die oorgang en “wonderwerk” van 1994.

Die liberale Afrikaanse establishment het twee riskante opsies indien Terre’blanche te suksesvol raak:

Smeer hom deur die media soos in die verlede.
Verwyder hom permanent uit die samelewing soos Verwoerd en Robert Smit.

Die probeem met die eerste opsie is: hoe smeer jy ‘n man wat in die modder lê en wil opstaan sonder ‘n publieke teenreaksie? Die probleem met die tweede opsie is: gaan jy daarmee wegkom as jy nie die land meer regeer nie?

Daar is tans ‘n sosiopolitieke vakuum by die Afrikaner wat nie deur die partypolitieke stelsel gevul word nie.

Om op te som:

Eugene Terre’blanche kan nie nou meer skade aanrig aan die Boeresaak as 15 jaar terug nie. Inderwaarheid kan hy nou ‘n positiewe bydrae maak.
Antjie Krog is besig met ‘n reusetaak om die verligte Afrikaner se beeld as naïef, verward en bespotlik te maak. Sy moet maksimum mediablootstelling hierin kry.

Bogenoemde twee faktore, tesame met ‘n verwarde en onseker Afrikanerestablishment, kan onderhandelinge vir die Boeresaak van selfregering sterk bevoordeel.

палатки киев

Springbokke kla oor NSA-lied

Die Springbokke het gekla oor hoe swak die Nuwe Suid-Afrikalied voor hul 20-13-nederlaag Vrydagaand teen Frankryk gesing is.

Die afrigter, Peter de Villiers, sê die Franse het hul oorwinning in Toulouse verdien, maar is kwaad vir die gashere oor die swak sangvertoning.

Die sanger het by tye stil gebly en gesukkel om die woorde te onthou.

“Ons is ontsteld oor die feit dat die Franse geen respek vir ons volkslied getoon het nie,” het de Villiers gesê.

“Hulle het nie iemand gekry wat dit ken nie en het geen respek daarvoor getoon nie…ons verwag dat almal respek toon vir enige volkslied.”

Die woorde van die volkslied is ‘n mengelmoes van vier van Suid-Afrika se 11 amptelike tale.

Die slot Victor Matfield het gesê die spelers was baie geskok en het weens dié blaps konsentrasie verloor.

“Elke keer as ons op die veld gaan en die volkslied sing, is dit baie belangrik vir ons. Dit is iets wat jou regtig opgewonde maak omdat jy vir jou land speel.”

“Dit was ‘n grap en die ouens kon nie eens saamsing nie. Die toeskouers het selfs begin lag. Dit was regtig teleurstellend.

Die reggae-sanger het op sy beurt gesê hy dink hy het die volkslied “pragtig” gesing.

Ras Dumisani, wat van Durban afkomstig is, het gesê niemand het vir hom gesê dat hulle ontsteld is oor sy singery nie.

Twee tromspelers van sy Afrikhaya Band en ‘n blaasorkes het hom begelei.

Die Suid-Afrikaanse volkslied is voor Frankryk se bekende “Marseillaise” gesing.

Лобановский

Springbokke se flenterwysie in Frankryk

Wat op aarde het wie op aarde gedink?

Suid-Afrika se saamgeflanste ellende van ‘n volkslied is gisteraand voor die toets teen Frankryk in Toulouse gesing deur iemand wat lyk of hy per ongeluk daar was. “Nee, ek het nie vir jou geld vir ‘n halfbrood nie, maar kom saam dan sing jy Nkosi Sikelele…” Oud, pikgietswart, ‘n rasta met grillokke wat amper op sy bewerige knieë hang. Hy en die orkes was vreemdelinge vir mekaar en die konsep dat hy op die noot, in ritme en op die wysie moet sing, het nooit by hom geregistreer nie. En nou het hy ook so ‘n heserige gilstemmetjie, soos ‘n kriek in ‘n sinkbad. Ag sê my tog iemand het die wedstryd opgeneem. Dié weergawe van “Oom Kosie soek ‘n lêplek in Afrika” is suiwer Youtube-goud. Toe neem die Springbokke die veld en dít is waar die werklike verleentheid plaasgevind het.

Al die voorspelbare elemente van ‘n neerlaag was daar: Die Franse voorpak was meer gehard, vinniger, meer verbete en tot die oogballe toe opgesous met veglus. Agterlangs was dit chaos met binnesenter Adi Jacobs wat rondkrabbel asof hy iets in die donker soek, onseker of dit ‘n handgranaat of sy kontaklense is. Op vleuel was JP Pietersen so oorgretig soos ‘n worshond in ‘n slaghuis en Jaque Fourie moes dikwels drie posisies se verdediging volstaan. Kankowski het die bal telkens in die lakslag met groot flambojantheid aangeslaan en die onwettige immigrant, Tendai Mtawarira, se kop is amper in sy slukderm in geskrum.

Die Bokke het nieteenstaande, so verrassend soos wysheid uit Malema se mond, die voortou geneem met ‘n Morné Steyn-stelskop, ‘n Morné Steyn-skepskop en ‘n John Smit-drie. Die drie het gekom nadat Victor Matfield paniek in die Franse lynstaan gesaai het. Deur meer geluk as planmatigheid is die bal ‘n muistongetjie ver van die Franse doellyn uitgeskop. Die Franse haker, sy oë vasgenael op Matfield, het die hele lynstaan misgegooi, Smit het die meevaller gevang en bo-oor die tengerige Franse skrumskakel gehardloop vir sy drie.

Jake White hét gesê ‘n wedstrydplan kan nié op die veld verander word nie. Maar hoekom nie? Hoeveel moeiliker is dit om ‘n bal uit te skop as veldaf? Want teen hierdie tyd was dit duidelik dat hulle skop-en-storm-meesterplan te veel myle op die klok het. Hoekom sal jy nie lynstane wil hê as jy die teenstaander se bal so maklik soos jou eie wen nie?

Maar uitskop, volgens die meesterplan, het hulle nie uitgeskop nie. ‘n Teenaanval, ‘n Adi Jacobs-verdwyning op verdediging en voilà, Vincent Clerc gaan druk vir die Franse, en dít terwyl John Smit nog nie sy geluk oor sy eie drie kon glo nie.

Die Jacobs-Pietersen-kombinasie het weer toegeslaan, naby die einde van die wedstryd. ‘n Dreigende Springbok-aanval het uitmekaar geval toe Jacobs die bal in kontak laat val het. Die Franse het uit hulle kwartgebied aangeval en die bal veldaf oor die kantlyn geskop. Pietersen, in een van die mees bisarre breinstuipe wat ooit in ‘n Springbok-trui gesien is, besluit toe om die bal vinnig in te gooi – sonder dat daar ‘n spanmaat in sig is. Die Franse het skoon van genot gehuppel en afgesit doellyn toe. Net ‘n professionele stukkie misdaad van Kankowski het die Hane verhoed om ‘n drie te druk; daarvoor het hy ‘n geel kaart gekry en die Franse het strafskop nommer vyf behaal om die Springbokke uit sig te laat verdwyn.

Die Franse, vir al hulle ywer en al die Bokke se geploeter, wen net met 20-13. Dít is Heinrich Brüssouw se skuld. Hy was vraatsig op verdediging, nie tevrede om net sy eie kwota pletter te loop nie. ‘n Goeie dosyn keer het ‘n Franse aanval in die konsepstadium uitgeflikker wanneer Brüssouw die bal afrokkel of nóg ‘n speler met bal en al vasknoop.

Nou ja, hierdie was nie ‘n algehele vrugtelose aand nie. Ons het darem beleef dat Nkosi Sikelele gesing word soos dit verdien om gesing te word.

в вуз топкарго развод

Antjie Krog – Beroepsafrikaner en nar

Vandag lees ek ‘n verwysing na Antjie Krog in ‘n power rubriek van Tim du Plessis raak waarin hy sê: “as Afrikaanse mense in die nuwe orde kritiek lewer, ‘sterf’ hul woorde in hul ‘Afrikanermonde'”.

Dit prikkel my toe om na Tannie Antjie – die vrou is seker nou al amper sestig en daarop geregtig om met dié eretitel aangespreek te word – se artikel in die Sunday Times te gaan soek. Vir eens werk die ST se soekfunksie en siedaar! ek vind A new ancestor for our alienated Afrikaner youth.

Dis die gewone mengeldrankie van wodka uit die Onsamehangende bottel met ‘n goeie skeut wit skuld daarby, “geskud, nie geroer nie”, soos James Bond sou sê. Vanmôre was Eugene Terre’Blanche op RSG en skielik skiet die gedagte my te binne: Tannie Antjie en Oom Eugene het soveel in gemeen, hulle behoort onderbroeke met of sonder gate uit te ruil.

Want sowel Antjie Krog as ET verteenwoordig die hofnarre van ‘n globale gehoor wat hulself as “Afrikaners” voordoen. ET met sy manne in uniform, swastikavlag en histrioniese stemtoon, asook AK met haar mantel van wit skuld en popsielkunde dramatiseer twee aspekte van die Afrikanerstereotipe: eersgenoemde verpersoonlik die Afrikaner as mislukte opstandeling en laasgenoemde as onderdanige hensopper en Anglo-Amerikaanse rokspantneet.

Behalwe enkele joernaliste en Adriaan Vlok, ken ek geen Afrikaners wat “skuldig voel oor apartheid” nie. Of miskien voel ‘n klomp Afrikaners skuldig – omdat hulle in 1992 tydens die referendum “ja” gestem het. Nie net het ‘n enkele geslag Afrikaners en hul leiers alles verraai waarvoor hul voorgeslagte bloed gesweet het nie, maar hulle het ook die toekomstige geslagte van hul geboortereg en hul vryheid beroof; voorwaar iets om oor skuldig te voel!

Alle verraad – soos alle patriotisme – wentel om identiteit. As iemand wat haar rug op haar eie mense gedraai het, verkeer Antjie Krog onder die indruk dat almal dieselfde identiteitskrisis, dieselfde aangetrokkenheid tot die ANC-identiteit as sy ervaar. Dwarsdeur Suid-Afrika en selfs oorsee is daar ‘n paar miljoen Afrikaners wat geensins twyfel oor hul herkoms of lojaliteit nie.

Krog het vandeesweek weer ‘n krater van haarself gemaak deur te beweer dat Julius Malema se uitsprake verkeerd vertolk word; hy wil maar net hê ons moet hom as swartman verstaan.

In hierdie tydvak van regstellende aksie, swart bemagtiging en alles wat daarmee saamhang, verkeer ons almal onder die indruk van hoe belangrik dit is om swart te wees. In ander samelewings, soos in die VSA en veral in Hollywoodfilms, kry ‘n mens iets soos ‘n “token black”, wat die Hollanders ‘n Beroepsneger noem. Antjie Krog en haar eindelose spekulasies oor die Afrikanerpsige wat sy in Engelse koerante of voor buitelanders lewer, is insgelyks ‘n Beroepsafrikaner, iemand wat ‘n onbelangrike en eintlik vreemde element in ‘n ander kultuur moet verteenwoordig. Sulke mense word gewoonlik gekies op grond van hul toepaslikheid vir die vreemde of meerderheidskultuur.

Antjie Krog is, vanuit die ANC-bewind of die buiteland se oogpunt die “ideale” Afrikaner. Sy is ‘n mak Engelse persoon wat haarself in die Rooitaal uitdruk en slegs ‘n geringe nostalgie oor ‘n kwynende Afrikaans en Afrikanerskap voel. Enigeen kan haar aan ‘n leiband rondlei as ‘n voorbeeld van ‘n “gebore Afrikaner wat tot inkeer gekom het en nou haar onderdanigheid teenoor swartes haar lewenstaak gemaak het”. Haar gunstelingvergelyking vir die Afrikanergeskiedenis is met Nazi-Duitsland. Soos die Nazi’s, het ons ‘n “misdaad teen die mensdom” gepleeg. Daarom voel sy is dit haar opdrag “om die regering te beïnvloed om nie te doen wat (die Afrikaner) gedoen het nie”. Vermoedelik sluit dit die oprigting van suksesvolle kragstasies en werkende staatshospitale in, iets waarvoor ons gelukkig nie die ANC kan kwalik neem nie.

Angjie Krog se histrioniese openbare vertonings van Afrikanerverraad en selfverguising – tot groot vermaak van die Afrikaner se binnelandse en buitelandse vyande – vind die volmaakte teenhanger in Eugene Terre’Blanche se ewe teatrale demonstrasies van platvloerse, kwasi-militaristiese patriotisme.

Buitestaanders kan vir albei ewe hard lag. Albei is ewe dom en bevestig die vermoede dat Afrikaners verdien om verdruk en stadigaan vanuit Suid-Afrika gesuiwer of ten minste geassimileer te word, synde ‘n volk wat uit gekke en narre bestaan.

Dat enigeen vir Antjie Krog ernstig kan opneem, is op sigself ‘n aanduiding van watter verwronge beeld van Suid-Afrika daar in die wêreld bestaan. In een opsig mag dit ons tot voordeel strek, in dié sin dat die Engelse media en die buiteland byna niks van Afrikaners verstaan nie.

Benewens haar narrestatus, mag Antjie Krog die volmaakte verspreider van disinformasie oor Afrikaners wees. Ons word as skuldig, verward, dom en onderdanig gesien. Iewers in Soen-Tsoe of Von Clausewitz was daar mos iets oor: “As jy sterk is, laat die vyand dink jy is swak. En as jy swak is, bring die vyand onder die indruk van jou krag.”

Лобановский

Reitz-studente ‘gaan berou toon’

Prof. Jonathan Jansen, rektor van die Universiteit van die Vrystaat, sê die sogenaamde Reitz-4 gaan voor die einde van die maand in die openbaar verskoning aanteken.

Jansen het Vrydag tydens ‘n noenmaal by die Kaapse Persklub op die vraag gereageer of die studente nie berou moes toon voor hulle weer tot die kampus toegelaat word nie.

“Ek dink dit sou ideaal wees as hulle berou toon en om verskoning vra,” het Jansen gesê.

“En ek glo dit gaan binne die volgende twee weke gebeur. Jy gaan ‘n proses sien wat die land geweldig gaan transformeer.”

Hy het gesê die proses het baie min met hom te doen, maar dat hy bevoorreg is om deel daarvan te wees.

Jansen is geloof en gekritiseer toe hy aangekondig het dat die vier studente vergewe is en weer aan die universiteit kon studeer.

Die vier studente, wat inwoners van die Reitz-koshuis was, is geskors nadat hulle ‘n satiriese video gemaak het waarin swart skoonmaaksters aan die universiteit kos geëet het waarin daar na bewering geürineer is. Dit het agterna geblyk dat dit aanmaaklemoensap was, maar dié feit is deur sowel plaaslike as buitelandse media geïgnoreer.

мозаика Данильченко Харьков

Rassistiese tirade van dronk regter

‘n Vertaling van ‘n klankopname toon dat regter Nkola Motata wel rassistiese stellings gemaak ná hy dronk bestuur het en teen ‘n muur gebots het.

Die Mail&Guardian het ‘n klankopname, wat die aand van die ongeluk in 2007, ontleed en van Sotho na Engels vertaal.

Motata het aan omstanders gesê: “Almal van julle, laat ek vir julle sê, my broers en susters – die mense moet ons nie vang nie. Laat ons lewe. Ons is die meerderheid en dit is ons land. Dit is nie die land van die boere nie, al het hulle ‘n groot liggaamsbou.”

Later sê hy: “Ek word gevang deur die boere, ek gee nie om vir hulle nie. Ek wil nie met hulle praat nie…Hulle moenie dink hulle het my met iets gevang nie, dit gaan nie gebeur nie.”

Motata het telkemale aan Richard Baird, die eienaar van die huis waarteen Motata gebots het, gesê: “F–k hom” of “f–k jou”.

Hy sê ook: “Moet julle nie oor die wittes bekommer nie, dis die waarheid wat moet seëvier.”

Die burgerregtegroep AfriForum het ‘n klag van rassistiese wangedrag teen Motata by die Geregterlike Dienskommissie (GDK) ingedien.

Kallie Kriel, uitvoerende hoof van AfriForum, het aan Sapa gesê al die klankopnames is na die GDK gestuur.

“Ek kan bevestig dat die vertaling waaroor die Mail&Guardian berig, akkuraat is,” het Kriel gesê.

“Ons het die inligting aan die GDK deurgegee en ons glo daar is gronde om teen hom op te tree.”

Marumo Moerane, woordvoerder van die GDK, het aan Sapa gesê dié liggaam het verlede maand vergader en het besluit om te wag tot Motata “al sy kriminele hulpmiddels uitgeput het”.

“Die GDK sal in April weer vergader, maar in die tussentyd sal ‘n sub-komitee van die RDK na die inligting wat kyk aan hom gestuur is.”

Moerane kon nie bevestig of die GDK die klankopname ontvang het nie.

Die DA het Vrydag weer gesê Motata moet bedank.

“‘n Regter wat skuldig is aan ‘n oortreding kan nie ander veroordeel wat die wet verontagsaam nie. Ons verwag dat regters onberispelik moet optree in hul persoonlike en professionele hoedanigheid,” het die DA in ‘n verklaring gesê.

“Dié voorval gee die regbank ‘n slegte naam en regter Motata is dit aan die res van die regbank en die land verskuldig om homself te verwyder, selfs voor AfriForum se klagtes die GDK bereik.”

Motata is in September in die Johannesburgse landdroshof skuldig bevind aan dronkbestuur en ‘n boete van R20 000 of ‘n jaar tronkstraf opgelê. Sy aansoek om verlof tot appèl teen sy skuldigbevinding en vonnis is verlede maand in dieselfde hof van die hand gewys.

Die Mail&Guardian berig dat Motata se regspan intussen aangedui het dat hulle regter-president Bernard Ngoepe in nóg ‘n poging om appèl gaan nader.

стенд для

‘Thatcher is dood’

“Thatcher is dood”

Só het ‘n SMS gelui wat vir ‘n oomblik diplomatieke verwarring onder die lede van die Kanadese parlement en hul raadgewers tydens ‘n formele geleentheid veroorsaak het, het die Kanadese media Vrydag berig.

Dié nuus het soos ‘n veldbrand gedurende ‘n seremonie vir militêre families versprei.

Sowat 2 000 geskokte gaste het gesê hulle beter op die dood van die ystervrou van Brittanje reageer.

Die Kanadese premier se kantoor het die Buckingham-paleis en die presidensiële hoofkwartiere, 10 Downing Street, gebel om Thatcher se dood te bevestig,

Dié oproep het talle Britse amptenare op hol gehad, het die CanWest-nuusagentskap berig.

Dit het egter later aan die lig gekom dat John Baird, die Kanadese minister van vervoer, ‘n boodskap aan iemand by die geleentheid gestuur het om die persoon in kennis te stel dat sy kat (16), vernoem na Margaret Thatcher (84), gesterf het.

Die ontvanger het die boodskap versprei.

‘n Woordvoerder vir die premier, Stephen Harper, was nie beskikbaar vir kommentaar nie.

Godsell weer terug?

Dit lyk of Bobby Godsell op pad terug is na Eskom.

Barbara Hogan, minister van openbare ondernemings, en Godsell, wat Maandag bedank het as Eskom se voorsitter, gaan die naweek ontmoet.

Hogan se kantoor het egter gesê daar kan nie verder kommentaar gelewer word nie omdat die ontmoeting nog nie plaasgevind het nie.

“Dis eintlik Godsell se keuse of hy wil terugkeer na Eskom se direksie toe,” het me. Ayanda Shezi, woordvoerder van die departement van openbare ondernemings, gesê.

Dit volg nadat Hogan op Radio 702 gesê het sy sal bly wees as Godsell sy posisie sou heroorweeg.

Godsell het Maandag bedank nadat die nou voormalige uitvoerende hoof van Eskom, mnr. Jacob Maroga, aanvanklik geweier het om te gaan nadat die direksie sy bedanking aanvaar het.

Godsell het bedank nadat hy met pres. Jacob Zuma vergader het.

Selfoontariewe binnekort laer

Genl. Siphiwe Nyanda, die minister van kommunikasie, het met sy aankondiging in die parlement die “vrywillige” verlaging van die tarief vir interkonneksie vir selfone as ’n Kers- en Paasfeesgeskenk vir die verbruiker bestempel. Interkonneksie-tariewe gaan met 36c daal.

Die interkonneksie-tarief is die bedrag wat een netwerk aan ’n ander moet betaal om ’n oproep na die ander netwerk oor te skakel. Dié tarief is van die hoogste in die wêreld.

’n Verlaging in dié tarief sal die selfoonnetwerke in staat stel om ook gewone selfoontariewe te verlaag.

Dit volg nadat die Onafhanklike Kommunikasie-owerheid van Suid-Afrika (Okosa) voorgestel het dat die netwerke self met mekaar onderhandel en ’n laer tarief beding.

Nyanda moes verlede maand egter ’n nuwe beleidsvoorskrif by die parlement indien omdat selfoonoperateurs traag was hulle winste in te boet.

Die portefeuljekomitee gemoeid met die kwessie wou interkonneksie-tariewe met tot 60c verlaag. Netwerke het daarna dadelik onderneem om nuwe en bekostigbare kleinhandelprodukte reeds in Desember vanjaar in te stel.

MTN en Vodacom het die 36c voorgestel omdat ’n drastiese verlaging in tariewe hul sakemodelle sou beïnvloed en voorgestel dat die tariewe eerder stelselmatig verlaag moet word.

Nyanda het gesê dié verlaging sal meer mededingendheid in die mark sal bring.

Nyanda het sy beleidsvoorskrif onttrek om die proses verder aan te help.

“Ons is bly dat die bedryf ’n vroeë oplossing gevind het tot die kwessie van laer selfoon-interkonneksie-tariewe,” het mnr. Shameel Joosub, besturende direkteur van Vodacom Suid-Afrika gesê.

Vodacom en Cell C se tarief sal van R1,25c tot R0,89c in spitstye verlaag word en dit sal reeds in Februarie van krag wees.

MTN se verlagings tree eers in Maart in werking.

каталки детские