openbare geweld – Bladsy 4

Oproer saai oral chaos

‘n Vierde skool is by Khakhanwa in Malamulele in Limpopo aan die brand gesteek omdat hulle klasse voortgesit het.

Ouers het die skool probeer bewaak te midde van die laaste vier weke se oproer in die gebied.

Drie skole in die gebied is vroeër dié week ook aan die brand gesteek.

Dienste en toegang tot die gebied is steeds versper. Oproer in die gebied duur reeds sowat vier weke met Tsongas wat ‘n aparte munisialiteit eis.

Intussen sê die Malamulele-taakspan die Tsongas sal Sondag besluit of hulle protes gaan opskort. ‘n Woordvoerder, Isaac Nukeri, het met die minister van polisie, Nathi Nhleko en die minister van staatsveiligheid, David Mahlobo, gesprek gevoer.

In ‘n ander voorval van openbare geweld, het Jacob Mamabolo, LUR vir samewerkende regering in Gauteng, Woensdag gesê dit was EFF-lede wat munisipale geboue aan die brand gesteek het tydens oproerigheid in Mohlakeng buite Randfontein.

“Die EFF-lede het op ‘n plundertog gegaan en munisipale eiendomme aan die brand gesteek en alle paaie en ingange na die gebied versper, en die gemeenskap is verhoed om te gaan werk,” het Mamabolo gesê.

Die burgemeester se huis en motor, die biblioteek, munisipale kantore en die stadsaal is van die eiendomme wat in ligte laaie gelaat is.

Volgens Mamabolo het die betogers ook winkels, wat deur buitelanders besit word, geplunder.

Inwoners het Woensdagoggend op ‘n plundertog uitgevaar. Christina Mabala, voorsitter van die EFF se Wes-Rand-tak, het egter gesê ANC-lede het die brande begin.

“Sommige mense binne die ANC het besluit om die geleentheid te gebruik om eiendomme te brand en te plunder. Ons as die EFF distansieer onsself van die gewelddadige optrede en skade aan eiendom,” het sy gesê. Sy het gesê die beskuldigings is vals.

Mabala het gesê die EFF het ‘n optog gereël van Mohlakeng na Randfontein om hul griewe aan die burgemeester te oorhandig.

Volgens Mabala het die polisie met rubberkoeëls op die betogers losgebrand.

In nog ‘n voorval van openbare geweld, het die polisie Woensdag met rubberkoeëls op betogers in Majakaneng, naby Mooinooi in Noordwes, losgebrand.

Brig. Thulani Ngubane, woordvoerder van die polisie, het gesê die oproeriges het dele van die N4 met hekke, klippe, bome en brandende bande versper. Volgens Ngubane het die betogings Maandag begin.

Sewe betogers is in hegtenis geneem en sal aangekla word van openbare geweld en kwaadwillige saakbeskadiging.

‘n Bus is aan die brand gesteek en twee winkels, wat aan buitelandse behoort, geplunder. Inwoners is glo ongelukkig oor water- en elektrisiteitstoevoer in die area.

Biskop Paul Verryn van die Metodistekerk en ‘n kollega wat probeer het om dialoog te bevorder, is met klippe bestook. Verryn en sy kollega is nie beseer nie.

Hoofpaaie was Woensdag gesluit nadat die oproeriges motoriste tussen Rustenburg en Pretoria met klippe bestook het. Die pad tussen Mooinooi en Brits was ook gesluit.

Die departement van gemeenskapsveiligheid in Noordwes het gesê drie vragmotors en ‘n voertuig is Dinsdagaand aan die brand gesteek.

Niemand is nog in hegtenis geneem in verband met die voorval nie.

Oproer oor waterplan by Brits

Die burgemeesterskomitee van die Madibeng-munisipaliteit in die Noordwesprovinsie sukkel om die situasie in Majakaneng onder beheer te kry nadat inwoners – hoofsaaklik jong swart mans – met die polisie slaags geraak het oor water.

Vroeër dié week het die komitee met die leiers van die amokmakers ooreengekom en besluit om saam te werk om die waterprobleme in die gebied op te los.

Die burgemeester van die gebied Jostina Mothibe was nie teenwoordig nie, maar haar komitee het ‘n tydperk van twee tot vier weke gevra om die beskadigde pype en lekkasies in die watertoevoer te herstel.

‘n Verteenwoordiger van die burgemeester, Kabelo Ntshabele het gesê die voorsiening van water is ‘n prioriteit vir die regering. Premier Supra Mahumapelo het verlede maand ‘n water- en sanitasieplan aangekondig om die probleme in die provinsie aan te pak.

Hy is in ‘n vennootskap met die Ontwikkelingsbank van SA en die groot projek sal glo meer as R350 miljoen kos.

Alle water infrastruktuurplanne moet glo teen die einde van Maart voltooi wees en inwoners moet gereeld ingelig word oor die vordering.

Intussen het daar van die skikking tussen die burgemeester en die oproermakers dadels gekom en drie vragmotors is op die N-4 snelweg by Majakaneng naby Brits aan die brand gesteek.

Verkeer tussen Pretoria en Rustenburg is vroeër tot stilstand gedwing nadat verskeie voertuie ook met klippe bestook is.

Van die oproeriges sê hulle het hulle tot dié vlakke van geweld gewend om seker te maak dat die regering spoedig aandag skenk aan hulle griewe.

Hulle sê dis die enigste taal wat die regering verstaan.

Polisie skiet op Diepslootgrondbesetters

Die Gautengse polisie moes ‘n tierend swart skare met rubberkoeëls verwilder nadat hulle probeer het om ‘n stuk grond tussen Pretoria en Johannesburg te beset.

A.o. Daniel Mavimbela, polisiewoordvoerder, het gesê ‘n groep van nagenoeg 100 mense het vroeër op ‘n oop stuk grond in die ooste van Diepsloot toegesak en onwettig beset.

Volgens Mavimbela het die skare toegang met brandende bande en ander voorwerpe versper en was die toestand Saterdag gespanne.

‘n Mag is in die gebied ontplooi nadat die polisie met klippe bestook is. Die skare is met rubberkoeëls verwilder.

‘n Vierjarige het ‘n besering aan sy bolyf opgedoen en is na ‘n hospitaal geneem vir behandeling en ‘n volwassene is vir openbare geweld in hegtenis geneem.

Polisie ontplooi na pamflet chaos aanmoedig

Die polisie in Noordwes is op ‘n gereedheidsgrondslag ná ‘n pamflet die rondte gedoen het waarin swart inwoners van Bloemhof aangepor word om met ‘n weeklange wegbly-aksie te begin, het RSG berig.

Die wegbly-aksie is daarop gemik om steun te verleen aan mense wat in die hof moet verskyn in verband met diensleweringsbetogings in Maart verlede jaar.

Die hofsaak van meer as 80 mense wat aangekla word van onder meer openbare geweld, opsetlike saakbeskadiging en brandstigting, begin vandeesweek.

Die woordvoerder van die polisie, Keaoleboga Majikela sê die polisie is gereed vir enige onwettige optrede wat mag volg.

Die burgemeester van die Lekwa Teemane-munisipaliteit, Kagiso Palagangwe het intussen die organiseerders van die wegbly-aksie gekritiseer. Hy sê dit is onwettig en dat daar opgetree sal word teen diegene wat aan die wegbly-aksie deelneem.

Amerikaanse polisiegeweld lei tot wit skuld-orgie

Kort nadat ‘n besluit van die groot jurie bekend geword het om nie ’n polisiebeampte te vervolg vir die dood van Eric Garner in Julie vanjaar nie, het honderde betogers by die Rockefeller-sentrum en in New York se Times Square byeengekom en die slagspreuk “Geen geregtigheid, geen vrede” begin skree.

Dit was ook die slagspreuk nadat ‘n ander groot jurie verlede week besluit het om nie die wit polisieman te vervolg wat ’n ongewapende swart tienermisdadiger, Michael Brown, in Ferguson, Missouri doodgeskiet het nie.

Dit is die vyfde dag dat betogings oor rasse-ongelykheid in die VSA gehou word. In Chicago, Miami en Philadelphia het kerke die massa-aksie gesteun.

Daar is reeds 300 mense in hegtenis geneem vir openbare geweld regoor die land. In Kalifornië moes die polisie klipgooiers met traangas verwilder.

Die polisie het Woensdagnag nagenoeg 30 mense in New York in hegtenis geneem, het die polisiebevelvoerder van die stad, Bill Bratton, gesê. Vroeg Donderdagoggend het die protes nog voortgeduur.

‘n Reeks klein protesbyeenkomste het saamgekom en tot ’n opmars van byna 5 000 mense in Broadway-rylaan tot by Times Square gelei.

Motorbestuurders wat in yslike verkeersknope vasgesit het, het hul toeters geblaas. Organiseerders het die getoet as ‘n teken van solidariteit verklaar.

Albei gevalle, saam met die dood van ’n 12-jarige swart seun wat deur polisie doodgeskiet is toe hy ’n speelgoedpistool in ’n speelpark uitgehaal het, het die ou debat in Amerika oor rassebetrekkinge weer laat opvlam.

Alhoewel wit wetstoepassers daarvan beskuldig word dat hulle Afro-Amerikaners met oor-aggressiewe polisiëring teister, is die protesoptogte gemik daarop om wit skuld uit te buit.

Sedert Brown geskiet is, is daar meer as 900 mense in Chicago doodgeskiet, meestal in swart-op-swart geweld.

Ná Woensdag se juriebesluit, het die prokureur-generaal, Eric Holder, gesê die Amerikaanse departement van justisie sal ’n federale burgerregte-ondersoek gelas na die saak van Eric Garner, 43, wat dood is nadat hy deur ’n New Yorkse polisieman, Daniel Pantaleo, in ’n wurggreep vasgehou is.

Garner is aangekeer na vermoed is dat hy sigarette waarop nie belasting betaal is nie, op Stateneiland verkoop het.

Die bruin komediant Trevor Noah – terloops erg ongewild by die meeste swart Suid-Afrikaners – het as gas op die Daily Show gegrap dat die VSA met swak rasseverhoudinge spog sonder dat hulle apartheid daarvoor kan blameer.

Numsa hits lede verder aan na openbare geweld

Lede van die metaalwerkersvakbond Numsa sal hulself glo tot verdere openbare geweld wend op Rustenburg in Noordwes.

Die stakers wil die polisie dwing om 13 van sy lede wat deel was van ‘n betoging buite die Rustenburgse Ingenieursentrum, vry te laat.

Die vakbond het reeds borgtog vir al sy lede betaal. Die lede sal aangekla word weens openbare geweld en saakbeskadiging.

Numsa se plaaslike organiseerder, Mere Boas, het berigte ontken dat van hulle lede die vensters van eiendomme stukkend geslaan het.

Die polisie sê hulle het die lede in hegtenis geneem weens beskadiging van stadseiendom.

Numsa is besig met ‘n landwye veldtog om stakers tot verset aan te hits.

Die vakbond het stakers aangemoedig om aan te hou “betoog” buite hul werkplekke as deel van die volgehou landwye staking.

Die staking het die land se ekonomie byna reeds tot ‘n stilstand gebring met die vakbond wat ‘n tien persent verhoging per jaar eis.

Berigte van grootskaalse intimidasie en geweld is vanaf die begin van die staking aangemeld by die meeste fabrieke.

Vyftig Numsa-stakers vir openbare geweld vas in Gauteng

Die polisie in Gauteng het meer as vyftig stakende werkers van die metaalwerkersvakbond Numsa in hegtenis geneem vir openbare geweld en kwaadwillige saakbeskadiging.

Volgens die polisie is 40 mense in Germiston in hegtenis geneem nadat die perseel van ‘n staalmaatskappy onder klippe gesteek is.

Een staker is ook in hegtenis geneem vir die besit van ‘n wapen.

Dertien mense is in Brakpan in hegtenis geneem nadat hulle ‘n vragmotor met klippe bestook het.

N2 in Oos-Kaap sluit na openbare geweld

Oproerigheid het daarvoor gesorg dat talle mense in hegtenis geneem is in die Oos-Kaap vir openbare geweld.

Die polisie was uiteindelik genoodsaak om traangas en skokgranate te gebruik om die skare uiteen te jaag.

Oproermakers het die die N2 tussen Oos-Londen en King William’s Town versper.

Die inwoners van Tshabo het buitebande op die pad aan die brand gesteek en verkeer ure lank ontwrig.

Die oproeriges eis dat ‘n raadslid bedank, nadat hy nie sy beloftes oor behuising nagekom het nie.

Swart jeugdiges val buitelanders aan in Limpopo

Die polisie in Limpopo het vyf-en-twintig mense, onder wie verskeie tieners, is in hegtenis geneem na ‘n plundertog teen buitelanders.

In Gilead, buite Ellisras (Lephalale) in Limpopo is die winkels van buitelanders aangeval en besteel.

Die polisiewoordvoerder, Hangwani Mulaudzi, sê die skare het die winkels aangeval nadat hulle die buitelanders van misdaad beskuldig het.

Mulaudzi sê die verdagtes sal binnekort op aanklagte van openbare geweld en roof in die hof op Gilead verskyn.

Veertig vas vir oproer by Bloemhof

Die polisie het 40 mense by Bloemhof in Noordwes in hegtenis geneem vir openbare geweld.

Die gewelddadige oproer was teen buitelanders en die burgemeester van Lekwatemane, Moeder Makodi gemik.

Oproerige inwoners van die Boitumeleng-township het Woensdagaand ‘n aantal eiendomme beskadig wat aan die burgemeester behoort.

Die woedende skare het die bedanking van die burgemeester en haar raad geëis.

Winkels wat aan buitelanders behoort is ook geplunder. Die buitelanders is deur die polisie is na ‘n plek van veiligheid gebring, terwyl inwoners besig was om ‘n vergadering te belê.

Die betogers sê die munisipaliteit is nepotisties, korrup en het hulle van gebrekkige dienslewering beskuldig.

Inwoners sê dienslewering het nog nie in die gebied sedert 1994 verbeter nie.

Oproeriges vas by Brits, polisie skiet kind by Tzaneen

Die polisie in Noordwes, het Dinsdag vyf verdagtes in hegtenis geneem by Brits, in Majakaneng Village naby Mooinooi vir brandstigting, kwaadwillige beskadiging van eiendom, intimidasie, aanranding en openbare geweld.

Die inhegtenisneming volg na ‘n intensiewe ondersoek oor gevalle wat gedurende Majakaneng-oproer op 27 en 28 Februarie 2014 geregistreer is.

Van die vyf verdagtes, staar een ‘n aanklag van openbare geweld in die gesig, nog een brandstigting, terwyl die ander drie tereg staan op aanklagte van brandstigting, kwaadwillige beskadiging van eiendom, intimidasie, aanranding.

Die verdagtes se ouderdomme wissel van tussen 23 en 28. Hulle sal almal Woensdag in Brits-landdroshof verskyn. Ondersoeke rakende die saak duur voort.

Intussen is ‘n sewejarige swart meisie na bewering deur die polisie geskiet en beseer in oproer by Lorraine buite Tzaneen in Limpopo.

Dit volg nadat inwoners Sekororo paaie met klippe, brandende bande en ander voorwerpe versper het.

Die inwoners betoog oor ‘n beplande winkelsentrum in die gebied. Verskeie mense is reeds vir openbare geweld in hegtenis geneem.

Die kind is met ‘n kopbesering in die hospitaal opgeneem, maar is glo in ‘n bevredigende toestand.

Paaie na 25 dorpies in die gebied is steeds versper.

Paaie in Kaapstad gesluit weens oproer

Na brandstigting en openbare geweld is 46 mense is in Montague Gardens in Milnerton in Kaapstad in hegtenis geneem.

‘n Oproerige groep inwoners van Joe Slovo Park het ‘n bus aan die brand gesteek. Volgens die polisie het die oproermakers die bestuurder uit die bus gedwing nadat hulle gedreig het om die bus aan die brand te steek.

Hulle het die bus in ligte laaie gelaat nadat die bestuurder uitgeklim het. Die groep is vermoedelik dieselfde mense wie se plakkershutte verlede week gelykgeskraap is.

Die Stad Kaapstad het die plakkershutte vernietig omdat hulle nie aan ‘n hofbevel gehoor gegee het nie.

Verskeie paaie in die Kaapse Skiereiland is tans gesluit weens gewelddadige oproer.

Inwoners het paaie met brandende buitebande versper en verkeersligte beskadig. Verbygaande motoriste word ook met klippe bestook.

Die polisie en die verkeersdienste is in die gebied ontplooi.

Die woordvoerder van die Kaapstadse verkeersdiens, Maxine Jordaan sê die R-300 tussen Highlands en Oliver Tambo, en tussen Govan Mbeki en Simfonieweg is gesluit.

Jordaan het motoriste aangeraai om versigtig te wees en waar moontlik alternatiewe roetes te gebruik.

Die polisie is ook op die N2 ontplooi waar verkeer nog vryelik vloei.

Polisie skiet glo nog twee oproermakers in Limpopo

Die polisie in Limpopo sê hulle het geen ander keuse gehad nie as om hulself te verdedig teen die oproerige inwoners in Rhelela buite Tzaneen.

Hangwani Mulaudzi , polisiewoordvoerder, het het gereageer op die dood van twee lede van die gemeenskap wat omgekom het na skote buite ‘n satellietpolisiestasie in die gebied Dinsdagnag weerklink het.

Woedende inwoners is sedert Vrydag verlede week in oproer ná die noodlottige skietery van ‘n 15-jarige seun en die moord van ‘n 20-jarige vrou.

Hulle het ‘n satellietpolisiekantoor aangeval en beamptes met klippe gegooi. Die aanval het gevolg nadat woedende inwoners deur ‘n provinsiale leier van die Ekonomiese Vryheidsvegters toegespreek is.

Skote is afgevuur wat gelei het tot twee sterftes. Die skare is verwilder nadat die polisie versterkings ingeroep het.

Agt mense is dood in botsings tussen oproermakers en die polisie in die afgelope twee weke.

Sedert Vrydag is vier mense reeds in Rhelela dood

Gautengse premier betig oproermakers in Bekkersdal

Gauteng se premier, Nomvula Mokonyane, het Sondag in Bekkersdal aan die Wesrand verklaar dat sy nie deur betogers geïntimideer sal word nie.

“Ek sal nooit van enigiets weghardloop nie. Ek sal nie weghardloop van ons mense terwyl hulle ‘n ’n krisis verkeer nie.” Seweduisend inwoners het opgedaag om haar te troef.

Paaie in die lokasie is Sondag met klippe en brandende boomstompe versper. Skole en eksamens is ook ontwrig. Inwoners eis onder meer dat die burgemeester van Westonaria, Nonkuliso Thunzi, die trekpas kry.

Die betogings duur nou al weke lank en 59 mense is reeds in hegtenis geneem vir poging tot moord, diefstal en openbare geweld.

Mokonyane sê sy het gehoor daar word geëis dat dié mense vrygelaat word anders sal die plundery voortduur. Hierop het sy gesê die regering “sal nie as gyselaar aangehou word nie”.

Sy het inwoners skerp gekritiseer omdat hulle Sondag kerkdienste ontwrig het, iets wat selfs nie in die apartheidsjare gebeur het nie. “Kerke was ons vestings,” het sy gesê.

Die polisie is in die gebied ontplooi. Die oproerige inwoners sê hulle sal aanhou totdat die Westonaria plaaslike munisipaliteit onder administrasie geplaas word.

Hulle het Sondag met Gautengse regeringsamptenare vergader om die swak dienslewering in die munisipaliteit te bespreek.

Die regering het onderneem om die bewerings van korrupsie in die munisipaliteit te ondersoek.

Thunzi sê die inwoners keer dat die munisipaliteit sy werk kan kom doen, soos vullisverwydering. – Sapa