'n Groot ontploffing het Athene, die hoofstad van Griekeland, Woensdag geruk en skade aan die Griekse aandelebeursgebou aangerig.
'n Vrou is ook beseer deur glasskerwe van die ontploffing en 'n aantal motors is beskadig, volgens wat die staatstelevisie berig.
Om en by dieselfde tyd wat die aanslag in Athene plaasgevind het, het 'n ander ontploffing Thessaloniki, die noordelike hawestad, getref. Die plofstof is voor 'n regeringsgebou geplaas, maar het nie groot skade aangerig nie.
‘n Polisieman en ‘n passasier is Dinsdagaand aan boord die snelbusdiens (BRT) gewond nadat skote vanuit ‘n minibus in Soweto op hulle gevuur is.
Volgens insp. Kay Makhubela, polisiewoordvoerder, het ‘n Toyota Quantum-minibus die snelbus agtervolg en buite die Nancefield hotel op die insittendes losgebrand.
“’n Polisieman is in die been getref en ‘n onbekende passasier is ook gewond. Albei is in die hospitaal opgeneem,” het Makhubela gesê.
Niemand is nog in hegtenis geneem nie. Daar is nie sekerheid oor hoeveel mense aan boord die snelbus was nie.
Die BRT is Sondag tydens ‘n spoggeleentheid geopen. Taxi-bestuurders is ongelukkig oor die snelbusdiens omdat hulle glo dit sal die einde van hulle werk beteken.
Drie Amerikaners is uit Kambodja geskop weens aanklagte van seksuele misdrywe teen kinders.
Ronald Boyajian, Erik Peeters en Jack Sporich word daarvan aangekla dat hulle oorsee gereis het om seks met kinders te hê.
Hulle is die eerste oortreders wat as deel van “Operation Twisted Traveler” aan die pen ry.
“Twisted Traveler” is ‘n inisiatief vir die bekamping van kinderseks-toerisme in Kambodja.
Die trio het Dinsdag vir die eerste keer in verband met die aanklagte voor die hof verskyn. Hulle het Maandag van Kambodja teruggekeer.
‘n Landdros het gesê die drie seksmisdadigers sal in aanhouding bly tot en met hul verhoor op 21 September.
Boyajian, Peeters en Sporich, het al drie kriminele rekords vir vorige seksuele misdrywe.
Die operasie aan president Jacob Zuma se oog het goed verloop, berig die militêre gesondheidsdienste.
Volgens Lt.genl. Vejay Ramlakan, geneesheer-generaal, was die prosedure ‘n sukses en sal Zuma ten volle herstel binne die volgende paar dae.
“Zuma sal teen Woensdag weer gereed wees om te kan werk,” het Ramlakan gesê.
Die operasie is in Durban gedoen. Die mediese besonderhede is egter nie bekendgemaak nie.
Sowat 2000 afdankingsbriewe is uitgestuur aan soldate wat verlede week aan 'n onwettige optog deelgeneem het, het die minister van verdediging Dinsdag gesê.
"Daar is tussen 1500 en 2000 mense wat ons ondersoek. Ons het kennis van hulle afdanking uitgestuur en hulle het 10 dae om daarop te reageer”, het Ndivhuwo Mabaya, ‘n woordvoerder vir die minister gesê.
Pikkie Greef, nasionale sekretaris van die vakbond Sandu – wat die soldate verteenwoordig – het gesê hulle beplan om 'n hofinterdik aan te vra om die afdankingsbriewe te laat terugtrek.
Sasfu, nog 'n unie, het 'n vergadering met Lindiwe Sisulu, minister van verdediging, aangevra om die briewe te laat terugtrek.
Die Suid-Afrikaanse Nasionale Weermag, wat 62 000 mense sterk is, het onder skoot gekom vir die gebrek aan dissipline wat tans heers.
Die regering het sy afkeur van die optog, wat op 26 Augustus na die Uniegebou onderneem is, uitgespreek.
Die gewelddadige optog is deur lede van die polisie met rubberkoeëls en traangas uitmekaar gejaag toe hulle by die Uniegebou probeer inbreek het. 'n Polisievoertuig is ook aan die brand gesteek volgens beeldmateriaal wat op die SAUK vertoon is.
"Om ‘n hofbevel teen te staan en in die Uniegebou te probeer inbreek is heeltemal onaanvaarbaar, veral van mense wat verantwoordelik is vir die verdediging van ons land”, het Themba Maseko, regeringswoordvoerder, gesê.
Die Suid-Afrikaanse Raad van Kerke het eweneens 'n ontmoeting met Sisulu aangevra om die kwessie te probeer besleg. Eerwaarde Vuyani Vellem het gesê die SARK ondersteun albei partye. Die weermag moet dissipline handhaaf, maar die soldate het ook die reg om hulleself uit te druk, het hy gesê.
Cosatu het ook aangebied om te help om die geskil op te los.
Die Kommunistiese Jeugliga en die Pan-Afrikanistiese Beweging het in onderskeie verklarings die geweld veroordeel, maar het die soldate ondersteun in hulle griewe.
Russell Kaplan, die regsverteenwoordiger van Brandon Huntley, sê sy kliënt is waarskynlik die eerste wit Suid-Afrikaner wat asiel in Kanada gegee is omdat hy deur swartes bedreig word.
Huntley het gesê die geweld wat witmense moet verduur is vanweë velkleur en 'n haat weens die verbeeld onregte wat teen swartes gepleeg is.
Die asielsoeker, 31, is sewe keer deur swartes aangeval – dit sluit drie mesaanvalle in – wat hom wou beroof.
Dat hy gedurende hierdie aanvalle 'n "wit hond" en 'n "setlaar" genoem is, is 'n verwysing na die apartheidsverlede van Suid-Afrika wat op ras gegrond was.
"As jy geld het, kan jy jouself beskerm," het Huntley gesê. Hy het verduidelik dat gewapende veiligheidspersoneel ryk wit Suid-Afrikaners beskerm.
Huntley het sy "subjektiewe vrees vir uitdelging as konstant en konsekwent beskryf" totdat hy sy asielaansoek ingedien het, het die raad wat daaroor besluit het, bevind.
Die besluit het ook berus op die getuienis van Laura Kaplan, 41, die suster van Huntley se regsverteenwoordiger. sy het verlede jaar van Suid-Afrika na Kanada geëmigreer.
Laura Kaplan het vertel hoe haar ander broer Robert deur 'n bende van 10 swartes in 1997 oorval is wat by sy huis ingebreek het en hom agt ure lank gemartel het, daarna geskiet en vir dood gelaat het.
Die voorsittende beampte het die getuienis van Huntley en Laura Kaplan beskryf as "vervolging" van wittes deur swartes omdat die regering afsydig daarteenoor staan en nie sy wit burgers kan of wil beskerm nie.
Die ANC bestempel Kanada se besluit om die Suid-Afrikaner, Brandon Huntley, vlugtelingstatus toe te ken, as rassisties.
“Suid-Afrika is ‘n demokrasie met staatsdepartemente om misdaad te beveg. Dit is een van die ANC se hoofprioriteite, sonder voorkeur tot enige ras, slagoffer of oortreder”, het Brian Sokutu, ‘n ANC-woordvoerder, gesê.
Volgens Sokutu beskou die ANC ook Huntley se beweringe dat hy sewe keer deur Afrikane aangeval is as gevolg van die kleur van sy vel en sonder enige optrede deur die polisie, as sensasioneel en kommerwekkend.
Die party sê Kanada se besluit om Huntley vlugtelingstatus toe te ken omdat hy vervolg sou word sou hy na Suid-Afrika terugkeer, is rassisties.
“President Jacob Zuma het tydens sy 2009 Staatsrede gesê ál die land se burgerlike beskermingseenhede beoog om die misdaadkrisis aan te vat”, het Sokutu gesê.
Die Britse regering het besluit dit is "in die oorweldigende belang van die VK" om Abdelbaset Ali Mohmed al-Megrahi, die Lockerbiebomaanvaller, na Libië te laat terugkeer, volgens ministeriële briewe wat gelek is aan die media.
Gordon Brown se regering het die besluit geneem ná besprekings tussen Libië en BP, nadat 'n multimiljardpondooreenkoms begin vasval het.
Die sogenaamde probleme is dadelik na die vrylating van die voormalige terroris opgelos.
Jack Straw, eertydse minister, het die briewe twee jaar gelede aan Kenny MacAskill gestuur en laasgenoemde word veral gekritiseer vir sy rol in die vrylating van al-Megrahi.
Die aard van die korrespondensie wat deur die briewe openbaar is, maak dit duidelik dat die besluit vir die vrylating in Londen geneem is, in nasionale belang.
Lede van die opposisie sê dit is die sterkste getuienis tot nog toe dat die samesprekinge al lank aan die gang is en dat kommersiële oorwegings die botoon gevoer het.
Die ontginningsooreenkoms vir olie en gas wat 'n geraamde £15 miljard werd is, is in Mei 2007 aangekondig, maar is eers bekragtig nadat die bomaanvaller se vrylating verseker is.
BP het ontken dat politieke faktore 'n oorweging was.
'n Kosbare stuk in 'n nasionale museum in Nederland blyk nou niks meer as 'n stuk versteende hout te wees nie. Dit was veronderstel om 'n maanklip te wees van die eerste maanlanding, volgens die kurators.
Die "maanklip" is aan 'n voormalige eerste minister Willem Drees gedurende 'n welwillendheidsbesoek van die drie Apollo-11 ruimtemanne geskenk kort ná hulle maanreis in 1969.
Ná Drees se afsterwe is die stuk klip aan die Amsterdamse museum geskenk waar dit tentoongestel is.
Op een stadium was dit vir die bedrag van bykans $500,000 verseker, maar toetse het bewys dat dit nie die ware Jakob is nie.
Die Rijksmuseum, beter bekend vir skilderye van kunstenaars soos Rembrandt, sê hulle gaan die rare voorwerp hou.
"Dis 'n goeie storie, met sekere vrae wat nog beantwoord moet word," sê Xandra van Gelder. Sy het die ondersoek wat die klip as 'n vervalsing uitgewys het, gelei.
"Ons kan daaroor lag."
Die "maanklip" is oorspronklik deur NASA per telefoon gewaarborg as synde die ware artikel.
Die Amerikaanse ruimteagentskap het "maanklippe" aan meer as 'n 100 lande uitgedeel na maanreise in die sewentigerjare.
Amerikaanse amptenare het gesê hulle het geen verklaring vir die Nederlandse ontdekking nie.
Kommersiële boere in die Noordwesprovinsie en die SA menseregtekommissie het ooreengekom om om saam te werk waar gevalle van menseregteskendings ter sprake is, het die landbou-organisasie Agri-Noordwes gister gesê.
President Andries Beyers het gesê die liggaam sal in die toekoms in kennis gestel word van alle nuwe plaasverwante menseregteskendings in die provinsie wat by die SAMRK aanhangig gemaak word.
"Ons sal help met die verskaffing van feite en inligting om hulp te verleen by die betroubaarheid en meriete van klagtes," het Beyers in 'n verklaring gesê.
Die uitvoerende beampte van Agri-Noordwes, Boeta du Toit, het gesê die regte van boere, hul werkers en gesinne sou die beste beskerm word indien ondersoeke na menseregteskendings objektief geskied.
"Organe van die staat soos die MRK moet objektief en onpartydig gedurende ondersoeke wees."
Agri-Noordwes het gesê die kongres van SA vakbonde, oftewel Cosatu, het in die verlede lasterlike aantygings in die provinsie gemaak en kwaadwillige gerugte oor boere versprei.
Du Toit het gesê die boerderyliggaam beskou sulke bewerings in 'n ernstige lig aangesien hulle op haatspraak neerkom en 'n klimaat vir plaasaanvalle skep.
Cornelius Jansen van Rensburg het onvoorwaardelik sy verskoning aan die leier van die VF Plus, dr. Pieter Mulder en die VF Plus as party, aangebied.
Dit volg nadat Jansen van Rensburg skuldig bevind is deur die party se Federale Regskomitee dat hy die VF Plus se grondwet oortree het.
Die oortreding was dat hy uitsprake in die media gemaak het wat getuig het van wantroue, disrespek en dislojaliteit teenoor die Vryheidsfront Plus en sy nasionale leier en dat hy nie die interne kanale in die party daarvoor gebruik het nie.
Die VF Plus se Federale Raad, as hoogste gesagsliggaam, het Jansen van Rensburg sy lidmaatskap van die VF Plus laat behou, maar hy is verwyder uit alle ampte van die VF Plus-jeug, asook as onderleier van Gauteng.
Hy behou egter sy amp as raadslid van Pretoria. Sou hy in die volgende vyf jaar ‘n soortgelyke oortreding begaan, sal sy lidmaatskap summier beëindig word. Jansen van Rensburg het die besluit aanvaar en onvoorwaardelik sy verskoning aangebied.
Eerste Nasionale Bank (ENB) se beleggers bestaan grotendeels uit jong swartmense, het die bank Maandag bekend gemaak.
”Die profiel van die beleggingsgemeenskap verander vinnig met jong en opgeleide swartmense wat die leiding neem,” het die bank in ’n verklaring gesê.
Dit is ’n positiewe stap vir Suid-Afrika aangesien die land poog om ’n spaarkultuur onder sy burgers te probeer stimuleer, het ENB gesê.
Die ENB spaar-/beleggingsboek het getoon dat swart mense voorloop met 57%, wit mense met 28%, Indiërs met 8% en bruin mense met 7%.
Die gemiddelde ouderdom van beleggers is nou 40, in vergelyking met 50 in 2003 toe wit mense die voortou geneem het met 50%, het ENB gesê.
“Swart mense is die jongste beleggingsgroep met ’n gemiddelde ouderdom van tussen 25 en 34 jaar en hulle het meer opleiding as hul wit eweknieë,” het ENB gesê.
Die styging in die aantal mense wat belê, is ’n resultaat van mense wat besef hulle moet spaar, het Robert Keip, hoof van beleggings by ENB, gesê.
“Die navorsing wys dat aftrede die grootste spaarprioriteit vir alle inkomstegroepe is.
“Ongeag die styging van mense wat vir aftrede spaar, toon baie opnames dat slegs 6% van Suid-Afrikaners genoeg geld spaar vir hul aftrede,” het hy gesê.
Verkragtings onder skoolkinders het met 100% in Londen gestyg – wat die direkte gevolg is van die kolonisering van die Britse hoofstad deur gekleurdes vanuit die derde wêreld. Ten minste 40 persent van die stad se bevolking onder 20 jaar is nie-inheems.
Dié skokkende seksmisdaadsyfers is deur die metropolitaanse polisie uitgereik. Natuurlik is die syfers nie in verband gebring met die rassesamestelling van die bevolking nie, maar 'n onlangse streekstendensverslag wat deur Whitehall vrygestel is, toon dat meer as 700 000 kinders en tieners in Brittanje as nie-blank geklassifiseer word en reeds 40 persent van daardie ouderdomsgroep in Londen uitmaak.
In die geheel het verkragtings oor die afgelope vyf jaar verdubbel en aangemelde seksuele aanrandings het van 165 in 2004/5 na 346 in 2008/9 opgeskiet. Hierdie syfers verwys na gevalle wat op skoolgronde plaasvind.
Volgens die metropolisie se syfers is byna 900 jong seuns en dogters aan seksuele aanrandings waaronder verkragting oor die afgelope vyf jaar in Londen se laer- en hoërskole blootgestel.
Die metropolisie sê dat kinders so jonk as vier jaar oud bewerings van verkragting gemaak het. Kommandeur Mark Simmons sê dat die totale aantal seksuele aanrandings wat aangemeld word waarskynlik slegs 10 persent van die ware syfer verteenwoordig.
"Ons wil jongmense aammoedig om vir ons te vertel wat gebeur het. Ons wil hulle verseker dat daar opgetree sal word," het kommandeur Simmons verklaar en bygevoeg dat die polisie reeds 180 voltydse polisiebeamptes aan bepaalde skole in Londen toegewys het om kinders te beskerm.
Die metropolisiesyfers toon dat 52 kinders onder die ouderdom van 18 in laer- en hoërskole sedert 2004 verkrag is. In dieselfde tydperk was daar 763 slagoffers van ander seksuele aanrandings wat "penetrasie en betasting" ingesluit het.
Verkragtingskuldigbevindings het in een jaar met 60 persent tot 32 in 2008/2009 gestyg, terwyl die aantal beweerde verkragtings met 50 persent, van 10 tot 15, in dieselfde tydperk gestyg het.
Volgens kommandeur Simmons is die "risiko-ouderdom" vir slagoffers van 12 tot 14 en hoofsaaklik meisies, hoewel seuns ook verkrag word.
Die streekstendensverslag het onthul dat 'n derde van Londen se bevolking na raming nie-blank is, maar hierdie syfer gaan dramaties verander namate die huidige jeugbevoling die volwasse stadium bereik.
Drie Londense distrikte of "boroughs" beskik reeds oor bevolkings met 'n nie-blanke meerderheid: Newham, Tower Hamlets en Brent. Ongeveer 15 persent van jong Londenaars word as Asies geklassifiseer en nog 14 persent as swart.
In die Noorweegse hoofstad Oslo het 'n soortgelyke styging in verkragtings plaasgevind wat uitsluitlik aan die allochtone immigrantebevolking toegeskryf kan word. Die polisie in die hoofstad, Oslo, het oor die afgelope drie jaar 41 sake van ernstige seksuele aanranding ondersoek, wat op verkragting uitgeloop het. In die al die gevalle is die misdade deur nie-Westerse immigrante in Noorweë uitgevoer.
Die polisie het alle aangemelde gevalle van ernstige seksuele aanranding oor die afgelope drie jaar ondersoek en beskik nou oor 'n helder profiel van die oortreders:
Die meeste het 'n Koerdiese of Afrika-agtergrond, het die Noorweegse polisie bevind. Die gevalle van ernstige seksuele aanranding het almal een ding in gemeen: die gebruik van uiterste geweld.
Microsoft, waarvan die hoofkantoor in Seattle in die VSA is, het verskoning aangeteken omdat hulle 'n foto gedokter het waarop 'n swart man verskyn.
Op die maatskappy se webblad in Amerika is 'n foto gepubliseer waarop twee mans en 'n vrou by 'n konferensietafel sit. Maar op Microsoft se Poolse webblad is die swart man kop vervang met dié van 'n wit man. Die kleur van sy hand is egter nie verander nie.
'n Woordvoerder vir Microsoft, Lou Gellos, het Dinsdag in 'n verklaring gesê hulle is jammer daaroor.
"Ons vra om verskoning en is in die proses om die beeld af te haal."
