Etiket: Pretoria

Beroemde Jan Hettema naby Pretoria vermoor

Die beroemde Springbokfietsryer en tydrenjaer Jan Hettema is gisteroggend te Boschkop net oos van Pretoria vermoor. ‘n Bende rowers het ingebreek en die 83-jarige Hettema doodgeskiet, terwyl hulle sy vrou ook aangeval en beseer het.

Sy dogter Helena Hettema is insgelyks ‘n bekende Afrikaanse sangeres. Hettema is oorspronklik in Nederland in Leeuwarden gebore. Gister is daar ook vanuit die Nederlandse parlement navraag oor Hettema se moord gedoen.

Volgens Netcare 911 was Hettema reeds dood toe hul ambulans op die toneel aankom. ‘n Woordvoerder, Athlenda Mathe, sê: “Toe ons op die toneel aankom, het ons gevind dat die bejaarde man reeds gesterf het, as gevolg van die skietwond wat hy opgedoen het. Ons het hom op die toneel dood verklaar, waarna sy liggaam aan die Bosckop-polisie oorhandig is.”

Volgens berigte het Hettema en sy vrou Elsa hulle in die slaapkamer probeer toesluit nadat hy buite opgemerk het dat gewapende swartes met klapmusse op die perseel was. Die deur is egter afgebreek, waarna die boosdoeners Hettema na die kombuis geneem en in die gesig geskiet het.

Hettema het vyf keer die Suid-Afrikaanse tydrenkampioenskap gewen. Hy het ook namens Suid-Afrika as fietsryer aan die Olimpiese Spele in 1956 in Australië deelgeneem.

 

 

 

Pretoria-opstand: Familie blameer ANC vir dood van hul seun

Die familie van ‘n 19-jarige swarte, Thabiso Daniel wat Dinsdagnag in Mamelodi doodgeskiet is, het die skuld vir die geweld voor die deur van die regering gelê, nadat die dodetal tot ses gestyg het.

Hulle sê indien die regte prosedures gevolg is met die aankondiging van die burgemeesterskandidaat, sou die geweld nie uitgebreek het nie.

Niemand is nog in verband met die skietery in hegtenis geneem nie.

Veiligheidswagte by die Mabopane Central City-winkelsentrum in die noorde van Pretoria sê twee liggame is agter die sentrum gevind.

Daar word vermoed dat die oorledenes in die kruisvuur beland het toe ‘n skare van die winkels begin plunder het.

Dit bring die dodetal tydens die geweld nou op ses te staan.

Geel merkers is deur misdaadtoneelondersoekbeamptes van die polisie aan die agterkant van die winkelsentrum naby aan Pick n Pay se stoorkameringang geplaas wat dui daarop dat ‘n noodlottige skietery by die winkelsentrum plaasgevind het.

‘n Beampte op die terrein het bevestig dat die Onafhanklike Polisie Direktoraat se ondersoekbeamptes ook die toneel ondersoek het.

Die direktoraat raak gewoonlik betrokke as die polisie by beweerde moorde of ongerymdhede teen burgerlikes betrek kan word.

Daar was berigte dat Central City gisteraand geplunder is en dat meer polisielede daar ontplooi is. Die polisie het vroeër ontken dat hulle skerppuntammunisie gebruik het teen oproeriges.

Die ANC in Gauteng het nietemin erken dat van sy lede betrokke is by die gewelddadige oproer in die swart gebiede van die Tshwane-metrogebied.

Meer as 40 mense verskyn more in die hof in verband met openbare geweld.

Die omstrede burgemeesterskandidaat, Thoko Didiza sal haar eerste mediaverskyning aanstons maak.

Die geweld word op die huidige burgemeester, Kgosiento Ramokgopa wat nie as kandidaat gekies is nie, blameer.

Sakeondernemings in Mamelodi wat aan buitelanders behoort, is steeds gesluit en volgens bronne het die meeste buitelanders die gebied verlaat omdat hulle vir hul lewens vrees.

Dinsdagnag het betogers winkels geplunder, geboue beskadig en busse aan die brand gesteek. Geen geweld is vandag aangemeld nie.

Volgens swart Twittergebruikers het plunderaars ingebreek om rekenaars uit skole te steel.

Die situasie in Giyani in Limpopo bly egter gespanne ná verskeie winkels geplunder en afgebrand is in ‘n vlaag van gewelddadige oproer.

Die onrus het begin nadat ‘n inwoner na bewering deur buitelandse winkeleienaars vermoor is.

Die oorledene en twee beweerde medepligtiges is aangerand toe hulle glo bedrog by ‘n onderneming gepleeg het.

Intussen is vyf mense in hegtenis geneem in verband met die moord en verskyn in die plaaslike landdroshof.

Ergste opstand sedert einde van Apartheid duur voort

Die Verkiesingskommissie het die politieke geweld in dele van die land in die aanloop tot die munisipale verkiesing op 3 Augustus, veroordeel.

Die voorsitter van die kommissie, Glen Mashinini sê die verkiesing kan nie as vry en regverdig verklaar word indien huidige toestande so voortduur nie, maar die ANC weier steeds om die ongewilde burgemeesterskandidaat van KwaZulu Natal vir Tshwane te onttrek.

Mashinini het die media toegespreek by ‘n geleentheid waar politieke partye die verkiesings-gedragskode onderteken het.

Hy het partye gewaarsku dat geweld nie geduld sal word nie, en dat partye wat die gedragskode oortree, nie aan die verkiesing sal kan deelneem nie.

Twee mense is reeds dood in die openbare opstand, die ergste sedert die einde van Apartheid, oor ‘n omstrede burgemeesterskandidaat in Pretoria.

‘n Splinternuwe skool is intussen deur plunderaars gestroop. Behalwe 21 busse is verskeie polisievoertuie aan die brand gesteek. ‘n Joernalis van die SABC is ook aangeval.

Alle partye moet die gedragskode onderteken voordat hulle aan die verkiesing kan deelneem, maar die geweld is hoofsaaklik tussen faksies van die ANC en nie soseer tussen partye nie.

Spanning tussen die Patriotic Alliance en die DA het RSG se verkiesingsdebat in Mitchells Plein effens ontwrig, en sekuriteit moes tussenbeide tree. Die twee groepe het handgemeen geraak.

Maar die opstand in lokasies in en om Pretoria duur voort nadat Thoko Didiza as die ANC se burgemeesterskandidaat vir die Tshwane Metro in die komende verkiesing aangekondig is.

‘n Swart joernalis van die SABC is deur oproeriges in die Boikuthsong-plakkerskamp in Mabopane, noord van Pretoria aangeval en beroof.

Die joernalis, Horisani Sithole was teenwoordig toe ‘n winkel geplunder is, en hy is aangeval.

Daar is intussen steeds ‘n groot polisieteenwoordigheid by die Gomora-plakkerskamp, wes van Pretoria, waar ‘n skare van sowat tweeduisend betogers vroeër saamdrom.

Meer as veertig polisiebeamptes en ‘n polisiehelikopter monitor die situasie.

Bykomende beamptes van die polisie se openbare orde-eenheid, die honde-eenheid en metropolisiebeamptes is vroeër in die gebied ontplooi.

Die polisie het motoriste gewaarsku om die gebied te vermy, nadat motors vroeër met klippe bestook is.

Inwoners van die Malusi-plakkerskamp, wes van Pretoria sê Thoko Didiza sal nie die huidige burgemeester, Kgosientso Ramokgopa se bestaande projekte deurvoer nie.

Hulle het vroeër slaags geraak met die polisie wat hulle as Didiza se handlangers beskou.

‘n Gemeenskapsleiers sê hulle is bekommerd dat die huidige ontwikkeling tot stilstand gaan kom onder die nuwe burgemeester.

‘n Vergadering tussen ANC-leiers en takke binne die Tshwane-metrogebied moes ondertussen uitgestel word.

Alhoewel partyleiers ooreengekom het om brandpunte te besoek en inwoners se klagtes te bespreek, is die situasie steeds te gespanne met verskeie ANC-leiers wat uitgejou is.

Die party wou nie redes vir die uitstel openbaar maak nie, waarskynlik om hulle die verleentheid te spaar.

Die polisie het toegekyk hoe oproeriges winkels plunder in Mamelodi-Wes, oos van Pretoria.

Winkels wat deur buitelanders besit word, is oornag geteiken. Eienaars moes ook hulpeloos toekyk hoe oproeriges hulself aan voorraad help sonder dat die polisie ingryp.

Buitelanders uit ander Afrika-lande, moes soortgelyke aanvalle in April verlede jaar trotseer, toe skares hulle blameer het vir die hoë werkloosheid.

Ontleders het gewaarsku teen verdere onrus in die kommersiële spilpunt van Gauteng, wat Pretoria en Johannesburg insluit.

“Intra-ANC-faksiegeweld met die komende verkiesing word geïgnoreer deur markte wat handel oor eksterne faktore, maar is kommerwekkend,” sê Nomura se ontleder vir ontluikende markte, Peter Attard Montalto in ‘n nota.

Intussen moes die Jubilee-winkelsentrum in Hammanskraal, noord van Pretoria inderhaas ontruim word nadat ‘n wenk ontvang is oor oproeriges wat daarheen op pad is.

Die sentrum vir die studie van geweld en versoening sê die geweld wys hoe gefrustreerd armes is omdat hulle uitgesluit word van die politieke proses.

Die sentrum het die onvermoë van die ANC om toepaslik te reageer op die gemeenskap se klagtes gekritiseer.

Duisternis oor dele van Pretoria nadat oproeriges Eskom verjaag

Eskom het Dinsdagaand gesê dat ‘n hoogspanningstransformator by Mapopane-Oos se elektrisiteit-substasie omstreeks 18:00 onklaar geraak het, wat dele van Pretoria in duisternis gelaat het.

Pretoria gaan tans gebuk onder die grootste enkele vlaag van geweld sedert die ANC aan bewind gekom het.

Die kragvoorsiener het gesê ‘n aantal substasies regoor die Tshwane-gebied word daardeur geraak, insluitend Vuka, Winterveld, Nonyane en Makgatho se substasies, wat ongeveer 25.000 verbruikers van krag voorsien.

Eskomtegnici is na bewering weggejaag deur die oproerige massas toe hulle probeer om te reageer op die probleem by die substasie.

“Ons wil graag dit op rekord plaas dat dit dieselfde substasie is waar ons personeellede deur die gemeenskap weggejaag is vroeër as gevolg van die protesaksie wat vandag [Dinsdag] in Tshwane gebeur,” het Eskom in ‘n verklaring gesê.

“In die belang van hierdie soort uitdaging, is sekuriteit sedertdien saamgestuur om ons veldspan in hul ondersoek te begelei.”

Tshwane-inwoners in Atteridgeville, Soshanguve, Hammanskraal en Mamelodi, het Dinsdagoggend op ‘n brandstigting- en plundertog uitgevaar, waar voertuie en winkels geplunder en gebrand is uit protes teen die burgemeesterskandidaat van KwaZulu Natal.

Die besluit van die ANC om die voormalige minister Thoko Didiza te ontplooi as Tshwane se burgemeesterskandidaat voor die komende plaaslike regeringsverkiesings in plaas van die gevestigde Kgosientso Ramokgopa het tot etniese spanning gelei.

Die SABC het berig dat plundery Dinsdagaand in Mabopane toegeneem het namate meer en meer winkels gevandaliseer is.

“Mabopane se inwoners het begin om buitelanders se winkels en ander winkels te plunder insluitend PEP en Barnetts,” het joernaliste getwiet.

‘n Lid van die ANC se Nasionale Uitvoerende Komitee, Nomvula Mokonyane sê die voortgesette gewelddadige betogings in die Tshwane Metropool vererger die verdeeldheid binne die regerende party op streekvlak.

Geweld het in sommige gebiede in en om Pretoria uitgebreek omdat die betogers eis dat die huidige burgemeester, Kgosientso Ramogkopa (foto hierbo), behou word.

Die ANC vergader tans met al sy takke in die streek om Didiza aan hulle op te dring. Mokonyane het die keuse van Didiza probeer regverdig.

Die ministers in die Veiligheidsgroepering sê hulle weet wie betrokke is by die gewelddadige betogings in die Tshwane metropool.

Volgens bronne het 12 ANC-lede by Court Classique Hotel ontmoet om die geweld te beplan as “Sputla”, die huidige burgemeester, nie aangewys word nie.

Hulle sê ondersoek word ingestel na spesifieke individue, ná sowat 20 busse aan die brand gesteek is.

Die ministers het die geweld bestempel as ongekend, maar het besluit om nog nie die weermag te ontplooi nie.

Die minister van Verdediging, Nosiviwe Mapisa-Nqakula sê hulle sal die situasie daagliks monitor voor ‘n besluit geneem word. Die weermag is nogtans op ‘n gereedheidsgrondslag geplaas om in te gryp.

Die Minister van Staatsveiligheid, David Mahlobo, het vroeër ‘n beroep op politieke partye en individue gedoen om hulle daarvan te weerhou om paniek te saai op sosiale media oor die situasie in die metropool.

Mahlobo sê sommige mense gebruik die sosiale media om die situasie uit te buit. Die minister sê hulle is ook bewus van sekere politieke partye wat paniek probeer veroorsaak.

Hy sê slegs die regering sal inligting oordra oor enige bedreigings wat kan voorkom. Die SABC berig egter nie uitvoerend oor die openbare geweld nie.

Honderde pendelaars noord van Pretoria is gestrand weens busdienste in die gebied wat opgeskort is.

Inwoners van Hammanskraal sê hulle kan nie by die werk kom nie, aangesien hulle nie taxi’s kan bekostig nie.

Die situasie in Pretoria-Wes is steeds gespanne en ‘n polisievoertuig is vroeër met klippe bestook.

Motoriste is gewaarsku om Van der Hoff-weg in die gebied te vermy. Die meeste skole is steeds gesluit.

In Atteridgeville is die situasie gespanne en min busse en taxis is in bedryf. Die polisie het die situasie deur die nag gemonitor in Mamelodi en is steeds op die toneel.

Pendelaars moet van alternatiewe vervoer gebruik maak aangesien die busdiens opgeskort is.

In Mabopane is skole gesluit.

Die Tshwane metroraad het inwoners intussen gemaan om waaksaam te wees nadat geweld volgens berigte laasnag voortgeduur het.

Polisie ontken skerppuntaksie teen oproeriges

‘n Groep oproeriges het van lewendige ammunisie gebruik gemaak terwyl hulle probeer het om in te breek in ‘n winkelsentrum in Mamelodi Dinsdag, het die polisie gesê.

Iemand het die slot van die geslote ingang na die sentrum afgeskiet, het ‘n polisiewoordvoerder gesê.

“Ons het dadelik gereageer en die skare uitmekaar gejaag,” het die beampte gesê.

Die polisie het gereageer op gerugte dat hulle skerppuntaksie teen inwoners gebruik.

“Ons hoor dat daar verslae is wat beweer dat ons regte ammunisie gebruik. Dit is nie waar nie.”

Buitelanders se winkels is geplunder in Atteridgeville en ‘n twintigtal Autopax busse is aan die brand gesteek tydens die oproer wat Maandag uitgebreek het.

Die onrus volg na die ANC se besluit om Thoko Didiza as Tshwane burgemeesterskandidaat die party te benoem in die plaaslike regeringsverkiesings wat op 3 Augustus plaasvind.

Ten minste 21 Zimbabwiërs wat onderweg was na Johannesburg het net-net aan die dood ontkom nadat hulle aangeval en beroof vis deur gewelddadige onrusmakers 40km buite Pretoria op die N1.

Oproeriges het ‘n Eagle Liner bus gekaap vol Zimbabwiërs en die ongelukkige passasiers van hul waardevolle items gestroop en die bus in ligte laaie gelaat.

Een van die passasiers is beseer toe hy getref is deur ‘n klip.

Die bus wou omdraai, maar die oproeriges het die pad afgesper.

Adjunkpresident Cyril Ramaphosa het gewaarsku teen stamgebondenheid wat die aanvalle in die Tshwane-metrogebied oorheers.

Die bus was op pad van Bulawayo na Johannesburg in Gauteng.

Weermag nie in Pretoria ontplooi nie

Die minister van verdediging, Nosiviwe Mapisa-Nqakula, sê die regering sal nie die weermag in Pretoria ontplooi teen oproermakers nie.

Sy het die oproeriges anargiste en boewe genoem wat die hoofstad van Suid-Afrika, Pretoria verwoes.

Die Gautreinverkeer is op ‘n hoë gereedheidsgrondslag geplaas om die veiligheid van pendelaars te verseker.

Eiendomme in onder meer Atteridgeville, Mamelodi en Hammanskraal is geplunder en gevandaliseer.

Inwoners steel 'n vrieskas uit 'n winkel
Inwoners steel ‘n vrieskas uit ‘n winkel

‘n Sportskoenwinkel is een van talle wat geplunder is.

Mapisa-Nqakula het gesê diegene wat vir die geweld verantwoordelik was, sal met die volle mag van die gereg te doen kry.

Die uitgebreide onrus volg nadat die ANC ‘n voormalige minister, Thoko Didiza as die party se burgemeesterskandidaat vir die plaaslike verkiesings op 3 Augustus aangewys het.

'n Metropolisiekar lê op sy dak in die middestad
‘n Metropolisiekar lê op sy dak in die middestad

Swart inwoners van Hammanskraal kon nie Didiza se naam onthou nie, maar hulle het gesê hulle “hou nie van daardie een van Durban nie”.

Mapisa-Nqakula het die media toegespreek na ‘n vergadering van die veiligheidsgroepering oor die gewelddadige oproer in die Tshwane metrogebied.

Sy sê die beskadiging van meer as 20 busse wat aan die brand gesteek is, benadeel inwoners regstreeks.

Die huidige burgemeester Kgosi Ramokgopa, is in Atteridgeville buite Pretoria om die spanning in die gebied te probeer ontlont en het by opstokers gepleit vir kalmte.

Ramakgopa is deur die skare verwelkom, maar die Gautengse sekretaris van die ANC, Paul Mashatile is uitgejou.

Die skare het aangedui dat hulle nie vir die ANC sal gaan stem as Ramakgopa nie die kandidaat is nie.

Staatsdiensamptenare sowel as diegene wat vir die Tswhane metro werk, is huis toe gestuur sodat hulle vroeër kan vertrek met die meeste paaie na woongebiede wat versper word.

Adjunkpresident Cyril Ramaphosa het die veiligheidsmagte in die Tshwane Metroraad en op ander plekke gevra om daadwerklik op te tree teen die gewelddadige oproer.

Ramaphosa sê die polisie doen alles in hulle vermoë om die situasie onder beheer te hou.

In aanloop tot die komende plaaslike verkiesing, sal dit kennelik vir die ANC ‘n kopseer word as hulle die weermag teen ontevrede faksies moet instuur.

Joernaliste wat vanmiddag in Mamelodi wou gaan verslag doen oor die onrus, is deur die polisie gewaarsku dat hulle op eie risiko in die woongebied sal moet ingaan.

Hulle het omgedraai omdat inwoners hulle gewaarsku het dat dit te gevaarlik is tans. Benewens busse is verskeie voertuie aangeval en gebrand.

Die SABC weier steeds om nuus van die onrus te beeldsaai of daaroor te twiet.

Geweld in Pretoria versprei verder

Ten minste 21 busse is tot as verbrand in verkiesingsgeweld in Pretoria.

Berigte is ontvang dat sake-ondernemings in Atteridgeville, wes van Pretoria, geplunder word.

Groot skares het reeds versamel waar ‘n helikopter die gebied monitor.

Vroeër is ‘n patrollievoertuig van die Metropolisie in die middestad omgekeer, ook vermoedelik deur ontevrede ANC-lede, hoewel die polisie dit nog nie kon bevestig nie.

Polisie sukkel om die geweld in swart gebiede rondom Pretoria te onderdruk. Oproer het nou versprei na Atteridgeville, Garankuwa en Hammanskraal Dinsdag waar inwoners paaie afgesper het en motoriste onder klippe steek.

Strate wat in en uit Atteridgeville loop, is met doringdraad afgesper.

Pendelaars en skoolkinders kon nie die gebied verlaat nie. Slegs ‘n paar taxi’s is buite die gebied bedrywig.

Daar was ook verslae van voertuie wat met klippe bestook is in verskeie dele.

Vanoggend is twee vragmotors en ‘n bus in Hammanskraal, noord van Pretoria aan die brand gesteek.

Die polisie het motoriste gevra om van alternatiewe roetes gebruik te maak omdat die R101 tussen Hammanskraal en Pretoria asook die N1-Suid deur Hammanskraal, afgesper is.

Inwoners is ontevrede oor die keuse van die ANC-LP en voormalige minister van openbare werke, Thoko Didiza as burgmeesterkandidaat vir die Tshwane-metrogebied.

‘n Aantal busse is Maandagnag in Mamelodi oos van Pretoria aan die brand gesteek, vermoedelik deur inwoners wat gekant is teen die nuutaangekondigde burgemeesterskandidaat.

Verkeer is kwaai ontwrig op die langste straat wat die oostelike en westelike dele van die lokasie met mekaar verbind.

Die onrus volg nadat ‘n ANC-lid oor die naweek by die Tshwane Uitstalsentrum tydens die keuringsproses vir die burgemeesterskandidaat doodgeskiet is.

Intussen is wetstoepassers oor ‘n groot gebied in en om Pretoria ontplooi om orde te handhaaf.

‘n Bus is ook naby die Kalafong Hospitaal in Atteridgeville, wes van die stad aan die brand gesteek.

Verkeersontwrigting is digby die Daspoort-tonnel aangemeld. Die beplande stygings in bustariewe die einde van dié maand is blykbaar ook ván die redes vir die onrus.

Die regering het die onrus en geweld skerp veroordeel en ‘n beroep om kalmte gedoen.

Die waarnemende hoof van die regering se kommunikasie-en-inligtingstelsel, Donald Liphoko sê geen kwessie kan nié opgelos word deur middel van demokratiese prosesse en gesprekvoering nie.

Hy sê lede van die publiek moet hulle ontevredenheid deur die regte kanale opper.

Liphoko het die skuldiges gewaarsku dat hulle met die volle mag van die reg te doen sal kry.

Die burgemeester van die Tshwane metroraad, Kgosientsho Ramokgopa het ‘n beroep op inwoners van die metro se townships gedoen om hulle van geweld en vandalisme te weerhou.

Die ANC se Nasionale Uitvoerende Komitee tesame met Gauteng se provinsiale leierskap, sal na verwagting môre met die Tshwane ANC-takke vergader.

Die polisie in Delmas in Mpumalanga ondersoek ‘n saak van poging tot moord nadat ‘n twaalfjarige seun gewond is tydens ‘n betoging oor die ANC se kandidaatlys vir die komende verkiesing.

Volgens die seun se familie het sy pa hom winkel toe gestuur toe die skietery plaasgevind het.

Oproeriges het opgeruk na die huis van ‘n ANC-kandidaat, wat hulle daarvan beskuldig dat hy bo hulle keuse van kandidaat benoem is.

‘n Polisiewoordvoerder sê ‘n verdagte is nog nie geïdentifiseer nie.

Etniese geweld by Garsfontein eis drie

Drie swartes is dood ná etniese geweld Sondagmiddag tussen twee groepe in die ooste van Pretoria uitgebreek het.

Kapt Colette Weilbach het gesê die moeilikheid het omstreeks Plastic View in Garsfontein uitgebreek tussen Basotho’s en Zimbabwiese burgers.

“Daar word beweer dat ‘n groep Basotho mans vandag [Sondag] aangeval is deur Zimbabwiërs terwyl hulle sokker gespeel het,” het sy gesê.

“Die Basotho’s het teruggeslaan en hul aanvallers uit die kamp gedryf,” het Weilbach gesê.

Netcare 911-woordvoerder, Chris Botha gesê sewe Basotho mans het steekwonde opgedoen en een man is gedood.

“‘n Man in sy 20’s was ‘n kritieke toestand terwyl die ander ses beserings opgedoen het wat wissel van ernstig tot klein. Die kritiek beseerde man het dadelik na sy aankoms by die hospitaal aan sy wonde beswyk,” het Botha gesê.

Die ses beseerdes is op die toneel behandel en na ‘n hospitaal vervoer deur provinsiale dienste, het Botha gesê.

Weilbach het gesê die polisie sal die situasie monitor terwyl die leiers van beide groepe oor moontlike oplossings onderhandel.

“Geen arrestasies is nog gemaak nie en Garsfontein-polisie sal gevalle van moord en openbare geweld ondersoek,” het Weilbach gesê.

Vroeër berigte het aangedui dat een man tydens die gevegte omgekom het, maar die woordvoerder van die polisie se spesialis-afdeling het gesê die aanvanklike inligting is spekulatief.

Hy het later bevestig dat twee mense doodgebrand is, benewens die een wat aan sy steekwonde dood is.

Botha het gesê volgens inwoners by die plakkerskamp is nog vier mense ook vermoor, maar vyandige gemeenskapslede, gewapen met stokke en pangas, het geweier om die nooddienste toegang tot die kamp te gee om dit te gaan bevestig.

Weilbach kon ook nie die moorde van die ander vier mense bevestig nie.

Die plakkerskamp is in chaos gedompel en dit lyk asof inwoners hulself regmaak vir nog geweld.

Inwoners vertel van donker wolk wat oor Pretoria hang

Die raaiselagtige donker wolk wat byna twee keer ’n week oor Pretoria-Noord hang, is glo te wyte aan ‘n onwettige aktiwiteit.

‘n See van voertuigbande bedek met wit as, besaai die veld tussen die N4-snelweg en Willem Cruywagenpad met ‘n toksiese reuk wat alomteenwoordig is.

Die Rekord berig dat die rookwolk laat-aande tot soms in die vroeë oggendure oor Pretoria-Noord hang.

Inwoners het verduidelik dat die swart wolk ontstaan as gevolg van brandende bande.

“Die plakkers in die gebied brand voertuigbande om die staal wat binne in die bande is, uit te haal an aan herwinningsplekke te verkoop,” het inwoner Danie Erasmus vertel.

Die digte bosse en lang gras hou die veld versteek, maar ’n paar meter verder kom mens uiteidelik af op die bedrywighede.

Dit is al maande dat die donker rookwolk oor die noorde gewaar word, wat grootskaalse lugbesoedeling asook ‘n groot brandgevaar inhou.

Die brandweer is voorheen na die toneel ontbied toe ’n brand deur die veld en lang gras versprei het.

Gemeenskapspolisieëringforums (GPF) in die gebied sê hulle sukkel ook vir maande met metropolisie om die onwettige bedrywighede stop te sit.

Situasie by Unisa gespanne met klipgooiers

Geweld weer uitgebreek buite die Unisa-hoofkampus Woensdag nadat swart studente blokkades opgerig het en paaie versper het in weerwil van ‘n hofbevel wat sulke optrede verhoed.

Die situasie is tans gespanne en die polisie is in die gebied ontplooi.

Volgens berigte is die hele gebied om die universiteit met klippe besaai. Verkeer is erg geraak tussen die Fonteine-sirkel en Sunnyside.

Studente van die EFF saai chaos omdat hulle glo gekant is teen die uitkontraktering van dienste deur die universiteit.

Motoriste is gewaarsku om die gebied te vermy en paaie is steeds gesluit.

Dit het tot reuse verkeersopeenhopings gelei sedert die protes begin het.

Die universiteit het verlede week ‘n interdik bekom om betogers te weerhou van geweld, intimidasie en om te verhoed dat hulle die akademiese program te ontwrig.

“Na aanleiding van dade van intimidasie, die uitjaag van personeel en gaste van die Unisa-perseel, gewelddadige gedrag en skade aan eiendom deur die protesterende werkers en studente, het die bestuur van Unisa ‘n interdik asook ‘n bevel teen die deelnemers aan die protesaksie gekry,” het die universiteit se woordvoerder Martin Ramotshela vroeër gesê.

Dit het egter nie die betogers verhoed om weer te begin met ontwrigtende gedrag op die hoofkampus van Unisa nie.

Protesoptrede kom steeds voor naby die Daspoort-tonnel in Pretoria-Wes wat vroeër vanoggend deur ontevrede inwoners van die Gomora-woongebied versper is.

Van der Hoffweg en Bremerstraat is steeds gesluit waar rommel en bande aan die brand gesteek is.

‘n Polisiehelikopter sirkel oor die gebied.

Volgens berigte het talle skole in die weste van die stad vanoggend hul leerders huis toe gestuur uit vrees vir hul veiligheid.

Die spanning by universiteite is ‘n georkestreerde en kunsmatige poging deur duistere politieke magte en die EFF om ‘n rewolusionêre klimaat te skep.

Geweld het uitgebreek by TUT se Soshanguve-kampus en Noordwes-universiteit se Mahikeng-kampus waar geen Afrikaans of ‘n wit studenteraad ‘n kwessie is nie.

Die EFF hou egter vol dat rassisme onder wit studente by verskeie universiteite ‘n probleem is.

‘n LP van die party, Thembinkosi Rawula het in die rassebat gesê dié kwessie is deel van ‘n volgehoue siklus wat ‘n omgewing van ongelykheid skep, en daardeur gaan swart drome glo verlore.

Revolusie: 2 treine in Pretoria óók verbrand

Terwyl onrus en onluste op kampusse uitkring, met berigte dat die administrasiegebou van die Noordwes-universiteit se Mafikengkampus afgebrand is, is twee treine by die Pretoriastasie insgelyks aan die brand gesteek.

Metrorail het bevestig dat twee treine verbrand is, met ‘n verdere twee treine wat deur klipgooiers onder die klippe gesteek is. Vier swartes is glo in verband met die gebeure in hegtenis geneem.

Drie waens van Metroplus Express en twee van die Business Express-diens is Dinsdagaand geheel en al by die Pretoriase stasie verbrand, volgens ‘n woordvoerder, Lillian Mofokeng.

“Die vyf waens is deur misdadige elemente verbrand wat hulle as lojale pendelaars voorgedoen het. Die oorsaak van die voorval word tans ten volle ondersoek, met vier verdagtes wat op die toneel in hegtenis geneem is. Die verbranding van die waens plaas druk op ons dienste, meer spesifiek op die beskikbaarheid van treinstelle,” het Mofokong gesê.

Geen passasiers of Metrorail-werknemers is glo beseer nie.

Dinsdag is twee afsonderlike treine met klippe gegooi. Sakeondernemings by die stasie, asook 11 rondomtaliehekke, is gevandaliseer.

“Ten tye van die voorval vroeg Dinsdag, is ‘n trein wat na Johannesburg sou vertrek vir ongeveer 30 minute vertraag. Pendelaars is voortdurend via die luidsprekerstelsel daaroor ingelig,” het Mofokeng gesê.

Benewens die vier swartes wat op die toneel in hegtenis geneem is, word verdere ondersoeke gedoen.

Ook Dinsdag het Metrorail aangekondig dat hy treindienste op die Springs, Daveyton en Dunswart-trajek opskort vanweë toenemende dreigemente teenoor treindrywers en metrowagte.

‘Ongeskik’

Die provinsiale bestuurder van Metrorail, Tembela Kulu, het die gedrag van passsasiers as “ongeskik” beskryf. Volgens hom, “veroorsaak die toenemend onbeskofte gedrag van pendelaars dat tryndrywers vir hul lewens moet vlug omdat hulle aanvalle vrees. Dis baie ongelukkig dat ons die besluit moes neem om die diens geheel en al te beëindig vanweë die feit dat ons nie treindrywers het wat wou instem om hul lewens op die spel te plaas terwyl hulle mense dien wat geen begrip toon vir die noodsaaklike rol wat hulle speel nie.”

67 drywers en wagte aangeval

Kulu het onthul dat daar sedert November verlede jaar 67 drywers en veiligheidswagte deur passasiers by Gautengse treinstasies aangeval is.

Die LUR vir vervoer Ishmael Vadi het gesê dat hy die opskorting van treindienste op die Daveyton-Dunswart-roete steun.

“Die opsetlike verbranding en klipgooiery na treine, asook aanranding van treindrywers moet onmiddellik ophou, anders sal Metrorail se dienste opgeskort bly,” het hy gewaarsku.

Vadi het die gewelddadige gedrag veroordeel en gesê: “Dié tipe geweld en wetteloosheid moet ten sterkste afgekeur word.”

TUT steeds gesluit na oproer

Die Tshwane Universiteit van Tegnologie is steeds weens oproer gesluit.

Die TUT-bestuur sê die Pretoria-Wes kampus sal gesluit bly omdat protes by die kampus voortduur.

Samesprekings tussen die Universiteit en verteenwoordigers van die sogenaamde Outsourcing Must Fall-beweging het weer ‘n dooiepunt bereik.

‘n Verteenwoordiger van die skoonmakers, Vusi Mahlangu beskuldig die universiteitsbestuur daarvan dat hy nie hulle griewe nie ernstig wil oorweeg nie.

Die skoonmakers is ontevrede oor die insluiting van die vakbond Nehawu in die universiteit se taakspan.

‘n Woordvoerder van die Universiteit, Willa de Ruyter sê die Universiteit het die skoonmakers versoek om na die onderhandelingstafel terug te keer.

De Ruyter het studente aangeraai om aanlyn te registreer as hulle deur die oproer verhoed word om dit by die kampus te doen.

Die vakbond Nehawu het intussen ‘n beroep op sy lede gedoen om nie uit hulle werk te bedank as gevolg van die nuwe belastingwysigings wat pensioenfondse raak nie.

Talle onderwysers het reeds bedank.

Die wetgewing, wat vanaf 1 Maart van krag is, beteken dat werkers slegs ‘n derde van hul pensioen as ‘n kontantuitbetaling mag neem. Die res moet in annuïteite belê word.

Nehawu het hom by Cosatu geskaar en eis dat die wetgewing herroep word. Die hoofsekretaris van Nehawu, Bereng Soke sê werkers moenie bedank nie, maar moet eerder hulle vakbonde vertrou om die stryd teen die nuwe wetgewing te wen.

Motoriste aangeraai om Stinkwater te vermy

Motoriste is aangeraai om Stinkwater noord van Pretoria, te vermy nadat oproeriges paaie versper het.

Die oproermakers het die Molefe Makintapad met klippe en ander rommel besaai.

Die ontevredenes het gesê hulle het verskeie kere reeds oor watertekorte en swak sanitasie in die gebied gekla, maar die stad Tshwane het die afgelope vyf jaar nie na hulle geluister en dienste verskaf nie.

Motoriste word aangeraai om alternatiewe roetes te gebruik.

‘n Gemeenskapsleier, Josua Selemane, sê hulle sal die paaie vir ‘n onbepaalde tyd versper todat daar aandag gegee word aan hulle griewe.

Eksamens by TUT-kampus afgestel weens geweld

Eksamens is vir die res van die week by die Tshwane Universiteit van Tegnologie se Soshanguave-kampus afgestel na gewelddadige studente oproer.

Polisie het 16 oproeriges weens die geweld Dinsdag in hegtenis geneem.

Universiteitsbestuur sê die skade aan eiendom is aansienlik na ‘n paar geboue aan die brand gesteek is en ander gevandaliseer is Dinsdagnag.

‘n Veiligheidswag is steeds in ‘n kritieke toestand in die hospitaal na ‘n aanval deur ‘n skare studente.

Eksamens is ontwrig toe studente weer op ‘n plundertog gegaan het en hul vernielsug die oorhand gekry het. Die hoofpad is met klippe, rotse en selfs ‘n straatlamppaal afgesper.

Polisie was gevegte met studente betrokke en moes rubberkoeëls teen klipgooiers inspan.

Studenteleiers eis dat diegene wat in hegtenis geneem is, vrygelaat word en dat daar aan hul eise voldoen word.

Dit sluit in dat skuld opgehef word, sekuriteitskommer aangespreek word, meer NSFAS-befondsing en gratis onderwys vir almal.

Voorsitter van Sasco vir Gauteng, Sthembiso Ndlouvo, het gesê hulle eise is eenvoudig.

“Hoe kan ons eksamen skryf as ons nie eens weet of ons ons resultate gaan kry as gevolg van uitstaande skuld nie?”

TUT-bestuur het gesê hulle het die besluit om die eksamen op te skort vir een kampus geneem, maar eksamens sal voortgaan op sy ander kampusse.