Kategorie: Internasionale nuus

Nuus oor die wêreld buite Suider-Afrika

Eerste geval van ebola in VSA

Die eerste geval van ebola is in Amerika gediagnoseer, het RSG berig.

Amerikaanse gesondheidsowerhede sê ‘n man wat in Liberië die siekte opgedoen het, is in ‘n hospitaal in Dallas opgeneem, ses dae nadat hy in die land aangekom het.

Die Amerikaanse sentrum vir die beheer en voorkoming van siektes sê familielede van die man sal ook ondersoek word, terwyl nooddienstewerkers wat die man opgeneem het in kwarantyn geplaas is.

Bykans 3100 mense is reeds in Wes-Afrika aan die siekte dood, met meer as 6500 gevalle wat gediagnoseer is.

Intussen het ‘n Duitse nuusdiens berig dat ‘n vermoedelike ebola-pasiënt by Schönefeldlughawe in Berlyn geland het.

Dit is glo deur die owerhede bevestig. Die privaatstraler van ‘n werknemer van die Liberiese ambassade is nie toegelaat om in Israel te land nie. Hy word in ‘n spesiale Brandenburgse isoleringsvoertuig gehou.
 
‘n Regeringswoordvoerder het gesê die “veiligheid van burgers sal gewaarborg word”.
 
Na wat verneem word, wou ‘n werknemer van die ambassade in Monrovia, Liberië se hoofstad, in Israel land. Dit is geweier.

Omstreeks 17.28 op 26 September het die man in ‘n Learjet met Israeliese registrasietekens op Schönefeld geland.

Die man moes in die vliegtuig wag sodat paramedici kan regmaak om hom te vervoer na die hospitaal.

EU bemoedig deur Oekraïne-vredespogings

Die Europese Unie het gesê hulle is bemoedig deur onlangse verwikkelinge in die Oekraïne.

EU-ambassadeurs het in Brussel byeengekom om die situasie in die Oekraïne te bespreek.

‘n Woordvoerder sê die EU sal die opheffings van sanksies teen Rusland oorweeg wanneer die situasie in die Oekraïne dit toelaat.

Hulle wil toesien dat die Minsk-vredesooreenkoms tussen pro-Russiese seperatiste en die Oekraïense magte beter afgedwing word.

Die EU het voorts hulpmaatreëls van ongeveer 165 miljoen euro aangekondig vir boere wat geraak word deur ‘n Russiese verbod op die invoer van Europese landbouprodukte.

Die VSA en NAVO het met militêre optrede gedreig en sanksies afgeroep en nadat hulle Rusland sonder enige getuienis daarvan beskuldig het dat hulle ‘n passasiersvliegtuig, die MH17, oor die Oekraïne afgeskiet het.

Dit blyk nou dat die VSA moontlik self die lugramp veroorsaak het van byna 200 Nederlanders se lewens gekos het en dit probeer toesmeer.

Rusland het verlede maand ‘n jaarlange verbod op landbou-invoere uit onder meer die EU asook die VSA ingestel in reaksie op die felle Anglo-Amerikaanse poging om die land te destabiliseer.

Amerikaanse dokter vir ebola behandel

‘n Amerikaanse dokter wat aan die ebola-virus in Sierra Leone blootgestel was, is Sondag opgeneem in ‘n kliniek van die nasionale gesondheidsinstituut buite Washington.

Die man se identiteit is nie bekend nie. Hy het as medikus vrywillige werk gedoen in ‘n eenheid waar ebola-lyers behandel word.

Hy is tans in die hospitaal opgeneem as voorsorgmaatreël.

‘n Woordvoerder van die hospitaal het dit benadruk dat sy behandeling daar “minimale risiko” inhou vir die ander pasiënte.

Australië stuur nie dokters na ebola-gebied nie

Die Australiese regering sal nie dokters na Wes-Afrika stuur om hulp met die ebola-epidemie te verleen nie.

Die organisasie Dokters Sonder Grense en die Australiese opposisieparty het versoek dat die regering ‘n mediese span stuur om die nypende tekort aan dokters aan te spreek.

Meer as 3 000 mense is reeds in Nigerië, Liberië, Sierra Leone en Guinee dood weens die ebola-virus en die dokters wat hulp kan verleen, raak yl gesaai.

Julie Bishop, Australië se minister van buitelandse sake, sê dat die departemente van gesondheid en verdediging albei van mening is dat gesondheidswerkers nie betyds ontruim kan word nie.

Sy sê dat die regering nie bereid is om die gesondheid van sy mense in die weegskaal te plaas omdat daar nie voldoende ontruimingsplanne is nie.

Britte gereed vir lugaanvalle in Irak

Die Britse parlementslede stem Vrydag oor hul land se deelname aan lugaanvalle teen die Islamitiese Staat in Irak.

Die debat sal met ‘n toespraak deur premier David Cameron afskop.

Weens die talle video-opnames van sogenaamde “onthoofdings” is dit waarskynlik dat Britse deelname gestem sal word aangesien hoofopposisiepartye sowel as die regering die lugaanvalle steun.

Cameron het gesê dat IS ‘n “boosheid is waarteen die hele wêreld moet saamstaan. En as die doel vryheid, demokrasie en geregtigheid is, moet Brittanje sy rol speel.”

Blykbaar is die Britse vegvliegtuie reeds gereed om te begin met aanvalle op IS, ‘n militêre veldtog wat “jare kan duur”.

Militantes van die Islamitiese Staat (IS) het in die openbaar ’n menseregte-prokureur in die Irakse stad Mosoel tereggestel om saam te val met die Britse stemmery.

Samira Salih al-Nuaimi is op 17 September by haar huis in hegtenis geneem nadat sy na bewering inskrywings op haar Facebook-blad gemaak het waarin sy krities was teenoor die militantes se verwoesting van religieuse geboue in Mosoel.

Haar Facebook-blad is blykbaar sedert haar dood verwyder.

Volgens die VN se bystandsending in Irak is al-Nuaimi in sjaria-hof verhoor. Sy is glo vyf dae lank gemartel voor sy tot ’n openbare teregstelling gevonnis is.

IS het Mosoel, die tweede grootste stad in Irak, in Junie oorgeneem tydens die groep se oorname van groot dele van die noorde en weste van die land.

Intussen het die Amerikaanse Federale Speurdiens – die FBI – gesê hulle het die gemaskerde man geïdentifiseer wat in ‘n video verskyn waarin drie Amerikaanse gyselaars die afgelope weke in Sirië “onthoof” is, maar hulle gaan nie sê wie dit is nie.

Die geloofwaardigheid van die videomateriaal van die “onthoofdings” is steeds onder verdenking.

Die direkteur van die FBI, James Comey, het in Washington gesê hy gaan nie die man met die mes se identiteit bekend maak nie, maar hy weet wat sy nasionaliteit is.

Hy wou nie verdere besonderhede verskaf nie. Comey wou ook nie sê of hulle glo dat die man, wat lid is van die Islamitiese Staat, self die onthoofdings uitgevoer het nie.

Die aanvanklike ondersoekwerk om die man te identifiseer is glo deur die Britte gedoen.

ISIS onthoof Franse toeris

Die Algerynse regering het die moord deur ‘n jihadistegroep op ‘n Franse toeris veroordeel. Die 55-jarige Herve Gourdel is Sondag deur die Jund-al Khilifa-groep ontvoer.

Die groep, wat glo bande het met die ekstremistiese Islamitiese Staat-groep, het ‘n ultimatum van 24-uur aan die Franse regering gestel om lugaanvalle in Irak te staak.

Frankryk het die ultimatum verwerp.

‘n Video van Gourdel se onthoofding is Woensdag op die internet vrygestel. Die Algerynse regering sê hy het alles in sy vermoë gedoen om Gourdel vrygelaat te kry.

Ongeveer 1 500 Algerynse soldate het ‘n soektog geloods om die Franse gyselaar van die jihadiste op te spoor, het die amptelike Algerynse uitsaaier Chaine3 vroeër berig.

Die soektog na Gourdel het in die bergagtige gebied Tizi Ouzou, ongeveer 100 km oos van die hoofstad, Algiers, plaasgevind.

Die operasie het valskermsoldate van ’n teenterrorisme-eenheid ingesluit.

Die video waarin Gourdel verskyn, is Maandag deur die groep uitgereik. Hulle het gedreig om hom binne 24 uur dood te maak indien Frankryk nie “sy aanvalle op ISIS staak nie”.

Gourdel het ook in die video gepraat en gesê die groep het hom gevra om by die pres. François Hollande van Frankryk te pleit om aan die groep se eise te voldoen.

Frankryk het verlede week aangekondig dat hulle die Amerikaanse lugaanvalle op ISIS-teikens in Irak sal steun met hul eie lugbombardement.

Algerië sê hy gaan voort met die stryd teen terreur en waarborg die veiligheid van buitelanders in die land.

Wêreld moet ‘saamstaan’ teen 3 probleme wat VSA geskep het

Die Amerikaanse president, Barack Obama, het Woensdag by die VN se Algemene Vergadering in New York gesê die wêreld moet saamstaan teen terreur in Irak en Sirië, Russiese “aggressie” in Europa en ebola in Wes-Afrika.

Al drie probleme is vermoedelik deur die VSA self geskep.

“Ons kan die internasionale stelsel wat soveel vooruitgang geskep het hernu, of ons kan toelaat dat ons teruggetrek word deur ’n onderstroom van onstabiliteit,” het Obama gesê.

“Ons kan ons kollektiewe verantwoordelikheid om wêreldwye probleme te konfronteer herbevestig, of ons kan oorval word deur toenemende manifestasies van onstabiliteit.”

Hy het ’n beroep op die VN gedoen om saam te staan om die “kanker van gewelddadige ekstremisme te verwerp”.

David Cameron, die Britse premier, het Woensdag verklaar dat hy die Britse parlement gaan versoek om aan te sluit by die Amerikaanse lugaanvalle teen die Islamitiese Staat in Irak.

Cameron het dié besluit aangekondig in sy toespraak tydens die algemene vergadering van die Verenigde Nasies.

Dit is steeds nie duidelik of Brittanje gaan aansluit by die Amerikaanse lugaanvalle teen ISIS in Sirië nie.

Die hantering van ISIS het die VN-vergadering wat tans in sitting is, oorheers.

Obama omarm omgewingsaktivisme

President Barack Obama van Amerika het sy stem gevoeg by by dié van omgewingsaktiviste. Obama sê die klimaat is besig om vinniger te verander as pogings om aandag aan aardverwarming te gee.

As ‘n staatswetgewer het Obama voorheen gestem om die Kyoto-klimaatsverdrag te veroordeel en die staat te verbied om kweekhuisgasvrystellings te reguleer.

Obama het egter by die VN-beraad gesê Amerika sal sy deel doen maar bygevoeg dat geen land druk sal vryspring nie. Die klimaatsaktivisme is veral teen China en Indië gemik.

Obama sê Amerika sal sy doelwit haal om koolstofbesoedeling binne ses jaar met 17 persent te sny. Hy sê die wêreld kan nie kinders verdoem tot ‘n wêreld wat buite hulle vermoë is om te herstel nie.

Die beraad het ten doel gehad om steun vir ‘n wêreldklimaatsverdrag te kry wat aanstaande jaar gefinaliseer sal word. Omgewingsaktiviste het vroeër gesê die Kyoto-verdrag is onredbaar.

‘n Nuwe klimaatsfonds het glo intussen beloftes van sowat R23 miljard ontvang om die wêreld se armste lande te help om stygende temperature en rampe te bekamp.

Die sekretaris-generaal van die Verenigde Nasies, Ban Ki-Moon het die Groen Klimaatsfonds bekend gemaak aan die einde van die VN se beraad oor klimaatsverandering in New York.

Duitsland en Frankryk het elk 10 miljard rand bygedra. Ban sê lande wat die beraad bygewoon het, het onderneem om die uitlating van kweekhuis-gasse teen 2020 te beperk.

VSA begin lugaanvalle teen ISIS

Amerika en sy kliënte het Maandag begin met hul eerste gesamentlike lugaanvalle teen die Islamitiese Staat in Sirië terwyl gevegte tussen ISIS en die Koerdiese magte steeds bly voortwoed naby die grens aan Turkye.

Die Pentagon het bekend gemaak dat vegvliegtuie die Islamitiese staat aanval en dat Tomahawk-missiele vanaf skepe afgevuur word.

Die aanvalle is deel van pres. Barack Obama se uitgebreide militêre veldtog in Irak en Sirië wat hy byna twee weke gelede goedgekeur het.

Die doel is om die Islamitiese Staat te vernietig. Amerika alleen het al reeds 190 lugaanvalle op teikens van ISIS gedoen sedert die lugveldtog op 8 Augustus begin het.

Dragon glo eerste tree na onafhanklikheid van Rusland

SpaceX se onbemande vragtuig, Dragon, is Sondag die ruimte ingeskiet.

Aan boord is voorrade en wetenskaplike eksperimente vir die bemanning van die Internasionale Ruimtestasie.

Die tuig is op ’n Falcon 9-vuurpyl vanaf Cape Canaveral gelanseer. Hy behoort môre by die IRS aan te kom.

Die stasie se robotarm sal uitsteek om die tuig omstreeks 11:04 GMT te gryp. Dit is SpaceX se vyfde ruimtetog.

Die kommersiële vuurpylbedryf wat die eerste kritiese stap van ‘n menslike teenwoordigheid op Mars vanaf die suidpunt van Texas loods, kan so vroeg as 2016 begin, het SpaceX se stigter Elon Musk, uitvoerende hoof gesê.

“Die langtermyn-doelwit is om tegnologie wat nodig is te skep, om die mensdom buite die Aarde te neem,” het Musk gesê.

Boeing en SpaceX poog om ruimtereise sonder Rusland moontlik te maak.

Twee nuwe bemande ruimtetuie word tans ontwikkel om ‘n einde aan Amerikaanse afhanklikheid van Rusland se Sojoes-stelsel te skep.

NASA werk tans aan Orion, wat ‘n diep-ruimtesending sal wees.