Afrikaanse nuus – Bladsy 9

UV wen appèl teen Afrikaans met koste

Die Universiteit van die Vrystaat is in hul noppies met die uitspraak in die Appèlhof wat die implementering van ‘n nuwe anti-Afrikaanse taalbeleid moontlik sal maak.

Die vorige bevel wat die UV verbied het om die taalbeleid wat Afrikaans afskaf teen 2017 in te stel, is dus tot niet.

Die Appèlhof het beslis dat die aansoek gebring deur AfriForum en Solidariteit te kort geskiet het op ‘n wettige sowel as feitelike vlak.

Die hof het dienooreenkomstig die appèl deur die UV teen die implementering, tersyde gestel en gelas dat AfriForum en Solidariteit die regskoste van die UV betaal ten opsigte van beide die Hooggeregshof- en Appèlhofsake.

Ná die uitspraak kan die UV voortgaan om die nuwe anti-Afrikaanse taalbeleid in sy loodsprogram te implementeer volgende jaar, hangende die appèl van die hersieningsaansoek wat aan die begin van 2017 gehoor sal word.

In Maart 2016, het die Senaat en Raad met ‘n oorweldigende meerderheid ‘n nuwe taalbeleid aanvaar wat behels dat Engels as primêre onderrigtaal gebruik word.

Die Afrikaans-Engels, oftewel parallelmediumbeleid sal in die res van die fakulteite in 2017 uitgefaseer word volgens ‘n implementeringsplan vanaf 2018.

Slegs huidige ingeskrewe studente sal in staat wees om hul studies te voltooi in die taal wat hulle by registrasie gekies het.

Maclear-aanvallers nog op vrye voet

Vyf swart vermaande plaasmoordenaars in die Oos-Kaap is nog soek. Hulle het verlede maand ‘n plaaswerker op Rustig, ‘n plaas buite Maclear genader om te sê hulle wou ‘n paar beeste koop.

Nou, word ‘n moordsaak ondersoek deur die Queenstown-eenheid teen georganiseerde misdaad as gevolg van die moord en aanranding van ‘n bejaarde wit egpaar op die plaas.

Die plaaswerker sê hy het die booswigte wat vou beeste koop na die 74-jarige plaaseienaar, Louis van den Berg, verwys.

Hy sê hy het nooit geweet hy sal sy baas aan ‘n spul kriminele uitlewer wat sy lewe sal neem nie.

Van den Berg het glo die aanvallers uitgenooi na sy plaasopstal, en na ‘n ruk, het die plaaswerker gille gehoor en hy het gaan ondersoek instel.

Die booswigte het hom gegryp en hom in die plaashuis ingedwing sê hy, waar hulle daarop aangedring het dat hy die sleutels tot ‘n kluis oorhandig.

“Na ‘n stryd, wat mev Van den Berg beseer gelaat het, het hulle toegang tot die kluis verkry en het verskeie vuurwapens gebuit. Hulle het te voet gevlug nadat hulle die werker en mev Van den Berg vasgebind het,” het die SADP in ‘n verklaring gesê.

Die werker het daarin geslaag om homself los te maak en kontak met die familielede te maak wat daarna die polisie in kennis gestel het.

Mev Van den Berg is na die hospitaal geneem vir mediese behandeling. Haar man se lyk gevind is by die hek van die plaas, na bewering aangerand en doodgesteek, volgens die polisie.

Uitspraak verwag in reeks-plaasmoordenaars se saak

Uitspraak sal na verwagting vandag in die Hooggeregshof in Mafikeng in Noordwes gelewer word in die saak teen sewe swart plaasaanvallers, het RSG berig.

Moses Nonono en sy ses medepligtiges is skuldig bevind op verskeie aanklagte, insluitend moord, roof en die onwettige besit van vuurwapens en ammunisie.

Hulle het drie boere tussen 2012 en 2014 vermoor.

Hulle het ook boere in die omgewing van Madikwe, Lichtenburg, Zeerust en Klerksdorp van juwele, skootrekenaars, selfone, voertuie en kontant beroof.

Rapport: ‘Dom’ Leopold Scholtz knip en plak verkeerd oor Hillary

In ‘n merkwaardige erkenning van hul rubriekskrywer Leopold Scholtz se onbeholpenheid en “dom fout” oor die aantal afgevaardigdes van die Amerikaanse kieskollege, bied Rapport vandag teenoor ‘n leser verskoning aan. Nie net kon Scholtz nie die eenvoudige optelfout in sy somme raaksien wat ‘n laerskoolkind geredelik sou eien nie, maar hy het ook voorspel dat sy heldin, die liberale mev. Hillary Clinton, “gemaklik 263 kieskollege-stemme op haar (sou) verenig”.

In ‘n lesersbrief kla Almero du Preez teenoor Rapport en Netwerk24:

Leopold Scholtz voorspel verlede week in sy artikel dat Hillary Clinton gemaklik 263 kieskollege-stemme op haar sal verenig, Donald Trump 164 en dat 123 onseker is. Dit gee ’n totaal van 550 afgevaardiges en nie die werklike 538 nie. Is dit ’n drukfout? Of is dit te veel gevra om ingeligte syfers van Rapport te verwag? En toe wen Trump boonop!

Die syfers is oorgeneem van die Amerikaanse webblad RealClearPolitics en was inderdaad verkeerd. Jammer vir die fout. Met oplettende lesers soos Almero kan ons nie bekostig om sulke dom foute te maak nie. – Redakteur, Rapport.

Scholtz is bekend daarvoor dat hy menings en kommentaar vanuit oorsese publikasies oor buitelandse politiek in Afrikaans herskryf en as sy eie aanbied. Dis egter die eerste keer dat hy uitgevang word dat hy letterlik inhoud vanaf ‘n ander webblad “knip en plak” sonder om die ooglopende teenstrydigheid daarvan raak te sien.

Praag het Scholtz om sy reaksie genader, maar tot dusver geen antwoord ontvang nie. Sodra dit egter verkry word, sal dit hier bygewerk word.

Dapper boer weer Wepener-plaasaanval af

Die polisie in die Vrystaat soek steeds na ‘n vermeende aanvaller in verband met ‘n aanval op ‘n plaas buite Wepener vandeesweek.

Polisiewoordvoerder, Yanga Ngcukana, sê twee swartes het Woensdag omstreeks 09:00 op die 74-jarige Karel Hoffman, wat buite op sy plaaswerf geloop het, geskiet.

Ngcukana sê Hoffmann loop gereeld in die veld tussen sy vee en gaan ook die heinings na. Hoffman se plaas is naby die Lesotho-grens. Volgens Ngcukana was Hoffman byna klaar toe hy stemme naby hom gehoor het. Hy het twee swartes gesien en in hul rigting geskree. Die swartes het na bewering ‘n vuurwapen uitgehaal en op Hoffman losgetrek. Hy het skuiling gevind.

Nguckana sê Hoffman het teruggeskiet en een van die aanvallers in albei bene gewond. Dié gewonde man en sy makker het toe weggehardloop. Die swarte met skietwonde aan sy bene is later op Hoffman se plaas in die veld deur die polisie aangetref. Hy is in hegtenis geneem en is tans onder polisiebewaking in ‘n hospitaal in Bloemfontein. ‘n Geskokte Hoffman is ongedeerd.

Ngcukana sê die ander aanvaller het weggekom. Die polisie ondersoek ‘n klag van poging tot moord. Die verdagte sal in die hof verskyn sodra hy uit die hospitaal ontslaan word, sê Ngcukana.

Intussen sê die Wepener-landbouvereniging se voorsitter, Ulrich Wagener, boere van die distrik was vinnig om te reageer.

Daar is ‘n veiligheidsplan in plek en boere werk nou saam met die polisie. Hy sê mense in die distrik sal alles doen om mekaar te help in omstandighede. Almal in die distrik staan saam en vat hande in die stryd teen “misdaad”.

Bron: OFM Nuus

Levubu-boere ruk op na plaasmoordenaar-verdagtes se verskyning

Drie swart verdagtes wat na bewering ‘n boer van Levubu in Limpopo wreedaardig vermoor het, verskyn vandag in die periodieke hof buite Thohoyandou.

Die drie, onder wie ‘n plaaswerker, het die 60-jarige Hennie Bonnema verlede maand ingewag en doodgesteek. Daar is kort ná die voorval bevestig dat niks gesteel is uit die huis nie.

Na verwagting sal groot getalle belangstellendes weer die hofsaak bywoon. Boere in die omgewing het reeds ‘n beroep gedoen op die Nasionale Vervolgingsgesag om nie borg aan die drie toe te staan nie: “Ons soek nie misdadigers in ons gemeenskap nie.”

Die vermeende swart plaasaanvallers het Maandag vlugtig in die Vuwani Landdroshof verskyn en boere van die omgewing het Maandag opgedaag om hul solidariteit met die Bonnema-familie te wys.

Walter Maringa (24), Mudau Sylvester Takalani (31) en Khodani Tshishonga (33) is Vrydag deur die Levubu-polisie aangekeer. Volgens polisiewoordvoerder is die booswigte naby Mashau aangekeer. Die woongebied is nie ver van Bonnema se plaas, Beaufort F10, in Levubu nie.

Bonnema se bebloede lyk is twee weke gelede deur sy seun, Hendrik, buite sy plaashuis gevind. Hy is met sy terugkeer van ‘n besoek vermoedelik voorgelê en doodgesteek.

Sy aanvallers het Hennie klaarblyklik by sy hek ingewag, sy bakkie se sleutels gegryp en hom vermoedelik van die hek af huis toe gesleep.

Hendrik en sy broer, Pieter, was albei Maandag by die hof teenwoordig vir Maringa en sy twee medebeskuldigdes se eerste verskyning. Hendrik het bevestig dat een van die verdagtes voorheen vir hulle gewerk het.

Daar is nog steeds geen duidelikheid oor die motief vir sy pa se moord nie, het een van die seuns gesê.

Soutpansberg Distrikslandbou-unie (SDLU) het die nuus van die drie se inhegtenisname verwelkom.

“Sy [Hennie se] lewe is geneem op ‘n koelbloedige wyse deur gewetenlose kriminele wat wou kom vat wat nie aan hulle behoort nie. Hulle het ‘n familie van ‘n pa beroof en ‘n groot span werkers ‘n werkgewer ontneem wat vir baie jare net goed was vir hulle,” het Stephen Hoffman, voorsitter van die SDLU, aan die Zoutpansberger gesê.

Die voorsitter van die Levubu Boerevereniging, Fanie Havinga, het Hoffman se woorde beaam: “Ons [het] ‘n leierboer verloor. Hennie was saggeaard en ‘n persoon op wie se ondersteuning daar te alle tye gereken kon word. Hy was geliefd in sy gemeenskap,” het Fanie aan die koerant gesê.

Redakteur van Landbouweekblad kruip weg na hy Afrikaners skel

Die redakteur van Landbouweekblad, Albertus van Wyk, het die week Afrikaners wat ongelukkig is met die petrolbom wat die EFF na Paul Kruger se standbeeld gegooi het, as “white trash” op Twitter beskryf.

Steve Hofmeyr, wat die bebaarde, oorgewig kaalkop aangevat het daaroor, is ook sleggesê. Van Wyk, klaarblyklik witgeskrik deur die vloedgolf van negatiewe reaksies, het daarna dadelik sy rekening privaat gemaak.

Hy staan dus by sy uitgangspunt dat Afrikaners “wit gemors” is maar wil blykbaar nie kritiek hoor van diegene wat sy tydskrif lees nie.

Nie verbasend nie, het selfhaat ook dié Naspespublikasie ingehaal wat deur “white trash” boere ondersteun word.

Maar Van Wyk meen waarskynlik dat sy base sal aanhou om sy salaris te betaal aangesien hulle die globalistiese projek steun en presies dieselfde mening as Van Wyk huldig.

Van Wyk, self nie ‘n toonbeeld van afgerondheid en opvoeding nie, maak ‘n ongekunstelde indruk op die meeste mense. Dit blyk veral nou duidelik uit sy Naspes-onkunde om sy lesers te probeer verkleineer sodat die EFF in ‘n beter lig gestel word.

Lesers op Facebook het voorgestel dat Die Landbouweekblad voortaan hul tydskrif aan die EFF bemark. Die EFF se historiese bewussyn maak staat op die orale tradisie wat ‘n besonderse uitdaging aan Van Wyk kan stel.

Intussen het ‘n strukturele spesialis die Paul Kruger-standbeeld in Pretoria ondersoek om die skade daaraan te bepaal nadat swart betogers Woensdag ‘n petrolbom daarna geslinger het.

Dié petrolbomaanval is deur die EFF gedoen wat ‘n optog in die middestad gehou het om te eis dat pres. Jacob Zuma uit sy amp verwyder moet word.

Cecilia Kruger, besturende direkteur van die Erfenisstigting en Voortrekkermonument, het Donderdag in ‘n verklaring dat ‘n bewaringskundige die beeld ondersoek het.

Geen skade is glo aan die bronsbeelde of die granietvoetstuk aangerig nie, maar die heining om die beeldegroep is beskadig.

Swart aanvallers vier wit slagoffer se moord

Die familie van ‘n man wat deur swartes doodgeslaan is voor sy gesin, het vertel hoe die swartes opgewonde om die slagoffer gedans en fees gevier het.

Buks Oosthuizen (47) van Vereeniging is wreed vermoor terwyl die gesin langs die Vaalrivier kampeer het.

Hy en sy gesin Saterdag in die vroeë oggendure deur vier swartes oorval. Frans Oosthuizen, Buks se broer, het aan Maroela Media gesê dat die boosdoeners die gesin langer as’n uur aangehou het en hoe sy moordenaars “makaber fees gevier het” voordat hulle hom met ‘n graaf doodgeslaan het.

Volgens Frans het Buks, sy vrou en hul drie kinders en twee van die kinders se maatjies Vrydag oudergewoonte langs die Vaalrivier gekampeer. Maroela beskryf die moord as volg:

In die vroeë oggendure het die vier swart aanvallers sy vrou Susan in die gesin se woonwa oorval. Buks, wat by die vuur gesit het, het omgekyk toe hy Susan se gille hoor en is summier met ‘n graaf bewusteloos geslaan.

“Die kinders is terselfdertyd met ‘n hamer gedreig en die 12-jarige seun is in die [gesin se] motor ingedwing en gedreig om inligting oor die gesin te verskaf,” het Frans gesê. “Die gesin is sowat ŉ uur lank aangehou terwyl die aanvallers die gesin se aandete verslind het, musiek gespeel en gedans het en makaber feesgevier het.”

Volgens Frans is Susan in hierdie tyd herhaaldelik met ŉ onbekende voorwerp aangerand. Naderhand het die aanvallers hul aandag weer op Buks toegespits wat steeds bewusteloos op die grond gelê het. “Hulle het hom verskeie dodelike houe met ‘n graaf toegedien.”

Die aanvallers het die motor, waarin die seun steeds toegesluit was, se sleutel weggegooi en met twee selfone en ŉ skootrekenaar op die vlug geslaan. Susan en die kinders het gewag tot dit stil geword het voordat sy Buks in die gesin se bakkie gelaai en hospitaal toe gejaag het. Buks is met sy aankoms by die hospitaal dood verklaar.

Susan het kopwonde opgedoen waarvoor sy steke moes kry, maar is sedertdien weer ontslaan. Die 12-jarige seun het ŉ ligte besering aan sy arm opgedoen en die ander kinders was ongedeerd.

‘Dis verskriklik’: Gaye Derby-Lewis oor Clive se dood

Die politikus Clive Derby-Lewis wat deur die WVK amnestie geweier is vir sy aandeel in die sluipmoord op Chris Hani, is vroeër vandag in die Eugène Marais-hospitaal oorlede. Mev. Gaye Derby-Lewis het sy dood as “verskriklik” en “onverwags” beskryf.

Mnr. Derby-Lewis is vir asemhalingsprobleme in die hospitaal opgeneem, waar hy oorlede is. Terwyl hy in die gevangenis was, het hy onder meer ‘n aanval met ‘n bottelskerf wat sy long binnegedring het, oorleef.

Reëlings vir sy begrafnis word tans getref, volgens mev. Derby-Lewis.

Volgens inligting vanaf die Afrikaanse Wikipedia, was Derby-Lewis, wat in Kaapstad gebore is, ‘n Afrikaner van Duitse en Skotse afkoms. Hy het in Kimberley grootgeword en sy opleiding aan die destydse Christian Brothers-kollege ontvang. Hy het sy klerkskap as ‘n geoktrooieerde rekenmeester voltooi en by ‘n rekeningkundige sowel as ‘n olie-maatskappy gewerk. Hy was ook ‘n buitengewone leraar van die Holy Communion at Blessed Sacrament Church in Johannesburg voordat hy die Katolieke Kerk in die vroeë 1980’s verlaat het. Hy het later by die Afrikaanse Protestantse Kerk aangesluit.

Derby-Lewis is saam met Janusz Waluś skuldig bevind aan die sluipmoord op die kommunistiese terroris, Chris Hani, wat in 1993 plaasgevind het. Hulle is albei ter dood veroordeel, welke straf later tot lewenslange tronkstraf versag is.

Derby-Lewis is in 2008 vir gewone parool en daarna vir mediese parool aanbeveel, maar die owerhede het volstrek geweier om dit uit te voer. Derby-Lewis het die hof herhaaldelik genader om die onregmatige weiering van sy parool te betwis. Op 29 Mei 2015 het regter Selby Baqwa beveel dat die gevangenisdiens, die Minister van Korrektiewe dienste, en die Mediese paroolraad Derby-Lewis se paroolvoorwaardes teen 5 Junie moet vasstel. Die staat is ook gelas om sy regskoste te betaal.

Hy het negentien jaar as ‘n vrywilliger in die Suid-Afrikaanse Burgermag gedien en was die jongste bevelvoerder van die Witwatersrand se Rifles Regiment. Hy het later die John Chard-medalje vir lang en voortreflike diens ontvang.

Derby-Lewis het by die Nasionale Party aangesluit en was ‘n stadsraadslid vir Bedfordview (1972–1977), die onderburgemeester (1973–1974) en uiteindelik die burgemeester (1974–1975), asook ‘n vryman van Johannesburg se mini-stadsraad. Hy het Edenvale in die Transvaalse Provinsiale Raad (1972–1981) verteenwoordig, waar hy vir ‘n paar jaar as die Nasionale Party se woordvoerder vir onderwys en hospitaaldienste opgetree het. Hy dien ook op die direksies van verskeie ander liggame, insluitend hospitale, laer- en hoërskole, asook ‘n skool vir fisies gestremde kinders.

Hy was ook ‘n lid van die hoofbestuur van die voormalige Konserwatiewe Party.

Nico Carstens en Jans Rautenbach oorlede

Die bekende Afrikaanse trekklavierspeler en komponis, Nico Carstens is oorlede.

Die 90-jarige musikant het Dinsdagaand in ‘n Kaapstadse hospitaal vir oulaas gegroet. Hy het meer as tweeduisend musiekstukke gekomponeer, waarvan die bekendste die treffer Zambezi was.

‘n Familievriend, Ingrid Howard sê Carstens was ‘n ware heer wat mense aangespoor het. Hy het ook mense oorweldig met sy musiektalent. Huldeblyke stroom intussen in vir Cartens.

Die oud-rolprentmaker, Jans Rautenbach is op ‘n dag later op tagtigjarige ouderdom in die hospitaal op Mosselbaai in die Suid-Kaap oorlede.

Dit volg na ‘n lang siekbed en komplikasies met longontsteking. Hy is Woensdag van die lewensondersteunende masjiene ontkoppel.

Rautenbach was bekend vir talle rolprente, onder meer Die Kandidaat en Katrina.

Verdagte van moord op oud-AWB-leier se plaas voor

‘n Swart verdagte, (32) sal na verwagting vanoggend in die Ventersdorpse Landdroshof in Noordwes verskyn op ‘n aanklag van moord op ‘n boer.

Die moord het plaas gebeur wat eers aan die vermoorde voormalige AWB-leier, Eugene Terre’Blanche behoort het.

Terre’Blanche is in 2010 op dieselfde plaas vermoor.

Die polisie sê die slagoffer se bakkie is op Hartbeesfontein naby Klerksdorp in Noordwes opgemerk.

Die verdagtes het uit die bakkie gespring en te voet gevlug toe hulle die polisie gewaar het. Een van die verdagtes is met behulp van die gemeenskap aangekeer.

Twee ander is nog op vrye voet.

Die motief vir die moord is nog onbekend aangesien niks van die plaas geneem is nie. Die verdagte het na bewering voorheen op ‘n plaas naby Ventersdorp gewerk.

Oproer by Tuks

Ten minste een motor is verbrand en die dameskoshuis Nerina is met klippe aangeval tydens die jongste oproer by die Universiteit van Pretoria. Swart studente en ander betogers wat nie met die universiteit verbind is nie, het gepoog om Burnettstraat in Hatfield, die voorstad waarin die universiteit geleë is, te versper.

Polisie verkeer op die toneel. Brigadier Sally de Beer van die SAPD het in ‘n verklaring gesê:

Klipversperrings is in die strate rondom die kampus deur betogers aangebring

“Nadat ‘n nagwaak gisteraand gehou is, het studente aan die Universiteit van Pretoria, Hatfield, die ingang tot die kampus versper.

“Ons verstaan dat voertuie op die kampus beskadig is en die SAPD sal dit kontroleer.

“Openbare-ordepolisiëringslede verkeer op die toneel. Die polisie sal die situasie monitor en waar nodig optree, terwyl die maksimum versigtigheid en die minimum geweld gebruik sal word om vrede, kalmte en stabiliteit te handhaaf,” het sy bygevoeg.

Die universiteit se woordvoerder, Anna-Retha Bouwer, het gesê dat ‘n “beperkte akademiese program soos beplan is, sal voortgaan.

“In die vroeë oggendure is betogings deur ‘n groep betogers in die Hatfield-gebied van stapel gestuur, buite die kampus, wat tot ‘n mate van skade aan universiteitsgeboue in die Prospectstraat en Festivalstraat-gebied gevolg het.

“Die polisie hanteer die situasie,” het sy gesê.

Hierdie bord by die Prospectstraatingang van die kampus is deur betogers geskend

Die huidige betogings is deel van die #MustFall-veldtog, wat met #RhodesMustFall begin het, waarna #AfrikaansMustFall, #FeesMustFall and #ScienceMustFall gevolg het.Swart studente wil alle standbeelde en skilderye waarin blankes uitgebeeld word van die kampus verwyder hê, en wil ook sillabusse “gedekoloniseer” sien om alle Westerse inhoud uit te sluit. Ten minste een student aan die Universiteit van Kaapstad het geëis dat Westerse wetenskap “afgeskaf” word.

Eienares van AWB-leier se eertydse plaas ook vermoor

Die eienares van die plaas Witrandjiesfontein by Ventersdrop wat aan die vermoorde AWB-leier, Eugene Terre’Blanche, behoort het, is die naweek op die plaas vermoor.

Die 55-jarige Annerie Grobler is na bewering deur drie van haar voormalige swart werkers werkers doodgeslaan.

‘n Polisiewoordvoerder, Pelonomi Makau, sê een van die swart verdagtes is aangekeer nadat Grobler se bakkie waarmee die verdagtes gevlug het by Hartebeesfontein opgemerk is.

Die drie swartes het uit die voertuig gespring en te voet verder gevlug, waarna een met die hulp van die gemeenskap in hegtenis geneem is.

Niks word uit Grobler se huis vermis nie en die motief van die moord is volgens Makau nog nie bekend nie.

Terre’Blanche is ook in 2010 glo deur een van sy werkers op die plaas vermoor.

Plaasaanvaller slaan boervrou in gesig met bottel

Die vermeende swart plaasaanvaller van ‘n bejaarde boervrou van ‘n plaas by Ladybrand sal na verwagting vandag in die landdroshof op die dorp verskyn.

‘n Polisiewoordvoerder in die Vrystaat, Phumelelo Dhlamini, sê die 65-jarige Hazel Meiyer is aangerand en het ernstige beserings aan die gesig opgedoen toe sy Saterdag omstreeks 16:30 deur ‘n 24-jarige aanvaller aangerand en met ‘n bottel in die gesig geslaan is.

Meiyer was alleen tuis. Haar man Klaus was elders op die plaas. Dhlamini sê Meiyer se aanvaller het toegang tot die plaashuis verkry deur ‘n skuifdeur oop te breek.

Die polisie is ontbied na die toneel en het inligting ontvang oor waar die verdagte homself kan bevind. Hulle het die inligting opgevolg en die man, vermoedelik ‘n voormalige werknemer op die plaas, is omstreeks 19:00 op ‘n buurplaas in hegtenis geneem.

‘n Bebloede T-hemp is in sy besit gevind. Dhlamini sê die kledingstuk is vir forensiese toetse gestuur om vas te stel of dit die slagoffer se bloed op die T-hemp is.

Dhlamini sê ‘n televisiestel wat tydens die rooftog uit die plaashuis gesteel is, is ook teruggevind.

Intussen het ER24 se woordvoerder, Werner Vermaak, bevestig dat Meiyer in Ladybrand deur paramedici behandel is nadat familielede in die plaashuis op haar afgekom het. Sy het ernstige frakture in die gesig opgedoen.

Sy is na ‘n hospitaal in Bloemfontein vervoer.