‘n Senior beampte van Standard Bank is Maandag in die Bellville-handelshof tot agt jaar tronkstraf gevonnis.
Die 52-jarige Fowzia Davids is skuldig bevind op aanklagte van bedrog wat R1, 163 000 beloop en geldwassery.
Davids het ‘n goeie salaries verdien as privaat bankier by Standard Bank en moes die bank se spesiale kliënte op hoogte hou van gespesialiseerde produkte.
Landdros Sabrina Sonnenberg het gesê Davids het haar tot dobbelary gewend om te vlug van die druk van familielede wat haar om raad genader het weens haar pos by die bank. Haar dobbelgewoontes het tot verslawing gelei.
Sonnenberg het gesê as ‘n Moslem het Davids geweet dat die Islam-geloof dobbelary verbied. Om dié rede het sy nie Moslem-drag gedra tydens haar gereelde besoeke aan die GrandWest Casino in Kaapstad nie.
Die landdros het gesê Davids het ‘n kliënt geteiken wat dikwels oorsee was en nie gereeld sy bankrekening nagegaan het nie. Terwyl die kliënt oorsee was, het sy geld uit sy rekening na haar man se bankrekening oorgeplaas en toe na haar eie.
Sonnenberg het saamgestem met die staatsaanklaer, Zama Matayi, dat die bedrogspul goed beplan en tussen Junie 2008 en Mei 2009 goed uitgevoer is.
Sy het gesê die kliënt het ongerymdhede by die bank aangemeld. Davids is weens die senioriteit van haar pos toegelaat om alleen te werk en dit het dit maklik gemaak om die verduistering weg te steek.
Die bank moes die kliënt terugbetaal en sy reputasie het ook skade gely. – Sapa
Die tyd is nog nie reg vir ‘n vrou om die ANC te lei nie, het die party se ANC-vroueliga (ANCWL) Maandag gesê.
“Met tyd sal ons vroue-presidente in die ANC hê,” het Sisi Tolashe, hoofsekretaris van die ANCWL, aan joernaliste in Johannesburg gesê.
“As ‘n bevrydingsbeweging sal ons eendag kan vier dat die tyd aangebreek het en niemand sal ooit nee sê wanneer daardie tyd aanbreek nie. Ek dink ons is nou amper daar.”
Tolashe het gesê die ANC het vordering gemaak met vroue in top-posisies.
“Ons is die enigste organisasie in die land en op die kontinent wat erken dat vroue ook leiers kan wees.”
Angie Motshekga, president van die ANCWL, het gesê die liga sal ‘n vergeefse stryd stry “indien hy probeer druk” vir ‘n vroulike president of adjunk.
Motshekga het gesê die vroueliga het verlede jaar op die party se konferensie in Mangaung geweet dat dit ‘n verlore stryd is om vir ‘n vroulike president of adjunk te veg.
Sy het gesê dit beteken egter nie dat vroue in die party nie senior posisies wil beklee nie. – Sapa
‘n Boonzaier-spotprent uit 1934 wat Jeff Radebe as ‘haatspraak’ wil kriminaliseer. Die vet man met die sigaar is glo anti-Semities.
Volgens ‘n toespraak wat Jeff Radebe, die minister van justisie en grondwetlike ontwikkeling, verlede maand gelewer het, word wetgewing oor “haatmisdaad” en “haatspraak” tans voorberei wat spraakvryheid aan bande kan lê. Radebe het dié toespraak by die jaarvergadering van die Joodse Raad van Afgevaardigdes wat einde Augustus in Sandton plaasgevind het, gelewer.
Tot dusver het geen van die hoofstroommedia in die land van die wetgewing, wat reeds in voorbereiding is, berig nie. Die departement se webwerf bevat egter ‘n kopié van sy toespraak en daar is aan die begin van September deur die Joodse gemeenskapskoerant, SA Jewish Report, daaroor berig.
Dit wil voorkom asof die wetgewing daarop gemik gaan wees om sowel swartmense as Jode teen kritiek van ander groepe te beskerm, te oordeel aan Radebe se deelname aan die Joodse kongres waar hy ook ‘n paneellid was tydens ‘n bespreking met die titel: “Verbeel jou ‘n wêreld sonder haat.”
Volgens die SA Jewish Report, “het Radebe tydens sy aanbieding getoon dat hy goed ingelig is oor die geskiedenis van Jode, sowel in Suid-Afrika as globaal, waar Jode die slagoffers van vooroordeel was”.
Voorbeelde van vooroordeel jeens Jode wat die koerant uitlig, is “die Kwotawet van 1930, asook die Wet op vreemdelinge van 1937 wat gepoog het om Joodse immigrasie na Suid-Afrika te beperk en Jode van bepaalde poste in die staatsdiens uit te sluit”.
.Radebe het in sy toespraak glad nie na plaasmoorde en die verontmenslikende marteling wat daarmee gepaardgaan, verwys nie. Volgens die minister word “haatmisdade gepleeg deur enkeles wat weier om die nuwe grondwetlike orde te aanvaar”.
Voorbeelde hiervan is “geweld teen lesbiese, gay, biseksuele, transgeslag- en intergeslagsmense… xenofobiese geweld teen vreemdelinge, asook die ‘Reitz-vier’-insident aan die Universiteit van die Vrystaat”. Nog ‘n voorbeeld van “haatmisdaad” wat Radebe in sy toespraak noem, is “vandalisme jeens godsdienstige instellings soos die skending van grafstene in die Bloemfonteinse Joodse Begrafplaas met anti-Semitiese graffiti in 2010”.
Radebe het te velde getrek teen spotprente wat in die dertigerjare in Afrikaanse koerante verskyn het en gemeen dat sulke sportprente nie vandag toegelaat sou word nie. Veral die spotprente van Daniël Boonzaier word deur die minister vir kritiek uitgesonder en hy sê:
Die Hoggenheimer-figuur, ‘n Joodse spotprent wat pro-Afrikaner-spotprentkringe in die vroeë 1940s oorheers het, het ‘n vraatsige Jood gekarikaturiseer wat daarop uit was om winste ten alle koste te vergroot. Hy is onmiddellik herkenbaar in ‘n swart aandbaadjie, ‘n streepbroek, ‘n vetsugtige kalant wie se lyf met ‘n goue ketting omgord was. Hy ooreet homself by ‘n tafel vol kos en drink duur wyn en rook ‘n sigaar wat nooit doodgaan nie. Boonzaier, die spotprenttekenaar, het die gevoel dat Jode handels- en nywerheidsmededingers was wat vreemde kapitaal verteenwoordig, uitgebuit.
DIe minister se volledige Engelse toespraak is hier te vinde.
Volgens die ministeriële woordvoerder, adv. Mthunzi Mhaga,. sal die nuwe beleid oor haatspraak en haatmisdaad binnekort in ‘n wetsontwerp voor die parlement dien. Op ‘n navraag van praag oor hoe ver die proses al gevorder is, het hy gesê dat hy nie oor die presiese datum beskik nie, maar by amptenare van die departement navraag sal doen.
Tot dusver het praag nog nie verdere toeligting van mnr. Mhaga ontvang nie.
Tydens sy toespraak, het minister Jeff Radebe egter gesê dat “konsepbeleid oor die Raamwerk vir die bestryding van haatmisdade, haatspraak en onbillike diskriminasie” reeds deur sy departement “gefinaliseer” is. Daar is “intense navorsing” gedoen oor “die ontwikkeling van wetgewing wat:
die begrip haatmisdaad binne die Suid-Afrikaanse strafreg sal instel;
die begrip haatspraak op so ‘n wyse sal verfyn dat dit Suid-Afrika se verbintenis tot hoë standaarde van spraakvryheid sal weerspieël terwyl haatspraak bestry word;
haatspraak tot ‘n misdaad sal verklaar;
moontlik ander vorme van onbillike diskriminasie tot misdade sal verklaar; en;
die ontwikkeling van maatreëls om haatmisdaad, haatspraak en onbillike diskriminasie te bestry.”
Die voormalige polisiehoof en veroordeelde misdadiger Jackie Selebi, wat in 2012 op mediese parool vrygelaat is weens sy ernstige siektetoestand, is afgeneem waar hy in Pretoria inkopies doen, berig Beeld Maandag.
Hy is in sy luukse BMW-6-reeks deur ‘n chauffeur na ‘n winkelsentrum in Monumentpark toe aangery om die Sondagkoerante te gaan koop.
Selebi het met ‘n paar inkopiegangers gepraat alvorens hy sy koerant gekoop het.
Hy het sonder enige hulp geloop en, volgens Beeld, het hy heel gesond gelyk.
Toe verslaggewers hom ‘n paar ure later bel om oor sy gesondheid uit te vra, het hy gesê hy voel bietjie beter en hoop dat sy toestand verder sal verbeter.
Selebi sê dat sy siekte hom tuis laat bly en hom nie toelaat om te bestuur nie.
DIe mediese paroolraad het op 20 Julie 2012 besluit dat Selebi vrygelaat kon word aangesien hy aan onomkeerbare nierversaking, hoë bloeddruk en suikersiekte ly.
Sy skielike verval in swak gesondheid het onafhanklike dokters verbaas, wat gesê het dat nierversaking normaalweg ‘n siekte is wat stadig vererger.
Ten tye van sy vrylating op mediese parool, het die minister van korrektiewe dienste, Sibusiso Ndebele, gesê dat Selebi huis toe gestuur word omdat sy departement oor beperkte middele beskik om na terminaal ongestelde pasiënte om te sien.
Selebi is op 3 Augustus 2010 tot 15 jaar gevangenisstraf gevonnis omdat hy omkoopgeld van die veroordeelde dwelmhandelaar Glenn Agliotti aanvaar het.
Toe sy laaste appèl in Desember 2011 van die hand gewys word, het hy by sy huis inmekaar gesak.
Die gemaklike manier waarop Selebi mediese parool ontvang het, staan in kontras met die aansoeke van Clive Derby-Lewis om parool. Die voormalige LV van die Konserwatiewe Party, wat reeds 20 jaar gevangenisstraf uitgedien het, is reeds vir sowel mediese as gewone parool deur amptenare van die departement van korrektiewe dienste aanbeveel. Sy vrylating word egter deur dieselfde minister wat Selebi vrygelaat het, teruggehou.
Die hoofsekretaris van die SAKP, Blade Nzimande het ‘n beroep op die finansiële sektor gedoen om weg te beweeg van die finansiering van verbruik en te fokus op beleggingsfinansiering om sodoende ‘n produktiewe ekonomiese te ondersteun. Hy het op die bekendstelling van die party se Rooi Oktober-veldtog in Welkom in die Vrystaat gesê infrastruktuurprojekte van die regering moet ondersteun word om werkskepping aan te help. Nzimande sê wetgewing vir herbelegging in die gemeenskap is nodig sodat die finansiële sektor ‘n gedeelte van sy fondse in laekoste behuising en voorkeur-regeringsprojekte kan belê.
Nzimande het ook die regering se planne verwelkom om ‘n kantoor te vestig wat die waarde van grond sal bepaal. Hy het sê grondhervorming sal slegs suksesvol wees indien grond produktief bly. Hy het ook gesê suksesvolle grondeisers moet bygestaan word met befondsing en vaardigheidsontwikkeling. – RSG
Jacob Zuma en Macky Sall van Senegal. Foto: die presidensie
Ná sy besoek aan Senegal, het president Jacob Zuma verklaar dat toerisme en ekonomiese samewerking tussen Dakar en Pretoria bevorder gaan word.
Veral Gorée-eiland, waar die uitgeweke ANC met ‘n groep linkse Afrikaner-intellektuele in 1987 vergader het, sal tesame met Robbeneiland bemark word.
“Daardie historiese vergaderplek was baie belangrik aangesien dit die ANC gemistifiseer het en blanke Suid-Afrikaners dit beter laat verstaan het. Hierdie eiland is daarom ‘n spesiale plek in die Suid-Afrikaanse oorgangsgeskiedenis,”
Zuma het op 2 Oktober persoonlik ‘n besoek aan die eiland gebring en en ook die Gorée-instituut aangedoen waar die ontmoeting tussen die ANC en die Afrikaner-intelligentsia plaasgevind het.
Tydens die 20-jarige herdenking van dié ontmoeting in 2007 wat deur dr. Frederik van Zyl Slabbert, dr. Theuns Eloff en ander gereël is, het die ANC glad nie opgedaag of uitnodigings beantwoord nie. Volgens die joernalis Chris Louw, self ‘n Dakar-ganger en wat intussen selfmoord gepleeg het, het die “Afrikaner-intellektuele” tydens die herdenkingspartytjie maar taamlik bekaf gelyk aangesien sommige besef het dat hulle eintlik maar net gebruik is om Afrikaners te verdeel.
Wat ekonomiese samewerking betref, het president Zuma en president Sall van die Republiek van Senegal ooreengekom om samewerking op vele gebied uit te brei, waaronder lugvervoer, water, energie, verdediging, landbou, hoër opvoeding en toerisme.
“Ons sien uit na meer uitgebreide ekonomiese verhoudinge. Ons is tevrede dat Suid-Afrikaanse maatskappye soveel geleenthede in Senegal raakgesien het,” sê Zuma.
DIe Nywerheidsontwikkelingskorporasie (NOK), ‘n Afrikaner-instelling wat intussen heeltemal getransformeer is, sal Senegal bystaan met die bou van die Blaise Diagne-internasionale lughawe in Diass, Senegal. Daarbenewens sal die NOK, Transnet, Lonrho en TMMF Holdings ‘n consortium daarstel en deelneem aan die bou van die Dakar-AIBD-Thies-spoorwegprojek.
Wat lugvervoer betref, het Senegal en Suid-Afrika ooreengekom om van Dakar ‘n versamelpunt te maak om die hele Wes-Afrikaanse gebied te bedien. Hulle sal die daarstelling van ‘n goed ontwikkelde lugonderhoudsdiens bevorder, wat in staat sal wees om in die vraag vanuit dié sektor te voorsien.
Die twee leiers het ook samewerking bespreek aangaande kwessies rondom die versterking van die Afrika-Unie, hoe om vrede en veiligheid te bevorder en ‘n regverdige en billike wêreldorde teweeg te bring. – Praag en mediavrystelling van die presidensie deur Mac Maharaj
‘n Bantoeman is in Kwazulu-Natal doodgeskiet terwyl hy gepoog het om ‘n kaping op ‘n motoris in Montrose, Pietermaritzburg, uit te voer, sê die polisie.
“Die polisie het ‘n berig ontvang van skietery buite ‘n woning in Nedenweg in Montrose om 10 vm. en ná hul reaksie het hulle die liggaam van ‘n man langs die pad gevind,” sê kolonel Jay Naicker.
Die polisie het op ‘n 9mm-pistool en ‘n magasyn met ‘n aantal rondtes in die omgewing beslag gelê.
“Na bewering het die motoris, 58, huiswaarts gekeer vanuit die dorp en by sy voertuig, ‘n blou Toyota Prius uitgeklim, toe hy deur twee onbekende mans gekonfronteer word.”
Volgens Naicker het een van die mans die motoreienaar se arm gegryp, ‘n vuurwapen uitgepluk en sy voertuig geëis.
Gedurende die daaropvolgende gestoeiery, het die motoreienaar met ‘n vuurwapen vorendag gekom en verskeie skote op die gewapende mans geskiet, met een wat in die bors getref is, sê Naicker.
“Albei verdagtes het van die toneel gevlug, maar ‘n kort rukkie later het die gewapende verdagte sy vuurwapen laat val en op die grond neergesyg.”
Sy medepligtigte het in ‘n wit Nissan-bakkie weggevlug.
Twee selfone en ‘n groot hoeveelheid kontant is aan die Bantoe gevind.
“Die polisie ondersoek ‘n saak van gepoogde kaping en ‘n nadoodse ondersoek betreffende die verdagte,” sê Naicker – Sapa
Die polisie het ‘n waterkanon ingespan om betogers uiteen te jaag in KwaMashu in die vroeë oggendure van Vrydagoggend, het die polisie in KwaZulu-Natal gesê .
Woordvoerder kolonel Jay Naicker het gesê betogers het begin om ‘n deurpad, Dumisani Makhaye-rylaan, te versper, teen omstreeks 02:00 .
“Die polisie is met klippe bestook en versterkings is ingeroep. Hierdie boewe is verjaag met behulp van ‘n waterkanon,” het hy gesê.
Dit is nie duidelik waaroor die protes was nie, maar aanduidings is dat dit oor dienslewering nalv ‘n gebrek aan behuising gehandel het.
Hy het gesê voortgesette protes tap op die polisie se hulpbronne en verplaas waardevolle hulpbronne wat aangewend word om misdaad te beveg na skarebeheer.
“Wetsgehoorsame belastingbetalers uit verskeie gemeenskappe in die provinsie is ook ontstoke omdat dié misdadigers paaie na hul woonbuurte versper, eiendom beskadig en [ belastingbetalers ] versoek die polisie om beslis teen hierdie gewelddadige misdadigers op te tree,” het hy gesê.
Durban het die afgelope week in die Isipingo en Cato Crest-gebiede oproer beleef oor ‘n gebrek aan behuising. Maandag is ‘n 17-jarige meisie doodgeskiet deur twee polisiebeamptes na hul voertuig deur die betogers omsingel is, en hulle lewendige ammunisie moes gebruik om te ontsnap. – Sapa
Die Suid-Afrikaanse onderwysstelsel was baie beter voor die koms van demokrasie, het Agang-leier Mamphela Ramphele Vrydag gesê.
“Die studente van 1976 het gesterf in die geveg teen minderwaardige onderwys, en dit [Onderwys] is erger vandag,” het sy aan studente by die Universiteit van die Witwatersrand gesê.
“Ek het nooit gedink ek sou ooit dit sê nie, maar dit is nog erger.”
Sy het gesê die grootste misdaad wat deur die regering sedert 1994 gepleeg is, was sy rol in die vernietiging van die gehalte van onderwys.
“Die ironie is dat die mense wat die stryd om vryheid laat ontbrand het in 1976, het betoog teen swak opvoeding,” het Ramphele gesê.
” As hulle moes terugkom vandag sal hulle sal dit nie kan glo nie – dat dit wat hulle gehad het en waarteen hulle betoog het, is baie beter as wat ons kinders in 80 persent van skole te kry.”
Ramphele is later gevra deur een van die studente waarom dit die geval is, want daar is meer gegradueerdes sedert 1994.
Sy het haar kommentaar verdedig deur die student te vra om ‘n onlangse verslag oor globale mededingendheid te lees.
“Ons is heeltemal laaste … in ons prestasie in die onderwys. Ons spandeer die grootste deel van regeringsbesteding aan onderwys, meer as enige ander land, met die ergste uitkoms,” het sy gesê.
“Ja, ons het drie keer meer gegradueerdes, maar die gehalte daarvan is die rede waarom mense werkloos is.”
‘n Senior beampte van Standard Bank is Maandag in die Bellville-handelshof tot agt jaar tronkstraf gevonnis.
