Suider-Afrika Archives - Page 182 of 888

Verlamde wag reeds 2 weke tevergeefs op dokters

Die woordvoerder van die Vrystaatse regering, Mondli Mvambi, het gevra dat die verlamde Carina Visagie, wat al langer as twee weke in Bloemfontein se Pelonomi-hospitaal se spinale afdeling lê, nie moed moet verloor nie.

Dit het dié week aan die lig gekom dat die 19-jarige Visagie reeds 18 dae ongeopereer in die hospitaal lê, weens ‘n tekort aan dokters.

Visagie was verlede maand in ‘n motor-ongeluk en het haar rug op die T6-werwel gebreek, het OFM berig.

Mvambi sê die regering werk hard daaraan om dokters by Pelonomi aan te stel en die publiek word gevra om geduldig wees.

Hy sê verlede jaar het die ortopedie-afdeling van die hospitaal soortgelyke probleme ondervind, maar dié is spoedig opgelos.

Eskom kondig fase-2 beurtkrag aan

Eskom het aangekondig dat beurtkrag vanaf Donderdagoggend na fase 2 sal aangepas word.

“Die kragnetwerk is steeds onder druk. Fase 2-beurtkrag sal vandag [Donderdag] van 08:00 tot 23:00 toegepas word,” het Eskom se woordvoerder, Khulu Phasiwe gesê.

Die kragvoorsiener ervaar steeds probleme met sy opwekkingvermoë.

Eskom het Woensdag van 10:00 tot 14:00 fase 1-beurtkrag toegepas waarna fase 2-beurtkrag tot na 22:00 toegepas is.

Fase 1-beurtkrag maak voorsiening dat tot 1000 MW se kragverbruik ingekort word, fase 2 tot 2000 MW en fase 3 maak voorsiening vir die inkorting van tot 4000 MW se kragverbruik.

Dit beteken ook dat verbruikers tot twee maal ‘n dag vir sowat twee tot vier ure ‘n dag sonder krag kan wees. Hy sê die druk kan toegeskryf word aan die verlies van nog opwekkingseenhede.

Volgens Phasiwe is vyf van die eenhede onklaar.

‘n Woordvoerder van Nasionale Energiereguleerder (NERSA) het vroeër gesê hulle is nog besig om te bereken nadat Eskom toestemming gegee is om kragtariewe te verhoog.

NERSA het toestemming vir ‘n verhoging gegee om bykomende dieselkoste te verhaal wat Eskom moes aangaan om gasturbines aan die gang te hou vir kragvoorsiening.

NERSA het in November verlede jaar ‘n 12,6% verhoging aan Eskom toegestaan

Nasionale minimumloon op die tafel

Die portefeuljekomitee oor Arbeid sal openbare verhore oor die hele Suid-Afrika hierdie week hou om die lewensvatbaarheid van ‘n nasionale minimumloon te ondersoek.

‘n Sessie sal Donderdag in Bloemfontein Stadsaal gehou word, nadat dit Woensdag in Johannesburg afgeskop het.

Landboubelanghebbendes meen egter ‘n nasionale minimumloon kan arbeidsverhoudinge verder vertoebel, aangesien die ANC plaaswerkers aanmoedig tot arbeidsonrus binne ‘n klimaat van grondgryp.

Die groot hoeveelheid ongeskoolde werkers in die sektor, sowel as die impak op produksiekoste en eindgebruikerpryse moet in ag geneem word, sê hulle.

Die minister van Arbeid Mildred Oliphant het die idee van ‘n nasionale minimumloon geopper in haar begrotingsrede verlede jaar.

Sy het dit regverdig omdat daar ‘n sekere vlak van beskerming teen uitbuiting van werkers behoort te wees.

Sessies sal dié week in Port Elizabeth in die Oos-Kaap en in Pinetown, KwaZulu-Natal gehou word.

Twee polisielede vas vir roof en ontvoering

Die geloofwaardigheid van die polisie het opnuut onder skoot gekom.

Dit volg na ‘n verslag van die navorsingsmaatskappy Futurefact waarin bevind is dat 76 persent van Suid-Afrikaners van mening is dat baie polisielede self misdadigers is.

Net meer as drieduisend mense het aan die meningspeiling deelgeneem.

Twee polisielede, onderskeidelik 35 en 44 jaar oud, is intussen op Pongola in die noorde van KwaZulu-Natal vasgetrek op aanklagte van roof en van ontvoering, het RSG berig.

Daar word beweer dat hulle onder ‘n groep mans was wat veiligheidswagte by ‘n winkel vasgebind, hulle in ‘n suikerrietland agtergelaat en toe die winkel gaan beroof het.

Die KwaZulu-Natalse LUR vir Gemeenskapsveiligheid en Skakeling, Willies Mchunu, het die polisie se betrokkenheid by misdadige bedrywighede skerp veroordeel.

Mchunu sè die meerderheid polisielede in die provinsie is nog steeds mense van integriteit wat baie hard werk en hy het die publiek gevra om saam met die lede te werk en diegene te ontbloot wat by misdadige bedrywighede betrokke is.

‘n Woordvoerder van sy Departement, Sipho Khumalo, sè die polisielede sal later vandeesmaand in die landdroshof op Pongola verskyn.

Verskeie polisiebeamptes van die Douglasdale polisiestasie in die noorde van Johannesburg is blykbaar gister ontwapen nadat hulle kollegas gedreig het.

Die polisielede is na bewering op ‘n sloerstaking omdat hulle ontevrede is oor beweerde rassisme by die stasie.

Die Gautengse polisiewoordvoerder, kolonel Noxolo Kweza, wou nie kommentaar lewer nie.

‘Ons hou van jou, FW,’ sê ANC ná 25 jaar

Verteenwoordigers van die ANC het mnr. FW de Klerk gister geloof vir sy “moedige stap” om 25 jaar gelede op 2 Februarie die verbod op die ANC en SAKP op te hef, asook sy besluit om alle mag aan dié twee “bevrydingsbewegings” met hul stedelike terreur en kommunistiese retoriek te oorhandig.

Uit uitsprake deur De Klerk en Kgalema Motlanthe van die ANC gister by die FW de Klerk-stigting se konferensie in Kaapstad, blyk dit dat alles in Suid-Afrika goed gaan. Oor plaasmoorde, geweld en korrupsie is geen woord gerep nie, maar “rassisme in die kuberruim” is glo ‘n probleem.

Beeld, die Johannesburgse mondstuk van die ANC, skryf vandag op die voorblad: “As die nuwe vlaag van rassisme nie hokgeslaan word nie, kan dit alles wat die afgelope kwarteeu in Suid-Afrika bereik is ongedaan maak.”

Die koerant haal vir FW de Klerk aan waar hy sê:

“Daar is ’n bittere, konfronterende klank in die nasionale diskoers (oor ras) wat teenstrydig is met alles waarvoor Mandela gewerk het.”

Veral Motlanthe het hom teen “rassisme in die kuberruim” uitgespreek en gemeen “die ondermyn nasiebou”.Motlanthe het ook gesê dat hy die hernoeming van Tafelbaairylaan na FW de Klerkrylaan in Kaapstad steun. Die bejaarde Indiërkommunis, Ahmed Kathrada, is insgelyks ten gunste van die hernoeming.De Klerk word daardeur gekwel dat “die ANC (Mandela se) pogings tot nasionale versoening laat vaar het”. Hy het hom ook uitgelaat oor Jacob Zuma se onlangse aanval op Jan van Riebeeck en blankes wat vir alle probleme in die land verantwoordelik is deur te sê:

“Dit sal nie verras indien dié bombardering rassehaat by swart Suid-Afrikaners aanblaas of ten minste beskouings van wit morele skuld en swart aansprake versterk nie.”Motlanthe wil sien dat blankes nog meer doen vir die glorie van swart Suid-Afrikaners en die ANC moet doen. Hy het gesê: “Ek doen weer ’n beroep op wit mense om hul skuldgevoelens te laat vaar en hulle eerder met meer geesdrif te verbind tot ’n gemeenskaplike toekoms.”

Maar “rassisme in die kuberruim” is ‘n groot probleem, waaroor Motlanthe verder soos volg uitgewei het:

“Dit dien as barometer van die stand van maatskaplike samehorigheid en versoening in ons land. Dit is betreurenswaardig en daar kan gevra word wat verkeerd geloop het vir die Reënboognasie.”

Dit is veral hartseer dat kuberruim-rassisme gedryf word deur jong mense wat geen bewussyn van apartheid het nie.

Rassisme in die sosiale media bied ’n blik op die siel van Suid-Afrika ná apartheid.

Geen land sal kan oorleef sonder om so ’n belangrike nasionale vraagstuk op te los nie.”

Oor die ANC-ampsdraer Tony Ehrenreich se bitsige aanval op die Kaapstadse stadsraad oor die hernoeming van Tafelbaairylaan, het Motlanthe gesê dat hy nie sy woorde kan afwys nie, aangesien hy “oor vryheid van spraak in ons grondwetlike demokrasie beskik en dit op sensuur sou neerkom”.

Die ANC is die mees suksesvolle terreurbeweging in die geskiedenis, wat oor die afgelope twintig jaar ten minste tien triljoen rand op allerlei maniere van die eens gehate “apartheidstaat” verhaal het.

Oproer oor waterplan by Brits

Die burgemeesterskomitee van die Madibeng-munisipaliteit in die Noordwesprovinsie sukkel om die situasie in Majakaneng onder beheer te kry nadat inwoners – hoofsaaklik jong swart mans – met die polisie slaags geraak het oor water.

Vroeër dié week het die komitee met die leiers van die amokmakers ooreengekom en besluit om saam te werk om die waterprobleme in die gebied op te los.

Die burgemeester van die gebied Jostina Mothibe was nie teenwoordig nie, maar haar komitee het ‘n tydperk van twee tot vier weke gevra om die beskadigde pype en lekkasies in die watertoevoer te herstel.

‘n Verteenwoordiger van die burgemeester, Kabelo Ntshabele het gesê die voorsiening van water is ‘n prioriteit vir die regering. Premier Supra Mahumapelo het verlede maand ‘n water- en sanitasieplan aangekondig om die probleme in die provinsie aan te pak.

Hy is in ‘n vennootskap met die Ontwikkelingsbank van SA en die groot projek sal glo meer as R350 miljoen kos.

Alle water infrastruktuurplanne moet glo teen die einde van Maart voltooi wees en inwoners moet gereeld ingelig word oor die vordering.

Intussen het daar van die skikking tussen die burgemeester en die oproermakers dadels gekom en drie vragmotors is op die N-4 snelweg by Majakaneng naby Brits aan die brand gesteek.

Verkeer tussen Pretoria en Rustenburg is vroeër tot stilstand gedwing nadat verskeie voertuie ook met klippe bestook is.

Van die oproeriges sê hulle het hulle tot dié vlakke van geweld gewend om seker te maak dat die regering spoedig aandag skenk aan hulle griewe.

Hulle sê dis die enigste taal wat die regering verstaan.

Ses in Zim deur weerlig doodgeslaan

Sapa berig dat ses kinders en ‘n volwassene in Zimbabwedeur weerlig doodgeslaan is.

Die Zimbabwe-uitsaaikorporasie, die staatsuitsaaier het Dinsdag in sy aandnuus gesê die ses kinders was tussen vier en 11 jaar oud.

Die voorval het Maandagmiddag in Mugwinyi in Bikita plaasgevind. Die sewe persone het in twee grasdakhutte skuiling gesoek toe die weerlig hulle getref het.

Drie mense is reeds in Zimbabwe dood sedert die begin van Desember, die aanvang van die reënseisoen.

Dele van Zimbabwe, insluitend die hoofstad Harare, is deur hewige storms en swaar reënval die afgelope week geteister.

Vermeende mensvreter pleit skuldig

‘n Swart Zimbabwiër het Maandag in die Wes-Kaapse hooggeregshof skuldig gepleit op moord en dat hy sy slagoffer se hart verwyder het. Hy het glo ook op die toneel van sy hart verorber.

Andrew Chimboza (35) het op die eerste dag van sy verhoor ‘n pleitooreenkoms onderteken waarin hy skuldig pleit voor regter Ashley Binns-Ward en sy pleitooreenkoms is aan die hof voorgehou.

In die ooreenkoms vra hy om verskoning dat hy die 62-jarige Mbuyiselo Manona in Junie 2014 in Gugulethu by ‘n kliënt se huis vermoor het. “Ek is jammer oor dit wat ek gedoen het en ek het ware berou,” het hy in die dokument gesê.

‘n Bakleiery het tussen die mans uitgebreek waarna die vermeende mensvreter sy slagoffer met ‘n mes doodgesteek het.

Chimboza het gesê hy besef sy optrede was verkeerd en oorskry die grense van selfverdediging.

Die nadoodse ondersoek het aangedui Manona is dood van wonde in sy nek, bors en maag.

Die staat het verlede jaar tydens die hofverrigtinge in die Athlone-landdroshof aangevoer ooggetuies het gesien hoe sit Chimboza bo-op die slagoffer en eet stukkies van sy hart. Dit is nie Maandag in die pleitooreenkoms genoem nie.

Landdros Jacqueline Sibiya het gesê sy glo die verwydering van die hart was nie die oorsaak van dood nie en beïnvloed dus nie die pleitooreenkoms nie.

Sy beplan egter om die dokter, wat die nadoodse ondersoek gedoen het, as ‘n getuie te roep tydens die betoë oor verswaring van vonnis.

Die vonnisoplegging sal Dinsdag begin.

Poskantoor wys groot verlies

Die Suid-Afrikaanse Poskantoor (Sapo) verwag ‘n groot verlies in sy finansiële jaar tot Maart van R1.3 miljard, het Beeld Maandag berig.

Ouditeure is bekommerd oor Sapo se 2014-’15-jaarverslag en wat teen die einde van die bestaande finansiële jaar ook problematies lyk.

Die verslag is verlede week vier maande te laat by die parlement ingedien.

Verkwisting en onregmatige uitgawes van onderskeidelik R41 miljoen en R200 miljoen is glo aangegaan. Die Poskantoor het R5.3 miljoen verloor weens bedrog in die instansie se tesourie, en R5.5 miljoen aan handelsmisdaad.

Die organisasie het die vorige finansiële jaar ‘n verlies van meer as R358 miljoen gely.

Die Poskantoor se totale bates was teen 31 Maart verlede jaar R2.3 miljard meer as die totale laste.

Kanselier van nuwe universiteit binnekort aangekondig

Die Sol Plaatje-Universiteit in Kimberley kondig na verwagting môre aan wie die instelling se eerste heeltydse vise-kanselier is.

Die universiteitsraad vergader môre om dié besluit te neem. Aansoeke het in Desember verlede jaar gesluit, onderhoude is gevoer en ‘n kortlys is intussen saamgestel.

Die tussentydse hoof, Yunis Ballim, is volgens ‘n betroubare bron die gunsteling om in die pos aangestel te word.

Ballim, wat in Johannesburg woon, het laat verlede jaar besluit om vir die pos aansoek te doen.

Die engelstalige Sol Plaatje-Universiteit is die eerste om sy deure in Suid-Afrika te open nadat die ANC aan bewind gekom het.

Die Noord-Kaap, waar die instelling opgerig is, is oorwegend Afrikaanssprekend.