Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

Linden, Jhb: Nog ‘n verkragting deur swart SA polisieman

‘n Swart offisier van die Lindense polisiestasie in Johannesburg word daarvan beskuldig dat hy ‘n vrou in aanhouding verkrag het. Sersant Derick Phanyana word tans aangehou, terwyl sy borgaansoek in die Randburgse Landdroshof tot 7 Julie 2015 uitgestel is.

Die Onafhanklike Polisie-ondersoekdirektoraat het bevestig dat hulle ‘n saak van verkragting teen die 45-jarige polisieman ondersoek.

“Daar word beweer dat die 25-jarige vrou Saterdag vir bedrog in hegtenis geneem is. Rondom 2 voormiddag op 28 Junie 2015, het ‘n polisiebeampte na haar sel gegaan en haar verkrag. Die volgende oggend het die slagoffer daarin geslaag om aan een van die polisiebeamptes oor te dra dat sy verkrag is en sy is na die kliniek geneem vir medikasie en om ‘n saak van verkragting te open,” sê Grace Langa, die woordvoerder vir OPOD.

Intussen is ‘n ander swart polisieman van die Vosloorus-polisiestasie tot 33 jaar gevangenisstraf gevonnis vir verkragting, roof met verswarende omstandighede en ontvoering.

Die Palm Ridge-landdroshof het dié vonnis aan konstabel Lungile Majola opgelê.

“Daar word beweer dat ‘n 18-jarige meisie met haar kêrel op straat geloop het toe ‘n rooi VW Polo met twee insittendes stilgehou het. Hulle het ‘n vuurwapen op die slagoffers gerig.

Die kêrel het met die verdagtes baklei maar hulle het die oorhand gekry. Hulle het die vroulike voetganger in die motor gedwing en na ‘n veld gery waar sy verkrag is,” sê Langa.

Volgens Langa het dit tydens die ondersoek geblyk dat een van die oortreders konstabel Majola was.

 

Man van Noordwes weer voor oor kinderporno

‘n Noordwes man sal vandag weer in die Lichtenburg Landdroshof verskyn op aanklagte van die besit van kinderpornografie.

Bert Viljoen is een van ses mans wat in Augustus 2013 in vier provinsies in hegtenis geneem is. Dit nadat polisie ‘n wenk van Interpol ontvang het.

Die ander verdagtes, waaronder twee onderwysers en ‘n afgetrede skoolhoof, is in Lichtenburg, Potchefstroom, Bloemfontein, Witrivier, Douglasdale en Florida in hegtenis geneem.

OFM-nuus verneem dat Viljoen moontlik ’n pleitooreenkoms sal aangaan en vandag gevonnis sal word.

Gregory Robinson van Potchefstroom is verlede jaar in die die dorp se streekhof ‘n opgeskorte vonnis opgelê.

Sy vonnis van vier-jaar tronkstraf is vir vyf jaar opgeskort op die bepaling dat hy nie ‘n soortgelyke oortreding pleeg nie.

Derde konstruksie-ongeluk op Sandton-perseel

Twee konstruksiewerkers is by die Nelson Mandela-plein in Sandton beseer nadat ‘n plafon op hulle geval het.

Dit is die derde soortgelyke ongeluk die afgelope maand op persele wat deur JHI Properties bestuur word.

Die uitvoerende bestuurder van JHI Properties, Nomzamo Radebe, sê die werkers is beseer toe die plafon van `n winkel op hulle geval het.

Volgens Radebe is voorsorgmaatreëls getref om die veiligheid van kliënte in die winkelsentrum te beskerm.

Op 10 Junie het `n vrou haar heup beseer toe sy op tydelike matte geval het.

In `n ander voorval in Junie is die 25-jarige vrou ernstig beseer toe deel van `n plafon op haar geval het.

Nuwe toltariewe tree in werking

Die nuwe toltariewe en maandelikse perk vir geregistreerde gebruikers in Gauteng tree more in werking, het RSG berig.

Dit is die eerste stap van die hersiene e-tol-bedeling wat op 20 Mei deur adjunk-president Cyril Ramaphosa bekendgemaak is.

Die Suid-Afrikaanse nasionale padagentskap, SANRAL sê gebruikers wat vir e-tol geregistreer is, sal van more af R225 per maand betaal teenoor R450 in die verlede.

‘n Woordvoerder sê die vergunning om 30 keer gratis deur die tolhekke te ry per jaar, sal aangekondig word wanneer die stelsel en administratiewe prosesse gereed is.

TLU: Eskom se dreigemente onaanvaarbaar

TLU SA sê hy is verheug oor die feit dat NERSA voorlopig geen verdere tariefverhogings aan Eskom toegestaan het nie, maar dit is onaanvaarbaar dat Eskom nou met meer beurtkrag dreig.

NERSA het besluit om nie Eskom se aansoek vir ‘n tariefverhoging van 9,58% toe te staan nie.

Die president van die unie, Louis Meintjes, sê die landbou, land en ekonomie kan nie ‘n verdere elektrisiteitstariefverhoging bekostig nie.

Meintjies sê die land kan ook nie langer onbekwame bestuurspraktyke by die energieverskaffer — wat oor ‘n monopolie beskik — bekostig nie.

Die Vryemark Stigting het intussen gesê swak beleid by Eskom het die situasie geskep waarin die kragverskaffer die land gedompel het.

‘n Direkteur by die Vryemark Stigting, Eustace Davie, sê baie van Eskom se probleme is vanweë hul weiering lank reeds om onafhanklike kragprodusente nie toestemming te gee om krag aan die netwerk te lewer nie.

Davie sê van die belangrikste besluite by Eskom is deur die regering geneem.

NERSA het gesê verskillende wyses wat Eskom sal aanmoedig om sy verouderende kragaanlegte te onderhou, ondersoek sal word.

Die hoof van elektrisiteit by NERSA, Thembani Bukula sê goeie onderhoud moet beloon word, terwyl swak prestasie gestraf moet word.

‘n Senior bestuurslid van Eskom, Thava Govender sê die kragverskaffer sal eers met die regering beraadslaag voordat hy verder kommentaar lewer.

Eskom sê NERSA se besluit om nie ‘n tweede verhoging toe te staan nie, sal ondersoek word.

Die regering het sy 13,91% belang in Vodacom aan die Openbare Beleggingskorporasie verkoop te help om die R23 miljard toekenning aan Eskom te finansier, het die Nasionale Tesourie in ‘n verklaring gesê.

Die Nasionale Tesourie en die Departement van Telekommunikasie het saamgewerk in die uitvoering van die transaksie.

Namibiese egpaar oorleef huisaanval

Mnr. Willem Burger (70) en sy vrou, Alta (70), is Vrydagoggend­ in hul huis op Lüderitz­ deur twee swartes aangeval en ernstig aangerand, het die Republikein berig.

Burger is die eienaar van die OK Grocer op die dorp. Dit was Vrydag sy beurt om die winkel oop te sluit. Hy het omstreeks 05:15 sy huis se motordeur­ oopgemaak toe twee swartes ingestorm het en hom met kieries begin slaan het totdat hy bewusteloos­ was.

“Volgens die dokter is my pa verder geslaan terwyl hy bewusteloos was,” het me. Hannelie de Lange gesê.

Burger het sy bewussyn herwin en vir Alta, wat nog in die bed was, geskree dat sy die rewolwer moet bring. Voordat sy egter kon opstaan, het een van die aanvallers haar ook met ’n kierie begin slaan.

“Terwyl een van die aanvallers vir tannie Alta deur die huis gesleep en vir haar gesê het wat sy alles moet inpak, het die ander een my pa na die kluis toe gevat en gesê hy moet dit oopmaak. Hoe meer my pa vir hom gesê het dat hy nie sonder sy bril kan sien nie, hoe meer het die man hom geslaan,” het De Lange gesê.

Volgens De Lange het die aanvallers gedreig om Alta te verkrag as hy nie die kluis opmaak nie. Hulle het ook ’n plastieksak aan die brand gesteek en gedreig om haar met die warm plastiek­ te brand. Burger het die kluis oopgekry­ en die mans het vuurwapens en kontant gevat.

Burger en sy vrou is in die badkamer vasgebind en die mans het op die vlug geslaan. Alta kon daarin slaag om los te kom. Sy het haar man losgemaak en na vriende se huis gehardloop en die polisie gebel.

“My pa het erge hoofbesering opgedoen­ en sy arm is geswel soos hy probeer keer het toe hulle hom met die kierie slaan. Hy is in erge pyn. Tannie Alta moet ’n spesialis gaan sien, omdat haar kakebeen vermoedelik­ gekraak of gebreek is. Hulle het albei kneusplekke­ oor hul lywe soos hulle geslaan is. Albei sal vir skanderings Windhoek toe moet gaan,” het De Lange gesê.

Volgens haar is die aanvallers dieselfd­e swartmans wat twee maande gelede ook probeer het om die egpaar aan te val.

“My pa het van die werk af huis toe gekom en twee mans met balaklawas in die oprit gesien ophardloop. Alta het vir hulle geskree ‘ons gaan julle vrek maak’, waarna die twee mans weggehardloop het.”

Die twee swartes het glo tydens Vrydag se aanval vir Burger en sy vrou gesê “julle het mos gesê julle gaan ons vrek maak, nou wys ons julle hoe maak ons júlle vrek”.

“My pa en tannie Alta is al twee 70. As jy hulle goed wil vat, vat dit dan. Wat kan die twee ou mense doen? Maar om hulle so aan te rand en te slaan, is onmenslik en verskriklik.”

De Lange het ’n beloning van N$20 000 uitgeloof vir enige inligting­ wat tot inhegtenisneming kan lei. Die polisie het reeds twee van die gesteelde­ vuurwapens teruggekry.

“Ons het volle vertroue in die polisie dat hulle die twee mans sal arresteer­. Lüderitz is oor die algemeen ’n baie rustige dorp en die gemeenskap staan almal saam, want ons soek nie sulke elemente in ons dorp nie,” het sy gesê.

Uitspraak verwag oor H-woord

Uitspraak word na verwagting Dinsdag in die Gelykheidshof in Upington gelewer in die saak teen die Noord-Kaapse premier Sylvia Lucas.

Lucas word daarvan beskuldig dat sy ‘n rassistiese skelwoord tydens ‘n amptelike geleentheid gebruik het.

Die klag is deur die KhoiSan-groep se Stanley Peterson by die Menseregtekommissie ingedien. Peterson voer aan dat Lucas tydens haar begrotingstoespraak in 2010 op Upington die woord “hotnot” gebruik het.

Peterson het vroeër aan OFM-nuus gesê hy het besluit om Lucas hof toe te sleep nadat sy nie sanksies van die Menseregtekomissie nagekom het nie.

Peterson sê die feit dat die saak voor die hof gedien het is klaar ‘n oorwinning vir die Khoisan-gemeenskap, nadat Lucas se regsverteenwoordigers gevra het dat die saak van die rol geskrap moet word.

Karoo-leeu uiteindelik gevang

Die rondloper leeu in die Karoo is uiteindelik vasgetrek.

Die driejarige leeumannetjie wat as Sylvester gedoop is, het boere in die omgewing die afgelope drie weke op hol gehad omdat hy selfs ervare spoorsnyers ontduik het.

Hy het blykbaar deur ‘n stormwatersloot van die Karoo Nasionale Park ontsnap. Die dier het ‘n bloedspoor van negentien skape, ‘n donkie en ‘n koedoe agtergelaat.

Die leeu is Maandagmiddag opgemerk waar hy op ‘n rots in die Nuweveldberge op Palmietfontein in die son gelê het.

Hy is vanuit ‘n helikopter met ‘n doofpyl geskiet en na die park teruggeneem.

Meer onbestendigheid in Lesotho na sluipmoord

Adjunk-president Cyril Ramaphosa is dringend na Lesotho gestuur om met die premier Pakalitha Mosisili, te beraadslaag ná kommer oor meer politieke onbestendigheid in die Britse bantoestan.

Die Suider-Afrikaanse Ontwikkelingsgemeenskap sê dit volg nadat drie opposisiepartyleiers uit die land gevlug het en die onlangse moord op die voormalige weermagbevelvoerder in Lesotho, brigadier Maarparankoe Mahao.

Die Verenigde Nasies en die Afrika Unie het die dood van Mahao veroordeel.

Die VN se sekretaris-generaal, Ban ki-Moon het die regering versoek om die skuldiges aan te kla. Die voorsitter van die Au-kommissie, Nkosazana Dlamini-Zuma, sê hulle veroordeel dit ten sterkste.

Die Regering van Lesotho sê dit het gebeur toe die soldate hom in hegtenis wou neem vir die beweerde mislukte staatsgreep verlede jaar.

Ramaphosa is die SAOG se fasiliteerder oor Lesotho.

Ramaphosa se ingryping kom nadat die minister van verdediging, Nosiviwe Mapisa-Nqakula vroeër ‘n afvaardiging, wat Suid-Afrika, Namibië en Zimbabwe insluit, na die land vergesel het vir samesprekings om glo sekere staatsliggame se verantwoordbaarheid aan die uitvoerende gesag te verseker en te versterk.

Mosisidi het Atul Gupta en sy neef, Essa Omar Aziz as sy raadgewers intussen afgedank na die moord. Hul paspoorte wat deur Mosisidi se voorganger, Tom Thabane uitgereik is, is ook teruggetrek.

Thabana se administrasie het aangevoer dat die Guptas Lesotho sou help om buitelandse beleggers te kry, maar Mosisidi se party, die Demokratiese Kongres, het dit teengestaan.

Die party sê om aan die Guptas diplomatieke paspoorte te gegee het was ‘n verleentheid in die lig van die Guptas se omstredenheid in Suid-Afrika.

Mosisidi se woordvoerder het die regering se standpunt bevestig en sê die Guptas voeg geen waarde tot Lesotho toe nie.

Noord-Kaap vir mediese nalatigheid gedagvaar

Die Noord-Kaapse gesondheidsdepartement staar ‘n R32 miljoen mediese nalatigheidseis in die gesig nadat ‘n baba met serebrale gestremdheid gediagnoseer is nadat hy by een van die provinsie se fasiliteite behandel is.

Die departement voer aan dat een van die grootste uitdagings is om mediese personeel na die provinsie te lok. Die tekort aan verpleegsters is veral die probleem.

Die hoof van dié departement, Gugulethu Matladpane, sê die dagvaarding is verlede maand ontvang. Dit is die jongste in ‘n reeks eise teen die departement van sowat R102 miljoen.

Matladpane het tydens ‘n sitting van die Nasionale Raad van Provinsies se Sosiale Dienste Komitee ‘n voorlegging gedoen waarin dié eise aan die lig gekom het.

Vrae oor die dekade-lange konstruksie van die omstrede psigiatriese hospitaal in Kimberley, wat ‘n groot hap uit die provinsiale begroting geneem het, is ook geopper.

Luidens ‘n verslag van die provinsiale tesourie oor provinsiale departemente se ongeouditeerde inkomste en uitgawes het die gesondheidsdepartement se onreëlmatige uitgawes van R20 miljoen in die 2013/14 boekjaar tot R526 miljoen in die vorige boekjaar gestyg.