Uhuru Kenyatta ingehuldig

Die nuwe president van Kenia, Uhuru Kenyatta, het duisende ondersteuners toegespreek na sy inhuldiging in Nairobi. Kenyatta is deur die Internasionale Misdaadhof uitgewys vir misdade teen die mensdom.

Hy ontken dat hy etniese geweld vyf jaar gelede aangemoedig het. In sy toespraak het Kenyatta onderneem om eenheid in Kenia te bewerkstellig.

President Jacob Zuma, Goodluck Jonathan van Nigerië en Robert Mugabe van Zimbabwe was van die staatshoofde wat die inhuldiging bygewoon het.

Suid-Afrika sal sy samewerking aan Kenia se president Uhuru Kenyatta en sy adjunk William Ruto bied in weerwil van die aanklagte teen hulle. Albei leiers word tans in die Internasionale Strafhof in Den Haag aangekla van misdade teen die mensdom.

Volgens die aanklagte het hulle vyf jaar gelede verkiesingsgeweld in Kenia aangemoedig. President Jacob Zuma sê hulle is onskuldig tot hulle skuldig bevind word en boonop is hulle demokraties deur die Keniane verkies.

Aanklaers in Zimbabwe het intussen nuwe aanklagte gelê teen die prominente menseregte-prokureur, Beatrice Mtetwa. Sy is verlede maand in hegtenis geneem vir regsverydeling ‘n dag ná die referendum oor Zimbabwe se grondwet.

Sy is tydens ‘n klopjag by die eerste minister, Morgan Tsvangirai se kantore in hegtenis geneem.

Sy het die polisie na bewering kokkerotte genoem en word nou van die mishandeling van die polisie aangekla. Haar aanvanklike saak word op 27 Mei aangehoor.

 

Noorse student in Kaapstad verkrag

‘n Noorweegse uitruilstudent is die naweek op Seinheuwel in Kaapstad verkrag, het ‘n koerant Dinsdag berig.

“Dit was ongeveer eenuur [Saterdagoggend]. Die vrou en haar vriend was in hulle motor toe hulle deur twee gewapende mans oorval is wat die vrou se vriend vasgebind het,” het Andre Traut, woordvoerder van die polisie, aan die Cape Times gesê.

Hy het gesê die mans het hulle besittings afgeneem en toe die vrou, wat in haar twintigs is, verkrag.

Hulle het toe met die paartjie na Kampsbaai gery, waar hulle hulle in die motor agtergelaat het.

Niemand is in verband met die voorval in hegtenis geneem nie, en die paartjie help om identiteitsfoto’s van die mans saam te stel. ‘n Saak van roof en verkragting word ondersoek.

Andre van Zyl, woordvoerder van Table Mountain Watch, het aan die koerant gesê dis die eerste aanval van sy soort in twee jaar.

“Daar was ander aanvalle, maar op stappers… Dis ‘n ernstige geval en verskil heelwat van diefstal uit motors wat soms hier plaasvind,” het hy gesê.

‘n Poging van Stad Kaapstad om die straat om 22:00 te sluit was nie gewild onder inwoners nie, het hy gesê.

Angie swyg oor SADTU-sloerstaking

Angie Motshekga, minister van basiese onderwys, is doodstil oor die beplande sloerstaking van onderwysers.

“Die minister gaan nie kommentaar lewer oor die kwessie nie,” het haar woordvoerder, Hope Mokgatlhe, Maandag in ‘n SMS-boodskap gesê.

Die onderwysersunie SADTU het Maandag gedreig om met ‘n sloerstaking te begin as die skole dié week heropen.

Dit is om te eis dat Angie Motshekga, minister van basiese onderwys, en haar direkteur-generaal, Bobby Soobrayan, bedank, het Mugwena Maluleke, sekretaris-generaal van SADTU, gesê.

Skole in die binneland en skole aan die kus heropen Dinsdag ná die vakansie.

Maluleke het gesê Motshekga se departement het nie die salarisse van nasieners van matriekvraestelle verhoog ingevolge ‘n ooreenkoms wat in 2011 bereik is nie.

“Die minister laat die land in die steek en sy ondermyn kollektiewe bedinging. Haar leierskap beïnvloed die gehalte van onderwys,” het Maluleke gesê.

Volgens Maluleke sal onderwysers slegs by skole opdaag om klas te gee. Hulle sal nie ekstra pligte verrig soos om take na te sien, werksessies by te woon en departementele gaste te verwelkom nie.

“Aanvullende eksamens wat in Februarie afgelê is, sal nie nagesien word nie. Dit word gewoonlik in April gedoen.”

Onderwysers was vroeër vanjaar woedend toe die regering voorgestel het dat onderwys tot ‘n noodsaaklike diens verklaar word, wat dit onwettig maak om te staak.

Zuma gryp in by wanorde in munisipaliteit

Verskeie raadslede van die Mbizana-munisipaliteit in die Oos-Kaap is deur die bestuur van die ANC aangesê om te bedank, het die party in die provinsie Maandag gesê.

“Die party se president [Zuma] en sy ses toplede het Vrydag die Mbizana- plaaslike munisipaliteit besoek, wat sedert middel-2012 probleme ervaar,” het Mlibo Qoboshiyane, woordvoerder vir die ANC in die Oos-Kaap, gesê.

Die munisipaliteit se burgemeester, speaker, en hoofsweep is aangesê om Maandag te bedank. Die munisipale bestuurder se kontrak moet ook hersien word.

Dit sal die vestiging van ‘n nuwe administrasie moontlik maak, het Qoboshiyane gesê.

Die munisipaliteit is verlede jaar onder administrasie geplaas ná die skorsing van Simphiwe Thobela, die munisipale bestuurder. Dié skorsing en ‘n rits onwettige raadsvergaderings is later deur ‘n hof ongeldig verklaar.

“[Daar was] algehele verset teen provinsiale en nasionale leiding,” het Qoboshiyane gesê.

‘n Spesiale raadsvergadering sal gehou word om nuwe leiers aan te stel.

‘Ons is nie bang vir oorlog nie’

Die Suid-Afrikaanse Nasionale Weermag (SANW) staan gereed om die M23-rebellegroep in die ooste van die Demokratiese Republiek van die Kongo aan te vat het ‘n woordvoerder Maandag gesê.

“Ons is nie bang om oorlog te voer nie,” het Xolani Mabanga, woordvoerder van die SANDF, aan SAfm gesê.

“As hulle [M23] oorlog verklaar teen personeel van die Suid-Afrikaanse Nasionale Weermag, is ons gereed om hulle aan te vat. Ons, as die SANW, sal nooit van koers af gebring word deur enige omstandighede terwyl ons dít najaag wat die regering van Suid-Afrika ons gevra het om te doen nie.”

Mabanga het gesê die situasie in die ooste van die DRK verskil van die ontplooiing van Suid-Afrikaanse soldate in die Sentraal-Afrikaanse Republiek. Altesaam 13 soldate is in dié land dood.

“Ons weet wat die konflik is [in die DRK], terwyl ons nie dieselfde kan sê oor die situasie in die SAR nie.”

Mabanga wou nie sê hoeveel soldate in die DRK ontplooi sal word as deel van ‘n ingrypingsmag van die Verenigde Nasies nie.

“Toe ons by die SANW aangesluit het, het ons gesê ons is bereid om te sterf en ons is bereid om enigiets te doen en daarom is dít die opoffering wat ons vir die land maak.

“Ons is nie bang om oorlog te voer nie. Ons is nie bang om enige plek te gaan waar ons gevra word om te wees nie,” het Mabanga gesê.

Die VN se Veiligheidsraad het verlede week ‘n resolusie aanvaar wat die ontplooiing van ‘n ingrypingsmag in die DRK goedkeur.

Verskeie gewapende groepe, insluitend M23-rebelle, is in die ooste van die DRK aktief, waar hulle probeer om beheer oor die land se minerale rykdom te kry.

Jansen retireer oor Mandela

Prof. Jonathan Jansen, rektor van die Universiteit van die Vrystaat, het Maanadag ‘n berig verwerp waarvolgens by gesê het hy wens oudpres. Nelson Mandela sterf.

“Ek wens regtig Madiba leef vir altyd. Ek wens ook sommige joernaliste wil meer etiek hê voor hulle ‘n boodskap heeltemal verdraai,” het Jansen Maandagoggend getwiet.

‘n Twitter-gebruiker het aan Jansen gesê: “Ek neem aan die ‘berig’ oor jou wat wens Mandela is dood, is gemors? Wat die koerante sal doen om ‘n storie te kry is skokkend”.

Jansen het reageer deur te sê dit is “absolute gemors”.

Lacea Loader, sy woordvoerder, het gesê ‘n verklaring oor die kwessie sal later Maandagoggend uitgereik word.

FW prys Thatcher se positiewe rol

Oud-Premier Margaret Thatcher het ‘n beter begrip van Suid-Afrika se gekompliseerdheid en geo-strategiese realiteite gehad as die meeste van haar tydgenote, het oudpresident FW de Klerk Maandag in ‘n verklaring gesê.

“Thatcher het die behoefte verstaan om die bekommernisse en aspirasies van alle Suid-Afrikaners te oorweeg in hul soektog na ‘n konstitusionele konsensus.”

“Om hierdie rede was sy in staat om ‘n positiewe rol te speel in die ondersteuning van ons eie proses van transformasie in Suid-Afrika,” het De Klerk gesê.

“Sy sal nie net as een van Brittanje se grootste leiers beskou word nie, maar ook as ‘n leier wie se beleidspunte ‘n groot impak op wêreldpolitiek gehad het,” het hy gesê.

“Ons het verskeie kere in die Kaap en in Londen ontmoet nadat sy as premier uitgetree het en voor haar beroerte in 2002. Ek voel geëerd om Margaret Thatcher as ‘n vriend te kon hê,” het hy gesê.

Geweld dreig oor waterprojek in Lesotho

Die Polihali-dam wat in Lesotho gebou gaan word om deel uit te maak van die Hoogland-waterprojek wat water aan Suid-Afrika sal voorsien, is in die gedrang nadat die jeugliga-forum van Lesotho gevra het dat die konstruksiewerk opgeskort word.

Talle koerante het berig dat die koalisie-regering se Basotho National Party, die hoof-opposisie, die Democratic Congress en die Lesotho Peoples Congress briewe aan die eerste minister Tom Thabane geskryf het waarin hulle dreig dat die jeug gemobiliseer sal word as deel van die voortslepende protes-aksie teen die dam.

Die dam sal nie net water aan Suid-Afrika verskaf nie, maar ook elektrisiteit vir Lesotho opwek. Bouwerk aan die dam van nege-miljard rand moet teen 2016 begin.

Ingeligte bronne sê die faksies veg want wie die Private Sector Foundation of Lesotho (PSFL) beheer sal goed geposisioneer wees om voordeel te trek uit winsgewende tenders in die Lesotho Hooglandwaterprojek se M7.3 miljard Polihali-damprojek in Mokhotlong.

Osman Moosa bly voorsitter en hy sal sy finansiële spierkrag gebruik om kontrakte te monopoliseer.

Moosa het groot regeringstenders, selfs nadat sy reputasie as ‘n sakeman deur ‘n skuldigbevinding oor belastingontduiking in die gedrang gebring is.

Sommige PSFL lede vrees dat sy kriminele rekord die konsortium se kanse om groot kontrakte te kry, in gevaar kan stel.

Moosa en buitelandse beleggers sal baat vind by die Polihali-konstruksie,” sê ‘n PSFL lid. Moosa, sy seun Shameen Moosa en hul maatskappy Selkol 1983 (Edms) Bpk is skuldig bevind aan 198 aanklagte van belastingontduiking in Augustus verlede jaar.

Verlede jaar het Lesotho en Suid-Afrika ‘n ooreenkoms onderteken om te begin aan die LHWP Fase II. Die projek sal waarskynlik met Suid-Afrikaanse belastingeld betaal word, aangesien Lesotho besonder arm is.

Die projek sluit die konstruksie van die Polihali-dam en die uitbreiding van die Muela hidrokragstasie in Butha-Buthe in om meer elektrisiteit vir die twee lande te genereer.

 

Louis Trichardt-munisipaliteit ontvang ‘skokkende’ ouditverslag

‘n Ouditverslag oor die Makhado- plaaslike munisipaliteit wat verlede jaar deur die ouditeur-generaal aan die Limpopo-provinsie voorgelê is, is so pas deur die belastingbetalersvereniging van Louis Trichardt vrygestel.

Mnr. Jaap Kelder van die Nasionale Belastingbetalersunie het in ‘n verklaring die ouditverslag as “absoluut skokkend” bestempel. In ‘n boodskap van meegevoel met die plaaslike belastingbetalersunie onder leiding van mev. Inga Gilfillan, sê Kelder: “Dit skrei ten hemele! Ons is van mening dat julle nou behoort te sê: genoeg is genoeg! Dit sou makliker vir die ouditeur-generaal gewees het om te sê wat reg verloop het in die munisipaliteit. Dit sou net een woordjie gewees het: ‘NIKS!'”

Louis Trichardt se belastingbetalers, wat ook ‘n naamstryd teen die benaming “Makhado” voer, weerhou tans meer as R10 miljoen van die munisipaliteit omdat daar soveel wanbestuur plaasvind. Mnr. Jaap Kelder van die NBU het aan Louis Trichardt se inwoners verklaar: “Goddank het julle julle fondse van die munisipaliteit weerhou anders het die R10 miljoen ook nog in die bodemlose put verdwyn.”

In die verslag verklaar die ouditeur-generaal dat hy geen behoorlike rekords oor meer as R1,6 miljard se munisipale bates kon vind nie. Hy het reeds ‘n jaar gelede sulke syfers versoek, maar dit is nog nie beskikbaar nie.

Daar was ook nie gegewens beskikbaar oor meer as R300 miljoen se roerende bates nie.

Benewens probleme met die boekhouding wat BTW betref, het die munisipaliteit ongemagtigde besteding van R57 872 128 aangegaan.

Dié bedrag van byna R58 miljoen wat as ongemagtigde besteding aangegee word, is egter onderskat met meer as… R124 miljoen. Gesamentlik het die munisipaliteit dus ongemagtigde besteding van R182 miljoen aangegaan.

Foute van die vorige jaar wat deur die ouditeur-generaal uitgewys is, is nog nie reggestel nie.

R33 miljoen is aangewend vir ander doeleindes as waarvoor raadsbesluite geneem is.

Die ouditeur-generaal bevind dat die munisipaliteit nie oor die nodige kundigheid of bekwaamheid beskik om die wetlike vereistes vir die bestuur van ‘n plaaslike owerheid na te kom nie.

Ander elemente wat in die ouditverslag uitgelig word, is:

  • R200 miljoen se goedere en dienste is sonder pryskwotasies aangekoop, wat strydig met die toepaslike regulasies is.
  • Tenders is toegeken aan persone of entiteite sonder dat hulle verklaar het of hulle in diens van die staat of staatsinstellings is.
  • Die rekenkundige beampte het nie redelike stappe geneem om ongemagtigde besteding te voorkom soos deur artikel 63(2)(c) van die Wet op munisipale finansies en bestuur vereis word nie.

Wit ANC-LP bewusteloos na aanranding

‘n Top ANC-LP is aangerand en bewusteloos gelaat in ‘n wrede huisaanval in Kaapstad, het die polisie gister gesê. Sue van der Merwe is gered deur haar seun wat die twee indringers by haar Rondebosch huis onderbreek het.

Sy is Vrydagaand net voor 21:00 aangeval , het die polisiewoordvoerder kapt. Frederick van Wyk gesê.

“Twee mans het haar aangerand en verwurg totdat sy haar bewussyn verloor het. Die verdagtes het gevlug toe haar seun by die huis kom.”

Van Wyk het gesê die boewe het in ‘n silwer Hyundai gevlug. Bankkaarte word uit die huis vermis. Hy kon nie sê hoe ernstig Van der Merwe beseer is nie.

Die 58-jarige LP het vir die Black Sash in Kaapstad tussen 1988-1991 gewerk. Sy het ‘n LP in 1996 geword en het gedien as adjunk-minister van buitelandse sake tussen 2004-2009. Sy was ‘n parlementêre raadgewer vir die president tussen 2001-2004. Volgens die nuutste polisiemisdaadstatistieke, is huisbrake en diefstal die mees algemene misdaad in die woonbuurt.

Tussen April 2011 en Maart 2012, is daar 350 inbrake, 321 diefstalle van motors en 429 ander diefstalle by die Rondebosch-polisiekantoor aangemeld.