Misdaadintelligensie-eenheid in ‘disfunksionele krisis’

Chris Ngcobo
Genl.maj. Chris Ngcobo

Die skorsing van genl.maj. Chris Ngcobo, waarnemende hoof van die polisie se misdaadintelligensie-eenheid oor ‘teenstrydighede met sy kwalifikasies’, is alreeds ‘n ernstige vingerwysing na die staat van disfunksionaliteit waarin die eenheid verval het, het die Vryheidsfront Plus se hoofwoordvoerder oor die polisie gesê.

Daar is ernstige vrae moet gevra word oor waarom die ongerymdhede rondom Ngcobo nou eers op die lappe kom nadat hy reeds in Junie verlede jaar in die pos aangestel is.

Die eenheid is ironies genoeg juis veronderstel om die spesialis op die gebied van hierdie tipe inligting te wees.

Die eenheid spesialiseer onder meer in koverte optredes en meeluistering en is die regering se ‘oë en ore’ om inligting te bekom wat as ‘n bedreiging vir die staat beskou kan word.

Dit is alom bekend, en is reeds wyd in die media gerapporteer, dat Ngcobo ‘n voormalige lyfwag en vertroueling is van pres. Jacob Zuma.

“Hierdie eenheid is werklik die ‘Big Brother’ wat oor alle landsburgers se skouers loer en toegang kan kry tot die mees sensitiewe inligting oor enige persoon.

“Uit hoofde van sy amp sou Ngcobo op internasionale vlak met ampsgenote gepraat en inligting uitgeruil het. Daarvoor moes hy oor die hoogste sekerheidsklaring beskik. Dis moeilik om te aanvaar dat daar nou eers met sy kwalifikasies fout gevind word.

“Dit is werklik skrikwekkend dat ‘n eenheid met soveel mag so totaal disfunksioneel kon raak. Dit maak Suid-Afrika ‘n bespotting van die internasionale intelligensie-gemeenskap en behoort elke Suid-Afrikaner tot onrustigheid te stem,” lui die VF+ se verklaring.

Moord op Bekkersdal-inwoner nie gekoppel aan oproer sê polisie

burningtyresDie moord van ‘n 20-jarige swart man in Bekkersdal, wes van Johannesburg, is nie gekoppel aan gewelddadige betogings in die gebied nie, het die polisie Donderdag gesê.

Woordvoerder konst Elsie Tshonte het gesê: ” Die voorval kan nie gekoppel word aan die protes nie want twee mans was buite hul krot Woensdagnag toe ‘n voertuig met vier insittendes hulle genader het.”

Volgens ‘n ooggetuie , het die motor met die vier insittendes aangekom om 23:00 .

Twee passasiers het uitgeklim en die twee mans wat buite die hut gesit het beledig, waarna vier skote afgevuur is wat een van die mans noodlottig gewond het.

Die aanvallers het terug in die motor gespring en weggejaag .

Die man wat geskiet is, is op die toneel dood.

Die vermoorde man, Themba Khumalo en sy vriend het na bewering gebots met die ondersteuners van ‘n plaaslike raadslid wat inwoners afgedank wil hê.

Die area is getref deur oproer oor dienslewering oor die afgelope week. Inwoners eis dat die Westonaria munisipaliteit ontbind en onder administrasie geplaas word.

Woensdag is ‘n buitelandse winkel eienaar in hegtenis geneem nadat hy na bewering op ‘n ander man geskiet het. Hy staan ​​tereg op ‘n aanklag van poging tot moord .

Verlede week is 35 mense in hegtenis geneem en aangekla van openbare geweld nadat ‘n petrolbom en klippe gegooi is na die polisiestasie .

Drie polisievoertuie en ‘n rampbestuurvoertuig is beskadig in die aanval.

Die onrus het Donderdag na die naburige township, Simunye oorgespoel.

Gemeenskapslede sê dit sal ‘n sterk boodskap stuur aan die regering om spoedig op te tree en skole sal ook geteiken word.

Vanoggend moes ‘n polisiebeampte vir sy lewe vlug nadat ‘n groep woedende inwoners hom wou aanval. Hulle glo dat die polisie verantwoordelik is vir die dood van die 20-jarige man.

Vroeër is bespiegel dat die onrus na omliggende gebiede soos Simunye en Thusanang kan uitbrei, maar die polisie het die intussen die orde herstel. – Sapa

Twee wat apteker in PE aanhou verskyn

toygunTwee mans wat in hegtenis geneem is omdat hulle na bewering ‘n apteker en sy twee assistente in Seaview buite Port Elizabeth as gyselaars aangehou het, verskyn vandag in die hof.

Die polisie is nog besig om die aanklagte teen die pa en seun te formuleer. Die 53-jarige pa en sy 19-jarige seun het reeds mediese en sielkundige toetse ondergaan en word in die selle by die Kabegapark-polisiestasie aangehou.

Die twee het geëis dat die apteker dodelike inspuitings aan hulle toedien en gedreig om almal met plofstof en ‘n vuurwapen te vermoor.

Dit het later aan die lig gekom dat die twee slegs ‘n speelgoedgeweer en ‘n brandbom by hulle gehad het.

Die beleg van sewe uur is beëindig toe die polisie ‘n skokgranaat gebruik en die twee in hegtenis geneem het. Die twee mans het in ‘n tent op die strand gebly. – RSG

Sewe vas vir veediefstal

veediefstalDie polisie in KwaZulu-Natal het minstens sewe verdagtes in hegtenis geneem wat in besit betrap is van vee wat vermoedelik op Vryheid in die noorde van die provinsie gesteel is.

Die verdagtes is tydens ‘n polisie-padblokkade aangekeer. ‘n Polisiewoordvoerder, Thulani Zwane, sê minstens 57 stuks vee is teruggekry.

Hy sê dit is moelik om van die vee te identifiseer omdat hulle nie gebrandmerk is nie.

Hy het ‘n beroep op vee-eienaars gedoen om met die veediefstaleenheid op Vryheid in verbinding te tree, sodat hulle die beeste wat by die eenheid geskut word, kan probeer identifiseer. – Sapa

Luukshede vir regeringslui was nooit bekostigbaar nie

ccardsDie vraag is waarom dit bykans 20 jaar vanaf 1994 geneem het vir die regering om te besef dat die vermorsing van geld op luukse ministershuise en op kredietkaarte die verkeerde boodskap aan die publiek stuur en nie bekostigbaar is nie.

Die VF Plus verwelkom wel hierdie besparingsmaatreëls en beperkinge op luukse staatsuitgawes wat minister Pravin Gordhan as deel van sy mediumtermynbegrotingsrede aangekondig het.

Die redes vir die strenger maatreëls is die verminderde belastinginkomste wat die staat ontvang het en beslis die naderende verkiesing.

Die afgelope 19 jaar het die regering daaraan gewoond geraak dat die belastinginkomste elke jaar meer is as wat voorspel is. Die minister van Finansies het nou aangekondig dat minder belasting as wat verwag is, ingevorder is. Waar die mynbousektor in die verlede tot R22 miljard ingebring het, het dit vanjaar slegs ongeveer R12 miljard ingebring. Die mynstakings doen die ekonomie en die belastinginkomste dus baie skade.

Die voorgestelde besparingsmaatreëls, soos minder luukse behuising en verversings, sal nie soveel belastinggeld spaar nie as wat dit ‘n sterk boodskap na buite stuur oor die krisis waarin die ekonomie en die staatsfinansies hulle bevind. Selfsugtige vakbonde wat slegs aan hulle eie lede dink deur tot 60% verhogings te eis, is van die ernstigste Suid-Afrikaanse ekonomiese probleme. As die regering nie gaan slaag om die groot tekort op die begroting vinnig te verminder nie, kan Suid-Afrika se kredietgraderings weer laer aangepas word.

“As adjunkminister maak ek nie gebruik van ‘n ministershuis in Kaapstad of in Pretoria nie en het ek ook nie ’n kredietkaart nie. Met die ampsmotor wat die departement in 2009 aangekoop het, is die riglyn van 50% gevolg en nie die ministeriële handboek se 70% nie,” het dr. Pieter Mulder, leier van die VF Plus gesê.

Bloemfonteinse dokter verkrag glo pasiënte

stet‘n Bloemfonteinse dokter wat na bewering twee pasiënte verkrag het, het in die Bloemfonteinse landdroshof verskyn.

Dr Spirros Thaecharous was uit op borgtog van R2 000 toe hy op nog ‘n aanklag in hegtenis geneem is.

Albei die klaagsters is na bewering in sy spreekamer aangerand. Borgtog van R5 000 is nou aan hom toegestaan.

Die polisie het ‘n beroep gedoen op vroue wat soortgelyke probleme ondervind het, om na vore te kom. Die saak is tot 25 November uitgestel. – RSG

Swart polisieman wat glo sy dogter verkrag vas

saps5‘n Polisiebeampte van KwaMashu, wat daarvan beskuldig word dat hy een van sy dogters verkrag en die ander een seksueel aangerand het, sal Woensdag in die Ntuzuma-landdroshof om borgtog aansoek doen.

Die polisiebeampte het hom verlede Dinsdag aan die onafhanklike polisie-ondersoekdirektoraat (Opod) oorgegee.

Ncumiza Fandesi, woordvoerder van die departement van maatskaplike ontwikkeling, het die 15- en 16-jarige dogters die saak aangemeld. Die tieners en hul negejarige susters is na ‘n plek van veiligheid geneem.

Die oudste dogter beweer die verkragting het verlede jaar begin. Die 15-jarige dogter het aan die polisie gesê sy word sedert Maart seksueel aangerand. – Sapa

Burry Stander-saak wéér uitgestel

burry2Die saak van die taxibestuurder wat daarvan beskuldig word dat hy die internasionale bergfietskampioen Burry Stander doodgery het, is in die Port Shepstone-landdroshof uitgestel.

“Die saak is tot 28 en 29 November uitgestel sodat nog bewyse ingesamel kan word,” het Nathi Mncube, woordvoerder van die Nasionale Vervolgingsgesag, gesê.

Njabulo Nyawose het die 25-jarige Stander na bewering in Januarie tydens ’n oefenrit in KwaZulu-Natal doodgery.

‘n Patoloog, Lindani Nyawose het in die landdroshof op Port Shepstone getuig oor die noodlottige beserings wat die Olimpiese fietsryer opgedoen het toe hy in Januarie naby Shelley Beach deur ‘n taxi raakgery is.

Sy sê Stander se nek was gebreek en sy rugmurg was beskadig. Hy het ook bloeding op die brein opgedoen.

Die KwaZulu-Natalse vervolgingsgesag het in Maart vanjaar gesê die aanklag van strafbare manslag teen Nyawose is voorlopig teruggetrek, maar dié aanklag is in Julie weer ingestel. – Sapa

Saak teen Lonminmyners uitgestel

Duncan Scott
Duncan Scott in die warm stoel

Die saak teen die 270 Lonmin-mynwerkers en lede van die publiek wat aangekla word van openbare geweld, ‘n onwettige byeenkoms en besit van gevaarlike wapens is in die Garankuwa landdroshof tot 20 Maart volgende jaar uitgestel.

Die regsverteenwoordiger vir die mynwerkers, advokaat Dali Mpofu sê ‘n aansoek gaan voor die hof gebring word om die saak uit te gooi, omdat dit nie suksesvol verhoor kan word nie.

Hy sê die saak moet teruggetrek word hangende die uitkoms van die Marikana-kommissie van ondersoek.

Die mense is in hegtenis geneem na die onbeskermde staking by die Lonmin platinum-myn by Marikana in Augustus verlede jaar. Vier-en-dertig mense is dood nadat die polisie op stakende werkers geskiet het.

Intussen hervat die Marikana-kommissie van ondersoek vandag sy werksaamhede nadat dit ‘n week lank verdaag het.

Die getuienisleier, Matthew Chaskalson sal voortgaan om die polisie se Duncan Scott te ondervra, terwyl 28 getuies nog voor die kommissie moet getuig.

Advokaat Dali Mpodu sal weer gearresteerde en beseerde mynwerkers verteenwoordig ná ‘n hofbeslissing dat die werkers se regskoste deur die staat betaal moet word. – RSG

Popela kry grond na eis slaag

landclaimDie Popela-gemeenskap buite Modjadjiskloof in Limpopo gaan uiteindelik hulle grond terugkry, sewe jaar nadat die Grondwethof beslis het dat swart individue die regmatige eienaars is.

Die streek se grondkommissaris, Tele Maphoto het bevestig dat die eis binnekort afgehandel sal wees, nadat ‘n ooreenkoms tussen die huidige eienaars en die Kommissie vir Grondeise bereik is.

Die gemeenskap het die Hof tien jaar gelede genader nadat laer howe beslis het dat hulle nooit op die grond gewoon het en dus nie die regmatige eienaars is nie.

Regter Dikgang Moseneke het toe bevind dat Popela nie bestaan het as ‘n gemeenskap ten tye van die onteiening nie, maar as individuele huurarbeiders en dat hulle as individue oor dieselfde regte as gemeenskappe beskik.

Die uitspraak het ‘n beroering veroorsaak omdat die betrokke gemeenskap as individue die eis teen ‘n boer Augustus Altenroxel, van Limpopo, geloods het.

Altenroxel het volgehou dat hy destyds nooit geweet het van apartheidswette soos die Naturelle Wet oor Grondbesit, die Naturelle Trust en Grondbesitwet, die Bantoe Wysigingswet op en die regeringskennisgewing van 1970 oor swart huurarbeid nie.

Die bestuur van die Wesfalia-plase het sedertdien geweier om ‘n stuk grond vry te stel sodat die gemeenskap toegang tot water kan hê.

Die Popela-gemeenskap het in Julie na Westfaliaplase by Mooketsi opgeruk om hul grond terug te eis van die huidige eienaars ná die Grondwethof se beslissing van agt jaar gelede oor ‘n aantal plase in die Mooketsi-gebied.

Die grondkommissaris het toe gesê dat hulle die onteieningsroete sal volg as die eienaars nie gehoor gee aan die beslissing nie.

Die Popela-gemeenskap se woordvoerder Ally Maake het toe gesê hulle sal die grond met geweld vat indien die huidige eienaars voortgaan om te weier om dit te oorhandig wat ook die toegang tot water insluit.