Suider-Afrika Archives - Page 296 of 888

Drie tieners verdrink by Knysna

Drie tieners is in die hospitaal oorlede nadat hulle by Leisure Island op Knysna in die Suid-Kaap verdrink het.

Die drie is deur die see meegesleur, terwyl ‘n vierde kind oorleef het.

‘n Woordvoerder van die Nasionale Seereddingsinstituut, Craig Lambinon, het bevestig dat ‘n vierde meisie oorleef het.

Hy sê die NSRI kon daarin slaag om die drie uit die water te haal en hulle op die toneel behandel met mond-tot-mondasemhaling.

Hulle is daarna na die hospitaal gehaas, maar ten spyte van voortgesette noodbehandeling is die drie dood verklaar.

Lambinon sê daar word vermoed dat hulle in vlakwater deur seestrome meegesleur is.

Die munisipaliteit van Knysna het hulle skok uitgespreek oor die dood van drie kinders in ‘n trekstroom.

Hulle was glo tussen tien en dertien jaar oud en is in die plaaslike hospitaal dood.

Die nasionale seereddingsinstituut die vierde kind het ongedeerd uit die water gestap.

Hul name is nie bekendgemaak nie.

IVP, APC sal nie koalisie met KD aangaan nie

Die leier van die African People’s Convention, Themba Godi sê sy party sal nie by die opposisie-koalisie, die Kollektief vir Demokrasie aansluit nie.

Godi sê sy party se politieke program verskil van dié van Kollektief vir Demokrasie onder aanvoering van Mosiuoa Lekota.

Die KD wat uit ‘n paar marginale partye bestaan, beplan om saam te werk met die oog op aanstaande jaar se verkiesing.

Skaars ‘n dag na die aankondiging dat die IVP ook deel uitmaak van die groep, het die IVP gesê hulle was geskok om uit te vind dat hulle by die kollektief aangesluit het.

“Die leierskap van die IVP was geskok om te leer in die media, dat die IVP ‘n formele koalisie vir die komende 2014 aangegaan het om die nasionale en provinsiale verkiesing te betwis,” het die party se sekretaris-generaal, Sibongile Nkomo, gesê in ‘n verklaring Woensdag .

“Die IVP het nog nie sy seën gegee vir ‘n nuwe party wat gevorm moet word nie, en het ons ingestem om as ‘n deel van ‘n formele opposisie aan die koalisie vir die 2014 verkiesings deel te neem,” het sy gesê.

Nkomo gesê haar party is versigtig vir alliansies na die rampspoedige ervaring in 2004, toe hulle die noodlottige Koalisie vir Verandering met die Demokratiese Alliansie in KwaZulu-Natal aangegaan het.

Dit het gelei tot “meer as 250.000 bedorwe stembriewe (wat) die diepte van verwarring aangedui het onder voetsoolvlakondersteuners, wat vir beide partye op die stembrief gestem het,” het sy gesê.

“Dit was tot die IVP se nadeel,” sê Nkomo, en het bygevoeg dat dit bygedra het dat die party beheer van KwaZulu-Natal aan die ANC afgestaan het.

Die IVP het beklemtoon dat hulle nie ‘n koalisie aangegaan het nie, maar ‘n strategiese samewerkingsooreenkoms is vir die 2014-verkiesing.

Die Demokratiese Allaince (DA ) het na bewering ‘n uitnodiging om aan te sluit van die hand gewys.

Cosatu dreig Numsa oor Vavi

Cosatu dreig met regstappe teen die vakbond Numsa, omdat hy die geskorste hoofsekretaris, Zwelinzima Vavi genooi het om sy spesiale kongres toe te spreek.

Cosatu het vroeër by die geaffilieërde Numsa oor die uitnodiging aan Vavi beswaar gemaak en gesê dat die uitnodiging teen die besluit om Vavi te skors indruis.

Die federasie se sentrale uitvoerende komitee-vergadering het Vavi verbied om enige Cosatu-byeenkoms toe te spreek.

Die vakbondfederasie het gesê dat Numsa nie uit sy geledere geskop sal word nie, maar dat Vavi se uitnodiging in ‘n baie ernstige lig beskou word.

Die hoofsekretaris van Numsa, Irvin Jim, het in reaksie gesê Vavi is in sy persoonlike hoedanigheid genooi om te praat by die herdenking van ‘n voormalige vakbondleier, Mthunthuseli Tom.

Vandag is die vakbond se laaste dag van hulle spesiale nasionale kongres.

‘Zuma het nie voordeel getrek uit opgraderings nie’

Die minister van Openbare Werke, Thulas Nxesi sê dit is nie waar dat die president eie voordeel getrek het uit die opgraderings nie.

Hy het gesê alle soewereine lande het ‘n plig om die land se verkose leier te beskerm.

Nxesi het die volledige inter-ministeriële verslag oor veiligheidsopgraderings by President Jacob Zuma se privaatwoning by Nkandla in Pretoria bekend gemaak.

Nxesi het gesê die opgraderings was noodsaaklik, en dat president Zuma nie daarvoor gevra het nie. Die veiligheidsopgraderings het meer as R200 miljoen gekos.

Hy het egter bygevoeg dat die spesiale ondersoekeenheid en die ouditeur-generaal ondersoek gaan instel na bewerings dat die kostes van die opgraderings opgejaag is.

Hulle sal ook ondersoek of enige ander ongerymdhede voorgekom het.

Die direkteur van die Sentrum vir Demokrasie-studies aan die Rhodes Universiteit, professor Steven Friedman het aan RSG gesê dat hy twyfel of openbare vertroue herstel is ná die bekendmaking van die interministeriële verslag oor president Jacob Zuma se privaatwoning by Nkandla.

Hy sê die ministers van die Veiligheidsgroepering, as deel van die regering, het een kant van die saak gestel.

Hy sê die verwagting is dat hulle die president sal steun.

Friedman sê sonder die verslag van die Openbare Beskermer, sal die publiek se vertroue nie herstel word nie.

Numsa wil Phiyega, Ramaphosa, Zuma voor ISH daag

President Jacob Zuma se regering, Lonmin-aandeelhouers en die nasionale kommissaris van polisie Riah Phiyega moet voor die Internasionale Strafhof (ISH) verskyn meen die metaalwerkersunie Numsa.

Afgevaardigdes na die National Union of Metalworkers van Suid-Afrika het by die spesiale kongres Woensdag gesê het hul leiers het instruksies om ‘n regsmening te kry oor die moontlikheid om die Marikanaslagting na die hof in Den Haag te verwys.

Die voorstel is deur Numsa se KwaZulu- Natal-streek ingedien en ondersteun deur die ander streke.

Mpumalanga het egter hul kommer uitgespreek dat die ISH se vooroordeel teen die Afrika-leiers bekend is.

Numsa se oproep het gekom na Dinsdagaand se vertoning by die konferensie van ‘n dokumentêr wat glo die wrede slagting van mynwerkers deur die polisie op 16 Augustus verlede jaar uitgelig het.

Die dokumentêr – nog ongeredigeer en nie vrygestel nie – het die meer as 1 000 afgevaardigdes laat kook.

Hulle het onderneem om ‘n regsmening in te win oor of daar gronde bestaan om Phiyega, die regering en die Lonmin -aandeelhouers voor die ISH te sleep.

Bo-aan Numsa se lys van Lonmin-aandeelhouers vir hul beweerde rol in die moorde is Cyril Ramaphosa, die BEE-mynmagnaat, wat net vier maande ná die voorval as die ANC se adjunk-president verkies is.

Die 16 Augustus 2012 moorde in Marikana was hoofnuus op internasionaal televisiekanale wat gelei het tot globale veroordeling.

Numsa beplan om die dokumentêr internasionaal te versprei, skynbaar in die hoop dat die ISH-aansoek sal slaag.

Numsa se adjunk sekretaris-generaal Karl Cloete het gesê die dokumentêr sal afgelewer word by sakemense.

Numsa-afgevaardigdes het ook gevra vir Phiyega se onmiddellike ontslag.”Ons is van mening dat sy [ Phiyega ] is die een wat instruksies gegee het om ons mense dood te maak,” sê Cloete.

Nkandla-verslag geopenbaar

Die volledige verslag van die ministeriële taakspan oor die veiligheidsopgraderings by president Jacob Zuma se privaatwoning in Nkandla sal Donderdag bekend gemaak word.

Die verslag sou vroeër bekend gemaak word, maar is uitgestel vanweë oud-president Nelson Mandela se dood, het RSG berig/

Die ministers van die veiligheidsgroepering sal die verslag bekend maak.

Die verslag is vroeër vanjaar deur die minister van openbare werke, Thulas Nxesi geklassifiseer, omdat dit die president se veiligheid sou benadeel.

Die besluit is egter verander nadat uittreksels uit die Openbare Beskermer, Thuli Madonsela, se verslag oor die woning in die Mail & Guardian-koerant gepubliseer is.

Die uittreksels impliseer dat die president persoonlik deur die verbeterings bevoordeel is.

Die ANC het vroeër versoek dat die volledige verslag bekend gemaak word.

Ivoorsmokkelaar vas by OR Tambo

‘n Chinese vrou is in die streekhof in Kemptonpark aan die Oos-Rand tot ‘n boete van R50.000 of drie jaar tronkstraf gevonnis nadat sy probeer het om ivoor deur Suid-Afrika na Hongkong te smokkel.

Sy is een van talle Asiese smokkelaars wat die afgelope tyd vasgevat is.

Chinese doeanebeamptes het Augustus in Hongkong op 1 120 olifanttande, 13 renosterhorings en vyf luiperdvelle beslag gelê.

Dit beteken 3 ton ivoor is sedert Januarie vanjaar teruggevind.

‘n Woordvoerder van die Inkomstediens, Adrian Lackay, sê die vrou wou meer as 13 kilogram ivoor uitsmokkel.

Die 58-jarige Jialing Yang is Vrydag op die OR Tambo Internasionale Lughawe in hegtenis geneem.

Yang beweer dat sy die ivoor by ‘n vlooimark in Mosambiek gekoop het.

Vier mans en drie vroue is na samewerking deur die Inkomstediens, die polisie en Interpol by die lughawe in Hongkong vasgetrek.

Die sewe mense het van Dubai oor Johannesburg na Hongkong gereis.

Grace Ge Gabriel, die Internasionale fonds vir dierewelsyn, Ifaw, se streekdirekteur in Asië, het vroeër gesê olifantstropery in Afrika is buite beheer en die groot beslagleggings is bewys hiervan.

Die meeste ivoor is bedoel vir die Asiese mark, veral China, waar dit as “wit goud” bekend is en vanweë die skaarsheid, al duurder raak.

Die Wildlife Trade and Monitoring Network (Traffic) lei tans labrador-honde op om doene-amptenare te help met die opsporing van onwettige handel in wilde diere se horings of velle.

Die labradors kan ivoor, renosterhoring, tierbeendere, luiperdvelle, ietermagogskubbe en varswaterskilpaaie uitsnuffel selfs al is dit dig verpak.

Winnie tree tot Mandela-erfgename se geveg toe

Winnie Mandela het die standaard gestel wat kopdoeke betref, wat Koos Bekker en Piet Croucamp nou volg — Winnie Madikizela-Mandela

Winnie Madikizela-Mandela het tot die geveg tussen oudpresident Nelson Mandela erfgename toegetree deur haar steun aan Mandela se oudste dogter te verklaar.

Sy sê koerantberigte wat beweer daar is gevegte binne die Mandela-familie is van alle waarheid ontbloot.

Sy sê daar is “geen debat” oor opvolging in die Mandela-familie nie, in weerwil van talle bewyse dat die familie stry oor Mandela se nalatenskap.

Mandela se gewese vrou het haar steun aan Mandela se oudste dogter Makaziwe toegesê in die geveg tussen haar en Mandela se kleinseun.

Madikizela-Mandela het die media in ‘n verklaring beskuldig van insinuasies wat ontwerp is om die familie in oneer te bring.

Sy het gesê gewoontereg en tradisie bepaal dat Makaziwe die hoof van die familie word. Volgens Madikizela-Mandela sal Makaziwe besluite neem met die steun van haar susters Zenani en Zindzi.

Sy sê Mandela se oudste kleinseun Mandla is deel van die volgende generasie, en sal hom daarom moet hou by Makaziwe se besluite.

Vavi sê Zuma het misluk

Die geskorste hoofsekretaris van Cosatu, Zwelenzima Vavi sê die ANC behoort ander beleidsrigitngs te aanvaar wat ‘n verbintenis tot radikale ekonomiese transformasie verklaar.

Hy het in ‘n striemende aanval teen die regering onder leiding van die ANC geloods.

Vavi het gesê President Jacob Zuma se regering het misluk.

Vavi sê die ANC kon nie daarin slaag om die werkloosheidskrisis aan te spreek of om behoorlike werk te skep nie.

Vavi het by die metaalwerkersvakbond Numsa se spesiale kongres in Boksburg aan die Oos-Rand gepraat.

Die kongres moet besluit of Numsa die ANC in die verkiesings in 2014 gaan steun, en of hy wil deel bly van die vakbondfederasie Cosatu.

Die vakbondfederasie is een van die vennote van die drieparty-alliansie.

Gill Marcus vier oorname van Uniegebou met spesiale R2-munt

Gill Marcus, wat self as ‘n begunstigde van die ANC se verowering van die land en sy instellings, R5 miljoen per jaar verdien, het so pas ‘n nuwe R2-muntstuk aangekondig om haar party se oorname van die Uniegebou te vier.

Hoewel die munt aangebied word om die eeufees van die Uniegebou te herdenk, is dit uit verklarings duidelik dat die Reserwebank die Uniegebou aan Nelson Mandela koppel. As gevolg van die bank se ideologies geïnspireerde note met Mandela se gesig daarop het dit in die mees onlangse boekjaar ‘n verlies van R1,27 miljard getoon.

Dit het egter nie die bank verhoed om Marcus se enorme salaris van R4 990 000 te betaal nie – twee keer soveel soos die staatspresident s’n. Selfs haar adjunkte verdien enorme salarisse. Daar is nie minder as drie van hulle nie, wat met die volgende vergoedingspakkette spog:

Daniel Mminele: R3,8m

Francois Groepe: R3.56m

Lesetja Kganyago: R3,81m

Groepe was voorheen by Naspers werksaam waar hy die uitvoerende hoof van Media24 was. Hy is egter weens onbekwaamheid deur mnr. Koos Bekker, uitvoerende hoof van Naspers, afgedank.

Volgens Marcus is dit nie nodig vir die Reserwebank om wins te maak nie. “Ons is nie ‘n instelling wat deur die winsmotief gedryf worrd nie. Niemand voel gemaklik met verliese nie, maar die oogmerk is nie om winste te maksimaliseer nie. Ons oogmerk is om ons werk te doen. Soms maak jy ‘n wins en soms ‘n verlies.”

Daar sal ook ‘n spesiale uitgif van sterlingsilwermunte geskied. Volgens Hlengani Mathebula, woordvoerder vir die SARB. sal die SA Munt in Midrand die munstukke vervaardig: “Die SA Munt sal die sterlingsilwer- R2-kroon uitreik as ŉ enkelmuntstuk met sy beperkte oplaag van 1 000, sowel as deel van ŉ versamelaarstelletjie wat die kroon, sirkulasiemuntstuk en 20 herdenkingseëls insluit,”

Daar sal slegs 700 stelle beskikbaar gemaak word. Die stelle en die R2-kroon sal by SA Mint en Coin World te koop aangebied word.

Die muntstuk het die landswapen, jaar van uitreiking, en die woorde “Suid-Afrika” in Afrikaans en isiXhosa op sy voorkant. ŉ Afbeelding van die Uniegebou verskyn op die rugkant, tesame met ‘n Engelse inskripsie.

Die R2-sirkulasiemuntstuk sal van vroeg 2014 af in omloop geplaas word.