Nuus Archives - Page 576 of 1583

Twee kritiek na hyskraan-ongeluk in Pretoria

Twee mense is ernstig beseer en nog drie het ligte beserings opgedoen toe ‘n hyskraan in die ooste van Pretoria teen drie voertuie gebots het.

Die ongeluk het op die hoek van Solomon Mahlangu- en Garsfontein-rylaan plaasgevind.

Volgens die nooddienste het die bestuurder beheer oor die hyskraan verloor toe die remme waarskynlik onklaar geraak het.

Dit het deur die omheinings van twee huise gebars en in ‘n sloot tot stilstand gekom.

Die hyskraanbestuurder en ‘n motoris is in ‘n kritieke toestand.

Die nooddienste het gevra dat mense die gebied vir die volgende uur moet vermy. – Sapa

Stenograaf in Kongres val Vrymesselaars aan

‘n Stenograaf Dianne Reidy in die Amerikaanse Kongres het lede laat Woensdagaand op die stertkant van die skuldplafonstem onkant betrap toe sy na die podium gestap het om die Vrymesselaars aan te val.

“Alle lof aan God,” het me Reidy gesê. “Hy sal nie bespot word nie. Hy sal nie bespot word nie. Raak my nie aan nie. Hy sal nie bespot word nie.”

Sy het gesê Amerika kan nie twee meesters dien nie.

Fox News sê me Reidy is al lank werksaam op Capitol Hill en skaars die radikale partydige soort. Haar onderbreking het veroorsaak dat verskeie lede erg onthuts was. Party het haar geestesgesondheid bevraagteken. Die kabelnetwerk het ook berig dat me Reidy gestuur is vir ‘n geestelikegesondheidsevaluering kort ná die voorval .

Onder haar stellings, soos vasgelê op klank : “Die grootste misleiding hier is dat dit nie een nasie onder God is nie. Dit was nog nooit. As dit was, sou dit nie gewees het nie. Nee, dit sou nie gewees het nie. Die Grondwet is nie geskryf deur ‘n Vrymesselaar nie. Hulle gaan teen God. Jy kan nie twee meesters dien nie. Jy kan nie twee meesters dien nie. Alle lof aan God, die Here Jesus Christus. Loof Hom vir ewig.”

“Ek dink daar is baie simpatie, omdat iets duidelik daar gebeur het,” sê Gerry Connolly. Ander lede het haar as vriendelik en gaaf beskryf. Sy is al byna 20 jaar daar werksaam.

“Julle is almal kinders van die duiwel,“ het die stenograaf uitgeroep voordat sy uit begelei is. Een kommentator het droogweg opgemerk dat daar “vir die een kort klein oomblik het eintlik gesonde verstand en dapperheid op die Huis vloer aanwesig was”.

Gevaarligte flikker na ANC aan e-Tolwet torring

Die Suid-Afrikaanse publiek kan nou met reg bekommerd wees oor SANRAL en die ANC-regering se toekomstige planne met tolpaaie nadat die Vryheidsfront Plus vasgestel het dat twee belangrike artikels se werking onbepaald uitgestel is met die proklamasie van die E-Tolwet.

Adv. Anton Alberts, die VF Plus se parlementêre woordvoerder oor vervoer, sê die uitsluiting van die betrokke artikels, 3(b) en (c), beteken effektief dat geen sosio-ekonomiese- en verkeersimpakstudies gedoen hoef te word rakende tolpaaie nie, en dat die publiek ontneem word van die reg om hieroor ingelig te word.

Artikel 3(b) bepaal dat SANRAL sosio-ekonomiese en verkeersimpakstudies in samewerking met die geaffekteerde plaaslike owerheid en provinsie moet doen. Dit moet dan aan die publiek bekend gemaak word deur ‘n kennisgewing in die Staatskoerant.

Hierdie artikel is deur die VF Plus onderhandel en in die Wet geplaas.

Artikel 3(c) bepaal dat SANRAL aan die minister moet aandui wat die uitkoms van die sosio-ekonomiese en verkeersimpakstudies was, hoe kommentaar van die publiek geakkommodeer is, en watter stappe geneem is om die impak, soos nagevors, te verminder.

Adv. Alberts sê die verwikkeling is ‘uiters kommerwekkend’ aangesien paaie ingevolge die nuwe wet nou getol kan word sonder enige openbare deelname.

“Dit wil voorkom of die ANC-regering en SANRAL probeer om die implementering van sosio-ekonomiese en verkeersimpakstudies te vermy om dit sodoende makliker te maak om e-tol in te stel volgens hul eie diskresie en sonder om verantwoording te doen aan die publiek.

“Veral Kapenaars sal nou nie te gemaklik kan slaap met die beplande N1- en N2-Wynlandtolprojek nie.

“Die oprigting van luukse nuwe kantore van byna R90 miljoen vir SANRAL langs die N1 in Bellville spel die agentskap se planne oor e-tol vir die Kaap duidelik uit.

“Luidens koerantberigte het die agentskap in die Kaap 35 werknemers. Dit beteken byna R3 miljoen per werknemer vir kantoorruimte indien daar nie nou al vir meer personeel voorsiening gemaak word nie.

“Die VF Plus is van mening dat SANRAL vasbeslote is om e-tol in die Kaap in te stel nadat dit nou in Gauteng deurgestoomroller is nieteenstaande hewige teenkanting uit alle oorde,” sê adv. Alberts.

‘n Waarskuwing aan Julius Malema

Die VF Plus rig ‘n boodskap aan Julius Malema dat hy versigtig moet wees met sy rewolusionêre uitsprake want die geskiedenis het geleer ‘n rewolusie eet gewoonlik sy eie kinders, sê adv. Anton Alberts, die Vryheidsfront Plus se parlementêre woordvoerder oor ekonomie.

“Robespierre, ‘n roekelose, bloeddorstige en magsugtige man het die vlamme van die Franse rewolusie gestook en uiteindelik aan die hoof van die Franse Republiek gestaan deur sy vyande links en regs te elimineer met die gevreesde guillotine.

“Dit was egter ‘n kortstondige magsposisie, want die onbeheerste magte van die rewolusie het uiteindelik teen hom gedraai met sy kop wat toe ook onder die guillotine gerol het.

“Malema se vals uitsprake dat witmense alles wat hulle het, gesteel het, skep verder ‘n ‘meen’ of virale gedagte wat die wêreld ingedra word en deur arm en gefrustreerde mense as feit aanvaar word en sodoende gemeenskappe op grond van ras polariseer.

Dit is juis hierdie gewoonte van Malema om minderhede, veral wittes, te demoniseer, wat die VF Plus genoop het om die registrasie van sy party by die OVK teen te staan,” sê adv. Alberts.

Adv. Alberts sê dit is waar dat Suid-Afrika geweldige verdeeldheid in rykdom het, maar hierdie verdeling is al hoe meer intra-ras georiënteerd en nie soseer tussen rasse nie. Voorts moet die ekonomiese verdeeldheid verstaan word as ‘n probleem wat verkeerd deur die ANC hanteer is.

“Swart ekonomiese bemagtiging het tot dusver net ‘n paar swartmense oor en oor verryk terwyl die massas verder verarm het. SEB is duidelik ‘n beleid wat nie werk nie en tog het die ANC besluit om die beleid te verskerp met onmoontlike teikens wat deur die nuwe SEB-kodes gestel word.

“Regstellende aksie het op sy beurt weer die deur vir ANC-kaderontplooiing wyd oopgemaak met die gevolglike ineenstorting van dienslewering deur die staat en endemiese korrupsie wat deel geword van die samelewing.

“Malema moet gevolglik versigtig optree deur eerder sy aanvalle aan die adres van die ANC te rig en in gedagte te hou dat sy uitsprake die omgewing skep vir rasse-geweld. Dit mag dalk sy hart warm laat klop indien dit werklik gebeur, maar uiteindelik sal die vlamme van die rewolusie hom ook verdelg. Uiteindelik is daar geen oorwinnaar nie.

“Daarom sal die VF Plus verdere stappe oorweeg indien Malema voortgaan met sy vals en polariserende uitsprake,” sê adv. Alberts.

Gauteng in 2050 so digbevolk soos Bangladesj

Internasionale navorsers het bevind dat Gauteng teen 2050 byna so dig bevolk as Bangladesj sal wees.

Die suid-Asiatiese land is een van die digsbevolkte lande ter wêreld.

Jonathan Moyer van die Joseph Korbel Skool vir Internasionale Studies het ‘n seminaar in Pretoria gelewer.

Hy sê die regering se infrastruktuur-beplanning sal in ‘n groot mate bepaal hoe die toekoms gaan lyk.

Hy sê daar moet in infrastruktuur belê word, met die oog op behoeftes wat selfs eers 50 jaar later ten volle ‘n werklikheid sal word.

Onbehoorlike beplanning kan moontlik negatiewe implikasies vir verkeer, krag- en watertoevoer, sanitasie, sowel as onderwys en gesondheidsdienste inhou. – RSG

Britse duikbote was geen opsie, hoor Wapenaankope-kommissie

Die hoof van die vlootstelsel-afdeling by Krygkor, Rob Vermeulen het Maandag bewerings weerlê dat Suid-Afrika ‘n geleentheid om goedkoper, Brits-vervaardigde Upholder/Victoriaklas-duikbote te koop oor die hoof gesien het.

Vermeulen het voor die Wapenaankope-kommissie in Pretoria gesê dat Suid-Afrika voldoende produkte by die Duitse duikbootkonsortium gekry het, ondanks kritiek.

Vermeulen het sy getuienis gister voltooi, en sy kruisondervraging sal vandag begin. Die kommissie het bevraagteken waarom die kontrak aan die Duitse maatskappy toegeken is om die duikbote te bou terwyl daar ander bevoegde sakevennote was.

Vermeulen het verduidelik dat die duikbote voldoende is vir die werk wat hulle moet doen.

Hy sê dis jammer dat die hele projek besmet is deur die bewerings oor die aankope.

Hy het gereageer op ‘n vraag wat aan hom gestel deur Sammy Lebala SC, wat gevra het of daar enige waarheid steek in kritici se aansprake dat Krygkor die goedkoper duikbote vir ‘n duur Duitse model verruil het as gevolg van korrupsie .

Vermeulen het sy getuienis hervat na Krygkor en die departement van verdediging toegegee het aan die kommissie se eis dat hulle sensitiewe dokumente vrystel. Regter Willie Seriti het uitgestel gegee om die regering tyd te gun om al die dokumente te oorhandig.

Vermeulen het gesê onafhanklike kundiges het gehelp met die Suid-Afrikaanse vloot se stel kriteria om voornemende duikbote te evalueer. Die topprioriteit was om die vermoëns van die duikbote en die ouderdom van die tegnologie aan boord van die skip te meet.

Hy het gesê die nadeel van die Britse Upholderduikboot – wat op ‘n dieselenjin in plaas van ‘n kernreaktor staatmaak – is dat dit stokou tegnologie is wat ontwerp is in die Verenigde Koninkryk in die laat 1970’s. Dit sou moeilik gewees het om hulle te plaaslik te herstel in Simonstad.

Die vier lande op die kortlys (Duitsland, Frankryk, Italië en Swede) het egter die nuutste tegnologie gehad.

Terwyl die Britse duikbote gesien word as goedkoop, is dit reeds bekend dat hulle weens hulle tegniese probleme uiteindelik hul koste laat toeneem.

Die Britse duikbote wat aan die Kanadese vloot verkoop is en gestoor is, was volgens verskillende politieke partye in Kanada só sleg dat hulle nooit in diens was in Kanada nie en uiteindelik onnodige uitgawes was, het mnr Vermeulen gesê.

Vermeulen het ook ontken dat senior vlootpersoneel ingemeng het met die kortlys van die verkrygingsafdeling .
Intussen het Lawyers for Human Rights gister gekla dat nie genoeg inligting oor die Krygkorgetuies beskikbaar is nie.

Inlywing van Midvaal en Emfuleni in nuwe metro ’n ramp vir inwoners

“Die beoogde inlywing van die Midvaal-munisipaliteit in Meyerton en die Emfuleni-munisipaliteit wat Vereeniging en Vanderbijlpark insluit in ‘n nuwe metroraad sowel as die verskuiwing van Heidelberg-Lesedi na die Ekurhuleni-metro aan die Oos-Rand, stuur af op ‘n diensleweringsramp, sê mnr. Jaco Mulder, VF Plus-LPW vir Gauteng.

Die blote herverdeling van hulpbronne sal opsigself geen welvaart en verbeterde dienslewering in die Vaaldriehoek teweegbring nie, maar wel neerkom op die herverdeling van armoede. Die streek benodig sterk leierskap en kundige amptenare wat dienslewering kan verseker.

Die geïntegreerde ontwikkelingsplanne van al drie plaaslike owerhede ter sprake maak nie vir so samesmelting voorsiening nie en die reeds bankrot Emfuleni-munisipaliteit se skuldlas sal deur Midvaal se belastingbetalers gedra moet word.

Verder is ‘n enkele openbare vergadering met geen in diepte inligting oor begrotings en die invloed op geïntegreerde ontwikkelingsplanne nie, totaal onvoldoende om as genoegsame openbare deelname gereken te word.

Die VF Plus het reeds op 17 April 2013 by die afbakeningsraad appèl aangeteken nadat openbare verhore tussen 7 en 11 April 2013 gehou is binne die twee munisipale gebiede en verskeie ander sentra in Suid-Afrika. Die voorsitter van die munisipale afbakeningsraad, mnr. LJ Malhango, het die kennisgewing tot openbare verhore eers op 3 April 2013 onderteken – minder as 6 dae voordat die openbare verhore sou plaasvind en die publieke kennisgewings in nuusblaaie is so laat as op Sondag 7 April 2013 gepubliseer.

Die appèl is geskoei op die gees van die Suid-Afrikaanse grondwet soos vervat in artikel 33 wat in geen onduidelike terme die reg op billike administratiewe aksie reël in paragraaf 1, 2 en 3 en die Wet op die Bevordering van Billike Administrasie “PAJA”, wet 3 van 2000.

Die VF Plus is oortuig dat die munisipale afbakeningsraad lank gelede reeds besluit het om voort te gaan met die stap en dat openbare vergaderings weinig invloed sou hê op die besluit. Die VF Plus het gedurende 2012 reeds met die munisipale afbakeningsraad in verbinding getree om duidelikheid te kry oor die aangeleentheid en het ook voorleggings aan die afbakeningsraad gemaak sonder enige reaksie.

‘n Aanlynpetisie wat die party geloods het by www.mymunisipaliteit.org.za om ‘n stem teen die beoogde samesmelting te monster, is deur duisende mense onderteken. Mulder het ‘n beroep op die publiek gedoen om die VF Plus en alle betrokke instansies te steun om die totstandkoming van die Metro te stuit, selfs al lei dit tot ‘n regsgeding.

Umgungundlovu kry nie metro-status nie

Die KwaZulu-Natalse LUR vir Samewerkende Regering, Nomusa Dube sê hulle is teleurgesteld in die Munisipale Afbakeningsraad se besluit om nie aan die sewe plaaslike munisipaliteite in die Umgungundlovu distrikmunisipaliteit Metro-status te gee nie.

Die distrikmunisipaliteit sluit Pietermaritzburg in. Dube het met die media gepraat nadat die Afbakeningsraad se finale besluit oor die afbakening van munisipale grense aangekondig is.

Sy sê die samesmelting van kleiner munisipaliteite in die distrik sou groot voordele ingehou het. Volgens Dube sou dit gelei het tot beter dienslewering en nuwe geleenthede vir staatsbefondsing, privaat belegging en ontwikkeling. – RSG

Teenstrydighede oor 2 swart kleuters se dood

Daar is teenstrydighede in die verklaring van die ma van twee swart kleuters wat gisteroggend dood in ‘n veld in Katlehong gevind is, het die polisie in Gauteng gesê.

‘n Inwoner van Katlehong het op die twee meisies, wat een- en drie-jaar oud was, se liggame afgekom in ‘n veld naby Zonkizizwe.

Hulle ma, ‘n Mosambiekse burger is, wat by hulle was is in ‘n hospitaal opgeneem in ‘n kritieke toestand.

Sy het beweer dat haar man hulle in die veld gelos het by ‘n bouval met ‘n bottel koeldrank waarmee sy en haar kinders vergiftig is, omdat sy hom saam met ‘n ander vrou betrap het.

Die waarnemende provinsiale polisiekommissaris, Joel Mothiba sê egter die voorlopige ondersoek dui op teenstrydighede in die ma se weergawe van gebeure.

Obama lig skuldplafon

Die Amerikaanse staatsdiens begin weer vanoggend werk nadat die Kongres ter elfder ure ‘n ooreenkoms bereik het om die regeringstilstand te beëindig en die skuldplafon te lig.

Die Huis van Verteenwoordigers, wat deur die Republikeiene beheer word, het ‘n kort gelede met 285 stemme teen 144 ‘n ooreenkoms aanvaar, terwyl die Senaat vroeër met 81 stemme teenoor 18 ten gunste van die wetsontwerp gestem het.

Die Amerikaanse minister van Finansies, Jacob Lew sê die ooreenkoms stel die VSA in staat om sy geloofwaardigheid én kredietwaardigheid gestand te doen.

President Barack Obama het reeds die die wet onderteken en sê die land kan weer begin werk. – RSG