Nuus Archives - Page 559 of 1583

Groot aanlynkuberaanval in Londen gesimuleer

‘n Kuberaanval deur ‘n buitelandse regering op die finansiële markte is Dinsdag in een van Londen se historiese geboue gesimuleer tydens ‘n “oorlogspel” om die Stad se verdediging te toets teen aanlynsaboteurs .

Sowat 100 bankiers, reguleerders, staatsamptenare en die markte se infrastruktuurverskaffers het byeengekom om deel te neem in ‘n oefening genaamd “Waking Shark II” by Plaisterers’ Hall in die hart van Brittanje se finansiële distrik .

Reguleerders en maatskappye is toenemend bekommerd oor die bedreiging van misdaad op die bankstelsel, insluitende die impak van ‘n gesamentlike aanlynaanval of -inbraak op spesifieke leners. Die Bank van Engeland het gesê banke moet hul verdediging versterk teen sulke kuberaanvalle.

Een ongeïdentifiseerde genoteerde Londense maatskappy het reeds verliese van £800 miljoen in ‘n kuberaanval gely, volgens die Britse veiligheidsdiens.

Dinsdag se vyf en ‘n half uur aanval het vanaf 1200 GMT geloop en het simulasies ontwerp om te toets hoe goed banke en ander spelers in die mark kommunikeer en koördineer met die owerhede, het bronne aan Reuters gesê.

‘n Bron met binne-inligting, het gesê een van die simulasies was ‘n kuberaanval deur ‘n valse buitelandse regering en ‘n ontkenning van diens ( denial-of-service of DOS ) aanval, wat netwerkhulpbronne van gebruikers weerhou.

Die bron het die oorlogspel as ‘n “produktiewe oefening” beskryf wat deelnemers beter toegerus het om ‘n werklike aanval die hoof te bied.

Die Ministerie van Finansies , BoE en die finansiële oorsig owerheid het gesê die oefening was “volgehou en intensief” .

“‘n Deeglike hersiening van die lesse wat geleer is om moontlike verbeterings te identifiseer wat die veerkragtigheid van die sektor kan verseker,” sal in ‘n verslag gepubliseer word vroeg in die nuwe jaar, luidens die gesamentlike verklaring wat uitgereik is.

Die oorlogsimulasie, wat een van die grootste van sy soort in die wêreld was, volg op ‘n soortgelyke grootskaalse simulasie in New York vanjaar genaamd “Quantum Dawn 2” en kom te midde van verhoogde vrese oor die bedreiging van inbraak en kuberaanvalle .

“Dit is ‘n goeie geleentheid om enige foute uit te stryk voor ons kuberverdediging in woede getoets word,” sê Stephen Bonner, ‘n vennoot in KPMG se Inligtingspan .

Richard Horne, ‘n vennoot by PricewaterhouseCoopers, wat spesialiseer in kubersekuriteit , het gesê die oefening was nuttig, maar die werklike uitdaging lê in die koördinering van regoor die bedryf om seker te maak ‘n krisisscenario word nooit bereik nie .

“Dit sal baie gedetailleerde tegniese werk en toetse kos, gekoördineer oor die hele bedryf, om werklik te verstaan wat al die interafhanklikhede is om sinvolle herstelplanne te ontwikkel,” sê Horne .

Die beleggingsbankbedryf het self ‘n sleutelrol gespeel in die koördinering van die oefening, saam met BoE , die Tesourie en die finansiële oorsig owerheid ( FCA ) en dit volg op ‘n soortgelyke oefening twee jaar gelede, het die bronne gesê.

Instellings wat betrokke is by hierdie jaar se oorlogspel het ingesluit Barclays, BNP Paribas, Bank van Amerika, Commerzbank, Credit Suisse, Deutsche Bank, Clear, Goldman Sachs, HSBC, JP Morgan, LCH Clearnet, London Stock Exchange, Morgan Stanley, Nomura, Royal Bank van Skotland, SocGen, SWIFT en UBS, volgens ‘n bron vertroud met die kwessie. – Reuters

Egipte spoor gesteelde antieke artefakte in Jerusalem op

Egipte het Sondag gesê dat 90 antieke artefakte is in Jerusalem opgespoor by ‘n veiling, en het gevra dat Israel ander oudhede terugvind en aan Kaïro terugbesorg.

Die Ministerie van oudhede het gesê hulle het die Israeliese owerhede versoek om in te gryp nadat daar die “afgelope weke 110 antieke Egiptiese artefakte op die webwerf van ‘n veilingshuis in Jerusalem te koop aangebied is”.

Die veilingshuis was nie in staat om dokumente te voorsien van wie die items besit nie en die Israeliese owerhede moes die veiling staak, het die ministerie gesê. Hulle sal 90 van die 110 artefakte na Kaïro terugstuur.

Egipte het die Israeliese owerhede gevra om ondersoek in te stel en stukke wat reeds verkoop is op te spoor sodat hulle aan Egipte terugbesorg kan word,” het die ministerie gesê.

Ali Ahmed, ‘n beampte by Egipte se departement van oudhede, het gesê verskeie antieke Egiptiese artefakte is na bewering gesien by Israeliese veilings en Kaïro het regstappe geneem om van die gesteelde items terug te kry.

In Oktober het die Ministerie het gesê hulle het ‘n versekering van eBay ontvang dat hulle nie artefakte wat onwettig uit Egipte kom, sal opveil nie.

Gedurende die opstande in 2011 is verskeie museums geplunder, insluitende die Museum van Egiptiese oudhede naby Kaïro se Tahrir Square, middelpunt van die demonstrasies.

Ander museums is ook besteel in die onrus wat gevolg het na die weermag se omverwerping van die Islamitiese president Mohamed Morsi op 3 Julie, en baie van die items word steeds vermis.

Stuxnet het waarskynlik nog kernraanlegte besmet

Sekuriteitskenners het gewaarsku die berugte Stuxnetvirus waarskynlik verskeie kernfasiliteite buite Rusland en Iran besmet het.

Kundiges sê die aard van Stuxnet beteken dat kernaanlegte kwesbaar is vir die virus.

Die Internetsekuriteitsdeskundige Eugene Kaspersky beweer ten minste een Russiese kernsentrale is reeds besmet.

“[Die lid van die personeel het aan ons gesê] hul kernkragsentrale se netwerk, wat van die internet ontkoppel is [ …] is erg besmet deur Stuxnet,” het Kaspersky tydens ‘n toespraak voor die Australiese Nasionale Persklub 2013 gesê.

Stuxnet is ‘n sabotasievirus wat oorspronklik gefokus het op Windows-stelsels in Iran se kernfasiliteite in 2010 en is na bewering deur die VSA en Israel versprei.

Die virus is glo oorspronklik ontwerp om Iran se kernindustrie te teiken, maar het daarna daarin geslaag om homself te versprei op onvoorsiene maniere.

Ontleders sê Stuxnet se onvoorspelbare natuur beteken dat dit waarskynlik versprei het na ander installasies buite die sentrale waarna Kaspersky verwys.

“Dit het nie versprei via die internet nie. Dit versprei as gevolg van ‘n fout via USB. Gegewe die gemeenskap sou ek nie verbaas wees as ander lande se kernkragsentrales met besmette rekenaars sit nie,” het een gesê.

“Baie van hierdie stelsels is nie verbind tot die internet nie, want hulle is so oud en delikaat. Diegene wat aanvalle loods besef nie die gevaar wat dit inhou vir die Internet en die onvoorsiene gevolge nie.

“Alles wat jy doen kan boemrang. Dit kan terugkom na jou,” het die stigter van Kaspersky Lab gesê.

“Dit is die kuberruim, daar is nie grense nie.”

DRK-vredesooreenkoms in die weegskaal

‘n Vredesooreenkoms tussen die regering van die Demokratiese Republiek van die Kongo en M23 rebelle is in die weegskaal, nadat ‘n finale ooreenkoms nie bereik kon word nie.

Die sogenaamde Kampala Dialoog moes gisteraand afgesluit word, en die ondertekeningseremonie sou Maandag plaasvind.

Daar is blykbaar ‘n verskil oor of die ooreenkoms ‘n vredesooreenkoms moet wees of ‘n verklaring waarin die rebellie verwerp word.

Spesiale gesante in die DRK het onder leiding van Mary Robinson van die VN ‘n dringende beroep op die partye gedoen om hul verskille oor die formaat van die dokument by te lê en verbind te bly tot vrede. – RSG

Studente oorleef gewapende roof

‘n 24-jarige man is in hegtenis geneem nadat hy studente in Johannesburg beroof het, het die polisie in Gauteng Dinsdag gesê.

Die man is Maandag aangekeer nadat hy ‘n 19-jarige man en sy vriend beroof het, het ao. Xoli Mbele, polisiewoordvoerder, gesê.

Mbele het gesê die man het die vriende met ‘n vuurwapen gedreig en hulle van hul selfone en sakrekenaars beroof.

Die verdagte het probeer weghardloop, maar polisiebeamptes wat besig was met ‘n roetine-patrollie, het hom in hegtenis geneem.

Polisiebeamptes het beslag gelê op ‘n rewolwer sonder ‘n reeksnommer en ammunisie.

Die man is aangekla van gewapende roof en die besit van ‘n ongelisensieerde vuurwapen en ammunisie. – Sapa

Cyril vat City Press ombudsman toe

Die ANC gaan ’n klag by die persombudsman indien teen die Sondagkoerant City Press ná ’n berig dat mense Cyril Ramphosa uitgejou het en geweier het om sy hand te skud tydens sy besoek Sondag aan Seshego in Limpopo.

“Gaan weg, gaan weg. Jy’s nie welkom hier nie. Dis my huis. Mense gaan dood weens die ANC,” het een man volgens City Press gesê.

Cyril Ramaphosa, die ANC se adjunkpresident, het inwoners van Limpopo aangespoor om te stem anders gaan die “Boere” weer aan bewind kom, het die The Star Maandag berig.

Die werklose enkelma van drie het die ANC die skuld gegee vir die hoë werkloosheidsyfer en gesê sy het haar geloof in die party verloor.

“As al die Suid-Afrikaners nie stem nie, sal ons kwyn. Die Boere sal terugkom om ons te beheer,” het hy glo gesê.

Die ANC bestempel die City Press-berig as “fabrikasie en vervalsing”. The Star word egter geloof vir sy “akkurate, feitelike en gebalanseerde weerspieëling” van wat in Seshego gebeur het, “wat duidelik die sensasiebelaaide konkoksies en leuens wat in City Press gepubliseer is, weerspreek.

“Die manier waarop die res van die media oor dieselfde gebeurtenis berig het, wat wêrelde verskil van City Press se weergawe, laat mens vermoed dat die storie deur iemand anders in Johannesburg geskryf is, en nie deur die verslaggewer wat in Seshego was nie.

“Dis jammer dat ’n verslaggewer gestuur word om ’n storie te doen, net dat sy storie vir hom geskryf word deur iemand in die nuuskantoor ten einde ’n spesifieke agenda na te streef. Dis g’n wonder nie die maatskappy is die onderwerp van rassespanning in die nuuskantoor,” het Jackson Mthembu, nasionale woordvoerder, in die verklaring gesê. – Sapa

DRK-vredesverdrag onderteken

Die Demokratiese Republiek van die Kongo (DRK) en die oorwonne M23-rebelle gaan Maandag ’n vredesverdrag onderteken.

Die rebelle – een van talle gewapende groepe in die mineraalryke, maar verarmde ooste van die land – is met behulp van ’n spesiale intervensiemag van die Verenigde Nasies oorrompel.

M23 word na bewering deur Rwanda en Uganda gesteun. Dié lande ontken dit.

Sowat 1 500 rebelle woon in kampe oor die grens met Uganda en minstens 100 beseerde vegters het na Rwanda uitgewyk.

Die groep het verlede week aangekondig dat hy ná 18 maande sy wapens neerlê. Baie van die rebelle is oudsoldate van die DRK-weermag.

Volgens ’n regeringswoordvoerder sal van die rebelle die opsie gegun word om terug te keer na die weermag, maar die lot van die sowat 100 bevelvoerders is onseker. Sultani Makenga, M23 se leier, was vir verskeie menseslagtings, verminkings, ontvoerings en verkragtings – ook van kinders – verantwoordelik.

Die welsynsgroep Oxfam sê meer as 30 ander gewapende groepe is aktief in die streek en dat burgerlikes nog op ’n daaglikse grondslag aan geweld blootgestel word. – Sapa/AFP

Aandagsoeker spyker homself op Rooiplein vas

’n Russiese politieke aandagsoeker wat Sondag sy genitalieë in die grond vasgespyker het buite Moskou se Rooi Plein, is Maandag vrygelaat.

Piotr Pawlenski het dit uit protes gedoen teen Rusland se “polisiestaat” op die land se nasionale polisiedag.

’n Video wys die naakte Pawlenski op Rusland se befaamde plein net buite die Kremlin nadat hy homself vasgespyker het. Die polisie het hom eers hospitaal toe geneem voordat hulle hom in hegtenis geneem het.

Hy is van “eenvoudige boewery” aangekla, maar ’n hof het die aanklagte afgewys.

Pawlenski is welbekend om sy selfskending. In 2012 het hy sy mond toegewerk uit protes teen die tronkstraf wat opgelê is aan drie lede van Pussy Riot. Dié punkgroep het sonder toestemming ’n katedraal gevandaliseer uit protes teen die Ortodokse Kerk se steun aan pres. Wladimir Poetin. – Sapa/AP

Maatskappye moet belasting betaal en politieke partye steun

Pravin Gordhan, minister van finansies, het maatskappye gewaarsku om nie geld uit Afrika te “smokkel” nie, het die SAUK Maandag berig.

Gordhan het groot korporasies wat baie wins maak, maar min belasting betaal, vir kritiek uitgesonder.

Hy het by die jaarlikse G20-Afrika-konferensie in Johannesburg gesê dit kos die vasteland miljarde en Afrika se ekonomieë sal die bykomende belastinggeld goed kan aanwend.

“Afrika sal merkbaar verbeter, met meer skole, infrastruktuur en ekonomiese bedrywighede.”

“Sonder die belasting wat van maatskappye kom, word regerings gedwing om die belasting op individue te verhoog óf besteding te besnoei.”

Die ANC se tesourier, Zweli Mkize, het gesê maatskappye moet politieke partye finansier en het voorgestel dat ’n trustfonds vir dié doel geskep word, berig die Sowetan.

“Maatskappye moet miljoene betaal, maar dit behoort hulle nie te stop om die partye van hul keuse te ondersteun nie,” het Mkize volgens die koerant gesê.

Hy het gesê dat maatskappye voordeel trek uit vrede en demokrasie.

“As daar onrus is of gemeenskapsprotes is, sal daar geen sakegeleenthede wees nie…”

Volgens die Sowetan is hy bereid om met groot ondernemings te vergader om die voorstel van ’n trustfonds te bespreek.

Die Speaker van die parlement kan die fonds administreer. Geld sal toegewys word volgens die proporsionele verteenwoordiging van partye.

“Ek glo daar is ondernemings wat floreer danksy die stabiliteit en vrede wat deur demokrasie geskep word, maar dat hulle nie wil bydra nie,” het hy aan die Sowetan gesê. – Sapa

Indiese beleggers na Lesotho

‘n Sake-afvaardiging van Indië het in Lesotho aangekom om beleggingsmoontlikhede te ondersoek.

Die ministerie van Buitelandse Sake sê die afvaardiging van 15-lede sal moontlike beleggings ondersoek in sektore soos landbou, die mynbedryf en toerisme.

Hulle sal met amptenare van die Lesotho Nasionale Ontwikkelingskorporasie vergader, asook die Lesotho Toerisme Ontwikkelingskorporasie en die Basotho Ondernemingsontwikkelingskorporasie.

Die afvaardiging sal Donderdag ‘n sakeforum in Mafeteng, suidwes van Lesotho bywoon. – RSG