Nuus Archives - Page 521 of 1583

Transito-rowers kom tweede

Twee vermeende rowers is in ‘n skietery met transito-veiligheidswagte by ‘n winkelsentrum op Witbank dood.

Die polisie in Mpumalanga sê ‘n groep van sowat vyf mans het die SBV transitovoertuig by die Safewaysentrum aangeval.

‘n Woordvoerder, Selvy Mohlala, sê die mans het op die wagte losgebrand waarna hulle teruggeskiet en twee doodgeskiet het, het RSG berig.

‘n Smous is ook in die kruisvuur dood. Mohlala sê die rowers is vermoedelik van Botswana en Zimbabwe.

Die polisie soek na drie aanvallers wat van die toneel af weggevlug het.

Vroeër is vyf mense doodgeskiet in nog ‘n transitorooftog op Richmond in KwaZulu-Natal.

Onder die slagoffers is ‘n polisielid, ‘n veiligheidswag en drie vermeende rowers.

Die polisie sê die veiligheidsmaatskappy was besig om geld in die kitsbank te laai toe die veiligheidswag deur gewapende mans gekonfronteer is.

Hulle het hom daarna doodgeskiet en sy vuurwapen na bewering afgeneem.

Toe hulle probeer het om die geldhouer te verwyder, het die kleurstof ontplof waarna hulle gevlug en in die daaropvolgende skietery nog twee omstanders gewond het.

Solly Ozrovech se boeke van winkelrakke na beweerde molestering

Die boeke van ‘n gewilde skrywer is van die Christelike Uitgewers Maatskappy (CUM) se winkelrakke gehaal, na Huisgenoot berig het oor sy beweerde kindermolestering.

Ds. Solly Ozrovech se ouers was Poolse Jode wat na Suid-Afrika geïmmigreer het om die sogenaamde Jodeslagting van die Tweede Wêreldoorlog vry te spring.

Nadat albei sy ouers in ‘n motorongeluk oorlede is, is hy wees gelaat en het weens ‘n misverstand in die Afrikaanse weeshuis in Ugie beland, pleks van die Joodse weeshuis in Brixton.

Twee mans wat anoniem wil bly, beweer dat hulle deur Ozrovech gemolesteer is.

Die eerste man beweer dat hy as tienjarige weeskind gesodomiseer is deur Ozrovech, toe direkteur van die M.T.R. Smit-kinderoord in die Oos-Kaap.

’n Tweede beweerde slagoffer het soortgelyke voorvalle beskryf.

Ozrovech het met regstappe teen die tydskrif begin.

Jacques Louw, Ozrovech se prokureur, het bevestig dat Huisgenoot vir laster gedagvaar sal word.

Oranje Meisieskool moet swembadwater gebruik weens watertekort

Honderde meisies van Oranje Meisieskool het begin om die skool se swembad te benut vir water weens die erge watertekort in Bloemfontein.

Die Mangaung Metroraad sê egter die grootskaalse wateronderbrekings in die stad se noordelike voorstede sal eersdaags iets van die verlede wees.

Watertekorte veroorsaak groot ongerief vir inwoners.

Inwoners wat na die munisipale kantore opgeruk het, is deur die polisie voorgekeer omdat die betoging klaarblyklik onwettig was.

‘n Munisipale woordvoerder het gesê die Metroraad het miljoene rand bestee om die probleem aan te spreek.

Die woordvoerder sê hulle het ‘n kontrak van sowat R70 miljoen gesluit vir die aankoop van nuwe pompe.

Die geld sal aangewend word om die infrastruktuur te verbeter en te verseker dat daar in inwoners se waterbehoeftes voorsien word.

Polisie skiet glo nog twee oproermakers in Limpopo

Die polisie in Limpopo sê hulle het geen ander keuse gehad nie as om hulself te verdedig teen die oproerige inwoners in Rhelela buite Tzaneen.

Hangwani Mulaudzi , polisiewoordvoerder, het het gereageer op die dood van twee lede van die gemeenskap wat omgekom het na skote buite ‘n satellietpolisiestasie in die gebied Dinsdagnag weerklink het.

Woedende inwoners is sedert Vrydag verlede week in oproer ná die noodlottige skietery van ‘n 15-jarige seun en die moord van ‘n 20-jarige vrou.

Hulle het ‘n satellietpolisiekantoor aangeval en beamptes met klippe gegooi. Die aanval het gevolg nadat woedende inwoners deur ‘n provinsiale leier van die Ekonomiese Vryheidsvegters toegespreek is.

Skote is afgevuur wat gelei het tot twee sterftes. Die skare is verwilder nadat die polisie versterkings ingeroep het.

Agt mense is dood in botsings tussen oproermakers en die polisie in die afgelope twee weke.

Sedert Vrydag is vier mense reeds in Rhelela dood

Twintig studente geskors by UJ oor beurs-oproer

Twintig studente is geskors na betogings by die Universiteit van Johannesburg (UJ) oor ‘n tekort aan befondsing deur die regering se nasionale studente-finansiële hulpskema (NSFAS).

Sowat ‘n honderd studente het vandag buite die universiteit se Kingsway-kampus betoog.

Geregistreerde studente is geskors hangende dissiplinêre optrede en moontlik kriminele klagte teen hulle.

Studente wat nog nie geregistreer is nie en wat deel was van die protes sal aangekla word van kriminele gedrag, het die universiteit gesê.

Die universiteit sê die studente het administratiewe en registrasie-aktiwiteite ontwrig.

“Die universiteit respekteer die reg van studente om vreedsaam te protesteer , so lank as wat akademiese en administratiewe aktiwiteite nie ontwrig word nie en die veiligheid van studente en personeel is nie in die gedrang gebring word nie.”

Die vise-kanselier, Tinyiko Maluleke sê die studente het ‘n persooneellid aangehou, en van die studente het gedreig om die universiteit af te brand.

Studente by tien universiteite sê hulle gaan registrasie en klasse ontwrig uit protes teen onvoldoende befondsing deur die NSFAS.

Die SA Studentekongres ( Sasco ) het Sondag ‘n oproep om massaprotes oor die befondsingstekort gedoen.

Mangosuthu Universiteit van Tegnologie en die Durban Universiteit van Tegnologie in KwaZulu-Natal ervaar ook ontwrigting as gevolg van die protes.

“Geen registrasie by die universiteite nie totdat alle studente gelyke geleenthede gegee word,” het Sasco se president Ntuthuko Makhombothi aan verslaggewers in Johannesburg gesê.

Winderige koeie laat skuur ontplof

Metaangas uit 90 winderige koeie het ‘n Duitse plaasopstal laat ontplof en skade aan die dak aangerig.

Een van die diere is beseer, het die polisie gesê.

Hoë vlakke van die gas het opgebou in die struktuur in die sentrale Duitse dorp Rasdorf, toe ‘n statiese elektriese lading ‘n vonk veroorsaak het wat die gas laat ontplof het in vuurtongflitse,” het die owerhede in ‘n verklaring gesê.

Een koei is vir brandwonde behandel, het ‘n woordvoerder van die polisie gesê.

Mampi-Rampi die DA se presidensiële kandidaat

Die leier van die DA, Helen Zille het pas haar swart vriendin asook haar eie se politieke loopbaan gered.

Zille het aangekondig dat Mamphela Ramphele, ook bekend in die volksmond as Mampi-Rampi, sal staan as die DA se presidensiële kandidaat.

Die twee partye het ook die oprigting van “gesamentlike tegniese komitee” tussen DA en Agang SA aangekondig.

Ramphele het gesê sy voel geëerd om die DA se uitnodiging te aanvaar. Zille het haar daarna ‘n drukkie gegee en gesê: “Welkom , Mamphele.”

Sy het gesê die belangrikste ding is dat die twee partye dieselfde waardes deel en dat dit ‘n stap in die nuwe rigting van die bou van ‘n nuwe SA beteken wat sal lei tot ‘n “fundamentele herskikking van die politiek.”

Britse VN-resolusie teen lospryse eenparig aanvaar

Die Veiligheidsraad van die Verenigde Nasies het ‘n beroep op lande gedoen om die betaling van lospryse te staak.

‘n VN-resolusie is eenparig goedgekeur, wat ledestate verhoed om lospryse aan groepe te betaal wat bande met al Kaida het.

Die resolusie is nie bindend nie, maar wil terreurgroepe verhinder om geld so in te samel.

Al Kaida verdien honderde miljoene dollar deur lospryse te eis.

Groepe wat bande het met al Kaida het in die laaste drie jaar meer as een miljard rand in lospryse ontvang, het Brittanje se VN-ambassadeur Mark Lyall Grant aan verslaggewers gesê.

Dit kom te midde van pogings om die Suid-Afrikaanse onderwyser, Pierre Korkie, vry te laat wat in Jemen as gyselaar aangehou word.

The Gift of the Givers Foundation se verteenwoordiger in Jemen sal voortgaan om te onderhandel met al Kaida vir die vrylating van die Bloemfonteinse onderwyser, maar van buite die land.

Die stigter van die Suid-Afrikaanse Moslemliefdadigheidsorganisasie Imtiaz Sooliman het gesê die onderhandelaar Anas al-Hamati moet Jemen verlaat nadat die ontvoerders hom beskuldig het dat hy die losprys vir Korkie se vrylating gesteel het.

Hulle glo die Suid-Afrikaanse regering het die losprys verlede week in Jemen betaal.

Die adjunk-Minister van Internasionale Betrekkinge en Samewerking Ebrahim Ebrahim het Jemen verlede week besoek, en ‘n vergadering met topregeringsamptenare oor Korkie se saak bespreek.

Alhoewel sekere state reeds weier om ontvoeringslospryse te betaal onder ‘n resolusie wat in 2001 aangeneem het, het die Britse regering ‘n nuwe resolusie opgestel wat ontwerp is om politieke druk op lande wat steeds lospryse betaal, te verhoog.

Die resolusie skep geen nuwe wetlike verpligtinge nie.

Bheki Cele glo op ANC-kandidatelys

Die ANC sal vandag sy kandidate vir die nasionale en provinsiale vergaderings bekend maak.

Dit volg nadat die party sy lyskonferensie afgehandel het, Die party het sedert Vrydag vergader om sy nasionale uitvoerende komitee vergadering en lekgotla te hou.

RSG se politieke redaksie berig dat president Jacob Zuma en sy adjunk, Cyril Rampahosa bo-aan die lys sal wees, gevolg deur ministers soos Pravin Gordhan, Aaron Motswaledi en Ebrahim Patel.

Nuwelinge op die lys kan die Gauteng Premier, Nomvula Mokonyane, die voormalige polisie-kommissaris, Bheki Cele en die voormalige minister van openbare werke, Thoko Didiza insluit.

Jongelinge soos die voormalige tesourier van die ANC Jeugliga, Pule Mabe en die Jong Kommuniste Liga se Buti Manamela sal na verwagting ook op die lys wees.

Oor die naweek het dit geblyk dat die openbare beskermer, Thuli Madonsela deur verskeie ANC-takke in Gauteng benoem is vir die Nasionale Vergadering of in een van die nege provinsiale wetgewers .

Madonsela het in reaksie gesê dit is noodsaaklik dat die openbare beskermer onafhanklik moet wees.

Madonsela het egter nie genoeg ondersteuning vir haar kandidatuur vir die ANC se nasionale lys gehaal nie.

Die Parlement hervat vandag sy werksaamhede na sy somer-reses.

Die Nasionale Vergadering het nog 24 wette om af te handel voor dit vanjaar verdaag vir die algemene verkiesing en die Nasionale Raad van Provinsies.

Die staatsrede word vanjaar op 13 Februarie gelewer.

Die Parlementêre woordvoerder, Luzuko Jacobs, sê president Jacob Zuma sal weer sy toespraak in die aand lewer sodat meer Suid-Afrikaners dit tuis kan volg.

Hy sê diegene wat die toespraak bywoon sal in verskeie tale daarna kan luister, na verskeie elektroniese opgraderings in die Nasionale Vergadering.

DA, Agang SA gaan glo saamsmelt

Die Burger berig dat die DA en Agang SA Dinsdagoggend sal aankondig dat dié twee partye saamsmelt.

Volgens Die Burger is dit ikabod vir dr. Mamphela Ramphele se party, wat minder as ’n jaar oud is en miljoene in skenkersgeld uit die VSA ontvang het.

Helen Zille, DA-leier, sal glo binnekort ‘n aankondiging van “nasionale belang” maak.

Onderhandelings tussen die DA en Agang SA het verlede jaar platgeval en Ramphele het daarna besluit om die haar eie party te stig.

Intussen het sy met die DA in Kaapstad vergader oor besonderhede van die samesmelting. Daar word beweer dat Ramphele steeds ‘n hoë profiel wil handhaaf.

Agang SA sê in ‘n verklaring op sy webwerf dat die gerugte “geïgnoreer” moet word dat Ramphele op die DA se lys van kandidate vir die verkiesing verskyn.

“Ons maak geen geheim van die feit dat ons praat met ander partye in Suid-Afrika nie. Ons maak geen geheim van die feit dat al die partye en burgers nodig het om saam te staan teen die ANC en diegene wat ons hulpbronne wil gebruik om hul eie ego’s te befonds en lewenstyl …

“Daar is ‘n buitengewone venster van geleentheid wat geopen het sedert Madiba se dood en die verbrokkeling van die Drieparty-alliansie.

“Ons sal voortgaan om burgers te inspireer om die land eerste te stel in hul keuse van leierskap en samewerkingsgeleenthede,” lui die verklaring.