Kategorie: Nuus

Amcu-lede se grusame dade verder in getuienis ontbloot

Regter Ian Farlam, voorsitter van die Farlam-kommissie, moes die verrigtinge in Centurion tydelik staak nadat familielede van twee veiligheidswagte wat by Marikana vermoor is, se foto’s vertoon is, ineengestort het.

Mnr. X het Maandag sy grusame getuienis voortgesit oor wat in 2012 tydens die staking by Marikana gebeur het.

Hy het voorheen getuig hoe Amcu-lede mensvleis geëet het vir moetie.

Regter Farlam het ‘n aansoek van adv. Dali Mpofu, wat namens van die mynwerkers optree, verwerp om mnr. X vir sielkundige waarneming te stuur.

Mnr. X het Vrydag uitstel gevra omdat hy gevoel het mense in die openbare galery toor hom met moetie.

Volgens Mpofu is die getuie se geloofwaardigheid onder verdenking.

Mpofu het aangevoer mnr. X is paranoïes en hallusinerend en dat hy ’n metaalplaat in sy kop het weens ’n breinbesering.

Amcu-lede was volgens mnr. X se getuienis daarop uit om die polisie uit te lok en aan te val tydens die staking.

Hy het gister herhaal hoe Amcu toordokters, Izinyanga, gehuur het vir moetie om hulle teen polisiekoeëls te beskerm.

Die aand van 11 Augustus 2012 op die koppie in Marikana is een wag se ken met ’n panga afgekap en hy het in die motor doodgebrand.

Mnr. X het gesê hulle het die volgende oggend besluit om die vakbond NUM se kantoor in Marikana aan te val en lede daar te vermoor.

“Daar was drie vuurwapens. Die res was gewapen met pangas en assegaaie. Bhele (een van die leiers) het ’n kan petrol saamgedra.

“Op pad na die NUM-kantoor het ons by ’n mynhostel verbygestap. ’n Groep veiligheidswagte wou ons nie daar inlaat nie en ons met rubberkoeëls geskiet. Die vuurwapens het nie gewerk nie. Ons het geglo dis danksy die moetie.”

Volgens mnr. X het die wagte weggehardloop. “Twee wagte was in ’n private motor. Ons het dit met die petrol aan die brand gesteek. Een wag se ken is met ’n panga afgekap en hy het in die motor doodgebrand.

“Die ander wag is uit die motor gesleep en ek het hom met ’n panga in die gesig geslaan. Iemand het hom met ’n assegaai gesteek. Ek het hom ook gesteek. Bhele het sy tong en wang afgesny en in ’n plastieksak gegooi. Van sy bloed is in ’n ander plastieksak gegooi. Dit is verbrand om die moetie sterker te maak.”

Mnr. X sit Dinsdag sy getuienis voort.

Skikking in platinumbedryf bereik

Die platinumprodusent, Lonmin, sê hy sal sy werkers finansieel bystaan noudat die vyfmaandelange staking verby is, het RSG berig.

Geen besonderhede is egter bekendgemaak nie. Dit volg na die aankondiging van ‘n skikking tussen die vakbond AMCU en die drie groot platinumprodusente, met die insluiting van Amplats en Implats.

‘n Woordvoerder van Lonmin, Lerato Molebatsi, sê wanneer die mynwerkers terugkeer werk toe, sal hulle seker maak dat almal weet waarheen om te gaan.

Die werkers moet vir hulle mediese ondersoeke gaan. Sy sê die werkers het die afgelope tyd geen inkomste gehad het nie en kry finansieel swaar, daarom sal die maatskappy hulle bystaan.

AMCU, Amplats, Implats en Lonmin sal na verwagting vandag die ooreenkoms bekragtig.

Dit was die langste staking in die land se geskiedenis.

Ingevolge die skikking sal die laags besoldigde werkers vir twee jaar lank ‘n verhoging van duisend rand per maand kry en 950 rand vir die derde jaar.

Van die terugbetalings sal ook uitbetaal word. Werkers sal na verwagting more terugkeer.

Duisende Amcu-lede stroom na Rustenburg

Duisende mynwerkers het by die Royal Bafokeng-stadion in Rustenburg begin aankom.

Hulle sal na verwagting deur die president van Amcu, Joseph Matunjwa toegespreek word oor nuwe looneise.

Matunjwa sal die stakende mynwerkers waarskynlik inlig oor toekomstige optrede na ‘n ooreenkoms in beginsel bereik is tussen die platinumprodusente en Amcu.

Die mynwerkers het op 23 Januarie met die langste staking in die geskiedenis begin.

Adjunkpresident Cyril Ramaphosa het gesê die ANC sal nie regstreeks inmeng in die onderhandelings tussen die vakbond en platinummaatskappye nie.

Ramaphosa sê vakbonde het die grondwetlike reg om werkers se eise te verdedig.

Die minister van Minerale Hulpbronne, Ngoako Ramatlhodi het hom vroeër aan die bemiddeling tussen die twee twistende partye onttrek toe hy nie daarin kon slaag om ‘n beloofde ooreenkoms af te dwing nie.

Intussen sal die Farlam-kommissie verdere getuienis van “mnr X” aanhoor.

Mnr X het voorheen voor die Marikana Kommissie van Ondersoek getuig dat Amcu NUM-lede wou gaan vermoor.

Hy getuig vanuit ‘n onbekende plek by wyse van ‘n video-verbinding.

Die Kommissie het Vrydag vroeg verdaag nadat Mnr X gevra het om sy tradisionele geneser te raadpleeg.

Tien mense, onder wie twee polisielede en twee veiligheidswagte van Lonmin is dood voor die polisie 34 stakende mynwerkers doodgeskiet het 16 Augustus 2012.

Mnr X het getuig oor kannibalistiese rituele waaraan hulle gedurende dié tyd deelgeneem het.

Hulle het onder meer mensvleis van die twee vermoorde Lonmin veiligheidswagte geëet in opdrag van ‘n tradisionele geneser.

Hy het het hulle verseker dat Amcu sal onoorwinlik wees as hulle sy moetie gebruik.

Amerikaanse fiasko in Irak verdiep

Die Amerikaanse fiasko in Irak is besig om te verdiep.

Die Irakse weermag wat deur die VSA opgelei is ten bedrae van miljarde, verkeer in chaos, volgens die Washington Post.

Dié koerant beskik oor dokumentasie wat ‘n gebrek aan toerusting, drostery, en toenemende afhanklikheid van sektariese milisie bewys.

Die VSA se minister van buitelandse sake, John Kerry, sê Amerika wil hê dat die Irakse bevolking ‘n “inklusiewe leierskap” moet nastreef.

Dié onrealistiese versoek volg nadat ISIS verskeie grensdorpe in Irak oor die naweek oorgeneem het. ISIS is ‘n splintergroep van al-Kaida.

Kerry het toegegee dat Washington nie meer kan besluit oor wie Bagdad moet regeer nie.

Kerry het in Kaïro in Egipte gepraat aan die begin van sy Midde-Oosterse besoek waartydens hy na verwagting Irak ook gaan besoek.

Kerry sal premier Nouri Al-Maliki van Irak ontmoet.

Intussen het die Russiese leier, Wladimir Poetin aan Irak se premier die versekering gegee dat hy op Russiese steun kan staatmaak.

Soenie-militante groepe het beheer oorgeneem oor groot gebiede waaronder die lughawe Tal Afar teen die grens van Sirië en ook ‘n aansienlike hoeveelheid wapens van Irakse troepe afgeneem.

Kerry sê Amerika wil hê dat Irak leiers kry wat bereid is om “inklusief” op te tree en die mag te deel.

Spanning oor rassetransformasie by Universiteit van Stellenbosch-vergadering

Volgens ‘n voorbladberig in die Kaapse koerant, Die Burger, gaan “transformasie en die sentrum vir inklusiwiteit by die Universiteit Stellenbosch (US) na verwagting vanoggend vir groot spanning by ’n US-raadsvergadering sorg”.

Hoewel die huidige US-raad nie ten gunste van die radikale transformasie van die universiteit is, het die rektor, prof. Russel Botman, blykbaar ander planne. Soos Leon Lemmer in sy rubrieke op die praag-webblad gereeld berig, bedryf Botman ‘n vorm van universitêre politiek wat meer met linkse aktivisme as met akademie te make het.

Volgens bronne by die universiteit is ‘n “transformasieplan” wat van die blanke dosente en studente ontslae sou raak, asook die universiteit nog verder sou verengels, verleder jaar deur die universiteitsraad afgekeur. Maar Botman beskou nie die goedkeuring van die raad as noodsaaklik om in elk geval die plan uit te voer nie.

Sedert 2013 bestaan daar ‘n “Transformasiesentrum” op die kampus wat ten doel het om die US finaal van sy Afrikanerwortels en -erfenis te suiwer en daarvan ‘n Afrika-universiteit te maak.

Die sentrum beskik oor ‘n Facebook-blad waarin sy doelstelling omskryf is as “om transformasie op die kampus te bestuur, te ondersteun en te monitor”, dog dié missiestelling is intussen van die blad verwyder.

Ná die Universiteit van die Vrystaat met sy Reitz-huis-debakel en die Noordwes-Universiteit waar die sogenaamde “nazi-armgebaar” van damestudente tot ‘n nasionale polemiek gely het, is die Universiteit van Stellenbosch nou die derde Afrikaanse universiteit wat deur ‘n transformasie-aanslag in die gesig gestaar word, dié keer van binne die rektor se kantoor self.

Volgens Botman is die “breë trekke” van sy transformasieplan reeds aanvaar as deel van die US se Institusionele Voorneme en Strategie 2013 - 2018 waarvoor die raad op 29 April 2013 gestem het. Die“transformasieplan” was een van sewe aanvullende dokumente wat ook aan die raad voorgelê is.

Botman het teenoor Die Burger verklaar: “Die sentrum is gevestig as deel van ’n strategie ‘om ’n instelling te skep waarin ’n verwelkomende kultuur, gelykheid, diversiteit en transformasie floreer’.”

Die sentrum rapporteer regstreeks aan Botman en daarom voel hy hom nie gebonde aan die raad se sienings wat van meer “oorsigtelike aard” is, terwyl die transformasiesentrum deel van die “operasionele bestuur” van die kampus uitmaak.

Van die sentrum se personeel het reeds in die openbaar die Matie-alumni en donateurs as “struikelblokke vir transformasie” bestempel. Een van die aanbevelings van die transformasiesentrum is dat die naam van die DF Malan-sentrum verander moet word. Die sentrum bestempel ook die  US in ‘n dokument as “hoofsaaklik wit, heteroseksueel, manlik, Afrikaans en met belang in die sieninge van die alumni en die konvokasie en sieninge in die Afrikaanse media”.

Mnr. Piet le Roux, een van die raadslede met ‘n pro-Afrikaanse siening en wat voorheen as nagraadse student ‘n video-onderhoud met praag gevoer het, sê: “My vertroue in die US-bestuur hang af van die antwoorde wat op my vrae verskaf gaan word. Ek is glad nie tevrede met die sentrum en sy aktiwiteite nie.”

Prof. Christo Viljoen, voorsitter van die US-konvokasie, het hom soos volg daaroor uitgelaat: “Dit hou ernstige implikasies vir die konvokasie in indien sy lede deur ’n amptelike US-afdeling as struikelblokke vir die uitvoering van die raad se beleid vir diversifisering en inklusiwiteit beskou word.”

Daar is sprake van ‘n mosie van wantroue wat by vandag se vergadering ingestel mag word. Die universiteit weier egter om die gewraakte “transformasieplan” beskikbaar te stel, aangesien dit “slegs ‘n beleidsdokument is” en daarom nie vir openbare insae nie.

Pagad belowe om misdadigers self vas te vat

Die misdaadbekampingsgroep Pagad sê die polisie moet dwelmhandelaars op die Kaapse Vlakte vasvat of sy lede sal dit self doen.

Pagad het by vergadering wat gehou is in Freedom Park Sondag, die plaaslike Suid-Afrikaanse Polisiediens (SAPD) beskuldig daarvan dat hulle nie misdaad hokslaan nie.

Ontstoke inwoners by die Freedom Park Gemeenskapsaal, sê daar is ‘n skerp styging in bendes en dwelmmisbruik in hul gemeenskap.

Een inwoner sê die polisie doen nie genoeg om die probleem te bekamp nie.

“Vir my is dit asof die polisie saam met die bendelede werk, want ons sal ‘n saak maak, maar niks kom van die saak nie en die dossier verdwyn.”

Inwoners sê as hulle verslag doen van kriminele aktiwiteite, wil die polisie nie onmiddellik reageer nie, of versuim hulle om misdadigers vas te vat.

Hulle het gevra vir ‘n toename in die polisie se sigbaarheid in die gebied.

Pagad het beloof om die Mitchells Plain-gemeenskap te help in die bekamping van misdaad.

Pagad sê inwoners is desperaat vir effektiewe maatreëls om oortredings soos dwelmhandel te bekamp.

Volgens ander inwoners werk sekere lede van die polisie saam met bendelede en dwelmhandelaars.

Die beweging se nasionale koördineerder, Abdus Salaam Ebrahim, het die gemeenskap van Tafelsig in Mitchell’s Plain toegespreek.

Hy het ‘n beroep op inwoners gedoen om op te staan vir hulle regte en hulle teen misdaad te verset.

Zuma na landbouberaad, Cyril neem waar

President Jacob Zuma sal vandeesweek Suid-Afrika se afvaardiging na die Afrika Unie-beraad in Ekwatoriaal-Guinee lei, het RSG berig.

Die beraad word van Woensdag tot Vrydag in Malabo gehou. Die presidensiële woordvoerder, Mac Maharaj, sê die klem sal op landbou en voedselsekerheid.

Adjunkpresident Cyril Ramaphosa sal waarneem as president terwyl Zuma uit die land is.

Die aankondiging volg na berigte dat Zuma na bewering sukkel met ‘n harttoestand en suikersiekte.

Sy Kantoor het egter in reaksie daarop gesê dat hy in goeie gesondheid is om die land te regeer.

SA geskiedenis moet glo nog swarter word

Die ANC wil graag swarter geskiedenis in alle skoolkinders se kele afdruk.

Dié nuutste plan vir meer intensiewe ideologiese breinspoeling, sal lande soos Kuba uitsonder.

Die huidige kurrikulum plaas glo te veel klem op die Europese geskiedenis in plaas van “plaaslike helde en heldinne en hul stryd”, sê die onderwysersunie Sadou.

Die idee van ‘n nog swarter geskiedenis wat verpligtend moet wees vir staatsskole, kom egter van wit aktiviste.

Liliesleaf Trust se stigter en uitvoerende hoof, Nicholas Wolpe sê Suid-Afrikaners moet elke aspek van die geskiedenis omhels.

Lindiwe Sisulu, minister van Menslike Nedersettings, is baie opgewonde oor die idee en meen dit sal Suid-Afrikaners in proto-Amerikaners verander waar “nasieskap almal saamsnoer”.

Die ANC voel kinders moet weet dat Mandela aan die ANC “behoort” en deur hulle opgelei is.

“Ons kinders moet weet dat daar ‘n tyd in ons geskiedenis was toe hy deur die einste mense wat hom vandag beskou as ‘n held as ‘n terroris beskou is,” sê  Nkosana Dolopi, algemene sekretaris van Sadou.

Sisulu, wat die veldtog vir geskiedenis wat verpligtend gemaak moet word ondersteun, is opgewonde oor die skuif.

Dolopi het gesê “slagoffers” soos die jong aktiviste Hector Petersen [Pitso] en Solomon Mahlangu moet “prominensie” kry.

“Ons kinders moet weet dat op ‘n stadium het ons grond besit… Die Khoi en die San en die mense van Afrika was herders van beeste, ons was nie werkers nie… ons was boere [met] Jan van Riebeeck se aankoms [en] later het ons van eienaars verander na werkers op die grond. ”

Wolpe het die stap verwelkom en gesê in vergelyking met die Verklaring van Onafhanklikheid in die VSA en Brittanje se Magna Carta, min is bekend oor die Vryheidsmanifes.

Hy het gesê hoërskoolkinders weet nie wat Rivonia beteken nie.

Waterpypbars, rioolstorting kopseer vir Pretorianers

Wat vir Johan Erickson soos ’n klein waterlekkie gelyk het, het binne dae in ’n waterramp verander met derduisende rand se skade.

Erickson en Meyerstraat se inwoners in Wonderboom-suid, Pretoria, is Donderdagaand omstreeks 23:00 deur ’n geweldige slag wakkergemaak.’n Gebarste waterpyp voor Erickson se huis was die oorsaak vir dié helse ontploffing.

“Die water het meters in die lug gespuit en het geweldige skade aan my huis aangerig. My tuin en huis was heeltemal onder water,” het ’n ontstoke Erickson gesê.Erickson, voorsitter van die Wonderboompoort sektor 1 Mayville/WBS-gemeenskapspolisëringsforum, het sy dankbaarheid teenoor alle sektorlede en inwoners wat hom vir ure lank gehelp het om die gemors skoon te kry, uitgespreek.

“Almal het gehelp om slote te grawe om die water van my huis af weg te lei. Hulle het selfs reinigingsmiddels gebring en ingespring om te help skoonmaak. Ek is dankbaar vir almal se hulp,” het hy gesê.

Volgens Erickson het hy reeds verlede Sondag die waterlek onder die Tshwane-metro se aandag gebring.

Hy het gesê hy gaan die saak nie daar laat nie en het reeds regsadvies ingewin om die metro aanspreeklik te hou vir die skade wat aan sy eiendom aangerig is.“My meubes is beskadig en selfs ons voorstoep se plaveisel het gesak weens die watervloei. Dit is onaanvaarbaar.”

Maar dis nie net Erickson wat ’n stel met die metro afgetrap nie, Abie Fourie van Waverley het ook ‘n probleem met die metro.

Fourie ry vir die afgelope vyf maande van Waverley na Jan Niemandpark, maar hierdie rit sluit ‘n reis seur ‘n rivier van riool in.

Volgens Fourie spruit die probleem uit die diefstal van mangatdeksels op die hoek van Klipspruit- en Henningstraat.

Alhoewel inwoners en sakeondernemings die diefstal en rioolprobleem glo verskeie kere by die metro aangemeld het, is daar steeds geen lig aan die einde van dié grillige tonnel nie, sê hy.

“Sekere tye van die dag stroom die riool die pad af en op ander dae lê die menslike ontlasting en toiletpapier oor die hele pad. Dit is ’n groot probleem vir ons,” het Fourie gesê.

Die metro het na verskeie navrae nog geen terugvoer verskaf nie.

Bron: Rekord Moot

Lyke van agt myners opgespoor

Die SAPD in Gauteng het op die lyke van agt onwettige mynwerkers Sondagaand in ’n goudmyn by Benoni afgekom nadat hulle deur mynpersoneel ontbied is.

Lt.kol. Lungelo Dlamini, woordvoerder van die polisie, sê twee van die lyke was ondergronds. “In die stadium is die motief vir die moorde onbekend. Al agt is in die bolyf geskiet. Die identiteite van die oorledenes is nog nie bekend nie.”

Van die oorledenes is glo dood aan kopskote van agter. Dlamini sê daar is bewerings dat van die oorledenes buitelanders was.

Veldmotorfietsryers het glo op die lyke afgekom, waarna veiligheidswagte van die myn die polisie ontbied het. Verskeie patroondoppies is naby die lyke opgespoor.

Die polisie ondersoek ’n saak van moord. Niemand is nog in hegtenis geneem in verband met die voorval nie.