Kategorie: Nuus

Pretorianer deur stakers aangeval

‘n Pretorianer en sy vrou Woensdagmiddag deur ‘n bende oproerige Numsa-stakers in Hercules aangeval.

Kowie Fourie se bakkie se voor- en agterruite is stukkend geslaan, toe ‘n swart skare met rooi hemde en gewapen met knopkieries en sambokke op hulle toegesak het.

Fourie sê hy het aanhou ry omdat hy vir hul lewens gevrees het, het Beeld berig.

Die swartes het met geweld op die voertuig toegesak en die ruite uitgeslaan.

Fourie het aanhou ry, direk polisiekantoor toe om die voorval aan te meld. By die polisiekantoor was daar reeds ‘n ander slagoffer van die gewelddadige stakers wat ook ‘n klag ingedien het.

Die stakers het sy selfoon uit sy hand gegryp en gesteel en ander voertuie aangeval, het die vroeëre slagoffer gesê.

Fourie het gesê die polisie het die groep oproeriges vergesel, maar het nie ‘n vinger veroer toe sy bakkie aangeval is nie. Hy is geskok deur die polisie se ongeërgdheid, sê hy.

Volgens die polisie was die skare “vreedsaam”.

Die Nasionale Werkgewers-vereniging van Suid-Afrika, Neasa, sê hy is besorgd oor berigte van sy lede dat Numsa ook nie-stakende werkers intimideer en aanrand. Die vereniging is een van die grootste werkgewerverenigings in die metaal- en ingenieursbedryf.

Die bestuurshoof van die vereniging, Gerhard Papenfus sê verskeie berigte is ontvang van skade aan geboue en voertuie in Johannesburg.

Daar is beeldmateriaal beskikbaar van werkers wat uit voertuie gedwing en met sambokke geslaan word.

Papenfus sê daar is ook ‘n nuwe tendens om ingange na werkplekke te versper, wat beteken dat nie-stakende werkers nie kan gaan werk nie.

Britse pedofiele aangekeer onder wolk van toesmeerdery

Die Britse polisie het 660 vermeende pedofiele in hegtenis geneem na maande se ondersoeke.

Brittanje het die afgelope twee jaar gebuk gegaan onder ‘n aantal skokkende pedofiel-skandale.

Die onthullings oor die oorlede BBC-televisieaanbieder en reeksverkragter Jimmy Savile – ‘n hegte vriend van prins Charles wat ‘n ridderskaptoekenning van die koningin ontvang het – het die eiland veral geruk.

Die ondersoeke volg nadat ‘n Britse kind, Madeleine McCann, volgens Portugese bronne deur ‘n Britse pedofielring vermoor is. Daar word vermoed dat hoëlui by die moord betrokke is en dat Savile se geval gebruik is om die verdwyning van die dogtertjie toe te smeer.

Intussen het 114 dossiere ivm met oortreders wat politieke poste in Brittanje beklee, glo weggeraak, wat verder op ‘n toesmeerdery dui.

Baroness Butler Sloss het onder ‘n wolk van agterdog uitgetree as hoof van die Britse regering se ondersoek wat kyk na die verslae van minstens 20 senior figure wat kinders oor dekades misbruik het.

Butler Sloss, 80, was onder druk omdat haar oorlede broer Sir Michael Havers, as Prokureur-generaal in die 1980’s berug geraak het daarvoor dat hy die ondersoeke oor kindermisbruik destyds telkens gekelder het.

Die jongste oortreders sluit dokters, onderwysers en hulpwerkers in. Die operasie het ses maande geduur en mense geteiken wat onwelvoeglikhede aanlyn besigtig, het die Nasionale Misdaadagentskap Woensdag gesê.

Die operasie het ook gelei tot die beveiliging van 400 kinders. Die oortreders sal aangekla word van ’n reeks oortredings, insluitende die besit van onwelvoeglike foto’s van kinders en ernstige seksuele aanranding.

Meer as 45 polisie-eenhede uit Engeland, Skotland, Wallis en Noord-Ierland was by die operasie betrokke.

Wêreld se gewildste sangeres twiet vir Palestyne

Die popsensasie Rihanna, ‘n vurige Duitse sokkerondersteuner, ondersteun ook die Palestyne. Sy is een van die gewildste sangsterre in die wêreld en veral in die Midde-Ooste.

Sy moes egter noodgedwonge ‘n twiet uitvee na dreigemente van Joodse groepe.

Rihanna het glo “#FreePalestine” getwiet voordat sy dit agt minute later vinnig moes verwyder.

Volgens Beeld is dit “heel moontlik” dat sy afgeraai is omdat haar “CD-verkope” daaronder kan ly.

Agt minute was egter te laat. Die gewraakte twiet was teen daardie tyd al 7 000 keer hertwiet.

Volgens ʼn bron na aan Rihanna het die sangeres nooit bedoel om die twiet te stuur nie.

Sy was glo besig om op te lees oor die konflik toe sy per ongeluk op die hutsmerk gedruk en dit gestuur het.

Rihanna het later getwiet: “Kom ons bid vir vrede en ’n vinnige einde tot die konflik tussen Palestynse inwoners en Israel. Is daar enige hoop?”

Sy het die Duitse span Sondag in hul kleedkamer gaan gelukwens na hul oorwinning oor Argentinië.

Obama se gunsteling ster, Beyoncé is ‘n kommersiële flop in vergelyking met haar grootste mededinger Rihanna.

Rihanna het meer digitale verkope as enigiemand in die geskiedenis (100 miljoen en sy tel nog) en het 3,2 miljard YouTube-kykers.

Die musiektydskrif, die Rolling Stone beskryf haar as ‘n “Top 40 Genghis Khan”.

BRICS dring aan op Iran se reg tot kernkrag

Die BRICS-groep (Brasilië, Rusland, Indië, China en Suid-Afrika) het daarop aangedring in sy finale verklaring Dinsdag dat Iran ‘n reg tot vreedsame kernkrag het.

“Ons erken die onvervreembare reg van Iran op die vreedsame gebruik van kernkrag in ooreenstemming met sy internasionale verpligtinge,” lui die nota bekend as die Verklaring van Fortaleza, aangehaal deur die Russiese nuusagentskap ITAR-Tass.

“Terwyl ons weer ons siening bevestig dat daar geen alternatief vir ‘n onderhandelde skikking rakende die kernkwessie is nie, bevestig ons ons steun vir ‘n politieke en diplomatieke en onderhandelde skikking,” sê die teks deur die vyf presidente van BRICS.

Verder het die vyf die “positiewe momentum” verwelkom wat deur dialoog tussen Iran en die Groep 5 + 1 (VSA, die Verenigde Koninkryk, Frankryk, Rusland en China, plus Duitsland) tot stand gekom het.

Die groep het die hoop uitgespreek dat die volle implementering van die aanvanklike ooreenkoms bekend as die Gesamentlike Aksieplan sal volg tussen Iran en die ses lande wat in November 2013 in die Switserse stad Genève bereik is, ten einde ‘n omvattende en volhoubare oplossing vir die kernkwessie vir die Perse te vind.

Tans word die kerngesprekke tussen Iran en die G5 + 1 in Wene, Oostenryk se hoofstad, gehou waar die partye poog om ‘n finale ooreenkoms voor 20 Julie te bereik, wanneer die termyn van die ooreenkoms verstryk.

Chile skort handelsooreenkoms met Israel op

Chili het alle samesprekinge oor ‘n Vryehandelsooreekoms met die Israeliese regime opgeskort.

Chile het ook aangekondig dat hy oorweeg om sy ambassadeur uit Tel Aviv te onttrek.

Hulle sal die Veiligheidsraad van die VN nader oor die skendings teen Palestyne, volgens ‘n parlementêre groep wat Maandag met die Minister van Buitelandse Sake, Heraldo Muñoz, vergader het.

Senatore het die ministerie van buitelandse sake gevra om ‘n meer kritiese posisie oor die tragedie wat tans in die Gasa-gebied afspeel, in te neem.

Met die groeiende aantal slagoffers van die Israeliese aanvalle, het parlementariërs van alle partye dringende optrede van die regering geëis.

Michelle Bachelet, premier, het verlede week die Israeliese aggressie veroordeel, maar wou nog geen konkrete stappe teen Israel oorweeg nie.

Numsa hits lede verder aan na openbare geweld

Lede van die metaalwerkersvakbond Numsa sal hulself glo tot verdere openbare geweld wend op Rustenburg in Noordwes.

Die stakers wil die polisie dwing om 13 van sy lede wat deel was van ‘n betoging buite die Rustenburgse Ingenieursentrum, vry te laat.

Die vakbond het reeds borgtog vir al sy lede betaal. Die lede sal aangekla word weens openbare geweld en saakbeskadiging.

Numsa se plaaslike organiseerder, Mere Boas, het berigte ontken dat van hulle lede die vensters van eiendomme stukkend geslaan het.

Die polisie sê hulle het die lede in hegtenis geneem weens beskadiging van stadseiendom.

Numsa is besig met ‘n landwye veldtog om stakers tot verset aan te hits.

Die vakbond het stakers aangemoedig om aan te hou “betoog” buite hul werkplekke as deel van die volgehou landwye staking.

Die staking het die land se ekonomie byna reeds tot ‘n stilstand gebring met die vakbond wat ‘n tien persent verhoging per jaar eis.

Berigte van grootskaalse intimidasie en geweld is vanaf die begin van die staking aangemeld by die meeste fabrieke.

SA roep Israelse ambassadeur in na aanvalle op Gasa

Suid-Afrika het Israel se ambassadeur na die departement van Internasionale Betrekkinge ontbied om sy land se aanvalle op die Gasastrook te verklaar.

Dié aanvalle is ‘n growwe skending van die internasionale reg.

Die jongste diplomatieke wrywing kom nadat sowat 200 Palestyne, waaronder meestal burgerlikes en kinders, reeds in lugaanvalle deur die Israelse weermag gedood is.

Israel probeer voorgee dat die Palestyne “oorlogsmisdade” pleeg in weerwil van die feit dat daar geen Israeli-slagoffers is nie.

Die minister van Internasionale Betrekkinge, Maite Nkoana Mashabane het by die BRICS-beraad in Brasilië gesê dat Ambassadeur Arthur Lenk ingeroep sal word.

Israel sê die doel van die lugaanvalle is om ‘n einde te bring aan Hamas se vuurpylaanvalle uit Gasa.

President Jacob Zuma het by die BRICS-beraad gesê Suid-Afrika is bekommerd oor die jongste geweld en lewensverlies in Palestina en Israel.

Volgens Zuma moet BRICS-lande ‘n dringende inisiatief steun om die twee lande terug te bring na vreedsame onderhandelinge met die doel om ‘n tweestaat-oplossing te verkry.

Israel het sy lugaanvalle op Gasa vir ‘n negende dag voortgesit.

Die Israelse weermag het ‘n waarskuwing uitgereik aan inwoners in die ooste en noorde van Gasa, en hulle aangeraai om hul huise te verlaat.

Met vorige waarskuwings is die Palestyne slegs enkele sekondes gegun om hul huise te verlaat.

Israel het Dinsdag sy lugaanvalle hervat nadat internasionale pogings om ‘n skietstilstand te bereik, skipbreuk gely het.

Pik Botha wil ook grondeis indien

Nadat die Wysigingswet op die Herstel van Grondregte op 1 Julie in die Staatskoerant gepubliseer is, kan Suid-Afrikaners nog vir vyf jaar, tot 30 Junie 2019, grondeise indien.

Dit geld ook vir blanke boere wie se grond kragtens die tuislandkonsolidasieproses onteien is. Oudminister Pik Botha oorweeg dit sterk om insgelyks ‘n grondeis in te dien, want sy ma se plaas in Noordwes is destyds deur die Nasionale regering by Bophutatswana ingedeel sonder dat markverwante vergoeding betaal is.

Volgens ‘n gesprek wat Botha met Beeld gevoer het, het sy ouers “‘n appel en ‘n ei gekry vir die pragplaas in Noordwes wat deur die regering onteien is om in Boputhatswana te val”. Botha se moeder het die plaas van sy oupagrootjie, Thomas Frederik Dreyer, geërf. Dreyer het ‘n rol gespeel by die oprigting van die Gereformeerde Kerk in 1859 en was ook volksraadslid en ‘n vriend van pres. Paul Kruger. Die plaas was van 1840 af in die Botha-Dreyer-familie, waarna dit aan Bophutatswana oorgedra is.

Tydens die vorige tydperk vir grondeise, wat op 31 Desember 1998 verstryk het, wou die departement van grondsake nie eise deur blanke eienaars oorweeg nie omdat die departement glo gesê het dat hulle “aan ‘n bevoorregte rassegroep behoort”.

Dié keer is dit egter anders omdat boere hulle na die Grondwethof sou kon wend indien daar weereens teen hulle gediskrimineer sou word. Vanaf 1936, maar ook tydens die tuislandkonsolidasieproses, is miljoene hektaar grond van blanke boere aangekoop of onteien en aan swartes oorgedra. Ironies kan dieselfde wetgewing wat ingestel is om nóg grond aan swartes oor te dra nou gebruik word om van daardie grond wat in die verlede aan blankes behoort het, terug te kry.

Die grondeisehof in Randburg het reeds in die saak van ‘n blanke boer uit die Oos-Kaap, Ivor Leroy Phillips, beslis dat blankes nie van die reg op ‘n grondeis uitgesluit mag word nie. Die departement van grondeise het gepoog om teen dié beslissing na die Grondwethof te appelleer, maar die hof het in 2014 verlof tot appèl geweier, dus kan dié saak as ‘n presedent beskou word.

In getuienis voor die grondeisehof in Randburg het ‘n voormalige amptenaar van die NP-regering, Hendrick Schalk Pienaar, getuig dat daar van “boelietaktiek” gebruikgemaak is om blanke boere van hul plase te ontneem ten einde die TBVC-state te vergroot.

Die huidige ronde grondeise verteenwoordig die vierde keer in die geskiedenis dat blanke grond aan swartes uitgedeel word. Die vorige kere was 1936, die tuislandkonsolidasieproses en 1994-1998.

BRICS byeen vir oprigting van ontwikkelingsbank

Die BRICS-leiers sal Dinsdag vergader om stappe te bespreek vir die oprigting van ‘n nuwe ontwikkelingsbank asook ‘n reserwefonds.

BRICS sluit Brasilië, Rusland, Indië, China en Suid-Afrika in. Leiers vergader in Fortaleza in Brasilië vir die sesde keer om die negatiewe inloed van Westerse banke op die globale ekonomie te bespreek.

Die beplande bank en reserwefonds word as teenvoeter vir die Westerse finansiële instellings beoog.

Dit is nog nie seker in watter land die bank gesetel sal word nie. Beide Shanghai in China en Johannesburg is sterk kandidate.

Dié beraad kom te midde van verswakkende ekonomiese toestande in die VSA en druk op die dollar as reserwe-eenheid.

Die Brasiliaanse direkteur van BRIClab, Marcos Troyjo sê die bank sal ondersteuning aan BRICS-lande bied.

Die bank sal ‘n aanvanklike kapitaal van 50 miljard dollar hê, terwyl die lede 100 miljard dollar vir die reserwefonds beskikbaar sal stel.

Numsa gaan geweld, intimidasie uitbrei

Berigte van intimidasie en geweld wat deur lede van die metaalwerkersvakbond Numsa gepleeg word, neem toe.

Numsa sal na verwagting Dinsdag vergader om planne te bespreek om die tweewekelange staking in die staal-en ingenieursbedrywe verder uit te brei.

Intussen het honderde metaalbedrywe oral in die land gesê hulle word deurentyd deur Numsa-lede afgedreig met geweld, vandalisme, klipgooiery en aanvalle op personeel en klante.

In Wadeville, Germiston is ‘n brandbom binne in ‘n kantoor geslinger, voertuie onder klippe gesteek en ‘n bakkie aan die brand gesteek.

Stakers spioeneer op fabriekspersele in Wadeville en laat weet mekaar per selfoon as hulle werkers, selfs nie-lede van Numsa opmerk wat opdaag vir werk.

By ‘n ander fabriek in Gauteng is 7 voertuie beskadig deur stakers wat nie deel van die personeel is nie en by ‘n ander is hekke afgebreek toe ‘n groot groep stakers met pangas voor die perseel opgedaag het.

In ‘n ander geval is ‘n opsigter by ‘n plastiekfabriek na buite gesleep en bewusteloos geslaan nadat stakers die hekke afgebreek het en die eiendom geplunder het.

Oproepe na die polisie het onbeantwoord gebly.

Dit volg nadat Seifsa die vakbond se eis vir ‘n skikking verwerp het. Seifsa sê Numsa se voorstel vir ‘n tien persent verhoging oor drie jaar, of alternatiewelik 10 persent vir elke jaar, is nie bekostigbaar nie.

Seifsa sê die huidige aanbod op die tafel wat tien persent in die eerste jaar behels, nege-komma-vyf persent in die tweede en nege persent in die derde jaar, is al wat hulle kan bekostig.

Sommige klein sakeondernemings sê die staking gaan hulle knak. Werkers wat nie lede van die vakbond is nie, eis ook van hulle vergoeding omdat hulle verhoed word om te werk.