Nuus Archives - Page 427 of 1583

Poskantoorstakers intimideer en vandaliseer

Die Poskantoor sê stakers het hulself gewend tot intimidasie van werkers en vandalisme. Deeltydse werkers het verlede maand met ‘n onbeskermde staking begin.

Die deeltydse werkers eis hoër salarisse.

Sedert die begin van die jaar gaan die Poskantoor gebuk onder herhaaldelike stakings.

Poskantoor-kliënte in Gauteng kan weens die voortslepende arbeidsonrus verdere vertragings in die aflewering van pos en pakkies in die provinsie te wagte wees.

Die arbeidsonrus het reeds ‘n verlies van 71 miljoen rand beteken.

Die Poskantoor het verlede maand 473 werkers afgedank omdat hulle aan ‘n onbeskermde staking deelgeneem het. Die staking het hoofsaaklik Tshwane en die Oos-Rand geraak.

PRAAG tree toe tot regstryd oor Christelike inhoud in skole

PRAAG, die Pro-Afrikaanse Aksiegroep, het Woensdagoggend 3 September ‘n epos aan die voorsitter van OGOD, mnr. Hans Pietersen, gerig waarin die naam van sy prokureur en hul kontakbesonderhede versoek word aangesien PRAAG dié organisasie se skending van godsdiensvryheid in die land wil teenstaan.

“Hierdie is die soveelste aanval op Afrikaanse skole wat deur twyfelagtige nie-regeringsorganisasies geloods word,” sê Dr. Dan Roodt, direkteur van PRAAG. “Gewoonlik word sulke organisasies ook vanuit die buiteland, veral vanuit die VSA en Groot Brittanje, befonds. Dit gaan allermins oor die vryheid van leerlinge om te besluit watter geloof hulle wil aanhang, al dan nie. Dis maar net nog ‘n manifestasie van Boerehaat of etniese haatgevoelens jeens Afrikaners wat sowel in taaldiskriminasie as plaasmoorde manifesteer. Die deels Christelike aard van Afrikaanse skole kan teruggevoer word na die CNO-skole wat kort ná die verowering van die Boererepublieke gestig is. Dit het gegaan om die behoud van Afrikaans en Afrikanergeskiedenis, terwyl daar in Engelse staatskole in Suid-Afrika destyds slegs Britse geskiedenis gedoseer is.”

'n Skildery wat Christus uitbeeld deur Caravaggio. Binnekort ook verbode in Afrikaanse skole? — ‘n Skildery wat Christus uitbeeld deur Caravaggio. Binnekort ook verbode in Afrikaanse skole?

As kultuurorganisasie vind PRAAG die poging van OGOD om aan Afrikaanse skole, wat uiteindelik deur ouergemeenskappe en beheerrade bestuur word, ewe verwerplik as Section 27 se hofaansoeke om ‘n Sowjetagtige vorm van staatsbeheer en verengelsings van Afrikaanse skole deur die howe af te dwing. Dr. Dan Roodt sê: “Geloofsvryheid beteken ook die reg om in die skoolgebou te mag bid of die Bybel te mag lees. Die verbod op alle vorme van Christelike inhoud is ondeurdag en filistyns, aangesien selfs sekulêre letterkunde verwysings na Christelike temas bevat. Om van kunsgeskiedenis en skilderye nie te praat nie. Mag Raphaël, Caravaggio en al die ander skilders wat sowel Maria as Christus uitgebeeld het nou nie meer in ons skole behandel word nie? Daar is sekerlik duisende Afrikaanse gedigte met metafore, beeldspraak of verwysings na die Christendom… moet ons Afrikaanse skole nou dáárvan ook gesuiwer word?”

PRAAG het ‘n beroep op alle Afrikaners gedoen om saam te staan, selfs nie-gelowiges. “Deur die geskiedenis was Afrikaners nog altyd verdraagsaam en Paul Kruger het byvoorbeeld sowel Jode as Moslems in die Transvaal verwelkom. Met die heksejag teen Afrikaanse skole en gevestigde gebruike in ons skole word ons nou deur die Engelsman in sy marxistiese blindheid en fanatisme terugbetaal. Dis ‘n aanval op ons as gemeenskap en as volk.”

In getuienis wat voor die hof geplaas sal word, gaan PRAAG die totalitêre linkse tradisie in Suid-Afrika aan die kaak stel, wat wissel vanaf godsdienstige, etniese en talige onverdraagsaamheid tot verkragting, halssnoermoorde en terreur. Die vervolging van Christene in die toenmalige kommunistiese Oos-Europa is ook ter sake, aangesien die huidige Suid-Afrikaanse bewind hom ideologies op daardie vorm van kommunisme skoei.

Roodt het ook so pas ‘n eboek-essay gepubliseer waarin hy die ekstreemlinkse fanatisme van plaaslike Engelssprekendes van naderby ontleed en spesiaal vir die Engelse gemeenskap in Engels geskryf is: Raiders of the lost Empire: South Africa’s ‘English’ identity.

Intussen het die voorsitter van die organisasie vir godsdienste-onderrig en demokrasie (OGOD), mnr. Hans Pietersen, laat weet dat hy nie bereid is om sy prokureurs se kontakbesonderhede aan PRAAG te verskaf nie:

Soos ek in verskeie forums (drukpers, radio en tv) genoem het, is die saak nié teen ‘n spesifieke geloof óf geloof as sulks gemik nie, en ook nie teen ‘n spesifieke kultuur- of taalgroep nie. Om OGOD dus van Afrikaner- of Boerehaat te verdink sou onwaar, oneerlik en propagandisties wees.

Ek gaan op hierdie stadium nie ons regspan se besonderhede oordra nie aangesien skakeling met hulle bloot die fokus van ons eie doelwitte gaan aflei.

Desnieteenstaande het PRAAG die hofstukke bekom en is tans besig om dit te bestudeer en sal ook vergaderings met skole bywoon om die aanslag af te weer. In wese kom die hofstukke daarop neer dat Pietersen die regulasies teen die Christelike godsdiens soos dit deur Kader Asmal uitgevaardig is, op alle Afrikaanse skole en veral die ses skole wat in die aansoek gedagvaar word, wil laat afdwing. Die volgorde waarin die ses Afrikaanse skole in die aansoek genoem word, is:

Laerskool Randhart

Laerskool Baanbreker

Laerskool Garsfontein

Hoërskool Linden

Hoërskool Oudtshoorn

Langenhoven-gimnasium

Onder andere maak Pietersen beswaar teen Laerskool Randhart se leuse op sy skoolwapen: “Ons glo.” Pietersen meen ook dat die skoolwapen self (die embleem) teen die grondwet indruis omdat dit op die drieledige stelling gegrond is: “Glo in God, jouself en jou land.”

In weerwil daarvan dat al ses skole Afrikaans is, is die dagvaarding in Engels op die skole beteken.

Rusland, Oekraïne kom ooreen oor stappe vir skietstilstand

Russiese president Wladimir Poetin en sy Oekraïense eweknie Petro Poroshenko het “tot ‘n groot mate” ooreengekom op die stappe wat geneem moet word om ‘n skietstilstand te bereik, het die Russiese president se perssekretaris Dmitri Peskof gesê.

“In ‘n telefoniese gesprek vroeër in die dag het Poetin en Poroshenko menings uitgeruil en tot ‘n groot mate ooreengekom op stappe wat kan bydra tot ‘n vroeë skietstilstand tussen die Oekraïense weermag en die selfverdedigingsmagte in die suidooste van die land,” het Peskof gesê in die lig van ‘n verklaring deur die Oekraïense president se mediakantoor dat “die gesprek gelei het tot ‘n permanente skietstilstand in Donbass.”

Moskou het herhaaldelik daarop gewys dat Rusland nie ‘n party is tot die Oekraïne se interne konflik nie. Dit is presies wat President Poetin beklemtoon het ná verlede week se onderhandelinge met Poroshenko in Minsk.

“Om eerlik te praat, ons is nie in die posisie om enige skietstilstandterme of ooreenkomste tussen Kiëf, Donetsk en Luhansk te bespreek nie. Dit is nie ons besigheid nie, maar die Oekraïne se interne saak,” het Poetin gesê.

Vroeër, het die Russiese president Vladimir Poetin ‘n telefoniese gesprek met sy Oekraïens eweknie Petro Poroshenko gehad.

“[Die twee leiers] het voortgegaan om die Oekraïne se militêre en humanitêre krisis te bespreek,” het Peskof gesê.

“Die staatshoofde het hul standpunte oor die topprioriteit maatreëls vir die staking van die bloedvergieting in die land se suid-ooste uitgeruil,” het die perssekretaris gesê.

“[Poetin se] oog op moontlike maniere uit hierdie krisissituasie stem grootliks ooreen met dié van die Oekraïense president.”

Oornag, op 27 Augustus ná konsultasies met die Doeane-unie, die Oekraïne en die EU, het ‘n vergadering tussen die presidente van Rusland en die Oekraïne plaasgevind in Minsk. Die gesprek was agter geslote deure en het vir bykans twee ure geduur en was die eerste onderhandelinge tussen die twee leiers.

President Barack Obama van die VSA het Woensdag gesê dis te vroeg om van ‘n skietstilstand te praat in die Oos-Oekraïne. Obama het dit gesê na sy ontmoeting met President Toomas Hendrik Ilves in Tallinn, die hoofstad van Estland.

VSA brei lugaanvalle in Afrika uit

Die VSA het ‘n lugaanval deur ‘n onbemande tuig gedoen oor ‘n gebied waar die leiers van Somalië se Al-Kaida-militante vergader het, het intelligensie bronne Dinsdag gesê, maar dit is onduidelik of enige bevelvoerders gedood is.

Die aanval het volgens Somaliese regeringsamptenare die al Sjabaab-leier Ahmed Abdi Godane en ander leiers geteiken wat glo byeen was by die plek, maar daar was geen bevestiging dat hulle getref is nie.

Die Pentagon is tans besig met die voorbereiding van ‘n onbemande tuig-basis op een van die mees afgeleë plekke op aarde: ‘n Ou kameelkaravaankruispad in die middel van die Sahara.

Na maande van onderhandelinge het die regering van Niger, ‘n Wes-Afrika-land, is die Amerikaanse weermag gemagtig om onbemande tuie uit die modder-ommuurde woestynstad van Agadez te stuur.

Die besluit gee die Pentagon ‘n toesigmiddelpunt – die tweede in Niger en derde in die streek – om sogenaamde Islamitiese ekstremiste in Noord- en Wes-Afrika op te spoor.

Dit bevorder ook publisiteit vir die Amerikaanse strategie om bedreigings saam met Frankryk, die voormalige koloniale mag in daardie deel van die vasteland, aan te pak.

Die VSA se militêre magte onderneem dikwels oorvlugte oor Somalië, maar lugaanvalle en grondaanvalle is relatief ongewoon.

Die Pentagon het ‘n groot tuigbasis by Camp Lemmonnier in Djiboeti, wat grens aan Somalië in die Horing van Afrika, maar stuur tuie oor Somalië uit ‘n basis in Ethiopië.

VSA stuur troepe na Oekraïne, Irak, Somalië

President Barack Obama van Amerika gaan troepe na die westelike grens van die Oekraïne stuur vir ‘n gesamentlike militêre oefening hierdie maand met meer as 1000 troepe van die Verenigde State en sy bondgenote.

Die besluit om voort te gaan met die Rapid Trident-oefening vanaf 16 tot 26 September word beskou as ‘n teken van die toewyding van NAVO om die Oekraïne te ondersteun sonder openlike militêre ingryping in die konflik.

Die jaarlikse oefening sal plaasvind naby die Oekraïne se grens met Pole, en was aanvanklik geskeduleer vir Julie, maar is afgestel omdat vroeë beplanning deur die krisis in die oostelike deel van die land ontwrig is.

Die VSA het reeds $5 miljard bewillig vir ‘n regeringsverandering in die land. Daar word ná die NAVO-beraad in Wallis hierdie week ‘n nuwe vinnige reaksiemag van ‘n paar duisend troepe verwag.

Bykomend tot die lugmagoefeninge, sal die Verenigde State van Amerika tenks en 600 troepe na Pole en die Baltiese state Estland, Letland en Litaue stuur vir gesamentlike maneuvers in Oktober om valskermsoldate te steun.

Rapid Trident sal die eerste beduidende ontplooiing van Amerikaanse en ander personeel behels na die Oekraïne sedert die krisis uitgebreek het.

Onder ‘n breë program getiteld “Operation Atlantic Resolve” beoog die VSA om sy verbintenis tot die Europese wapenwedloop tesame met NAVO te bevestig.

Obama het ook aangekondig dat nog 350 troepe na Bagdad gestuur sal word om “hoofsaaklik Amerikaanse diplomate en sy ambassade in die Irakse hoofstad te beskerm”.

Dit sal die aantal Amerikaanse weermagpersoneel in Irak, wat hoofsaaklik vir sekerheid ontplooi is, op sowat ‘n duisend te staan bring.

Die Withuis en Pentagon het dit bekend gemaak nadat nog ‘n gru-video deur die Islamitiese Staat op die internet uitgereik is waar ‘n gemaskerde ekstremis met ‘n Britse aksent nog ‘n klaarblyklike onthoofding op ‘n Amerikaner uitvoer.

Ten spyte daarvan dat hulle nie egtheid van die twee videos kan bevestig nie, sal die VSA nog soldate stuur.

Die joernalis, Steven Sotloff wat verlede jaar in Sirië ontvoer is, was deel van die video wat die onthoofding van sy landgenoot, James Foley gewys het.

In die video dreig ‘n gemaskerde persoon ‘n derde gyselaar en waarsku regerings om hulle alliansies teen die Islamitiese Staat te staak.

Senator McCain het voorheen die leierskap van ISIS ontmoet en na hulle verwys as “gematigdes” wat veg teen die “diktatuur” in Sirië.

Berigte dat die VSA en Brittanje ISIS befonds is vollop op die internet.

In Afrika is Ugandese soldate wat deel vorm van die Afrika-unie se sending in Somalië, besig om voor te berei om na Kurtunwaarey in die Laer Shabelle-streek van Somalië te beweeg.

Dit is deel van Operasie Indiese Oseaan, wat daarop gemik is om die oorblywende dorpe in die gebied wat steeds deur die Moslemterroristegroep, Al Sjabaab beset word, te bevry.

Grondwethof beslis teen Solidariteit oor RA

Dirk Hermann, uitvoerende hoof van Solidariteit, het Dinsdagoggend gesê die Grondwethof se beslissing teen Renate Barnard laat hulle “bitter teleurgesteld”.

Barnard is blykbaar bevordering geweier in die polisie omdat sy wit is. Die saak het egter in die arbeidshof oor diensbillikheid gehandel en nie oor ras nie.

Barnard was ‘n luitenant-kolonel in die polisie, maar het intussen bedank om ‘n pos in die private sektor te aanvaar.

Solidariteit wat die saak namens Barnard gevoer het, het intussen weer ‘n aansoek in die arbeidshof in Johannesburg gebring oor die geldigheid van die polisie se diensbillikheidsplan. Die uitspraak word voorbehou.

Regter Dikgang Moseneke het namens die Grondwethof die appèlhof in Bloemfontein se aansoek in Barnard se guns tersyde gestel in die polisie se guns.

Volgens Moseneke is die polisie se diensbillikheidsplan in die gees van die Grondwet en is daar nie meriete in Barnard se aansoek teen die besluit van die nasionale polisiehoof nie.

Barnard is drie keer nie in ‘n vakante pos aangestel nie, vermoedelik omdat sy wit is, maar die saak het eerder gehandel oor meriete in regstellende aksie-aanstellings

Oproeriges op Oos-Rand met rubberkoeëls uiteengejaag

Oproer by Rabie Ridge in Tembisa aan die Oos-Rand, het die polisie genoop om met rubberkoeëls op oproeriges te skiet.

Die polisie monitor steeds die gespanne situasie nadat inwoners amok gemaak het oor ‘n behuisingstekort.

“Die polisie het vanoggend rubberkoeëls afgevuur om die betogende inwoners uitmekaar te jaag,” het lt. kol. Lungelo Dlamini, polisiewoordvoerder, Dinsdag gesê. “Twee van die betogers is vir openbare geweld in hegtenis geneem.”

“Geen beserings is aangemeld nie. Die inwoners het gesê hulle betoog oor behuising in die gebied.”

Modderfonteinweg was vroeër weens die oproer gesluit, maar is intussen weer oopgestel.

Grootste deel van Edenvale sonder krag

Ongeveer tweederdes van huishoudings in Edenvale sit sonder krag tot verdere kennisgewing.

Teen ongeveer 04:30 Woensdagoggend, het die Northrand-toevoerkabel in Edenvale glo ‘n kortsluiting gehad.

Die kragonderbreking raak die Edenvale-sakegebied, Edenvale, Eastleigh, Eastleigh Ridge, Glendower en sy uitbreidings asook Dowerglen en uitbreidings.

Volgens Eskom, is tegniese spanne reeds uitgestuur na die terrein om die omvang van die skade te evalueer.

“Gevolglik word uitgebreide beplanning en herstelwerk vereis om toevoer te herstel na die geaffekteerde gebiede, wat na raming ‘n lang tydperk sal neem tyd as gevolg van die kompleksiteit van die situasie,” het Eskom gesê in ‘n media-verklaring.

Eskom het ook om verskoning gevra vir die ongerief. Inwoners kan Eskom by 086 003 7566 kontak.

Winkelsentrum in Pretoria deur rowers geteiken

Die vlaag gewapende rooftogte by winkelsentrums wat Johannesburg dié week getref het, het na Pretoria uitgekring.

‘n Winkel in die Kolonnade winkelsentrum in Montana, Pretoria, is Dinsdag deur gewapende rowers aangeval. Die aanvallers het goedere van meer as R200.000 rand gebuit.

Niemand is nog in hegtenis geneem in verband met die rooftog by ‘n Telkomwinkel in die sentrum nie. Dit is die tweede rooftog by die sentrum binne twee weke.

‘n Polisiewoordvoerder, Johannes Maheso, sê twee gewapende mans het die winkel binnegegaan en nog twee het buite wag gehou. Hulle ondersoek die moontlikheid dat dit dieselfde rowers kan wees as twee weke gelede.

Die personeel is deur die rowers beveel om na die agterkant van die winkel te gaan. Niemand is beseer nie en die rowers het met die buit gevlug.

Die bestuur van die sentrum was nie beskikbaar vir kommentaar nie.

OVK-voorsitter bedank

Die voormalige voorsitter van die Onafhanklike Verkiesingskommissie, Pansy Tlakula, het die handdoek ingegooi, nadat sy glo by onregmatige besteding en korrupsie betrokke was.

Die ANC het Tklakula vir haar bydrae bedank tydens haar ampstermyn by die kommissie.

Tlakula het bedank nadat sy haar stryd in die Grondwethof verloor het om ‘n uitspraak om te keer dat sy die pos moet ontruim.

Sy is in ‘n verslag van die Openbare Beskermer en die Tesourie oor die kole gehaal weens ‘n huurtransaksie van 320 miljoen rand vir die OVK se hoofkwartier wat volgens hulle onreëlmatig was.

‘n ANC-woordvoerder, Moloto Mothapo, sê haar bedanking bring ‘n einde aan ‘n moeilike tyd vir haar asook die instelling waarvan sy voorsitter was.

Moloto sê hulle is vol vertroue dat die OVK weer sy reputasie sal herstel as ‘n instelling wat oor ‘n regverdige, deursigtige en geloofwaardige verkiesing toesig kan hou.