Kategorie: Nuus

Virtuele volksvergadering op 1 Mei 2015

Vanweë die toenemende onveiligheid en geweld, regeringsvyandigheid, aanslag op Afrikaanse skole, xenofobie, demografiese marginalisering, werkloosheid, armoede en ander probleme waarmee Afrikaners te kampe het, hou PRAAG op 1 Mei heel dag lank ‘n virtuele volksvergadering waaraan elkeen vrylik kan deelneem. U op die volgende 3 forums deelneem:

1. Die PRAAG-blad op Facebook.

2. @pro_afrikaans op Twitter.

3. Op die Disqus-kommentaarblad onder aan hierdie bladsy.

4. Via e-pos aan inlig[by]praag.org, waarna ons dit op Facebook en Disqus sal publiseer.

Oor die volgende paar dae, in aanloop tot die virtuele volksvergadering, sal ons ‘n oorsig verskaf van pogings wat reeds oor die afgelope 20 jaar aangewend is om Afrikaners saam te snoer, strategiese vergaderings en beplannings wat gehou is, en waarom sulke pogings moontlik nie tot op hede die nodige resultate gelewer het nie. Hoewel die vergadering eers amptelik op 1 Mei begin, is die debat dus reeds geopen. U voorstelle en kommentaar is welkom.

U kan nou reeds items vir bespreking op Disqus plaas, wat agterna op dié bladsy as ‘n sakelys aangebring sal word soos wat hulle deur deelnemers aanvaar word. Hier volg ‘n konsepsakelys.

SAKELYS

  1. Fisieke oorlewing: veiligheid, mediese sorg.
  2. Behoud van kultuur, skole en eie instellings.
  3. Doelwitte:
    1. Herstel van politieke en ekonomiese invloed.
    2. Kantons, grondgebied en/of selfbeskikking.
    3. Groter samehorigheid onder Afrikaners binne- en buitelands.
  4. Verraad en dwarstrekkery in eie geledere.
  5. Skakeling met internasionale organisasies.
  6. Die inligtingsoorlog teen Afrikaners in die media en elders.
  7. Vyandelike groepe.
  8. Water en elektrisiteit.

Dr. Dan Roodt
PRAAG

Noodtoestand in Baltimore na swart geweld

‘n Noodtoestand is afgekondig en ‘n weeklange aandklokreël is ingestel nadat swart geweld uitgebreek het in Baltimore in die Amerikaanse deelstaat, Maryland.

Die onrus het ontstaan na die begrafnis van Freddie Gray, ‘n swart Amerikaanse krimineel wat vroeër die maand in polisie-aanhouding dood is.

Gray was 18 keer voorheen in hegtenis geneem vir dwelmverwante oortredings. Dit is nie bekend hoe lank hy die tronk deurgebring het nie. Hy het ‘n mes aan hom gehad toe hy gearresteer is, het The Guardian berig.

Die swart onluste het glo gevolg nadat pamflette oor die naweek dmv sosiale media versprei is wat vra dat swartes na Mondawmin Mall opruk.

Dit was veronderstel om ‘n vreedsame optog vir Freddie Gray te wees wat gou in geweld en plundery ontaard het.

Amptenare het die onrus as die ergste bestempel sedert die sluipmoord op Martin Luther in 1968.

Verskeie polisiebeamptes moes behandeling ontvang nadat die polisie en betogers slaags geraak het. Minstens 15 polisiebeamptes is beseer, waarvan ten minste een in ‘n kritieke toestand verkeer.

Swart oproeriges het die polisie met klippe, bottels en ander voorwerpe bestook.

Die goewerneur van Maryland, Larry Hogan het die geweld veroordeel.

Die polisie het gesê lede van ‘n groep oproeriges het ‘n brandslang gesny terwyl die brandweer probeer het om ‘n brand by ‘n winkelsentrum te blus waarop plunderaars toegesak het.

Baltimore Sky Eye se helikopter 13 het een swart plunderaar afgeneem waar hy fluks besig was om goedere uit ‘n winkel te steel en in ‘n wagtende voertuig te laai.

Die polisie het vroeër te hore gekom van ‘n sameswering dat verskeie bendes beplan om wetstoepassers te vermoor.

Rassespanning in Amerika is op die spits gedryf ná ‘n aantal voorvalle die afgelope ruk waar slegs wit polisielede vir geweld verkwalik word.

Swart-op-swart geweld soos in Chicago wat in veelvoude van tien meer lewens eis, kry daarenteen byna geen aandag nie.

Gray is Maandag begrawe in ‘n wit kis met goue versiering.

Die drie polisielede wat Gray in hegtenis geneem het, was wit, en klaarblyklik is wittes oorverteenwoordig in Baltimore se polisiedepartement.

Anders as in Ferguson is die munisipaliteit egter swart.

Los Angeles het intussen ‘n “blou waaksaamheidswaarskuwing” uitgevaardig uit vrees dat die geweld kan oorspoel na die stad uit wraak.

Ses wat myn wou besteel vasgevat

Ses persone is by Harmony se Kalgold-myn in Noordwes in hegtenis geneem op aanklag van sameswering om te steel.

Noordwes polisiewoordvoerder, Sabata Mokgwabone, het gesê lede van die Valke en die polisie se reaksie-eenheid het inligting oor die beplande diefstal ontvang.

Die beamptes het Vrydagoggend omstreeks 03:30 waggehou by Kalgold-myn naby Setlagole toe verdagtes in ‘n wit Ford Courier met registrasienommer HWS029NW by die veiligheidshek opgedaag het. Nog ‘n voertuig, ‘n Mercedes Benz Iveco, het onmiddellik daarna ook by die hek opgedaag. Die lede van die Valke en die reaksie-eenheid het die voertuie voorgekeer.

Volgens Mokgwabone het die verdagtes glo op die polisie begin skiet en hulle het teruggeskiet. Die verdagtes het van die toneel gevlug, maar twee persone is in hegtenis geneem.

Volgens Mokgwabone is die polisie se honde-eenheid en ‘n polisie-helikopter ontbied om na die ander vier verdagtes te soek. Hulle is later in die bosse aangekeer en in hegtenis geneem.

Niemand is tydens die voorval beseer nie. Die polisie het beslag gelê op ‘n koperkabel ter waarde van R30 000 wat in die verdagtes se voertuig was.

Die mans, tussen 26 en 54 jaar oud, sal na verwagting Dinsdag in die Setlagole periodieke hof verskyn op aanklag van sameswering om te steel.

Eskom-agterstand glo weens onbehoorlike tenders

Chancellor House, die ANC se beleggingsmaatskappy, het kort voor die algemene verkiesing verlede jaar R50 miljoen in hul sakke gesteek toe hulle aandele verkoop het in ‘n maatskappy wat groot kontrakte bekom het van Eskom en aan die staat behoort, het News24 Sondag berig.

Chancellor House het ‘n bykomende R50 miljoen aan dividende ontvang te danke aan sy bande met Hitachi Power Africa (HPA). In 2005 het Chancellor House net R1.25m betaal vir sy aandeel in HPA.
 
In 2007 het HPA tenders ter waarde van R40 miljard ontvang om drukketels vir Eskom se Medupi- en Kusile-kragstasies te vervaardig. In 2008 het die Openbare Beskermer bevind dat die toekenning van die tenders deur Eskom aan HPA ‘n konflik van belange skep, omdat Valli Moosa, Eskom se voorsitter toe, ook ‘n senior lid van die ANC is.
 
Robin Duff, HPA se finansiële hoof ten tye van die toekenning, het voorheen ‘n waarskuwing ontvang oor Chancellor House se onbehoorlike politieke verbintenis, maar Duff het verlede week dié bewering ontken.
 
HPA is ook in die verlede gekritiseer omdat die drukketels vir Medupi en Kusile na bewering deel van die oorsaak vir die groot agterstand by hierdie nuwe kragstasies is.
 
Mathews Phosa, die ANC se voormalige tesourier, het reeds in 2010 gesê Chancellor House moet sy aandele in HPA verkoop.

Phosa het gesê Chancellor House se belang in groot regeringstenders soos dié van Eskom skep die indruk die ANC “misbruik belastingbetalers om geld in te samel.” Vir baie jare is sy mening geïgnoreer.
 
Volgens News24 se bronne is die kontrakte vir die drukketels intussen oorgeneem deur Mitsubishi Hitachi Power Systems-Africa (MHPSA), ‘n nuwe maatskappy wat gestig na die samesmelting van die Japannese vervaardigingsreuse Mitsubishi en Hitachi.
 
MHPSA het nie reageer op News24 se vrae oor Chancellor House nie. David Milner, sy woordvoerder, het bloot gesê die verhouding tussen Hitachi Power Africa en Chancellor House is reeds beëindig met MHPSA se stigting.
 

Minister: Khoi en San kan uitsien na grond van voor 1913

Gugile Nkwinti, minister van landelike ontwikkeling en grondhervorming, het gesê grond is vir Khoi-San-grondeise in die Wes-Kaap beskikbaar.

Nkwinti het die naweek in Qwa-Qwa gesê soortgelyke eise sal ook in die Oos-Kaap toegestaan word.

Daar is glo geen spertyd vir die eise nie, het Nkwinti se woordvoerder, Mthobeli Mxotwa, aan Netwerk24 gesê.

Sulke aansprake kan kragtens die wet wat bepaal dat grondeise slegs ná 1913 oorweeg word, ongeldig wees, maar klaarblyklik “kyk” die ANC na die saak.

Afstammelinge van die Khoi en San moet deurgaans bewys lewer van hul erfenis, het aktiviste gesê, maar wanneer ‘n Xhosa grond eis, word ‘n DNS-toets nie vereis nie.

Nkwinti se aankondiging het wenkbroue laat lig aangesien die Khoi en San se tradisionele leiers nie deur die ANC erken word nie.

Heilbron loop onder brandstigters deur

Heilbron in die Vrystaat het Sondag onder brandstigters deurgeloop.

‘n Polisiewoordvoerder het bevestig dat daar die naweek vyf voorvalle in die dorp plaasgevind het.

Die brandweer is in die vroeë oggendure uitgeroep nadat ‘n brandende motor voor die hotel in die dorp opgemerk is.

Die stadsaal is later aan die brand gesteek en is in puin gelê.

Vure is by ‘n plaaslike winkel gestig, asook onder ‘n bakkie en by die munisipale kantore, maar kon betyds gekeer word. Die kantore is ongeskonde.

Volgens die brandweer is ‘n woonstel ook aan die brand gesteek.

Die landdroskantoor het in Februarie afgebrand.

Niemand is nog in verband met die voorvalle in hegtenis geneem nie.

April ‘n gru-maand vir padsterftes

Nagenoeg 700 mense is in die eerste drie weke van April op Suid-Afrika se paaie dood, het die Padverkeerbestuurskorporasie gesê.

Volgens voorlopige getalle is 699 mense tussen 30 Maart en 20 April op die land se paaie dood, het ANA berig.

Die Padverkeerbestuurskorporasie het gesê dit kan toegeskryf word aan motoriste se roekelose gedrag en die verontagsaming van verkeersreëls.

Die grootste getal sterftes het in KwaZulu-Natal voorgekom waar 148 mense in 116 ongelukke dood is. In Gauteng is 119 sterftes aangeteken. Die Noord-Kaap en Vrystaat het die laagste sterftesyfers aangeteken, onderskeidelik 19 en 52.

Makhosini Msibi, uitvoerende hoof van die Padverkeerbestuurskorporasie, het ‘n beroep op motoriste gedoen om nie onder die invloed van alkohol te bestuur nie en hul spoed te verminder.

Volgens Msibi is menslike foute en bande wat bars die hoofoorsaak van ongelukke.

Oos-Kaapse polisie soek na Baartman-vandale

Die Oos-Kaapse polisie sê hulle is steeds opsoek na diegene wat ‘n Sara Baartman-gedenkteken by Hankey gevandaliseer het.

Ooggetuies sê hulle het Saterdag gesien hoe ‘n groep mense wit verf oor die gedenkteken van die Khoi-vrou uitgooi. Die Khoi was die eerste bewoners van Suid-Afrika voordat Bantoes hulle verdryf het.

Dit is die jongste beskadiging van ‘n standbeeld wat begin het na ‘n veldtog om ‘n standbeeld van die Britse kolonialis, Cecil John Rhodes by die Universiteit van Kaapstad te verwyder.

‘n Aantal standbeelde, insluitend een van Paul Kruger in Pretoria, is intussen beskadig te midde van ‘n anti-wit veldtog teen “kolonialisme”.

Kruger, sowel as Baartman was slagoffers van kolonialisme, anders as Rhodes, maar oproepe van die ANC-Jeugliga asook die EFF om beelde te verwyder, is duidelik teen blankes gemik.

‘n Oos-Kaapse polisiewoordvoerder, Gerda Swart het bevestig dat ‘n ondersoek na die voorval aan die gang is.

Nepal-skudding: Everest-klimmers dood

Minstens 17 bergklimmers is op Everest dood toe ’n massiewe sneeustorting weens ‘n groot aardskudding in Nepal hulle verswelg het.

Die sneeustorting het ’n groot gedeelte van die basiskamp op Everest verwoes en vrese laat ontstaan dat baie meer ongevalle op die berg kan wees omdat baie bergklimmers daar uitgekamp het.

Die skudding, wat 7,9 op die Richterskaal geregistreer het, het oos van Pokhara in Nepal getref en kantoorgeboue en verskeie huise verwoes.

Die dodetal in die verwoestende aardskudding wat die Katmandoe-vallei Saterdag geruk het, styg steeds en volgens owerhede die is meer as 3 200 mense dood.

Tienduisende is dakloos gelaat na die ramp. Inwoners se huise is vernietig, terwyl ander te bang is om na hulle huise terug te keer, te midde van sterk na-skokke.

Talle sterftes in China en Indië is ook weens die aardbewing aangemeld. Intussen het talle reddingspanne en hulpmateriaal in die land begin aankom.

Telefoonlyne is erg beskadig en wat kommunikasie met nooddienspersoneel bemoeilik.

Vyf Suid-Afrikaners wat vermis was na die skudding is glo intussen opgespoor en hul gesinne laat weet dat hulle veilig is.

Die Britse regering het hulp beskikbaar gemaak om Nepal by te staan. Die Britse departement van internasionale ontwikkeling sê die fonse is dadelik beskikbaar om broodnodige voorrade te verskaf, terwyl die res aan die Rooi Kruis gegee sal word.

Verskeie Britse burgers is direk deur die aardbewing geraak.

Bendes en taxi-vereniging pak mekaar in Noordwes

Geboue en ‘n motor is Sondagmiddag aan die brand gesteek in ‘n konfrontasie tussen ‘n taxivereniging en beweerde bendelede in Kanana, volgens die polisie in Noordwes.

Die taxivereniging in Orkney was blykbaar moeg vir misdaad in die gebied en het glo boewe in die lokasie gaan konfronteer.

Niemand is nog in hegtenis geneem nie en geen beserings is aangemeld nie. Die polisie sal gevalle van brandstigting en openbare geweld ondersoek.
 
Die konfrontasie kom ‘n week nadat die provinsiale LUR vir gemeenskapsveiligheid Gaoage Molapisi die gebied besoek het en met die polisie en raadslede oor die tsotsi-probleem beraadslaag het.
 
Volgens ‘n verklaring van die departement is verskillende groepe swart jeugdiges in die gebied besig om te “verkrag, eiendom te vernietig, mekaar te vermoor en by mense se huise in te breek”.
 
Die bendelede bestorm glo huise met wapens wat tuinvurke insluit.
 
Inwoners het gesê hulle is bang om aan die polisie inligting te gee as gevolg van moontlike vergelding.
 
Polisie patrolleer steeds die gebied wat Sondagaand kalm was.