Die Nelson Mandela Stigting het sy medelye betuig met die dood vanoggend van een van die bergklimmers van die inisiatief – Trek4Mandela – op Berg Kilimandjaro in Tanzanië.
Die Suid-Afrikaanse renjaer, Gugu Zulu, was een van 42 bergklimmers wat aan die inisiatief deelgeneem het.
Hy sou vanoggend op Mandela-dag die piek bereik het, maar het asemhalingsprobleme ontwikkel.
Die ekspedisie het ten doel om bewustheid te skep vir die lot van arm meisies wie se skoolbywoning weens ‘n gebrek aan persoonlike higiëne ontwrig word.
Zulu se vrou, Letshego, was een van die bergklimmers.
Die Nelson Mandela Stigting sê ‘n mediese span het alles in hul vermoë gedoen om sy lewe te red.
Die bestuurshoof van die Nelson Mandela Stigting, Sello Hatang, sê hy het Zulu persoonlik geken en is uiters geskok oor sy dood.