Nuus Archives - Page 241 of 1583

Kruger-standbeeld weereens met verf beskadig

Die Boerekrygers rondom die Paul Krugerstandbeeld deur Anton van Wouw op Kerkplein in Pretoria, is weereens met verf beskadig.

Pretoriase metropolisie was gister op die toneel om ondersoek in te stel. Sedert April toe die beeld vir die eerste keer met verf aangeval is, word dit met ‘n hoë heining beskerm, dog ‘n groot gat is in die heining gemaak. Die metropolisie het dit gister met plastieklinte afgekordon.

In April het Julius Malema se party, die Ekonomiese Vryheidsvegters die stadsraad van Pretoria sewe dae gegee om Oom Paul se standbeeld te verwyder. ‘n Woordvoerder van dié party, Benjamin Disoloane, het toe gesê:

Die burgemeester, Ramakgopa, moet verstaan dat dié standbeeld ons mense elke dag frustreer. Ons mense het nie werk nie en kom in hierdie park ontspan.

As hulle na die standbeeld van Paul Kruger kyk, frustreer dit hulle. Ons bied aan om die standbeeld te verwyder aangesien die stad nie oor die begroting beskik nie.”

Volgens hom beskik die EFF oor die mannekrag en die vervoer om die standbeeld te verwyder.

Voordat die standbeeld gister weer met verf toegetakel is, is dit rondom April skoongemaak.

PRAAG het aansoek gedoen by UNESCO, die Verenigde Nasies se kulturele liggaam in Parys, dat Kerkplein as ‘n wêrelderfenisgebied verklaar word. UNESCO het toe die aangeleentheid na die Suid-Afrikaanse regering verwys, wat sedertdien weier om te antwoord.

Dr. Dan Roodt van PRAAG het sy ontsteltenis oor die jongste voorval van vandalisme teen die Kruger-standbeeld uitgespreek. “Ons sal weer met UNESCO in verbinding tree en aan hulle noem dat die ANC-bewind glag nie aan ons versoeke gehoor gee nie. Daar is ook die moontlikheid om ‘n hof te nader om die ANC-bewind te dwing om ons te antwoord.”

PRAAG loods terselfdertyd ‘n appèl op Suid-Afrikaanse kommuniste om nie langer Boerehaat en antipatie jeens Afrikaans of die Afrikanererfenis te propageer nie. “In ander wêrelddele het kommuniste gereeld volksmoorde veroorsaak met hul haat- en propagandaveldtogte,” sê Roodt. “As Suid-Afrika dit wil vryspring, sal ons pro-aktief moet optree en sulke veldtogte teen ons taal en standbeelde in die kiem moet smoor.”

Zuma ontmoet visekanseliers vandag

President Jacob Zuma sal vandag die visekanseliers van hoër onderwysinstellings ontmoet om oor verskeie brandende kwessies te praat wat universiteite regoor die land raak.

Die vergadering sal op versoek van die Universiteitsraadvoorsittersforum van Suid-Afrika en Suid-Afrikaanse Universiteite plaasvind.

Die Presidensie se waarnemende woordvoerder, Bongani Majola, sê die regering sal ook toekomstige planne vir hoëronderwysinstellings in die land openbaar.

Hy sê Zuma sal deur verskeie ministers, waaronder die minister van Hoër Onderwys en Opleiding, Blade Nzimande, by die vergadering in die Uniegebou vergesel word.

Befondsingsverwante kwessies wat tot studenteprotes lei, is ‘n gereelde gebeurtenis by UKZN, maar het veral verlede maand gewelddadig geraak toe die administrasiegebou op die Westvillekampus, tesame met twee voertuie, aan die brand gesteek is.

Die studentekantoor op die Westvillekampus is ook verlede week aan die brand gesteek. Studente van die Westville- en Pietermaritzburgkampusse is oor die afgelope drie weke in hegtenis geneem, en ten minste 10 studente is geskors.

Volgens internasionale standaarde is die vlak waarop hoër onderwys in Suid-Afrika befonds word, laag.

Dieselfde verslag van 2013 noem die huidige “onvoldoende” koers van staatsbesteding aan hoër onderwys as ‘n faktor wat verhinder dat die volgende geslag akademici ontwikkel word.

Die aantal studente wat ingeskryf is aan Suid-Afrika se universiteite sal na verwagtig teen 2019 1,1 miljoen wees.

Vrystaat landbou besluit boervrou ‘koester geen wrok’ na plaasaanval nie

Die vroue-boer van Harrismith, Alison Oates, wat Maandagmiddag wreed op haar plaas deur twee rowers aangeval is, sterk by familie aan.

Volgens Vrystaat landbou “koester sy geen wrok nie”.

Dit, volgens voorsitter van Vrystaat Landbou se komitee oor wet en orde, Tommie Esterhuyse, is wat Oates na haar ontslag uit die La Verna Private Hospitaal op Ladysmith beweer het, toe hy haar saam met ander lede van die organisasie besoek het.

Hy sê volgens die Vrystaatse polisie is nog geen verdagtes in verband met die voorval aangekeer nie.

Polisiewoordvoerder Mmako Mophiring sê Oates is deur twee swartes buite haar plaashuis oorrompel. Hulle het geld gesoek. Haar hande is agter haar rug vasgebind.

Sy is onder meer met ‘n mes in die been en regterskouer gesteek en met ‘n strykyster gebrand.

Esterhuyse het vanmiddag aan OFM-nuus gesê Oates sterk goed aan onder die omstandighede.

Amerikaanse lugaanval op hospitaal skerp veroordeel deur VN

Die Verenigde Nasies (VN) het ’n aanval op ’n hospitaal van die organisasie Médecins Sans Frontières (MSF), beter bekend as Dokters Sonder Grense, in Koendoez in Afganistan skerp veroordeel.

Die hoof van die VN se humanitêre sending, Zeid Ra’ad Al Hoessein, het gesê indien ’n ondersoek sou bevind dat die hospitaal met opset geteiken is, dit as ’n oorlogsmisdaad beskou sal word.

Die sekretaris-generaal van die VN, Ban Ki-moon, sê ‘n grondige en onpartydige ondersoek na die voorval moet spoedig volg.

Die Amerikaanse president, Barack Obama, het ook ‘n ondersoek na die tragedie belowe. Jens Stoltenberg, NAVO se sekretaris-generaal het ook sy “diepe meegevoel” uitgespreek.

Negentien mense, onder wie 12 personeellede van MSF, is in die aanval dood.

Volgens MSF is die intensiewesorg- en ongevalle-eenheid in vlamme gelaat en het pasiënte doodgebrand.

Die Amerikaanse lugmag het erken dat hy in die omgewing van die hospitaal ’n lugaanval uitgevoer het.

“Die departement van verdediging sal ’n volledig ondersoek doen en ons sal op die uitslag van die ondersoek wag voordat ons enige verdere besluite neem rakende die omstandighede wat die aanval betref,” het Obama in ’n verklaring gesê.

Volgens Dokters Sonder Grense is die GPS-koördinate van sy fasiliteite in Koendoez by verskeie geleenthede aan Amerikaanse magte in Afghanistan deurgegee.

Afgaanse regeringsmagte, met die steun van onder meer Amerikaanse lugaanvalle, het die afgelope paar dae na wat berig word dele van Koendoez in hewige gevegte herower nadat die Taliban die stad vroeër vandeesweek ingeneem het.

Die Taliban se suksesvolle aanslag was ’n vernederende nederlaag vir die VSA. Dit was die eerste keer sedert 2001 dat ’n provinsiale hoofstad in die Taliban se hande beland het.

Bruin Oregon-slagter pleeg selfmoord

Die 26-jarige bruin skieter in die massaskietvoorval by die Umpqua Community College in Roseburg in die Amerikaanse deelstaat Oregon het selfmoord gepleeg, volgens Amerikaanse owerhede.

“Die mediese ondersoek het bevestig dat selfmoord die oorsaak van die skieter se dood was,” het die Douglas-distrik se polisiehoof, John Hanlin, gesê.

Hy het gesê die bruinman, Christopher Harper-Mercer, was ’n student aan die kollege waar die massaslagting plaasgevind het.

Harper-Mercer wat minstens nege studente en lektore doodgeskiet het, is deur die hoofstroommedia as wit voorgehou.

Dit was Amerika se ergste voorval van massamoord vanjaar. Voor die jongste voorval is daar reeds 293 mense vanjaar in massamoorde in dié land gedood.

Die slagting het begin toe Mercer Donderdagoggend by ’n lesinglokaal ingestorm en ’n lektor doodgeskiet het, waarna hy van die een lokaal ná die ander gestap en geskiet het. Angsbevange studente het probeer om die deure, wat nie kan sluit nie, toe te maak. Ander het op die vloer neergeval of agter tafels en stoele probeer skuil.

Pres. Barack Obama het egter sy woede teen die wit National Rifle Association (NRA) gerig.

China kondig infrastruktuurprojekte in Guinee-Bissau aan

Die aankondiging dat China vier groot infrastruktuurprojekte, insluitend die oprigting van ‘n presidensiële woning, in Guinee-Bissau sal onderneem, kom te midde van nuwe politieke onrus.

Dié Wes-Afrika-land het sedert onafhanklikheid van Portugal in 1974 nog nie een president gehad wat sy verkose termyn voltooi het nie en het sedert 1980 onder nege staatsgrepe deurgeloop.

Die aankondiging is Maandag deur die vise-president van die Kamer van Handel, produksie en Landbou van Guinee-Bissau gedoen, nadat president Jose Maria Vaz die Chinese afvaardiging ontmoet het.

Mama Samba Embalo het bygevoeg dat Chinese entrepreneurs wat deel is van die missie belowe het om te belê in Guinee-Bissau se landbou, veral in die ryssektor.

Die missie van die Chinese Kamer van Koophandel, onder leiding van me Li Guixiang, bly in Guinee-Bissau tot Donderdag.

Die spanning tussen Guinee-Bissau se president en premier dui op die konflik tussen China en die VSA wat invloed oor politieke besluitnemers probeer uitoefen.

Die president het die naweek die land se premier gewaarsku dat hy sy grondwetlike perke “oorskry” omdat hy strukturele veranderinge aan die parlement beoog, sowel as om kandidate vir die kabinet wil nomineer.

Die president het in ’n verklaring gesê slegs die staatshoof van die land kan besluite oor die struktuur en lede van die kabinet neem. Die premier kan eers daarna die president se voorgestelde name vir ministeriële posisies oorweeg.

Volgens Vaz is dit dus ongrondwetlik vir premier Carlos Correia om ’n lys van potensiële kabinetslede voor te stel en in te dien.

Dié magstryd tussen Vaz en Correia kom nadat laasgenoemde op 17 September as premier ingehuldig is om politieke onrus te besweer. Die land het in 2012 in chaos verval ná ‘n staatsgreep.

Guinee-Bissau is ‘n dwelmnodus met kokaïen van Suid-Amerika wat na Europa gesmokkel word.

Nigeriese weermag ontken nuwe Boko Haram-aanval

Die Nigeriese weermag het ontken dat jihadiste ‘n hernude aanval op ‘n stad in die land geloods het. Hulle sê die ontploffings was weermagoefeninge.

Veelvuldige ontploffings is Sondag aan die buitewyke van Maiduguri gehoor, het plaaslike inwoners gesê.

Dié stad is in die noordooste van Nigerië geleë en word herhaaldelik deur Boko Haram Islamiete aangeval.

Inwoners het gesê harde ontploffings is in die gebiede van Kayamla en Dalori gehoor. Dit volg knap nadat Maiduguri deur insurgente aangeval is en 10 mense se lewe geëis en nóg meer beseer is.

Die konflik het meer as 1260 lewens in Nigerië alleen geëis sedert president Muhammadu Buhari op 29 Mei ingehuldig is, volgens ‘n AFP-telling.

Ten minste 17.000 mense is dood en meer as 2,5 miljoen is dakloos gelaat sedert die Boko Haram-opstand begin het in 2009.

Steenkoolmyners staak

Die getal lede van die NUM wat in die steenkoolbedryf staak, sal na verwagting vandag tot sowat 30 000 styg.

Die staking het gister traag begin omdat die meeste myne op Sondae gesluit is.

Duisende lede van die NUM sal na verwagting in Witbank in Mpumalanga, nou genoem Emalahleni, aan ‘n optog deelneem.

Dit is die tuiste van talle steenkoolmyne in die land.

‘n Woordvoerder van die NUM se Hoëveldstreek in Mpumalanga, Nelson Ratshoshi, sê hulle aanvanklike eis vir die laags-besoldigde werkers was R3000, wat hulle later tot R1000 afgeskaal het.

Die werknemers bied R300 aan.

‘Vavi en Malema wil regering omver werp’

Cosatu se voormalige sekretaris-generaal Zwelinzima Vavi en EFF-leier Julius Malema smee glo planne om die regering omver te werp, het Noordwes-premier Supra Mahumapelo Sondag gesê.

“Hulle is besig om mense rondom hulle saam te trek, hulle wil mense aanhits om uiteindelik die regering omver te werp,” het hy gesê by die bekendstelling van die jaarlikse Rooi Oktober-veldtog van die SA Kommunistiese Party in Lethabong, naby Rustenburg.

Vavi hou homself as ‘n anti-korrupsie-aktivis aan mense voor om sy oortredings as Cosatu se sekretaris-generaal te verbloem.

“Hy is besig om sy spore dood te vee. Hy wil hê mense moet vergeet wat hy gedoen het in ‘n kantoor by Cosatuhuis… ” het Mahumapelo in Setswana gesê. Hy het verwys na ‘n buite-egtelike verhouding wat Vavi met Cosatu-personeellid gehad het.

Vavi en Malema het ‘n anti-korrupsie-opmars na die Uniegebou in Pretoria op 30 September gelei.

Vavi is geskors uit Cosatu in Maart vanjaar omdat hy die vakbondfederasie in oneer gebring het en verdelende aktiwiteite aanmoedig.

Vavi het intussen die jongste bekende persoonlikheid geword wat in hegtenis geneem is vir ‘n spoedoortreding.

Vavi is vasgetrek toe hy teen 207km/h op die R24-hoofweg naby Edenvale in Ekurhuleni, Sondagoggend, gejaag het volgens bronne. Die spoedbeperking op dié besige pad is 120km.

Malema, ‘n voormalige ANC-jeugliga president, is geskors uit die ANC in April 2012 vir die saai van verdeeldheid binne die regerende party.

Hy het sy eie politieke party, die EFF, begin in Julie 2013, waar wit linkses die gewillige houtwerk-genie voorsê.

Vrystaatse renosters deur hommeltuie beskerm

Terwyl plaasmoorde en -aanvalle voortwoed, kan renosters darem voortaan rustig slaap.

Die department van omgewingsake en natuurbewaring in die Vrystaat gaan die stryd teen renosterstropery met meer gevorderde tegnologie aanpak nadat ‘n toenemende getal renosters die afgelope maande aansienlik in die provinsie gestroop is.

Die departement se Coenie Erasmus, wat in beheer is van die Groenskerpioene wat voorvalle van wilddiefstal, insluitend renosterstropery, ondersoek, sê weens ‘n tekort aan mannekrag en duur gevorderde toerusting, is altesaam ses renosters die afgelope maand op private grond en in reservate in die provinsie doodgeskiet.

Hy sê die department gaan voortaan hommeltuie gebruik met ‘n nagsigfunksie om renosterstropery te bekamp. Hy sê natuurbewaarders het nie die vermoë en die nodige toerusting om die stryd teen slinkse tropers te wen nie, terwyl ‘n hommeltuig eerder as die duursame gebruik van helikopters, hul taak kan vergemaklik.

‘n Hommeltuig is stiller en minder sigbaar as ‘n helikopter. Erasmus sê dit beskik oor goeie kameraresolusies wat die patrolering van heinings oor ‘n 5km afstand moontlik maak met minder mannekrag. Die tuig kan ook hoog en laer vlieg en goeie beeldmateriaal verskaf. Dit feit dat dit tot 400m hoog kan vlieg vergemaklik ook die tel van wild.

Die departement se eerste hommeltuig is op die Vereniging vir Staatsamptenare in die Vrystaat aan die department op ‘n oorhandig. Bestuurder van die VSA, Gerhard Koorts, sê geld is op ‘n gholfdag ten bate van die bekamping van renosterstropery gebruik om die hommeltuig aan te koop.

Die vakbond het besluit die skunking te maak omdat dit belangrik is om nie slegs na lede se belange om te sien nie, maar ook ‘n bydrae te maak tot natuurbewaring.

Erasmus sê die hommeltuig sal in die Willem Pretorius-reservaat, waar vier renosters die afgelope maand doodgeskiet is, gebruik word.