Kategorie: Nuus

Meksikaanse oproeriges brand vlae by Trump-saamtrek

Oproeriges het berede polisie met klippe bestook en brande gestig buite ’n saamtrek wat Donald Trump in Albequerque in die Amerikaanse deelstaat Nieu-Mexiko toegespreek het.

Woensdagaand het Meksikane Amerikaanse vlae aan die brand gesteek en hul eie vlae rondgeswaai saam met anti-Trump-betogers buite die lokaal waar Trump gepraat het.

Die oproeriges het met polisielede slaags geraak nadat hulle versperrings omgegooi en bottels en klippe begin gooi het. ‘n Deur van die lokaal waar die saamtrek gehou is, is ook beskadig.

Volgens die polisie is die deur met ‘n windbuks geskiet, wat onwaarskynlik is aangesien dit van veiligheidglas gemaak is.

Die polisie het die geweld probeer onderspeel en niemand is vir openbare geweld in hegtenis geneem nie. Hulle wou nie beweringe dat skote deur betogers afgevuur is, bevestig nie.

Geen berigte van ernstige beserings is glo ontvang nie. CNN het bevestig dat niemand in hegtenis geneem is nie.

Die polisie het vroeëre berigte ontken dat traanrook gebruik is teen die betogers, wat oënskynlik ontevrede is met Trump se uitsprake oor immigrasie.

Trump het Dinsdagaand die Republikeinse Party se voorverkiesing in die deelstaat Washington gemaklik gewen. Die wenner benodig die steun van 1 237 afgevaardigdes.

Volgens CBC is Trump se steun van 1 193 afgevaardigdes, slegs 44 minder as wat nodig is om as dié party se presidentskandidaat vir die verkiesing in November aangewys te word.

Ander bronne meen dat die syfer nog hoër is, te wete 1 229.

Trump het in Washington sowat 76% van die stemme op hom verenig.

Hillary Clinton het die Demokratiese Party se voorverkiesing in ­Washington gewen.

Clinton loop ver voor in haar stryd teen Sanders. Sy het altesaam 2 305 afgevaardigdes se steun en Sanders 1 539.

Sy moet 2 383 afgevaardigdes se steun kry om die Demokratiese Party in die presidentsverkiesing te verteenwoordig.

Taliban kies nuwe leier ná VSA-aanval

Die Taliban in Afganistan het gister sy nuwe leier aangewys nadat die vorige leier, Moellah Akhtar Mansoer, Saterdag in ’n Amerikaanse lugaanval dood is.

Haibatoellah Akhoenzada, wat adjunkleier was, is as die nuwe leier aangewys, het Reuters berig.

Hy is ook die voormalige hoof van die Talibanse regbank. Pres. Barack Obama het Maandag bevestig Mansour is in ’n Amerikaanse lugaanval dood.

Obama het toestemming gegee vir die aanval met onbemande vliegtuie Saterdag in ’n afgeleë gebied van Pakistan, net binne die grens met Afganistan.

Pres. Barack Obama het tydens sy reis na Viëtnam gesê die aanval is geoorloof, maar ontleders sê die stap sal niks doen om die insurgensie te laat ophou nie.

Die Taliban het binne drie dae ‘n nuwe leier aangewys.

Die VSA het klaarblyklik die vir Mansoer in Pakistan om die lewe gebring en nie in Afghanistan waar hulle ontplooi is nie.

Sy besoek aan ­Viëtnam het origens in ’n gees van welwillendheid tussen die twee voormalige vyande verloop.

Dit het aan die lig gekom dat sommige leiers verbied is om ’n ­vergadering by te woon wat Obama met gemeenskapsleiers gehad het.

EgyptAir het glo skerp geswenk sê Griekse lugbeheer

Die hoof van Egipte se forensiese owerheid het ’n gevolgtrekking verwerp dat slegs klein stukkies liggaamsdele ná die EgyptAir-ramp gevind is omdat ’n ontploffing aan boord plaasgevind het.

’n Intensiewe ondersoek is aan die gang waarom die Airbus 320 van EgyptAir Donderdagoggend vroeg met 66 passasiers aan boord in die Middellandse See neergestort het.

Die grootste deel van die wrak, sowel as die vlugopnemers, is nog nie gevind nie.

’n Egiptiese forensiese amptenaar het gesê 23 sakke liggaamsdele is sedert Sondag gevind, het Reuters berig.Die opnemers se batterye hou net 30 dae.

Inligting wat verskaf is deur die lugvaartowerheid in Griekeland, wat die vliegtuig gemonitor het voordat dit Egiptiese lugruim bereik het, verskil van die Egiptiese inligting oor die vliegtuig se laaste oomblikke.

Panos Kammenos, Griekeland se minister van verdediging, het Donderdag gesê die Griekse radarnetwerk het skerp bewegings raakgesien voordat die vliegtuig hoogte verloor en toe verdwyn het.

Ehab Mohieldin Azmi, hoof van Egipte se lugnavigasiediens­, het gesê Egiptiese amptenare het nie opgemerk dat die vliegtuig swenk of hoogte verloor nie.

“Natuurlik het ons meer as een keer probeer om die vliegtuig te roep, maar daar was geen reaksie nie. Ons het vliegtuie in die omgewing gevra om ook te probeer, maar dit was onsuksesvol,” het hy gesê.

Egipte se openbare vervolger het Griekeland gevra om transkripsies van gesprekke tussen die vlieënier en die Griekse lugverkeerbeheer te oorhandig, asook dat amptenare ondervra word of die vlieënier ’n sein gestuur het dat die vliegtuig in die moeilikheid is.

Tot dusver is geen aanduidings van plofstof gevind nie. Hisjam Abdelhamid, hoof van Egipte se forensiese owerheid, het gesê dit is te vroeg om tot enige gevolgtrekking te kom.

Minstens twee ander bronne met regstreekse kennis van die ondersoek het gesê dit is te vroeg om te sê wat die oorsaak van die ongeluk was. Franse ondersoekers het gesê die vliegtuig het ’n reeks waarskuwingseine oor rook aan boord, asook ’n moontlike rekenaarprobleem, gestuur net voordat die vliegtuig van die radarskerms verdwyn het.

Lugvaartkenners het gesê sabotasie of ’n tegniese probleem kan nie uitgeskakel word nie. Ondersoekers maak staat op die wrakstukke, sakke en klere, sowel as chemiese ontledings om die spore van ’n ontploffing te probeer vind.

’n Span wat deur Egipte se burgerlugvaartowerheid saamgestel is, doen die tegniese ondersoek.

Drie amptenare van Frank­ryk se burgerlugvaart-­ondersoekeenheid en ’n kenner van Airbus is ook sedert Vrydag in Kaïro om te help. Egipte het ’n robotduikboot gestuur en Frankryk ’n skip om na die vlugopnemers te soek.

Teen druktyd was daar nog nie sprake dat die opnemers gevind is nie. Hulle lê in ’n gebied waar die see tot 3 000 m diep is.

Familielede van slagoffers gaan tuis in ’n hotel naby die Kaïro-lughawe. Hulle gee nou DNS-monsters om te help om die liggaamsdele te identifiseer.

Amjad Haqi, ’n Irakiër wie se ma, Najla, omgekom het, het ­gesê die families is nie amptelik ingelig dat liggaamsdele gevind is nie.

“Al waaraan hulle kan dink, is om die vlugopnemers en die wrakstukke te kry. Dis hul probleem, nie myne nie.”

NW bring kriminele klag teen munispiale bestuurder

Die Noordwes-wetgewer het, in ‘n ongekende stap, ‘n kriminele klag gelê teen die munisipale bestuurder van die Naledi Munisipaliteit, wat Vryburg insluit.

Die klag, minagting van die wetgewer, spruit uit ‘n voorval vroeër vandeesmaand toe Modisenyane Segapo tydens ‘n sitting van die staande komitee oor openbare rekeninge uitgestap het.

Segapo het voor die komitee verskyn om verslag te doen oor dié munisipaliteit se ouditeur-generaalsverslag vir die 2014/15-boekjaar.

Die voorsitter van die komitee, Mahlakeng Mahlakeng, sê Segapo moes vrae oor sowat R300 miljoen se onregmatige uitgawes beantwoord, maar het uitgestap en geweier om terug te kom.

Selfs nadat die burgemeester gestuur is om hom te gaan haal, het hy verseg om vrae te gaan beantwoord.

Obama wil wapens aan kommunistiese Viëtnam verskaf

Die Amerikaanse president, Barack Obama, het die week die verbod op wapenverkope aan Viëtnam opgehef.

Betrekkinge tussen die voormalige Koue Oorlog-vyande versterk toenemend danksy handelsbande en wedersydse vrees oor Chinese uitbreidings in die Suid-China see.

Die aankondiging is gedoen met die aanvang van Obama se driedaagse besoek aan Viëtnam. Die beëindiging van die dekades-lange embargo sou na verwagting ‘n steen des aanstoots vir Beijing wees.

“Amerika hef ten volle die verbod op die verkoop van militêre toerusting aan Viëtnam op, wat vir byna vyftig jaar in plek was,” het Obama tydens ‘n gesamentlike mediakonferensie met sy Viëtnamese eweknie, pres. Tran Dai Kwang, gesê.

Dit is Obama se eerste besoek aan Vietnam en die derde besoek van ‘n dienende Amerikaanse president sedert die einde van die Viëtnamoorlog in 1975.

Regstreekse Amerikaanse betrokkenheid by die oorlog het in 1973 geëindig.

China was onthuts deur die aankondiging en het in ‘n verklaring gesê die VSA moet nie vure in Asië aansteek nie.

China en Viëtnam se betrekkinge is op ‘n laagtepunt nadat ‘n dispuut uitgereek het tussen die twee oor eilande in die Suid-Chinese See.

China sê die VSA se besorgdheid oor menseregte elders is skynheilig omdat Viëtnam nie daaroor besorg is nie.

Kroonstad se waterkrisis Vrydag bespreek

Die munisipale bestuurder van die Moqhaka-munispaliteit en verskeie rolspelers vergader Vrydag om die waterkrisis in Kroonstad te bespreek.

Die woordvoerder van dié munispaliteit, Khojane Madiba, het aan OFM gesê hulle sal dan kommentaar op die kwessie lewer.

Die Bloemhoekdam, wat water aan Kroonstad verskaf, is nou minder as 1% vol.

Inwoners van die dorp het aan OFM-nuus gesê hulle vrees dat hulle binnekort geen water sal hê nie. Besighede in die dorp word ook geraak deur die krisis.

Gerhard Pretorius, eienaar van Pure Drop Water in Kroonstad, sê intussen dat die water nie noodwendig vuil is nie maar dat die vraag daarna vergroot.

‘n Waterkundige in Kroonstad, Theuns de Bruyn, is van mening dat die droogte en swak bestuur van die munisipaliteit van die hoofredes is vir die huidige waterkrisis.

Vroeër dié maand is berig oor ‘n soortgelyke waterkrisis in Qwaqwa in die Oos-Vrystaat.

Dit is volgens die Bakoena Koninklike Huishouding se woordvoerder, Dan Mbuli.

Mbuli sê omliggende dorpe word die ergste deur die situasie geraak.

Die Bakoena hoofman, Thokoana Mopeli, sal die verspreiding van 300 waterhouers (20 liter elk) onder Qwaqwa gemeenskappe oorsien.

“Sommige gebiede se dorpe het nie water sedert Junie verlede jaar nie. Water word versprei aan hulle deur verskeie organisasies en die munisipaliteit, selfs al is Qwaqwa ‘n opvanggebied vir die Vaalwaterskema.”

Die inwoners van Qwaqwa moet op watertenkwaens wat water vervoer, staatmaak.

Zuma meen sy kanse op sukses teen spioenasiebande is goed

Pres. Jacob Zuma meen sy kanse om met suskses te appelleer teen die hofbeslissing rakende spioenasie bande, is goed.

Sy regsverteenwoordiger Shaun Abrahams het Maandagoggend aangekondig dat die nasionale vervolgingsgesag (NVG) sal appelleer teen die uitspraak.

Luidens die vroeëre hofbeslissing van die hooggeregshof in Pretoria in April, moet Zuma tereg staan op 783 klagte van rampokkery, korrupsie en bedrog. Die proses sal sowat ‘n jaar neem.

Die hof het bevind die besluit om die 783 klagte in 2009 teen Zuma te laat vaar, is “irrasioneel.”

Die klagte teen Zuma hou verband met betalings aan sy voormalige finansiële adviseur, Schabir Shaik wat namens die Franse maatskappy Thint betrokke was by die wapenskandaal, soos deur die grondwetlike hof bevind.

Abrahams sê die hooggeregs­hof se beslissing hou implikasies in vir die skeiding van magte.

“Ek glo hierdie kwessies moet deur ’n appèlhof beoordeel word. Ek het dus besluit om aansoek te doen om verlof tot appèl. Hier is baie kwessies waaroor uitsluitsel verkry moet word.“

Geen plofstof op menslike oorskot van EgyptAir-ramp nie

Egipte het Sondag ’n duikboot gestuur om te help met die soektog na die vlugopnemers van die straler van Egypt­Air wat in die Middellandse See neergestort het. Al 66 mense aan boord het gesterf.

Honderde mense het Sondag in die Koptiese Christelike kerkgebou in Kaïro vergader om vir naasbestaandes onder die slagoffers te bid.

Daar is nog geen aanduiding wat tot die neerstorting van vlug 804 van Parys na Kaïro gelei het nie, ten spyte van spekulasie oor plofstof.

Egipte se pres. Abdel-Fattah el-Sissi sê dit sal tyd neem om vas te stel wat presies aan boord van die Airbus A320 gebeur het.

Menslike oorskot dui daarop dat daarop dat geen plofstof gebruik is nie, het ‘n Egiptiese forensiese beampte en ondersoekbronne gesê.

Egipte se lugvaartnywerheid is onder die interna­sionale vergrootglas sedert 31 Oktober verlede jaar. Toe het ’n Russiese Airbus A321 onderweg van die Rooi See oord Sharm el-Sheikh onderweg na St. Petersburg, in die Sinai-skiereiland neergestort.

Altesame 224 mense het in daardie ongeluk die lewe gelaat.

Dodelike vlaag aanvalle deur ISIS in Sirië

Minstens 101 mense is die week in twee regeringsbastions in Sirië dood in ‘n vlaag aanvalle waarvoor die Islamitiese Staat (ISIS) aanspreeklikheid aanvaar het.

Altesaam 53 mense is dood in die stad, Jableh en ‘n verdere 48 is in Tartus, verder suid dood, het AFP berig.

Volgens ‘n woordvoerder van die organisasie Rami Abdel Rahman, is dit “sonder twyfel die dodelikste aanvalle” op die twee stede sedert die konflik in Sirië in Maart 2011 begin het.

Sewe bomme, waarvan die meeste selfmoordbomaanvalle was, het Jableh en Tartus Maandagoggend byna gelyktydig getref.

Die Siriese staatsmedia het ook oor die aanvalle verslag gedoen en die staatstelevisie het beeldmateriaal van ‘n bushalte in Tartus, vertoon waar een van die aanvalle plaasgevind het.

Die uitgebrande wrakke van minibusse was op die toneel sigbaar, terwyl ander voertuie nog in ligte laaie was.
Ander teikens was nog ‘n bushalte en ‘n regeringshospitaal.

Albei stede is vestings van die bewind van pres. Basjar al-Assad, wie se familie oorspronklik van die Qardaha-nedersetting, net 25 kilometer oos van Jableh afkomstig is.

Die stede was tot nou toe redelik afgesonder van die oorlog wat in Sirië woed en waarin minstens 270 000 mense sedert 2011 omgekom het.

Washington sal voortgaan om ‘n rebellegroep wat na bewering met ‘n bloedbad in Sirië verbind word, te steun.

Die groep is glo “gekeur” deur die Saoedi’s en het ‘n rol in die Siriese politieke proses gespeel, die Department van buitelandse sake se woordvoerder gesê.

Ahrar Al-Sham (Harakat Ahrar ash-Sham al-Islamiyya) is een van die grootste rebellegroepe in Sirië, en behoort aan die Saoedi-gesteunde onderhandelingskomitee.

Dit word beskou as ‘n party tot die Siriese skietstilstand, wat tans onderhandel wprd met Rusland en die VSA.

Taxi-geweld eis motoris se lewe

‘n Motoris is in KwaMahlanga, oos van Pretoria aangerand en aan die brand gesteek ná ‘n skietery tussen hom en taxi-operateurs.

Volgens ooggetuies is die motoris na bewering deur die taxi-operateurs aan die brand gesteek. Die polisie het hom te hulp gesnel en hy is hospitaal toe gehaas.

Taxibestuurders het vroeg vanoggend na sporadiese aanvalle op hulle na die KwaMahlanga Taxivereniging opgeruk.

Verlede week is minstens vier mense in ‘n verbyry-skietery geskiet. Twee vroue is dood nadat hulle deur dwaalkoeëls getref is.

Daar word vermoed dat die geweld spruit uit geskille tussen strydende taxiverenigings.