Kategorie: Nuus

Egipte loods militêre offensief teen ISIS

Die Egiptiese weermag sê hy gaan voort met ‘n militêre offensief in die Sinai Skiereiland teen die Islamitiese Staat.

Die gebied is tussen Israel, die Gaza-strook en die Suez-kanaal geleë.

Hewige gevegte het vandeesweek tussen Egipste en ISIS-militante waarin meer as ‘n honderd mense omgekom het.

Lugaanvalle op stellings van die Islamitiese Staat het tot die vroeë oggendure geduur.

Volgens die Egiptiese leer het sewentien soldate in die gevegte met Islamitiese militantes omgekom maar plaaslike waarnemers meen die dodetal is hoër.

Die Egiptiese weermag sê lugaanvalle teen ISIS het deur die nag voortgeduur. ‘n Woordvoerder sê beheer oor die polisiestasie in Sheikh Zuweid is weer teruggeneem.

ISIS het 15 veiligheidsgebiede aangeval en drie selfmoordbom-aanvalle uitgevoer.

Twee polisiebeamptes is vroeër in Koeweit in hegtenis geneem na verlede Vrydag se bomaanval op ‘n moskee waarin 27 mense dood en meer as 200 beseer is.

Die Islamitiese Staat-groep het aanspreeklikheid vir die aanval aanvaar. Die inhegtenisnemings is deel van ‘n poging om toe te slaan op militante in die land.

Die land se veiligheidsmagte het ook ammunisie, kaarte en wapens gevind by die huis van ‘n student en nog ‘n man wat ook in hegtenis geneem is.

Minstens 90 mense word reeds in verband met die aanval aangehou.

Groot polisieteenwoordigheid weens oproer oor Mamelodi-busdiens

Daar is ‘n groot polisieteenwoordigheid by die busdepot in Mamelodi in Pretoria na oproeriges ‘n nuwe busdiens onder klippe gesteek en bestorm het.

Minibus taxi-bestuurders is ontstoke oor die bekendstelling van die Autopax-busdiens in die gebied.

Drie busse is beskadig, het Gauteng se departement van vervoer se woordvoerder Octavia Mamabolo aan News24 gesê.

Taxi-operateurs, wat gekant is teen die nuwe busdiens, het busse verhoed om die busdepot met passasiers te verlaat.

Hulle het ook die depot binnestorm en busse se sleutels gegryp.

Taxi-eienaars is ontevrede omdat die roetes aan Autopax toegeken is en nie aan hulle nie.

Volgens taxi-operateurs het ‘n vergadering met die Tshwane Metro Woensdag, geen oplossing opgelewer nie.

Autopax het die roetes oorgeneem van Putco wat dit nie meer as lonend beskou nie.

Dit is nog onduidelik hoeveel pendelaars geraak word.
 
Mamabolo het gesê ‘n vergadering gehou sal word om 09:00 met die betrokke partye, insluitende die SA Nasionale Taxiraad.

Winkelgroep verbreek bande met Trump

Die winkelgroep, Macy’s het alle bande met Donald Trump verbreek, nadat hy uitgevaar het politieke korrektheid en onwettige immigrante wat dwelms, misdaad en verkragting na die VSA bring.

Trump se uitlatings word as ‘n klein bonus vir die Demokrate beskou wat meeding met die Republikeine om Latino-stemme te trek.

Ten spyte van die opskudding, het Trump se gewildheid in twee sleutelkieserstate, Iowa en New Hampshire, die hoogte ingeskiet.

Macy’s is die tweede maatskappy wat afstand doen van die televisiepersoonlikheid ná sy neerhalende opmerkings oor Meksikane.

Die winkel sal Trump se mansklerereeks uitfasseer, wat hemde, dasse, mansjetknope en pakke insluit.

Die reeks word al sedert 2004 by Macy’s verkoop, maar hulle sê hulle kan nie diskriminasie in enige vorm aanvaar nie.

Linden, Jhb: Nog ‘n verkragting deur swart SA polisieman

‘n Swart offisier van die Lindense polisiestasie in Johannesburg word daarvan beskuldig dat hy ‘n vrou in aanhouding verkrag het. Sersant Derick Phanyana word tans aangehou, terwyl sy borgaansoek in die Randburgse Landdroshof tot 7 Julie 2015 uitgestel is.

Die Onafhanklike Polisie-ondersoekdirektoraat het bevestig dat hulle ‘n saak van verkragting teen die 45-jarige polisieman ondersoek.

“Daar word beweer dat die 25-jarige vrou Saterdag vir bedrog in hegtenis geneem is. Rondom 2 voormiddag op 28 Junie 2015, het ‘n polisiebeampte na haar sel gegaan en haar verkrag. Die volgende oggend het die slagoffer daarin geslaag om aan een van die polisiebeamptes oor te dra dat sy verkrag is en sy is na die kliniek geneem vir medikasie en om ‘n saak van verkragting te open,” sê Grace Langa, die woordvoerder vir OPOD.

Intussen is ‘n ander swart polisieman van die Vosloorus-polisiestasie tot 33 jaar gevangenisstraf gevonnis vir verkragting, roof met verswarende omstandighede en ontvoering.

Die Palm Ridge-landdroshof het dié vonnis aan konstabel Lungile Majola opgelê.

“Daar word beweer dat ‘n 18-jarige meisie met haar kêrel op straat geloop het toe ‘n rooi VW Polo met twee insittendes stilgehou het. Hulle het ‘n vuurwapen op die slagoffers gerig.

Die kêrel het met die verdagtes baklei maar hulle het die oorhand gekry. Hulle het die vroulike voetganger in die motor gedwing en na ‘n veld gery waar sy verkrag is,” sê Langa.

Volgens Langa het dit tydens die ondersoek geblyk dat een van die oortreders konstabel Majola was.

 

Man van Noordwes weer voor oor kinderporno

‘n Noordwes man sal vandag weer in die Lichtenburg Landdroshof verskyn op aanklagte van die besit van kinderpornografie.

Bert Viljoen is een van ses mans wat in Augustus 2013 in vier provinsies in hegtenis geneem is. Dit nadat polisie ‘n wenk van Interpol ontvang het.

Die ander verdagtes, waaronder twee onderwysers en ‘n afgetrede skoolhoof, is in Lichtenburg, Potchefstroom, Bloemfontein, Witrivier, Douglasdale en Florida in hegtenis geneem.

OFM-nuus verneem dat Viljoen moontlik ’n pleitooreenkoms sal aangaan en vandag gevonnis sal word.

Gregory Robinson van Potchefstroom is verlede jaar in die die dorp se streekhof ‘n opgeskorte vonnis opgelê.

Sy vonnis van vier-jaar tronkstraf is vir vyf jaar opgeskort op die bepaling dat hy nie ‘n soortgelyke oortreding pleeg nie.

Markte min gepla oor Griekse skuldsirkus

Internasionale markte het opwaarts beweeg en die euro het nie verder verswak nie omdat beleggers glo dat Griekeland steeds ’n manier sal kry om deel van die eurosone te bly.

Die regering het ‘n referendum vir Sondag 5 Julie uitgeroep en kapitaalbeheermaatreëls ingestel nadat dit duidelik geraak het dat die land se premier nie genoeg steun het van kiesers om die eurosone te verlaat nie.

Die kommunistiese Griekse premier, Alexis Tsipras, het in ‘n brief aan die land se krediteure, verklaar dat hy die voorstelle van die Internasionale Monetêre Fonds (IMF), die Europese Sentrale Bank en die Europese Kommissie aanvaar.

Griekeland en sy krediteure moet ‘n ooreenkoms bereik oor die land se skuld nadat inwoners oorweldigend aangedui het in meningspeilings dat hulle nie die euro as geldeenheid wil laat vaar nie.

Die referendum van Sondag kan die einde van die Kommuniste se leë beloftes oor staatsuitkerings wees en anti-Europese retoriek. Tsipras het vroeër ‘n beroep gedoen vir ‘n “nee-stem”.

Die Europese Sentrale Bank het Woensdag besluit om Griekeland nie meer met noodlenings by te staan nie, en in te stem tot ‘n finansiële reddingsplan óf die gevaar te loop dat sy bankstelsel ineenstort.

Griekeland het intussen die eerste ontwikkelde land geword wat hom aan wanbetaling skuldig maak tov ‘n IMF-lening.

Dinsdag was die spertyd vir ’n betaling van sowat 1,6 miljard euro aan die IMF deur die Grieke wat hulle verontagsaam het.

Dié nuwe stel voorvereistes moet deur die Grieke aanvaar word alvorens die instellings weer ’n reddingspakket aan die wanbetalende Griekse regering sal goedkeur.

Die voorvereistes behels onder meer dat die ekonomie drasties herstruktureer word deur staatsuitgawes te beperk en sekere belastings te verhoog.

Die brief is die eerste keer dat die Griekse regering die voorstelle aanvaar, nadat hulle al vir maande lank die ergste probeer ignoreer.

Die Griekse regering het egter gevra dat die nuwe stel vereistes aangepas word.

Ontleders waarsku dat die Suid-Afrikaanse geldeenheid wisselvallig kan bly totdat die Griekse skuldkrisis opgelos is.

Die hoof van die Internasionale Monetêre Fonds, Christine Lagarde sê sy hoop dat die uitslag van Sondag se referendum in Griekeland, meer duidelikheid en sekerheid sal bring oor die land se ekonomiese situasie.

Tsipras het in ‘n uitdagende houding Griekse burgers gevra om die voorstelle deur die land se krediteure te verwerp, maar heftig ontken dat dit Griekeland kan dwing om die Eurosone te verlaat.

Derde konstruksie-ongeluk op Sandton-perseel

Twee konstruksiewerkers is by die Nelson Mandela-plein in Sandton beseer nadat ‘n plafon op hulle geval het.

Dit is die derde soortgelyke ongeluk die afgelope maand op persele wat deur JHI Properties bestuur word.

Die uitvoerende bestuurder van JHI Properties, Nomzamo Radebe, sê die werkers is beseer toe die plafon van `n winkel op hulle geval het.

Volgens Radebe is voorsorgmaatreëls getref om die veiligheid van kliënte in die winkelsentrum te beskerm.

Op 10 Junie het `n vrou haar heup beseer toe sy op tydelike matte geval het.

In `n ander voorval in Junie is die 25-jarige vrou ernstig beseer toe deel van `n plafon op haar geval het.

Nuwe toltariewe tree in werking

Die nuwe toltariewe en maandelikse perk vir geregistreerde gebruikers in Gauteng tree more in werking, het RSG berig.

Dit is die eerste stap van die hersiene e-tol-bedeling wat op 20 Mei deur adjunk-president Cyril Ramaphosa bekendgemaak is.

Die Suid-Afrikaanse nasionale padagentskap, SANRAL sê gebruikers wat vir e-tol geregistreer is, sal van more af R225 per maand betaal teenoor R450 in die verlede.

‘n Woordvoerder sê die vergunning om 30 keer gratis deur die tolhekke te ry per jaar, sal aangekondig word wanneer die stelsel en administratiewe prosesse gereed is.

TLU: Eskom se dreigemente onaanvaarbaar

TLU SA sê hy is verheug oor die feit dat NERSA voorlopig geen verdere tariefverhogings aan Eskom toegestaan het nie, maar dit is onaanvaarbaar dat Eskom nou met meer beurtkrag dreig.

NERSA het besluit om nie Eskom se aansoek vir ‘n tariefverhoging van 9,58% toe te staan nie.

Die president van die unie, Louis Meintjes, sê die landbou, land en ekonomie kan nie ‘n verdere elektrisiteitstariefverhoging bekostig nie.

Meintjies sê die land kan ook nie langer onbekwame bestuurspraktyke by die energieverskaffer — wat oor ‘n monopolie beskik — bekostig nie.

Die Vryemark Stigting het intussen gesê swak beleid by Eskom het die situasie geskep waarin die kragverskaffer die land gedompel het.

‘n Direkteur by die Vryemark Stigting, Eustace Davie, sê baie van Eskom se probleme is vanweë hul weiering lank reeds om onafhanklike kragprodusente nie toestemming te gee om krag aan die netwerk te lewer nie.

Davie sê van die belangrikste besluite by Eskom is deur die regering geneem.

NERSA het gesê verskillende wyses wat Eskom sal aanmoedig om sy verouderende kragaanlegte te onderhou, ondersoek sal word.

Die hoof van elektrisiteit by NERSA, Thembani Bukula sê goeie onderhoud moet beloon word, terwyl swak prestasie gestraf moet word.

‘n Senior bestuurslid van Eskom, Thava Govender sê die kragverskaffer sal eers met die regering beraadslaag voordat hy verder kommentaar lewer.

Eskom sê NERSA se besluit om nie ‘n tweede verhoging toe te staan nie, sal ondersoek word.

Die regering het sy 13,91% belang in Vodacom aan die Openbare Beleggingskorporasie verkoop te help om die R23 miljard toekenning aan Eskom te finansier, het die Nasionale Tesourie in ‘n verklaring gesê.

Die Nasionale Tesourie en die Departement van Telekommunikasie het saamgewerk in die uitvoering van die transaksie.

Hulporganisasies pleit dat Jemen-burgerlikes ly

Volgens Dokters Sonder Grense (MSF) is die meeste van die infrastruktuur in Jemen so beskadig na herhaaldelike lugaanvalle, dat dit tot ‘n volskaalse humanitêre krisis gelei het.

Druk is besig om toe te neem teen die Saoedi-koalisie, met menseregte-organisasies wat beweer dat die aanvalle internasionale reg oorskry.

Human Rights Watch het die Verenigde State beskuldig van medepligtigheid in Saoedi-Arabië se oorlog van aggressie teen Jemen.

HRW het Dinsdag aangekondig dat Washington aanspreeklik is vir die onwettige aanvalle omdat die Amerikaners brandstof verskaf aan Saoedi-vegvliegtuie wat die aanvalle uitvoer asook intelligensie aan die koalisie verskaf.

MSF het intussen ‘n pleidooi aan vegtende partye in die oorloggeteisterde Jemen gelewer om op te hou om burgerlikes te teiken.

Voortslepende lugaanvalle en gevegte het nou so erg geword dat die land in ‘n humanitêre krisis gedompel is.

Volgens MSF se Jens Pedersen, is hulle nie net bekommerd oor hul personeel se veiligheid nie, maar die nood vir mediese voorraad het nou ‘n krisis bereik.

Hy sê kos kom nie by burgerlikes uit nie en noodsaaklike infrastruktuur is onherstelbaar vernietig.

Volgens Pedersen benodig sowat 80% van die Jemenie-bevolking humanitêre hulp, terwyl nagenoeg ‘n miljoen mense sonder heenkome sit.

Saoedi-Arabië teiken Jemen al sedert Maart sonder enige toestemming van die VN of die internasionale gemeenskap.