Kategorie: Nuus

Weerdiens waarsku dat klimaatsverandering kom

Die Suid-Afrikaanse Weerdiens het bekend gemaak dat meer negatiewe uitwerkings van klimaatsverandering in die land gaan voorkom, veral in Mpumalanga en Limpopo.

Dit het aan die lig gekom by ‘n klimaatsverandering-konferensie in Mbombela. Die konferensie is georganiseer deur die Departement van Omgewingsake, die provinsiale departement van Landbou, Landelike Ontwikkeling en Grondadministrasie.

Dit is deel van die komende Verenigde Nasies Klimaatsverandering-konferensie in Parys, Frankryk, later vanjaar, het RSG berig.

‘n Weervoorspeller, Rudzani Malala sê uiterste weerstoestande word voorspel in die oostelike dele van die land.

Dit sluit in onder meer hittegolwe en die groter intensiteit van tropiese siklone. Malala sê die situasie gaan nie verbeter, indien die kwessie nie dringend aandag kry nie.

Dele van Vrystaat sonder water oor wanbetaling

Virginia, Welkom, Hennenman, Ventersdorp en Alanridge moet Maandagoggend sonder water klaarkom nadat Sedibeng-water die watertoevoer na die Matjhabeng-munisipaliteit opgeskort het.

Sedibeng tot dié stap oorgegaan weens wanbetaling. Die munisipaliteit skuld glo sowat R945 miljoen.

Betalende inwoners is ontstoke en sê dis onaanvaarbaar dat verbruikers wat getrou hul munisipale rekeninge betaal, nou op dié manier behandel word.

Die munisipaliteit het glo nie by ‘n afbetalingsooreenkoms gehou nie.

Sedibeng-water se hoof, Tredwin Takalani, sê by monde van sy woordvoerder, dat hy nie kan kommentaar lewer nie, aangesien hy die hele dag in ‘n vergadering is.

Twee renosters in Vrystaat geskiet

‘n Renostereienaar en talle helpers is warm op die spoor van drie stropers wat gisteraand twee renosters op die plaas Brakfontein tussen Wesselsbron en Bultfontein geskiet het.

Japie Pienaar sê die bul en koei is nie onthoring nie, maar wel ernstig gewond.

Hy sê hy hoop dat sy koei gered kan word, veral omdat sy ‘n een-maand-oue kalf het. Hy sê die bul se prognose is glad nie goed nie – een van sy bene is deur ‘n swaarkaliber-koeël versplinter.

Pienaar sê hy en sy vrou was besig om op die plaas te kamp toe hulle skote hoor. Hulle het dadelik met hul bakkie in die rigting van die skote gejaag en op die gewonde diere afgekom.

Spoorsnyers volg die stropers van die Vetrivier in die rigting van Bultfontein. ‘n Soekgeselskap, insluitend ‘n helikopter, is ingespan.

Pienaar sê hulle is hoopvol dat die booswigte vasgetrek sal word.

Rand se vooruitsigte bedroewend

Negatiewe sentiment teenoor ontluikende markte en ‘n verlangsaming in Chinese groei, het die Rand ‘n knou toegedien.

Globale beleggers het hul risiko probeer beperk deur geldeenhede en aandele in ontluikende markte te verkoop met vernietigende gevolge vir die Johannesburgse aandelebeurs asook die Suid-Afrikaanse geldeenheid.

Goud het gestyg sowel as harde geldeenhede soos die Amerikaanse dollar en Britse pond wat beleggers as minder riskante bates beskou.

China as die wêreld se grootste verbruiker van grondstowwe en kommoditeite in hul strewe om hul ekonomie te laat groei, is egter besig om stoom te verloor.

Hulle het daarin geslaag om hul ekonomie met meer as 7% van die afgelope paar jaar te laat groei, maar die verlangsaming in die Chinese ekonomie het China genoop om hul geldeenheid te devalueer in ‘n poging om hul uitvoersektor te stimuleer.

Suid-Afrikaanse blootstelling aan kommoditeite het ook die Rand negatief geraak. Alhoewel die finansiële sektor die grootste bydraer tot die Suid-Afrikaanse ekonomie is, steun die land steeds op grondstowwe.

Elektrisiteitstekorte, ‘n sukkelende vervaardigingsektor, en ‘n oorbemande staatsdiens waar korrupsie gedy, sal die Rand op die langtermyn verder benadeel, meen ontleders.

NWU pak sonkrag-uitdaging

Ingenieurstudente aan die Noordwes-Universiteit pak vanjaar ‘n groot bul by die horings wanneer hulle in Oktober skouers skuur met die groot name in sonenergie.

Die studente sal dan in die Bridgestone Wêreld Solar uitdaging in Australië meeding, het OFM berig.

Hulle spring weg in Darwin in die noorde van Australië – 45 voertuie van 25 lande sal oor 3 000 km tot in Adelaide resies jaag.

Volgens spanleier Albert Helberg het hulle nou nuwe tegnologie ingespan om die nuwe voertuig vinniger, ligter, meer doeltreffend en sterker te maak. Dié voertuig word deur die hoeveelheid energie aangedryf wat gelykstaande is aan dié van ‘n haardroër.

Volgens Helberg behoort die span die afstand in sewe dae kaf te draf, maar hul doelwit is om dit in vyf dae te vermag.

Twee polisiebeamptes voor vir motorkaping

Twee Bloemfonteinse polisiebeamptes wat glo ‘n taxi gekaap het, sal Dinsdag na verwagting weer in die plaaslike landdroshof verskyn.

Mojalelfa Bonties van die Parkweg-polisiekantoor en Delikile Nomandla van die Bloemspruit-polisiekantoor, is vroeër op borgtog van R800 elk vrygelaat.

Polisiewoordvoerder, Chaka Marope, sê hulle het glo ‘n taxi gehuur en toe in ‘n woordewisselling met die taxibestuurder betrokke geraak.

Een van die beamptes het glo in die stryery ‘n vuurwapen op die bestuurder gerig, waarna hy die voertuig gestop en uitgespring het om hulp te kry. Die twee beamptes het glo toe probeer om met die taxi weg te ry.

Bonties en Nomandla staan tereg op ‘n aanklag van die rig van ‘n vuurwapen en diefstal.

Twee vroue voltooi Amerikaanse spesmagkursus

Twee vroue het “militêre geskiedenis” gemaak toe hulle die eerste vroulike soldate geword het wat die Amerikaanse weermag se moordende Ranger-kursus voltooi het, het die weermag gesê.

Ongeveer 12 persent van die Amerikaanse mag wat in Irak en Afganistan ontplooi is, was vroue, en hulle verteenwoordig tans sowat twee persent van die Amerikaanse weermag se sterfgevalle in dié oorloë.

Luidens ’n verklaring het dié twee saam met 94 mans dié 62 dae lange leierskapskursus geslaag wat studente leer “hoe om uitputting, honger en spanning te oorkom en om soldate in klein eenhede gedurende gevegsoperasies te lei”, het Reuters berig.

Die eerste Ranger-skool wat vroue ook insluit, het in April met 19 vroulike en 381 manlike studente begin. Die kursus wat by Fort Benning, Georgia, aangebied word, sluit opleiding in woude, bergagtige terrein en Florida se vleilande in.

Die Rangers is vinnig ontplooi­bare troepe wat opgelei is vir berg-, woestyn- en vleiterreine en hulle word dikwels in spesiale operasies gebruik.

“Hoogtepunte van die kursus sluit in ’n fiksheidstoets, ’n swemtoets, ’n omgewingnavigasietoets; ’n 20 km-staptog in drie uur, verskeie hindernisbane, vier dae van militêre bergklim, drie valskermspronge, vier lugaanvalle op helikopters, verskeie rubberboot-operasies en 27 dae van skyngeveg-patrollies,” lui ’n verklaring.

’n Uitpasseringsplegtigheid sal môre by Fort Benning gehou word.

Die Amerikaanse weermag het twee jaar gelede met ’n proses begin om ’n duisend leiersposte in gevegseenhede vir vroue beskikbaar te stel. Die dienstakke ontwikkel ook geslagsneutrale vereistes vir weermagposte.

Die weermag het baie teenkanting ervaar nadat vroue toegelaat is om in gevegseenhede te dien. Omdat ondervinding belangrik is vir bevordering, was dit tot dusver vir vroue moeiliker om vooruitgang te maak en topposte te kry in vergelyking met mans, het beamptes gesê.

Noord- en Suid-Korea grom weer vir mekaar

Suid-Korea het dié naweek dosyne mortiere op Noord-Korea afgevuur nadat Noord-Korea ’n enkele vuurpyl op ’n Suid-Koreaanse dorp naby die wêreld se swaarste bewapende grens afgevuur het, het AP berig.

Die Suid-Koreaanse ministerie van verdediging sê die mortiere het naby die plek geland van waar die Noord-Koreane hul vuurpyl afgevuur het. Dit wil voorkom asof Noord-Korea nie gereageer het op Suid-Korea se reaksie nie.

Noord-Korea het in die verlede gedreig om Suid-Koreaanse luidsprekers aan te val, wat vir die eerste keer in elf jaar begin het om anti-Pjongjang propaganda-boodskappe oor die gedeelde grens uit te saai.

Nagenoeg 80 inwoners van die Suid-Koreaanse dorp waar die vuurpyl geval het, is vir veiligheid na ondergrondse bunkers geneem.

Die oorgrens propaganda-oorlog volg nadat Seoel Pjongjang daarvan beskuldig het dat dit landmyne aan die Suid-Koreaanse kant van die gedemilitariseerde sone geplant het wat vroeër die maand twee Suid-Koreaanse soldate vermink het.

Die outoritêre Noord-Korea is uiters sensitief vir enige kritiek teen die regering van Kim Jong Un, wie se familie aan bewind is sedert die land in 1948 tot stand gekom het.

Polisievoertuig aan die brand gesteek by Hartebeespoortdam

‘n Polisievoertuig is aan die brand gesteek en ‘n ander onder klippe gesteek by die Ten Rooms-lokasie naby Hartbeespoortdam, het Noordwes se polisie Sondag gesê.

Kolonel Sabata Mokgwabone het gesê die polisievoertuig is Saterdag aan die brand gesteek.

Daar word beweer dat die polisie wou keer dat die gemeenskap ‘n man aanrand.

Die polisie het na bewering probeer om in te gryp om die man van die tierende skare te red.

Die skare het daarna glo die polisievoertuig aan die brand gesteek, maar die amptenare het daarin geslaag om die erg beseerde man, wat daarvan beskuldig word dat hy verantwoordelik is vir misdaad in die gebied, te red.

Mokgwabone het gesê ‘n ander voertuig is deur die skare onder klippe gesteek.

“Daar word beweer dat die gemeenskap probeer het om die motor te brand deur ‘n brandende buiteband op dit te gooi. Tog het die motor nie gebrand nie, hoewel die band skade veroorsaak het. ”

Paramedici het ​​die beseerde bygestaan en hy is in die hospitaal opgeneem. Die polisiebeamptes is nie in die voorval beseer nie.

Duisende asielsoekers oorweldig EU-grenspos

Duisende migrante uit Afrika en die Midde-Ooste het oor die Masedoniese grens gestorm en veiligheidsmagte oorweldig.

Die land het Donderdag ‘n noodtoestand afgekondig en sy grense vir vlugtelinge gesluit.

Veiligheidsmagte het skokgrenate en knuppels ingespan om onwettige immigrante in bedwang te probeer bring, maar Masedonië het tevergeefs probeer om die jongste mensegety te keer.

Duisende stroom uit die Balkan na Wes-Europa – waar grensbeheer tussen Schengenlande afgeskaf is – om van staatstoelae te kan leef.

Ten minste 5000 migrante het aangekom in Serwië Sondag op ‘n reis verder wes, nadat die naburige Masedonië se pogings om hulle te verhoed, misluk het.

Betrokke Europese leiers het oproepe gedoen vir ‘n “radikale aanpassing” in die EU se migrasiebeleid, voordat die EU “sy siel verloor”.

Duisende vlugtelinge – hoofsaaklik uit die oorloggeteisterde Sirië, sowel as uit Afrika en Asië – het Serwië hierdie naweek bereik, nadat hulle met geweld deur die Griekse-Masedoniese grens gebreek in ‘n poging om verder in die EU te reis na meer vrygewige lande.

Alhoewel die Masedoniese polisie aanvanklik ​​die mensevloei met skokgranate en traangas kon terughou, het die land intussen besluit om migrante na Serwië te laat deurreis.

Die Serwiese minister van verdediging Bratislav Gasic sê hulle verwag dat “die mensegolf in die volgende dag of twee van ‘n soortgelyke intensiteit sal wees” het Reuters berig.

Nog ‘n Serwiese regeringsamptenaar wat anoniem wou bly het gesê dit is “die grootste getal in een dag so ver”.

Die “vlugtelingkrisis” is die “grootste uitdaging sedert hereniging” van Duitsland het die Duitse Visekanselier Sigmar Gabriel Sondag gesê.

Europa sal hul beleid “radikaal moet verander” het Gabriel gesê in ‘n onderhoud met Duitsland se ARD openbare uitsaaier.

Die Italiaanse minister van buitelandse sake het Sondag gesê, die “siel” van die EU sal met die vrye beweging van mense bedreig word nalv die situasie by die Griekeland-Masedonië grens.